GÁLATAS 5:7 - Chatino Tataltepec

⁷ Tso'o tsa ndyu'ni ma̱ nquicha'. ¿Tilaca laca nu ndacu̱' cha' ji'i̱ ma̱, cha' nga'aa taquiya' la ma̱ ji'i̱ cha' liñi nu cua nda Cristo lo'o ma̱?

GÁLATAS 5:7 Referans Kwoze

1 CORINTIOS 9:24

Ndi'ya̱ laca cña nu nda Ni 'na, ñi'ya̱ ndyaca lo'o cua'ni ngu' sca posta lo'o nxna ngu'. Tyu̱u̱ tya'a ngu' xna ngu' stu'ba ti li', masi sca ti yu tyiji̱loo ji'i̱ ca ta'a ngu' su tye cha' bi'. La cui' jua'a̱ caca lo'o na, nga'a̱ cha' tsa cu' ti cua'ni na cña ña'a̱ cuayá' nu tye chalyuu ji'na.

GÁLATAS 3:1

Na tonto tsa ma̱, cu'ma̱ ngu' gálatas, cha' nduna ma̱ cha' nu nda nu ngu' cuiñi bi'; laca ma̱ ñi'ya̱ si ntsu'u nu ngua'ni cucha'a̱ ji'i̱ ma̱. Bi' cha' juani nga'aa nti' ma̱ xñi la ma̱ cha' liñi nu cua nda Cristo lo'o na. Pana lo'o nda ya cha' ji'i̱ Cristo lo'o ma̱ tya clyo, li' ngulu'u tsa ya ji'i̱ ma̱ ñi'ya̱ ngua lo'o ngujuii Jesucristo lo crusi xqui'ya na; jua'a̱ ngulu'u ya ji'i̱ ma̱ ña'a̱ cuayá' nu ngua cuayá' tso'o ti' ma̱ cha' bi'.

HEBREOS 12:1

Lo'o juani, ¿ñi'ya̱ cua'ni na lacua? Ndi'ya̱ cua'ni na nde chalyuu: Ñi'ya̱ si tya ndi'i̱ jyo'o cusu' bi' tsa tlyu ti lo'o na, jua'a̱ cua'ni na, cha' jua'a̱ tyi'u tso'o ti' na lcaa ña'a̱ cha' tlyu nu ngua'ni ngu' bi' tya sa'ni la, xqui'ya cha' jlya ti' ngu' ji'i̱ ycui' Ndyosi. Ndu'ni cha' xtyanu na lcaa cha' nu ndaca'a ji'na cha' ná xñi tso'o na cha' ji'i̱ Jesús; xtyanu na lcaa cha' cuxi nu tiji̱' tsa ti' na ji'i̱, culochu̱' na cha' bi'. Lo'o li' nguula ti' tyiquee na cua'ni na cha' tso'o nde chalyuu, tsa lo cua tyempo nu tya ta ti Ni ji'na.

1 PEDRO 1:22

Xqui'ya cha' nxtyucua Xtyi'i ycui' Ndyosi ji'i̱ ma̱, na cua ndaquiya' ma̱ ji'i̱ cha' liñi nu nda ycui' Ndyosi lo'o na, bi' cha' ngua lubii cresiya ji'i̱ ma̱; juani taca caca tso'o tyiquee ma̱ ña'a̱ ma̱ ji'i̱ tya'a ñati̱ ma̱. Pana tyucui tyiquee ma̱ ntsu'u cha' caca tso'o tyiquee ma̱ ña'a̱ ma̱ ji'i̱ tya'a ñati̱ ma̱, si'i ñi'ya̱ ndu'ni ngu' nu ntsu'u tucua cha' tyiquee ngu' cua'ni cu'ma̱.

2 CORINTIOS 10:5

Ntsu'u cha' tyiji̱loo na ji'i̱ lcaa cha' cuiñi nu nchcui' ngu' ji'i̱ Cristo; jua'a̱ ntsu'u cha' tyiji̱loo na ji'i̱ lcaa cha' cuxi nu tiji̱' tsa ti' ngu' ji'i̱, nu ndaca'a tsa ji'i̱ ngu' cha' ná xñi ngu' cha' ji'i̱ ycui' Ndyosi. Nu lo'o cua nguxtyanu ngu' ji'i̱ lcaa cha' cuxi bi', li' taca cua'ni na cha' taquiya' ngu' ji'i̱ cha' nu ntsu'u ji'i̱ Cristo.

ROMANOS 2:8

Pana nu ñati̱ cuxi ni, nu xcui' cha' ji'i̱ ycui' ca ngu' ntsu'u tyiquee ngu', tlyu tsa cha' ti'í ta Ni ji'i̱ ngu' bi'; ñasi̱' tsa ycui' Ndyosi ji'i̱ lcaa ngu' bi', cha' ná ntaja'a̱ ngu' taquiya' ngu' tsiya' ti ji'i̱ lcaa cha' liñi nu nclyu'u Ni ji'i̱ ngu', cha' ndijña tsa ti' ngu' ji'i̱ cua ña'a̱ ca cha' cuxi nu ña'a̱ ngu'.

SAN MATEO 13:21

Pana si lya' ti' xa' ñati̱ ji'i̱ ngu' bi', si xtyí lo'o ñati̱ ji'i̱ ngu' xqui'ya cha' tso'o nu cua ndyuna ngu' bi', ná talo ngu' li'. Laca ngu' bi' ñi'ya̱ laca lo'o ná ngusñi tso'o su̱u̱ si'yu nu ntyucua lo yuu lati tu'ba chu̱' quee bi', cha' ná ndalo calya bi', ndyanaa bi' li'.

2 TESALONICENSES 1:8

Li' xcube' ycui' Ndyosi ji'i̱ cua ña'a̱ ca ñati̱ nu ná ntaja'a̱ taquiya' ji'i̱ Ni, lo'o jua'a̱ xcube' Ni ji'i̱ ñati̱ nu ná ntaja'a̱ xñi cha' tso'o ji'i̱ ycui' Jesús nu Xu'na na.

ROMANOS 6:17

Tso'o tsa nti' na' cha' tyucui tyiquee ma̱ ndyu'ni ma̱ cña ji'i̱ ycui' Ndyosi, tsa ña'a̱ cha' nu ngulu'u ngu' ji'i̱ ma̱. Nu cha' cuxi, bi' laca nu ngua loo ji'i̱ ma̱; pana lo'o cua ngulaá ma̱ ji'i̱ nu cuxi bi', li' nguxana ma̱ ndu'ni ma̱ cña cha' caja chaca chalyuu su caca lubii cresiya ji'i̱ ma̱, cha' ycui' Ndyosi laca loo ji'i̱ ma̱ juani.

HEBREOS 5:9

Tiya' la li', lo'o cua ngua lcaa cha' ji'i̱ Jesús cha' cua ngua'ni yu cña nu cua nda ycui' Ndyosi ji'i̱ yu cha' cua'ni yu, tya li' ntucua quiya' cha' cua'ni lyaá Jesús ji'i̱ cua ña'a̱ ca ñati̱ chalyuu nu tyaja'a̱ cua'a̱ jyaca̱ ji'i̱ cha' nu cua nchcui' yu lo'o; ná tye tsiya' ti cha' cua'ni lyaá Ni ji'na ji'i̱ cha' cuxi nu ntsu'u ji'na.

ROMANOS 16:26

pana juani cua ngulu'u tso'o Ni cha' bi' ji'na. Bi' cha' nga'a̱ cha' cañi cha' ji'i̱ Cristo tyucui ña'a̱ lo yuu chalyuu su ndi'i̱ ñati̱ ña'a̱ cuayá' cuna lcaa ngu' xa' tsu', cha' taca xñi ngu' cha' ji'i̱ sca ti ycui' Ndyosi, cha' taquiya' ngu' ji'i̱ cha' nu nchcui' Ni. La cui' cha' bi' laca nu cua nscua lo quityi ji'i̱ ycui' Ndyosi, nu nguscua jyo'o cusu' ñi'ya̱ caca cha' nde loo la. Ngua ti' ycui' Ndyosi cha' caca cha' bi', bi' cha' jua'a̱ ndyaca juani; ycui' Ndyosi laca nu ná nga'a̱ cha' tye chalyuu ji'i̱ Ni tsiya' ti.

ROMANOS 15:18

Pana tsa bi' ti cha' chcui' na' lo'o ma̱, cha' ji'i̱ cña nu ngua'ni Jesús, cha' caja ñi'ya̱ nu taquiya' ngu' xa' tsu' ji'i̱ cha' nu nchcui' ycui' Ndyosi. Si'i sca ti na' nu ngua'ni na' cña bi', pana Xtyi'i ycui' Ndyosi ngua'ni cña lo'o na' lo'o nchcui' na' lo'o ngu'.

ROMANOS 10:16

Ná ndyuna tso'o lcaa ñati̱ cha' nu nda na lo'o ngu', nu lo'o ndacha' na ji'i̱ ngu' ñi'ya̱ cua'ni lyaá Ni ji'i̱ ñati̱. La cui' jua'a̱ ngua lo'o jyo'o Isaías cua sa'ni. “Ndyosi Xu'na ya, ná tucui ndu̱ tsiya' ti nu ngusñi cha' jinu'u̱ nu nchcui' ya lo'o ngu'”, nacui̱ jyo'o bi'.

HEBREOS 11:8

Jlya ti' jyo'o Abraham ji'i̱ ycui' Ndyosi, bi' cha' ngusñi yu cha' ji'i̱ Ni, nu lo'o nguane Ni ji'i̱ yu cha' tsaa yu sca loyuu tyijyu' tsa, su nacui̱ Ni ji'i̱ yu cha' cajua caca quichi̱ tyi yu. Ngutu'u yu loyuu su nguti'i̱ yu tya clyo, ndyaa yu li', masi ná jlo ti' yu macala su tsaa yu.

LOS HECHOS 6:7

Lcaa tsa̱ nda ngu' cha' ji'i̱ ycui' Ndyosi lo'o quiña'a̱ la ñati̱ nu ntaja'a̱ cua'a̱ jyaca̱ ji'i̱ cha' bi'. Jua'a̱ ngua quiña'a̱ la ngu' nu ndyaca tsa'a̱ cha' ji'i̱ Jesucristo nde quichi̱ Jerusalén, lo'o jua'a̱ ngua tyu̱u̱ tya'a sti jo'ó ji'i̱ ngu' judío nu ngusñi cha' ji'i̱ Jesucristo li'.

GÁLATAS 2:2

Ndyaa ya Jerusalén, xqui'ya cha' cua ngua'ni ycui' Ndyosi cha' ngua'ya sca cha' hique na' cha' tyaa ya; bi' cha' lo'o cua ndyalaa ya quichi̱ bi', li' ndya'a̱ ca su ntucua ngu' ycui' ti ngu', nchcui' na' lo'o ngu' nu laca loo la ji'i̱ taju tya'a ñati̱ ji'i̱ Cristo quichi̱ bi'. Li' ndacha' na' ji'i̱ ngu' bi', nchcui' na' ni cha' nu nda na' lo'o ngu' xa' tsu' cuentya ji'i̱ Cristo, cha' ngua'ni lyaá Cristo ji'na ji'i̱ nu cuxi. Jua'a̱ nchcui' na' lo'o ngu' bi', xqui'ya cha' ná nti' na' cha' culacua cuxi ti' ngu' bi' ña'a̱ ngu' jna'; ná nti' na' cha' chcui' ngu' cha' ná tso'o laca cha' nu nda na' lo'o cu'ma̱ ngu' xa' tsu' tya tsubi' la, masi chcui' ngu' cha' ná tso'o ndu'ni na' juani.

GÁLATAS 5:10

Cuentya jna', ndyi'u tsa ti' na' ji'i̱ ma̱ xqui'ya ycui' nu Xu'na na, cha' jlya ti' na' cha' stu'ba ti ntsu'u tyiquee ma̱ lo'o cha' nu cua nchcui' ca na'. Ná ndu'ni cha' tilaca laca nu ndya'a̱ nchcui' cha' cuiñi lo'o ma̱ cha' xcutsi̱i̱ ji'i̱ ma̱, xcube' tsa ycui' Ndyosi ji'i̱ ñati̱ bi'.