HEBREOS 10:5 - Chatino Tataltepec

^5-6 Nu lo'o tya lyiji ca̱a̱ Cristo lo yuu chalyuu, li' nchcui' Ni lo'o ycui' Ndyosi Sti Ni. Ndi'ya̱ nacui̱ Ni: Nga'aa nti' nu'u̱ cha' ca̱lo'o ngu' ji'i̱ na'ni nu tyaqui̱ cha' caca msta̱, nacui̱ Cristo ji'i̱ ycui' Ndyosi. Ná tso'o nti' nu'u̱ ña'a̱ nu'u̱ ji'i̱ ngu' su ndaqui̱ ngu' na'ni lo mesa quii', cha' caca bi' msta̱; masi xa' ña'a̱ msta̱ sta ngu' cha' cuityi̱ qui'ya nu ntsu'u ji'i̱ ngu', nga'aa ndiya ti' nu'u̱ cha' bi'. Pana cua ta ti nu'u̱ cuaña' 'na, cha' caja ñi'ya̱ ca̱a̱ na' nde lo yuu chalyuu, nacui̱ Cristo.

HEBREOS 10:5 Referans Kwoze

1 PEDRO 2:24

Ycui' Cristo laca nu sca ti quiya' ngujui'i̱ ca'a̱ ngu' ji'i̱ lo crusi cha' taca cuityi̱ Ni qui'ya nu ntsu'u ji'i̱ lcaa na, cha' clyaá na ji'i̱ qui'ya nu ntsu'u ji'na; bi' cha' cuentya ji'i̱ Cristo taca tyi'i̱ na chalyuu juani, cha' jua'a̱ tyaja'a̱ na cua'ni na xcui' cha' tso'o nu nti' ycui' nu Xu'na na cha' cua'ni na. Xqui'ya cha' nchcube' ycui' Cristo, bi' cha' ngua ti̱ cha' cuxi nu ntsu'u tyiquee na, ñi'ya̱ nti' lo'o ngua ti̱ cha' quicha na lo'o ndyaca tso'o na.

HEBREOS 1:6

Tya clyo lo'o cua ta ti ycui' Ndyosi ji'i̱ Sñi' ycui' ca Ni cha' ca̱a̱ yu chalyuu, li' nacui̱ Ni: Lcaa xca̱ nu ntsu'u cuentya jna' nde cua̱, nga'a̱ cha' cua'ni tlyu ngu' xca̱ bi' ji'i̱ Sñi' na'.

HEBREOS 10:7

Bi' cha' cua lijya̱ na' ca nde juani, Ndyosi Sti na', cha' cua'ni na' cua ña'a̱ ca cña nu nti' nu'u̱ cha' cua'ni na', ñi'ya̱ nchcui' cha' nu nscua lo quityi cusu' cuentya jna'. Jua'a̱ ngua cha' nu nda Cristo nu ngua li'.

HEBREOS 2:14

Nu na, ñati̱ chalyuu na ni, sca ti cuaña' na, sca ti tañi na lo'o ngu' cusu' ji'na, jua'a̱ lo'o ngu' tya'a na. Ca ta'a na nu cua ngusñi na cha' ji'i̱ Jesús laca na ñati̱ chalyuu; bi' cha' lo'o nu Jesús bi' ngua yu ñati̱, cha' li' ngua ji'i̱ yu ngujuii yu cuentya ji'na. Sca ti jua'a̱ ngujui ñi'ya̱ tyiji̱loo yu ji'i̱ nu xña'a̱ nu nclyo cña nde ca bilyaa, su nti' nu xña'a̱ bi' cha' tsaa cresiya ji'i̱ lcaa ñati̱.

HEBREOS 10:10

Ngua'ni Jesucristo lcaa cña nu ngua ti' ycui' Ndyosi Sti yu cha' cua'ni yu, cha' nda yu ji'i̱ tyucui ña'a̱ yu cha' ngujui'i̱ ca'a̱ ngu' ji'i̱ lo crusi; sca ti quiya' tsiya' ti ngua ycui' ca yu msta̱, la cui' msta̱ nu ngua ti' ycui' Ndyosi Sti yu ngua bi'. Bi' cha' cua ngua lubii cresiya ji'na cuentya ji'i̱ ycui' Ndyosi juani, cua ndye yabe' nu ntsu'u ji'na.

GÁLATAS 4:4

Pana lo'o cua ndyalaa tsa̱ nu ndu'u scua cha' nu ngüiñi ji'i̱ Ni lo'o na, li' cua nda ycui' Ndyosi ji'i̱ Sñi' ycui' ca Ni ñaa chalyuu; sñi' sca nu cuna'a̱ ngu' judío ngua nu Jesús bi', lo'o jua'a̱ ndaquiya' tsa yu ji'i̱ lcaa cha' cusu' nu jlya ti' ngu' judío.

2 JUAN 1:7

Ntsu'u tsa ñati̱ cuiñi nu nchcui' cha' ná chañi cha' ngua Jesús ñati̱ lo'o ya̱a̱ yu chalyuu. Tyucui ña'a̱ lo yuu chalyuu ndya'a̱ ñati̱ nu nchcui' cha' cuiñi bi'; na nñilo'o ngu' bi' ji'i̱ tya'a ñati̱ na, jua'a̱ tya'a cusu̱u̱ ji'i̱ Cristo laca ngu' bi'.

HEBREOS 8:3

Lcaa xu'na sti jo'ó nde chalyuu ni, ntsu'u cha' sta ngu' msta̱ ca slo ycui' Ndyosi, ntsu'u cha' taqui̱ ngu' xa' la msta̱ lo mesa quii', cha' bi' laca cña ji'i̱ ngu'; lo'o jua'a̱ Jesús ni, ntsu'u msta̱ nu nda Ni ca slo ycui' Ndyosi cuentya ji'na,

1 TIMOTEO 3:16

Chañi cha' tlyu tsa cha' tso'o ji'i̱ Jesucristo nu ngusñi na. Ndi'ya̱ nchcui' cha' bi': Nu ngua sa'ni la ni, ni sca ñati̱ ná ngua cuayá' ti' ñi'ya̱ cua'ni lyaá ycui' Ndyosi ji'i̱ ngu'; pana nu juani jlo ti' na, xqui'ya cha' ngula Jesucristo chalyuu, cha' ngua ycui' Ni sca ñati̱. Lo'o jua'a̱ nchcui' Xtyi'i ycui' Ni cha' ji'i̱ yu, cha' sca ñati̱ nu lubii tsa laca yu; cua na'a̱ xca̱ ji'i̱ ycui' Ndyosi ji'i̱ Jesús, nu ñati̱ lubii bi'. Li' nclyu'u ngu' cha' ji'i̱ Jesucristo bi' ji'i̱ ñati̱ ca quiña'a̱ tsa quichi̱ tyucui ña'a̱ chalyuu; ngusñi ñati̱ lcaa quichi̱ cha' nu nchcui' ngu' ji'i̱ Ni li'. Cua ndyaa Jesús ca slo ycui' Ndyosi Sti na nde cua̱, lo'o juani tlyu tsa laca Jesús cajua.

SAN JUAN 1:14

Ngua yu bi' ñati̱, la cui' yu nu laca cha' ji'i̱ ycui' Ndyosi. Stu'ba ti nguti'i̱ yu lo'o na nde chalyuu. Cua na'a̱ ya ji'i̱ yu cha' tlyu tsa cha' ntsu'u ji'i̱ yu, cha' laca yu nu sca ti Sñi' ycui' Ndyosi. Xcui' tso'o tsa ndu'ni yu lo'o na, xcui' cha' liñi nchcui' yu.

SAN LUCAS 1:35

Li' nda xca̱ sca cha' lo'o: ―Ta ycui' Ndyosi Xtyi'i Ni cha' tya̱a̱ su ndi'i̱ nu'u̱, cha' tyu'ú tyucui ña'a̱ nu'u̱; sca cha' tlyu nu cua'ni ycui' Ndyosi nu laca loo caca cha' bi'. Nu lo'o cala sñi' nu'u̱, sca ñati̱ nu lubii tsa cuentya ji'i̱ ycui' Ndyosi caca cubi' nu cala bi', la cui' bi' laca nu caca naa Sñi' ycui' Ndyosi.

SAN MATEO 11:3

cha' xcuane ngu' bi' ji'i̱ Jesús cuentya ji'i̱ Juan ndi'ya̱: ―¿Ha chañi cha' nu'u̱ laca ycui' nu cua ca̱a̱ ti? ―nacui̱ ngu' bi' ji'i̱ Jesús li'―. ¿Ha tya ca̱a̱ la chaca nu caca ycui' Cristo?

SAN LUCAS 7:19

Li' ngusi'ya Juan ji'i̱ tucua tya'a ngu' tya'a ndya'a̱ yu bi'. Ngulo yu cña ji'i̱ ngu' cha' tsaa ngu', tsaa xcuane ngu' ji'i̱ Jesús si chañi cha' ycui' yu laca yu Cristo, nu ñati̱ tlyu nu cua ca̱a̱ ti; si tya ntsu'u cha' jatya la xi ngu' ña'a̱ cuayá' nu ca̱a̱ chaca ñati̱ nu cua tlyu la.

HEBREOS 5:7

Nu lo'o tya ndi'i̱ Jesús lo yuu chalyuu, tyu̱u̱ tsa quiya' ngusi'ya tsa yu lo'o nchcui' yu lo'o ycui' Ndyosi Sti yu; lye tsa ngua ti' cresiya ji'i̱ yu lo'o ngüijña yu cha' ji'i̱ Ni, cha' nchca tsa ji'i̱ ycui' Ndyosi. Ngua ji'i̱ Ni cua'a ji'i̱ ñati̱ cha' ná cujuii ngu' ji'i̱ Jesús nquicha'; pana ndyuna Ni cha' nu nchcui' Jesús lo'o Ni, cha' ntaja'a̱ yu cua'ni yu lcaa cña nu nti' ycui' Ndyosi Sti yu.

HEBREOS 10:8

Lo quityi bi' ni, clyo nacui̱ Cristo cha' ná nti' ycui' Ndyosi msta̱; la cui' jua'a̱ nacui̱ Ni cha' ná ndiya ti' ycui' Ndyosi cha' xcui' ndya'a̱ lo'o ngu' ji'i̱ msta̱, masi msta̱ jua'a̱ ti, masi na'ni lu'ú nu caca msta̱ nu tyaqui̱ lo mesa quii' cha' cati̱ qui'ya nu ntsu'u ji'i̱ ngu' lo'o ycui' Ndyosi. Jua'a̱ nacui̱ Ni, pana cuentya ji'i̱ cha' cusu' ji'i̱ ngu' nga'a̱ cha' cua'ni ngu' bi' jua'a̱.