HEBREOS 1:9 - Chatino Tataltepec

⁹ Ndiya tsa ti' nu'u̱ lcaa cha' liñi nu ndu'ni ñati̱; ñasi̱' tsa nu'u̱ lo'o ndyu'ni ñati̱ cha' cuxi lo'o ycui' Ndyosi Sti nu'u̱. Bi' cha' ngusubi na' jinu'u̱ cha' tya'a̱ nu'u̱ lo cña jna', nacui̱ ycui' Ndyosi. Jua'a̱ tso'o tsa nti' nu'u̱ juani, cha' tlyu la chacuayá' cua nda na' jinu'u̱ que ji'i̱ xa' la ñati̱, nacui̱ ycui' Ndyosi.

HEBREOS 1:9 Referans Kwoze

GÁLATAS 5:22

Xa' ña'a̱ cña ndu'ni Xtyi'i ycui' Ndyosi ne' cresiya ji'na: ndu'ni Ni cha' tyu'u tyiquee na ña'a̱ na ji'i̱ tya'a ñati̱ na; jua'a̱ ndu'ni Ni cha' chaa ti' na cuentya ji'i̱ Ni, cha' ti̱ ti tyi'i̱ tyiquee na, cha' talo tyiquee na ji'i̱ tya'a ñati̱ na; jua'a̱ ndu'ni Ni cha' ca tya'na ti' na ña'a̱ na ji'i̱ ñati̱, cha' xcui' tso'o ti cua'ni na lo'o ñati̱, cha' liñi ti cua'ni na lo'o ñati̱;

ROMANOS 15:13

Bi' cha' juani nti' na' cha' cua'ni Ni cha' xñi tso'o la ma̱ cha' ji'i̱ ycui' Ni, cha' tso'o tsa caca tyiquee ma̱, cha' ti̱ ti taca tyi'i̱ tyiquee ma̱ li'. Nu lo'o tyanu Xtyi'i ycui' Ndyosi ne' cresiya ji'na, li' nga'aa caca taja ti' na lo'o ntajatya na ji'i̱ ycui' Ndyosi cha' ca̱a̱ Ni.

SAN LUCAS 4:18

Cua ngulacua̱ ycui' Ndyosi nu Xu'na na jna', nacui̱ lo quityi bi'. Cua ngua'a̱ loo Ni jna', bi' cha' cua ndi'i̱ Xtyi'i ycui' Ndyosi lo na', cha' chcui' na' cha' tso'o lo'o ngu' ti'i. Cua nda Ni jna' lijya̱a̱ cha' cua'ni cho'o na' tyiquee ñati̱ nu xñi'i̱ tsa ti', nacui̱ lo quityi bi'. Ntsu'u cha' chcui' na' lo'o ngu' nu laca preso ji'i̱ nu xña'a̱, cha' cua tyu'u ti ngu' ya' nu xña'a̱ bi'. Ta na' xee nu tyu'u ne' cresiya ji'i̱ ñati̱ nu ndyacu̱' hique ngu'. Lo'o lya' tsa ti' ngu' ji'i̱ tya'a ngu' ni, li' ta na' chacuayá' ji'i̱ ngu' cha' tyu'u ngu' laja ti.

1 JUAN 1:3

Juani culu'u ya ji'i̱ ma̱ cua ña'a̱ ca cha' nu cua na'a̱ ya, culu'u ya cua ña'a̱ ca cha' nu cua ndyuna ya. Chañi laca cha' stu'ba ntsu'u tyiquee na lo'o ycui' Ndyosi Sti na, jua'a̱ lo'o Jesucristo nu sca ti Sñi' ycui' Ni. Lo'o juani cua nti' ya cha' stu'ba ti caca tyiquee ma̱ lo'o ya;

1 PEDRO 1:3

Cua'ni tlyu na ji'i̱ ycui' Ndyosi, la cui' bi' laca nu ndu'ni tlyu Jesucristo nu Xu'na na ji'i̱, la cui' Sti Jesucristo nu Xu'na na laca bi'. Tya'na tsa ti' ycui' Ni ña'a̱ Ni ji'na, bi' cha' ngua'ni cucui Ni cresiya ji'na; ntsu'u chalyuu cucui ji'na juani, xqui'ya cha' ndyu'ú ycui' Jesucristo chaca quiya' nu lo'o ngujuii yu. Lo'o nu juani cua ndu̱ ti' na cha' caja chalyuu nu ná nga'a̱ cha' tye ji'na,

HEBREOS 7:26

Xñi na cha' ji'i̱ Jesús lacua; bi' laca sti jo'ó nu laca loo la, nu chañi cha' taca xtyucua ji'na. Ñati̱ lubii tsiya' ti laca Ni, cha' ná ntsu'u cha' cuxi, ná ntsu'u qui'ya ji'i̱ Ni. Xa' ña'a̱ laca Jesús, nu ná nda ycui' Ndyosi chacuayá' cha' tyanu yu slo ñati̱ chalyuu nu ndu'ni tsa cha' cuxi; cua nda Sti yu su tyucua yu la cui' su tlyu ca su ntucua ycui' Ndyosi Sti yu.

FILIPENSES 2:9

Bi' cha' juani cua ndyaa lo'o Ni ji'i̱ yu cha' stu'ba ti tyi'i̱ yu ca su tlyu la ca su ntucua ycui' Ni; juani tlyu tsa chacuayá' cua nda Ni ji'i̱ Jesús. Tyucui ña'a̱ chalyuu nga'aa ntsu'u la xa' chacuayá' nu tlyu la,

EFESIOS 1:3

Lye tsa tya na xlya'be ji'i̱ ycui' Ndyosi Sti na, nu laca Sti Jesucristo nu Xu'na na. Cua ndyaca stu'ba cha' ji'na lo'o Cristo; bi' cha' lo'o ycui' Ndyosi, tso'o tsa nti' Ni ña'a̱ Ni ji'na. Lcaa lo cha' tso'o nu tyacua ji'na cha' ngusñi na cha' ji'i̱ Jesucristo, cua ngua'ni Ni cha' bi' lo'o na xqui'ya Cristo.

1 CORINTIOS 1:9

Ycui' Ndyosi ndu'ni cña, lcaa cña nu cua nacui̱ Ni cha' cua'ni Ni; bi' laca nu ngusubi ji'i̱ ma̱ cha' caca stu'ba cha' ji'i̱ ma̱ lo'o Jesucristo nu Xu'na na, nu sca ti Sñi' ycui' Ndyosi.

SAN JUAN 20:17

Li' nchcui' Jesús lo'o María: ―Ná cala' nu'u̱ jna' cha' tya lyiji tya'a na' nde cua̱ ca su ntucua Sti na' ―nacui̱―. Nu juani, yaa clya nu'u̱ su ndi'i̱ nu xa' la ñati̱ nu cua ngusñi cha' 'na, yaa cacha' nu'u̱ ji'i̱ ngu' bi', cha' cua tyacuí̱ ti na' tya'a na' ca su ntucua ycui' Ndyosi Sti na', nu laca Sti ma̱. Tya'a na' ca su ntucua ycui' Ndyosi nu Xu'na na', nu bi' nu laca ycui' Ndyosi nu Xu'na ma̱.

SAN JUAN 1:41

Hora ti ndyaa Andrés ndyaana ji'i̱ tya'a, la cui' nu Simón bi'. Li' nchcui' Andrés lo'o: ―Cua nquijeloo ji'i̱ ya ñi'ya̱ nu laca Cristo, nu ñati̱ tlyu nu nda Ni ji'i̱ lijya̱ nde chalyuu ―nacui̱.

APOCALIPSIS 2:15

Lo'o jua'a̱ ntsu'u xi ngu' tya'a ndyu'u ti'i̱ ma̱ nu ná ntaja'a̱ ngu' xtyanu ngu' ji'i̱ xa' cha' cuxi nu ngulu'u ngu' nicolaítas bi'. Ná ndiya ti' na' cha' cuxi bi' tsiya' ti, nacui̱ Ni.

2 CORINTIOS 11:31

Ycui' Ndyosi Sti Jesucristo nu Xu'na na ni, tyucui tyempo nga'a̱ cha' cua'ni tlyu na ji'i̱ Ni: la cui' Ni jlo ti' Ni cha' si'i cha' cuiñi laca nu nda na' lo'o cu'ma̱.

ROMANOS 12:9

Cua'ni ma̱ cha' tso'o tsa caca tyiquee ma̱ ña'a̱ ma̱ ji'i̱ xa' la ñati̱, cha' si'i sca cha' nu nda ti ma̱ laca bi', nu lo'o chcui' tso'o ma̱ lo'o ngu', masi lo'o cua'ni ma̱ cha' tso'o lo'o ngu'. Nga'aa taquiya' ma̱ ji'i̱ cha' cuxi, tyucui tyiquee ma̱ clyana ma̱ ji'i̱ cha' tso'o.

LOS HECHOS 10:38

Jlo ti' ma̱ ñi'ya̱ nguti'i̱ Jesús chalyuu, la cui' Jesús Nazaret. Cua ngusubi ycui' Ndyosi Sti yu ji'i̱ Jesús, nda la Ni juersa ji'i̱ nu Jesús bi' nu lo'o ndyalaa Xtyi'i ycui' Ni lo yu. Lcaa su nguta'a̱ yu ngua'ni yu cha' tso'o lo'o ñati̱, lo'o jua'a̱ ngua'ni yu cha' ndyaca tso'o ngu' nu quicha tsa, masi ñati̱ nu ntsu'u tsa cha' ti'í ji'i̱ xqui'ya cha' ngusñi cui'i̱ cuxi ji'i̱ ngu'. Ngua'ni Jesús cña jua'a̱, cha' nguxtyucua ycui' Ndyosi ji'i̱ yu.

LOS HECHOS 4:27

’Ñi'ya̱ nu cua nchcui' quityi jinu'u̱ nu nguscua jyo'o David sa'ni la bi' ―nacui̱ ngu' ji'i̱ ycui' Ndyosi Sti na―, jua'a̱ cua ndyu'u ti'i̱ ngu' nu laca loo ji'i̱ quichi̱ re cha' cua'ni cuxi ngu' lo'o Jesús Sñi' ycui' nu'u̱, masi xcui' lubii tsiya' ti cresiya ji'i̱ nu Jesús bi'; la cui' yu laca nu ngusubi nu'u̱ ji'i̱ ―nacui̱ ngu'―. Ndyu'u ti'i̱ Herodes lo'o Poncio Pilato, lo'o ngu' xa' loyuu, lo'o ngu' tya'a ya nde loyuu re. Li' ngua'ni ngu' lcaa cña nu nda nu'u̱ chacuayá' ji'i̱ ngu' bi' cha' cua'ni ngu'; ñi'ya̱ nu nda nu'u̱ cha' lo'o ngu' sa'ni, la cui' jua'a̱ ngua cha' yija̱ re ―nacui̱ ngu' ji'i̱ ycui' Ndyosi―.

SAN JUAN 3:34

Nda Ni ji'i̱ nu Jesucristo bi' ya̱a̱ chalyuu, lo'o jua'a̱ xcui' cha' ji'i̱ ycui' Ndyosi nda yu lo'o na xqui'ya Xtyi'i ycui' Ndyosi. Lo'o ycui' Ndyosi ni, ná ntsu'u cha' tye cha' ta Ni Xtyi'i ycui' Ni ji'na.

HEBREOS 2:11

Na cua ngua'ni lubii Jesús ji'i̱ cresiya ji'i̱ ñati̱ chalyuu, bi' cha' juani laca ycui' Ndyosi Sti na; lcaa na nu cua ngua lubii cresiya ji'na xqui'ya Jesús ni, ntsu'u sca ti Sti na lo'o ycui' Jesús, cha' laca ycui' Ndyosi Sti na juani. Lo'o jua'a̱ ná ndube ti' Jesús, nchcui' yu cha' tya'a ycui' yu laca na.

SAN JUAN 10:17

’Tye chalyuu 'na, cajaa na' cha' tyu'ú na' chaca quiya' ca tiya' la, bi' cha' ntsu'u tsa tyiquee Sti na' ña'a̱ 'na.

LOS HECHOS 4:26

Cua ndyu'u ti'i̱ lcaa nu laca xu'na chalyuu re lo'o nu laca loo ji'i̱ lcaa quichi̱, cha' cua'ni cuxi ngu' lo'o ycui' Ndyosi nu Xu'na na, jua'a̱ lo'o Cristo nu ngusubi ycui' Ndyosi ji'i̱.

HEBREOS 2:9

Pana cua jlo ti' na ñi'ya̱ ngua ji'i̱ Jesús nu ngua li', cha' xti ti tyempo ngua lcaa xca̱ ji'i̱ ycui' Ndyosi loo la ji'i̱ ycui' Jesús. Ngujuii yu lo crusi cuentya ji'i̱ lcaa ñati̱ chalyuu, xqui'ya cha' xcui' tso'o tsa ndu'ni ycui' Ndyosi lo'o na. Lo'o jua'a̱ ndube tsa ti' na ñi'ya̱ ndyaca ji'i̱ yu juani, cha' tso'o tsa ndyu'ni chi̱ ngu' loo yu; ndyu'ni tlyu ngu' ji'i̱ yu xqui'ya cha' cua ngujuii yu, xqui'ya cha' ti'í tsa ngua ti' yu cuentya ji'na.