HEBREOS 13:1 - Chatino Tataltepec

¹ Ña'a̱ ti tyu'u tso'o tyiquee ma̱ ña'a̱ ma̱ ji'i̱ ngu' tya'a ngusñi ma̱ cha' ji'i̱ Cristo, cua'ni ma̱ cha' tso'o lo'o ngu' bi'.

HEBREOS 13:1 Referans Kwoze

1 JUAN 4:20

Ngu' nu ñacui̱ ndi'ya̱: “Ntsu'u tsa tyiquee na' ña'a̱ na' ji'i̱ ycui' Ndyosi”, lo'o li' ña'a̱ ti tya liye' ti' ngu' bi' ña'a̱ ngu' ji'i̱ tya'a ngu', cha' cuiñi ti laca nu nchcui' ngu' bi'. Ndi'ya̱ ndyu'u cha' bi': taca ña'a̱ na ji'i̱ tya'a ñati̱ na, pana ycui' Ndyosi ni, bilya ña'a̱ na ji'i̱ Ni tsiya' ti; bi' cha' lacua, si ná ntsu'u tyiquee na ña'a̱ na ji'i̱ tya'a ngusñi na cha' ji'i̱ Jesucristo, li' ná taca ñacui̱ na cha' ntsu'u tyiquee na ña'a̱ na ji'i̱ ycui' Ndyosi Sti na.

1 PEDRO 3:8

Lcaa cu'ma̱ ni, nga'a̱ cha' caca stu'ba tyiquee ma̱ lo'o tya'a ma̱, cha' tya'a ngusñi ma̱ cha' ji'i̱ Cristo laca ma̱; nga'a̱ cha' cube ti' ma̱ ji'i̱ tya'a ma̱, nga'a̱ cha' cua'ni tyaca'a ma̱ ji'i̱ lcaa tya'a ma̱. Lo'o jua'a̱ cua'ni tya'na ti' ma̱ ji'i̱ tya'a ma̱, ná cua'ni liye' ti' ma̱ ña'a̱ ma̱ ji'i̱ ngu' bi'.

1 PEDRO 1:22

Xqui'ya cha' nxtyucua Xtyi'i ycui' Ndyosi ji'i̱ ma̱, na cua ndaquiya' ma̱ ji'i̱ cha' liñi nu nda ycui' Ndyosi lo'o na, bi' cha' ngua lubii cresiya ji'i̱ ma̱; juani taca caca tso'o tyiquee ma̱ ña'a̱ ma̱ ji'i̱ tya'a ñati̱ ma̱. Pana tyucui tyiquee ma̱ ntsu'u cha' caca tso'o tyiquee ma̱ ña'a̱ ma̱ ji'i̱ tya'a ñati̱ ma̱, si'i ñi'ya̱ ndu'ni ngu' nu ntsu'u tucua cha' tyiquee ngu' cua'ni cu'ma̱.

2 PEDRO 1:7

Si jua'a̱ nti' ma̱ cha' tyi'i̱ ma̱ chalyuu, li' nga'a̱ cha' cua'ni tyaca'a ma̱ ji'i̱ tya'a ñati̱ ma̱; ntsu'u cha' tso'o ti caca tyiquee ma̱ ña'a̱ ma̱ ji'i̱ lcaa ñati̱.

1 PEDRO 2:17

Tso'o si tucuá ma̱ cha' nu nchcui' lcaa ñati̱. Lo'o jua'a̱ cua'ni ma̱ cha' tso'o ti caca tyiquee ma̱ ña'a̱ ma̱ ji'i̱ lcaa ñati̱ ji'i̱ Cristo, cha' tya'a ma̱ laca ngu' bi'. Ndu'ni cha' cutsi̱i̱ ma̱ xi ji'i̱ ycui' Ndyosi, lo'o jua'a̱ ndu'ni cha' cua'ni chi̱ ma̱ loo rey nu laca loo tsiya' ti chalyuu.

HEBREOS 10:24

Culacua tso'o ti' na, cha' caja ñi'ya̱ xtyucua na ji'i̱ xa' la ngu' tya'a ngusñi na cha' ji'i̱ Jesús; xtyucua na ji'i̱ ngu' bi', cha' xcui' cha' tso'o ti cua'ni ngu' lo'o tya'a ngu', cha' jua'a̱ caca tso'o tyiquee ngu' ña'a̱ ngu' ji'i̱ tya'a ngu'.

2 TESALONICENSES 1:3

Cu'ma̱ tya'a ngusñi na cha' ji'i̱ Jesús, ntsu'u cha' tya ya xlya'be ji'i̱ ycui' Ndyosi lcaa quiya' lo'o chcui' ya lo'o Ni cuentya ji'i̱ cu'ma̱; ndu'ni tsa cha' cua'ni ya jua'a̱, xqui'ya cha' lcaa tsa̱ tachaa la ndyanu cha' ji'i̱ Jesús ne' cresiya ji'i̱ ma̱, lcaa tsa̱ ntsu'u la tyiquee ma̱ ña'a̱ ma̱ ji'i̱ tya'a ñati̱ ma̱.

1 PEDRO 4:8

Nu cha' nu ndulo tsa cha' cua'ni ma̱ ni, bi' laca cha' xcui' tso'o caca tyiquee ma̱ ña'a̱ ma̱ ji'i̱ tya'a ñati̱ ma̱. Lo'o si jua'a̱ nti' na ña'a̱ na ji'i̱ tya'a na, ndyu'ni clyu ti' na ji'i̱ qui'ya nu ntsu'u ji'i̱ tya'a na li'.

GÁLATAS 5:22

Xa' ña'a̱ cña ndu'ni Xtyi'i ycui' Ndyosi ne' cresiya ji'na: ndu'ni Ni cha' tyu'u tyiquee na ña'a̱ na ji'i̱ tya'a ñati̱ na; jua'a̱ ndu'ni Ni cha' chaa ti' na cuentya ji'i̱ Ni, cha' ti̱ ti tyi'i̱ tyiquee na, cha' talo tyiquee na ji'i̱ tya'a ñati̱ na; jua'a̱ ndu'ni Ni cha' ca tya'na ti' na ña'a̱ na ji'i̱ ñati̱, cha' xcui' tso'o ti cua'ni na lo'o ñati̱, cha' liñi ti cua'ni na lo'o ñati̱;

GÁLATAS 5:13

Cua ngusubi ycui' Ndyosi ji'i̱ ma̱ cha' caca tyi'i̱ tso'o ti ma̱ chalyuu. Tsa bi' ti cha', tii ti ti' ma̱ tyi'i̱ ma̱ chalyuu; ná clyana ma̱ cha' cuxi nu cua'ni ma̱ laja lo'o ndi'i̱ tso'o ti ma̱, cha' si'i na ndi'i̱ tso'o ti na cha' culiji na na nu ntsu'u ji'na jua'a̱ ti. Ntsu'u cha' xtyucua na ji'i̱ tya'a ñati̱ na xqui'ya cha' ntsu'u tsa tyiquee na ña'a̱ na ji'i̱ ngu', bi' cha' ndi'i̱ tso'o ti na.

APOCALIPSIS 2:4

Pana nde qui'ya ntsu'u cha' sta na' hichu̱' ma̱, cha' ná ntsu'u tyiquee ma̱ ña'a̱ ma̱ 'na ñi'ya̱ nu ngua'ni ma̱ tya clyo la, nacui̱ Jesús.

1 JUAN 3:23

Nde laca cña nu cua nda ycui' Ndyosi cha' cua'ni sa scaa na: nga'a̱ cha' xñi tso'o na cha' ji'i̱ Jesucristo Sñi' ycui' Ni; la cui' jua'a̱ tso'o ti tyu'u tyiquee na ña'a̱ na ji'i̱ tya'a ñati̱ na, ñi'ya̱ nu cua nacui̱ ycui' Ni ji'na.

GÁLATAS 5:6

Lo'o jua'a̱ si chañi cha' stu'ba ntsu'u cha' ji'na lo'o Jesucristo, li' ná ndu'ni cha' masi ngulacua̱ na, masi ná ngulacua̱ na. Sca ti cha' ndulo tsa ji'na cha' cua'ni na, cha' xñi tso'o la na cha' ji'i̱ ycui' Ni; lo'o li' caca cua'ni na cha' tso'o ti tyu'u tyiquee na ña'a̱ na ji'i̱ tya'a ñati̱ na.

SAN JUAN 15:17

Bi' cha' juani ndulo tsa cña re ji'i̱ ma̱ cha' cua'ni ma̱: cha' tso'o tsa caca tyiquee ma̱ ña'a̱ ma̱ ji'i̱ tya'a ñati̱ ma̱.

EFESIOS 5:2

Tso'o ti tyu'u tyiquee ma̱ ña'a̱ ma̱ ji'i̱ ñati̱, cha' la cui' jua'a̱ ntsu'u tsa tyiquee Cristo ña'a̱ Ni ji'na. Nu lo'o ñaa Jesús chalyuu ni, cua ntaja'a̱ Jesús nda yu tyucui ña'a̱ ycui' ca yu cha' caca sca msta̱ ji'i̱ ycui' Ndyosi cuentya ji'na. Tso'o tsa ngua ti' ycui' Ndyosi li'.

EFESIOS 4:3

Cua'ni cña ti' ma̱ lacua, lo'o jua'a̱ xtyucua Xtyi'i ycui' Ndyosi ji'i̱ ma̱, cha' sca ti cha' taca tyu'u tyiquee ma̱ lo'o ngu' tya'a ntsu'u cha' ji'i̱ ma̱ lo'o Cristo lcaa tsa̱. Lo'o jua'a̱ cua'ni stu'ba cha' ji'i̱ ma̱ lo'o tya'a ma̱ cha' taca tyi'i̱ tso'o ti ma̱ lo'o ngu'.

LOS HECHOS 4:32

Se'i̱ ti ndi'i̱ lcaa ngu' nu ngusñi cha' ji'i̱ Jesucristo, stu'ba tsa ndu'ni lcaa ngu' bi' lo'o tya'a ngu', sca ti cha' ntsu'u tyiquee lcaa ngu'. Nda ngu' lcaa na nu ntsu'u ji'i̱ ngu' cha' xtyucua ji'i̱ lcaa ngu' lo'o tya'a ngu'.

LOS HECHOS 2:1

Ngua tsa̱ ta'a Pentecostés, sca ta'a ji'i̱ ngu' judío, li' ndyu'u ti'i̱ lcaa ñati̱ nu ngusñi cha' ji'i̱ Jesucristo ca bi' se'i̱ ti.