HEBREOS 10:10 - Chatino Tataltepec

¹⁰ Ngua'ni Jesucristo lcaa cña nu ngua ti' ycui' Ndyosi Sti yu cha' cua'ni yu, cha' nda yu ji'i̱ tyucui ña'a̱ yu cha' ngujui'i̱ ca'a̱ ngu' ji'i̱ lo crusi; sca ti quiya' tsiya' ti ngua ycui' ca yu msta̱, la cui' msta̱ nu ngua ti' ycui' Ndyosi Sti yu ngua bi'. Bi' cha' cua ngua lubii cresiya ji'na cuentya ji'i̱ ycui' Ndyosi juani, cua ndye yabe' nu ntsu'u ji'na.

HEBREOS 10:10 Referans Kwoze

HEBREOS 10:14

Sca ti quiya' cua ndyaa Jesús lo crusi lacua, ngua'ni lubii yu ji'i̱ cresiya ji'i̱ ñati̱ cuentya ji'i̱ ycui' Ndyosi; jua'a̱ ngua tyucui ti' tyiquee ñati̱ chaca quiya'.

HEBREOS 10:12

Pana nu Jesucristo bi' ni, sca ti quiya' ngujuii yu lo crusi cha' cati̱ qui'ya nu ntsu'u ji'i̱ ñati̱, lo'o ña'a̱ ti tya ndyu'u scua cña nu ngua'ni yu masi chalyuu juani. Li' ngutu'u Jesús ndyaa Ni, ndyaa tucua Ni nde la'a tsu' cui̱ su tlyu ca su ntucua ycui' Ndyosi.

1 CORINTIOS 6:11

Lo'o jua'a̱ ntsu'u xi cu'ma̱ nu ngua'ni ma̱ la cui' tya'a cha' cuxi bi' tya sa'ni la; pana cua xa' ña'a̱ ndu'ni ma̱ juani, cha' cua ngüityi̱ Jesús lcaa qui'ya nu ntsu'u ji'i̱ ma̱ tya li', cua ndyatí̱ ma̱ cuentya ji'i̱ ycui' Ndyosi li'. Cua ngüiñi cha' ji'i̱ ma̱ lo'o ycui' Ndyosi nu lo'o ngusñi ma̱ cha' ji'i̱ ycui' Jesucristo nu Xu'na na, lo'o li' cua nda Ni Xtyi'i ycui' Ni cha' tyanu ne' cresiya ji'i̱ ma̱.

HEBREOS 7:27

Ndulo la tsiya' ti cha' nu ntsu'u ji'i̱ Jesús que cha' nu ntsu'u ji'i̱ xa' la sti jo'ó nu ndi'i̱ chalyuu. Lcaa tsa̱ nsta ngu' bi' msta̱ lo mesa tacati, cha' jua'a̱ cati̱ la qui'ya nu ntsu'u ji'i̱ ngu' lo'o ycui' Ndyosi; clyo ndu'ni ngu' cha' cati̱ qui'ya ji'i̱ ycui' ca ngu', lo'o li' ndu'ni ngu' cha' cati̱ qui'ya nu ntsu'u ji'i̱ lcaa ngu' quichi̱ bi'. Pana nu Jesús bi' ni, sca ti quiya' ngusta yu msta̱ lo'o nguti'i̱ yu chalyuu cha' cati̱ qui'ya nu ntsu'u ji'i̱ ñati̱; tyucui ña'a̱ ycui' yu ngua msta̱ bi', nu lo'o ngujui'i̱ ca'a̱ ngu' ji'i̱ yu lo crusi.

SAN JUAN 17:19

Lo'o juani ta na' tyucui ña'a̱ ycui' ca na' cuentya ji'i̱ ñati̱ bi', cha' cua'ni na' lcaa cña nu nti' nu'u̱ cha' cua'ni na' ―nacui̱―. Lo'o jua'a̱ lcaa ñati̱ nu ngusñi cha' jinu'u̱ ni, nti' na' cha' cha'a̱ cresiya ji'i̱ ngu', cha' ta nu'u̱ cha' liñi nu tyanu ne' cresiya ji'i̱ ngu' cuentya jinu'u̱.

HEBREOS 13:12

La cui' ti ca to' quichi̱ nchcube' Jesús, cha' caja ñi'ya̱ nu cati̱ cha' cuxi nu ntsu'u ji'i̱ ñati̱, nu lo'o ndyalú tañi ycui' ca yu lo'o ngujuii yu lo crusi ca bi'.

1 CORINTIOS 1:30

Ndi'ya̱ laca cha': cua nacui̱ ycui' Ndyosi cha' caca stu'ba cha' ji'na lo'o Jesucristo, lo'o jua'a̱ cua nda Ni ji'i̱ Jesucristo ji'na. Masi ná nchca ji'na, pana nu Jesucristo ni, lcaa cha' nchca ji'i̱ ycui'. Xqui'ya nu Jesús bi' nchca tso'o cresiya ji'na ñati̱ cuxi na cuentya ji'i̱ ycui' Ndyosi; xqui'ya Jesús taca caca na ñati̱ ji'i̱ ycui' Ndyosi, cha' Jesús laca nu ngua'ni lyaá ji'na ji'i̱ nu cuxi.

HEBREOS 9:28

lo'o jua'a̱ Cristo, sca ti quiya' ngujuii yu lo crusi, cha' jua'a̱ ngüityi̱ yu qui'ya nu ntsu'u ji'i̱ quiña'a̱ tsa ñati̱. Tya ca̱a̱ Cristo chaca quiya' ca tiya' la; pana nga'aa si'i cha' cuityi̱ Ni qui'ya nu ntsu'u ji'i̱ ñati̱ ca̱a̱ Ni li', cha' cua ndye ngua'ni Ni cña bi'. Li' cua'ni lyaá lyiji Ni ji'i̱ lcaa ñati̱ nu ntajatya tsa ji'i̱ Ni, ña'a̱ cuayá' nu ca̱a̱ Ni chaca quiya'.

HEBREOS 9:12

Ndi'ya̱ ña'a̱ cña nu ngua'ni Cristo cuentya ji'na, nu lo'o ndyaa Ni la cui' ca su tacati tsa ca su ntucua ycui' Ndyosi: ná nguta'a̱ Ni lo'o tañi chivo lo'o tañi chqueru, cha' scui̱ Ni tañi bi' nde slo ycui' Ndyosi cha' cati̱ qui'ya nu ntsu'u ji'na; pana ngujuii Cristo lo crusi, ndye tañi ycui' yu ndyalú cuentya ji'i̱ qui'ya nu ntsu'u ji'na. Bi' cha' sca ti quiya' tsiya' ti ngua'ni lyaá Cristo ji'na, lo'o jua'a̱ ná nga'a̱ cha' tye cha' ngulaá na ji'i̱ nu cuxi, xqui'ya cña nu ngua'ni Ni cuentya ji'na.

1 PEDRO 2:24

Ycui' Cristo laca nu sca ti quiya' ngujui'i̱ ca'a̱ ngu' ji'i̱ lo crusi cha' taca cuityi̱ Ni qui'ya nu ntsu'u ji'i̱ lcaa na, cha' clyaá na ji'i̱ qui'ya nu ntsu'u ji'na; bi' cha' cuentya ji'i̱ Cristo taca tyi'i̱ na chalyuu juani, cha' jua'a̱ tyaja'a̱ na cua'ni na xcui' cha' tso'o nu nti' ycui' nu Xu'na na cha' cua'ni na. Xqui'ya cha' nchcube' ycui' Cristo, bi' cha' ngua ti̱ cha' cuxi nu ntsu'u tyiquee na, ñi'ya̱ nti' lo'o ngua ti̱ cha' quicha na lo'o ndyaca tso'o na.

HEBREOS 10:20

Nu lo'o nda yu tyucui ña'a̱ yu cha' ngujuii yu xqui'ya na, cua ngusaala yu chaca tyucui̱i̱ cucui cuentya ji'na li', cha' caja ñi'ya̱ ca̱a̱ na cacua ti slo ycui' Ndyosi; xqui'ya ycui' Jesús, bi' cha' taca xñi na tyucui̱i̱ nu lijya̱ ca slo ycui' Ndyosi juani.

HEBREOS 9:26

Si jua'a̱ ngua, ná tyiquee' cua tyu̱u̱ tsa quiya' cua ngujui'i̱ ca'a̱ ngu' ji'i̱ Cristo lo crusi tya lo'o ndya' chalyuu; pana si'i jua'a̱ ngua cha' bi', sca ti quiya' cua ya̱a̱ yu chalyuu nu ngua sa'ni xi lo'o cua tye ti chalyuu cusu', cha' cuityi̱ yu qui'ya nu ntsu'u ji'i̱ lcaa ñati̱ lo'o ngujuii yu lo crusi.

HEBREOS 2:14

Nu na, ñati̱ chalyuu na ni, sca ti cuaña' na, sca ti tañi na lo'o ngu' cusu' ji'na, jua'a̱ lo'o ngu' tya'a na. Ca ta'a na nu cua ngusñi na cha' ji'i̱ Jesús laca na ñati̱ chalyuu; bi' cha' lo'o nu Jesús bi' ngua yu ñati̱, cha' li' ngua ji'i̱ yu ngujuii yu cuentya ji'na. Sca ti jua'a̱ ngujui ñi'ya̱ tyiji̱loo yu ji'i̱ nu xña'a̱ nu nclyo cña nde ca bilyaa, su nti' nu xña'a̱ bi' cha' tsaa cresiya ji'i̱ lcaa ñati̱.

1 JUAN 5:6

Nu sca ti Sñi' ycui' ca Ndyosi laca Jesucristo, nu ya̱a̱ chalyuu. Ntyucuatya ngu' ji'i̱ yu li'. Ngujuii yu lo crusi, ndyalú tañi ycui' yu li'. Si'i xqui'ya cha' nu cua ntyucuatya ti yu, masi lo'o xqui'ya cha' cua ngujuii yu lo crusi ndyalú tañi yu, bi' cha' nchca cuayá' ti' na juani cha' nu sca ti Sñi' ycui' Ndyosi laca Jesucristo. Bi' laca cha' nu ndacha' Xtyi'i ycui' Ndyosi ji'na, lo'o jua'a̱ chañi tsa laca cha' bi'.

SAN JUAN 19:34

Ña'a̱ cuayá' nu ndyojo' sca sendaru chcua̱ cha sii' Jesús, li' tsiya' ca ndyalú tañi nguxa' lo'o hitya lubii.

HEBREOS 2:11

Na cua ngua'ni lubii Jesús ji'i̱ cresiya ji'i̱ ñati̱ chalyuu, bi' cha' juani laca ycui' Ndyosi Sti na; lcaa na nu cua ngua lubii cresiya ji'na xqui'ya Jesús ni, ntsu'u sca ti Sti na lo'o ycui' Jesús, cha' laca ycui' Ndyosi Sti na juani. Lo'o jua'a̱ ná ndube ti' Jesús, nchcui' yu cha' tya'a ycui' yu laca na.

HEBREOS 10:5

Nu lo'o tya lyiji ca̱a̱ Cristo lo yuu chalyuu, li' nchcui' Ni lo'o ycui' Ndyosi Sti Ni. Ndi'ya̱ nacui̱ Ni: Nga'aa nti' nu'u̱ cha' ca̱lo'o ngu' ji'i̱ na'ni nu tyaqui̱ cha' caca msta̱, nacui̱ Cristo ji'i̱ ycui' Ndyosi. Ná tso'o nti' nu'u̱ ña'a̱ nu'u̱ ji'i̱ ngu' su ndaqui̱ ngu' na'ni lo mesa quii', cha' caca bi' msta̱; masi xa' ña'a̱ msta̱ sta ngu' cha' cuityi̱ qui'ya nu ntsu'u ji'i̱ ngu', nga'aa ndiya ti' nu'u̱ cha' bi'. Pana cua ta ti nu'u̱ cuaña' 'na, cha' caja ñi'ya̱ ca̱a̱ na' nde lo yuu chalyuu, nacui̱ Cristo.

SAN JUAN 6:51

Na' laca̱ nu cha' tso'o nu caja ji'i̱ ñati̱ ―nacui̱ Jesús―. Ngutu'u na' nde slo ycui' Ndyosi lijya̱ na' chalyuu cha' caca na' ñati̱, cha' caja ñi'ya̱ nu tyaala' ti' ngu'. Nu lo'o xñi ñati̱ cha' jna', ná nga'a̱ cha' tye chalyuu ji'i̱ ngu' bi' li'; ta na' tyucui ña'a̱ na' ji'i̱ ngu', cha' jua'a̱ caja chalyuu cucui ji'i̱ ngu'.

EFESIOS 5:2

Tso'o ti tyu'u tyiquee ma̱ ña'a̱ ma̱ ji'i̱ ñati̱, cha' la cui' jua'a̱ ntsu'u tsa tyiquee Cristo ña'a̱ Ni ji'na. Nu lo'o ñaa Jesús chalyuu ni, cua ntaja'a̱ Jesús nda yu tyucui ña'a̱ ycui' ca yu cha' caca sca msta̱ ji'i̱ ycui' Ndyosi cuentya ji'na. Tso'o tsa ngua ti' ycui' Ndyosi li'.

EFESIOS 5:26

Ngujuii yu cha' caja ñi'ya̱ cua'ni lubii yu ji'i̱ ñati̱ nu xñi cha' ji'i̱ yu; ngua ti' Jesús cha' cuna ngu' lcaa cha' ji'i̱ ycui' yu, cha' taca cuityi̱ Ni qui'ya nu ntsu'u ji'i̱ ngu', cha' ta Ni chalyuu cucui ji'i̱ ngu'. Jua'a̱ ngua'ni Ni cha' sca ti quiya' laca ngu' bi' ñati̱ ji'i̱ Ni. Lo'o li' taca tyucuatya ngu' ji'i̱ ngu' bi' cuentya ji'i̱ Jesús.

HEBREOS 5:7

Nu lo'o tya ndi'i̱ Jesús lo yuu chalyuu, tyu̱u̱ tsa quiya' ngusi'ya tsa yu lo'o nchcui' yu lo'o ycui' Ndyosi Sti yu; lye tsa ngua ti' cresiya ji'i̱ yu lo'o ngüijña yu cha' ji'i̱ Ni, cha' nchca tsa ji'i̱ ycui' Ndyosi. Ngua ji'i̱ Ni cua'a ji'i̱ ñati̱ cha' ná cujuii ngu' ji'i̱ Jesús nquicha'; pana ndyuna Ni cha' nu nchcui' Jesús lo'o Ni, cha' ntaja'a̱ yu cua'ni yu lcaa cña nu nti' ycui' Ndyosi Sti yu.

HEBREOS 9:14

Masi jua'a̱ ngua'ni ngu' cña nu ngua li', pana tlyu la cña nu ngua'ni Cristo juani, cha' ndyalú tañi ycui' yu lo'o ngujuii yu lo crusi cuentya ji'na. Xqui'ya Xtyi'i ycui' Ni, bi' cha' ngua ji'i̱ Cristo ta yu tyucui ña'a̱ ycui' ca yu, cha' sca ti quiya' cati̱ qui'ya nu ntsu'u ji'na lo'o ycui' Ndyosi; nu ycui' Cristo ni, ná ntsu'u qui'ya ji'i̱ yu tsiya' ti, bi' cha' taca cua'ni lubii Ni cresiya ji'na, nu lo'o tyi'u ti' na ñi'ya̱ nu ngua'ni Ni lo'o ndyalú tañi ycui' Ni. Li' cuityi̱ Ni lcaa cha' cuxi nu ndyu'ni ñu'u̱ tsa ji'na, jua'a̱ taca ji'na cua'ni na cña ji'i̱ ycui' Ndyosi nu lu'ú ca nde chalyuu li'.

HEBREOS 10:29

Lo'o juani ni, tlyu la cha' ti'í tyacua ji'i̱ tya'a ñati̱ na nu chi̱i̱ tsa nti' ña'a̱ ngu' ji'i̱ Jesús, nu sca ti Sñi' ycui' Ndyosi bi', ngu' nu lye tsa chcui' lo ji'i̱ cña nu ngua'ni nu Jesús bi'; sca ti xqui'ya cha' ngujuii yu lo crusi, bi' cha' cua ndyaca lubii cresiya ji'na. Lo'o jua'a̱ si chcui' suba' na ji'i̱ Xtyi'i ycui' Ndyosi, li' lye la cha' nchcube' tyacua ji'na, cha' xcui' tso'o tsa ndu'ni Ni lo'o na xqui'ya Xtyi'i ycui' Ni.

1 PEDRO 3:18

Ycui' Cristo ngujuii xqui'ya qui'ya nu ntsu'u ji'na, masi lubii tsiya' ti cresiya ji'i̱ yu; nchcube' yu cuentya ji'na, cha' cuxi tsa tyiquee na. Lo'o juani taca tyalaa na slo ycui' Ndyosi xqui'ya nu Cristo bi'. Sca ti quiya' ngua cha' ti'í bi' ji'i̱ Cristo, ndye cña ji'i̱ yu nde loyuu chalyuu li'. Ndyujuii ngu' ji'i̱ nu ñati̱ nu naa Jesucristo bi', pana ngua'ni Xtyi'i ycui' Ndyosi cha' ndyu'ú yu chaca quiya'.