GÁLATAS 4:6 - Chatino Tataltepec

⁶ Bi' cha' laca cua nda ycui' Ndyosi Xtyi'i ycui' Ni nu tyanu ne' cresiya ji'i̱ ma̱, cha' culu'u Ni ji'i̱ ma̱ cha' cua laca ma̱ sñi' ycui' Ni. Xtyi'i ycui' Ni ndu'ni cha' taca chcui' na lo'o ycui' Ndyosi chañi ca: “¡Papá! ¡Sti na'!” ñacui̱ na.

GÁLATAS 4:6 Referans Kwoze

ROMANOS 5:5

Lo'o jua'a̱ si'i sca cha' nu nda ti ti' na laca cha' bi', sca cha' chañi laca bi'; cua'ni Ni ji'i̱. Cua ngua'ni Ni cha' ca tii cresiya ji'na, cha' ntsu'u tsa tyiquee ycui' Ndyosi ña'a̱ Ni ji'na; ngua'ni Ni jua'a̱ nu lo'o nda Ni Xtyi'i ycui' Ni ji'na.

ROMANOS 8:9

Nga'aa si'i jua'a̱ ndi'i̱ ma̱ juani, nga'aa nchca tiji̱' ti' ma̱ ji'i̱ cha' cuxi nu ntsu'u nde chalyuu; stu'ba ntsu'u cha' ji'i̱ ma̱ lo'o ycui' Ndyosi juani, cha' cua nda ycui' Ndyosi Xtyi'i Ni cha' tyanu ne' cresiya ji'i̱ ma̱. Lo'o jua'a̱ ná ntsu'u cha' ji'na lo'o Cristo tsiya' ti, si bilya tyanu Xtyi'i ycui' Ni ne' cresiya ji'na, la cui' Xtyi'i nu ndyu'u ji'i̱ Cristo.

FILIPENSES 1:19

Ndu̱ ti' na' cha' yala ti caca tso'o la cha' jna' re, cha' cua jlo ti' na' ñi'ya̱ ndijña tsa ma̱ ji'i̱ ycui' Ndyosi cha' tyu'u na' ne' chcua̱ re, cha' tyu'u na' nde liya'; jlo ti' na' cha' nxtyucua tsa la cui' Xtyi'i ycui' Jesucristo 'na.

EFESIOS 2:18

Lo'o juani ná ndu'ni cha' masi ngu' judío laca ya, masi xa' ñati̱ laca ma̱, sca ti lo ñati̱ laca na lo'o lcaa tya'a na xqui'ya Cristo, sca ti Xtyi'i ycui' Ndyosi ndu'ni cha' tyuloo na ji'i̱ Ni;

2 CORINTIOS 3:17

Lo'o nchcui' ca ti quityi re cha' ji'i̱ nu “Xu'na na”, bi' nti' ñacui̱ cha' Xtyi'i ycui' Ndyosi laca nu bi'. Lo'o jua'a̱ nu lo'o laca Xtyi'i ycui' Ndyosi nu Xu'na na loo ji'na, nga'aa tucui caca ji'i̱ tatsaa ji'na cha' cua'ni na cua ña'a̱ ca cña cuxi li'.

EFESIOS 4:30

Ná cua'ni ma̱ cha' ca xñi'i̱ ti' Xtyi'i ycui' Ndyosi; nu Xtyi'i ycui' Ndyosi ni, ñi'ya̱ laca si cua ngusta Ni cuayá' nu ji'i̱ ycui' ca Ni hichu̱' na, cha' laca na ñati̱ ji'i̱ Ni, jua'a̱ laca bi'. Tyanu bi' lo'o na ña'a̱ cuayá' nu tye chalyuu ji'na, ña'a̱ cuayá' nu tyalaa tsa̱ nu cua'ni lyaá Ni ji'na.

JUDAS 1:20

Pana nu cu'ma̱ ngu' tya'a tso'o na ni, xa' ña'a̱ cua'ni ma̱; nga'a̱ cha' xtyucua ma̱ ji'i̱ ngu' tya'a ma̱ cha' lcaa ma̱ talo ma̱ cua'ni ma̱ cña ji'i̱ ycui' Ndyosi. Taca talo ma̱ xqui'ya cha' ngusñi tso'o ma̱ cha' ji'i̱ ycui' Ni. Lo'o jua'a̱ ta Xtyi'i ycui' Ndyosi juersa ji'i̱ ma̱ cha' taca chcui' ma̱ lo'o Ni.

SAN JUAN 16:7

Pana ná cube tsa ti' ma̱. Cha' liñi nda na' lo'o ma̱ juani ―nacui̱ Jesús―, cha' tso'o la tyi'i̱ ma̱ si cua ndya'a na'. Ná ca̱a̱ Xtyi'i ycui' Ni nu xtyucua ji'i̱ ma̱ lcaa tsa̱ si ná tya'a na', cha' nu lo'o tya'a na', li' ta na' ji'i̱ nu bi' ca̱a̱ Ni.

SAN JUAN 14:16

Lo'o tya'a na', li' chcui' na' lo'o ycui' Ndyosi Sti na' cha' ta Ni chaca nu xtyucua ji'i̱ ma̱; bi' laca Xtyi'i ycui' Ndyosi nu laca su̱u̱ lcaa cha' liñi. Tyanu nu bi' lo'o ma̱ ña'a̱ cuayá' nu tye chalyuu ―nacui̱―.

SAN LUCAS 11:13

Bi' cha' lacua, si jlo ti' ma̱ cha' ta ma̱ na tso'o cacu sñi' ma̱, masi xña'a̱ tyiquee ma̱, la cui' jua'a̱ jlo ti' ycui' Ndyosi Sti ma̱ nu ntucua nde cua̱; lye la cua'ni tya'na ti' Ni ji'i̱ ma̱, cha' tya ta Ni Xtyi'i ycui' Ni tyanu ne' cresiya ji'i̱ ma̱ si jña ma̱ cha' bi' ji'i̱ Ni.

2 CORINTIOS 1:22

Ndi'ya̱ laca ñi'ya̱ si ngusta ycui' Ni sca cuayá' nu ji'i̱ Ni hichu̱' na, nu lo'o nda Ni Xtyi'i ycui' Ni nu ndyanu ne' cresiya ji'na. Xtyi'i ycui' Ndyosi laca nu nda ycui' Ndyosi ji'na yala la, cha' caca cuayá' ti' na cha' chañi cha' cua'ni Ni lo'o na lcaa ña'a̱ cha' nu nacui̱ Ni cha' cua'ni Ni.

SAN JUAN 15:26

’Cua'ni na' cha' ca̱a̱ nu laca Xtyi'i ycui' Ni lo yuu, Xtyi'i nu ndu'u slo ycui' Ndyosi ―nacui̱ Jesús―. Bi' laca nu culu'u ji'i̱ ma̱ lcaa cha' nu liñi ca, bi' laca nu xtyucua ji'i̱ ma̱ lcaa tyempo chacuayá' 'na. Nu lo'o ca̱a̱ nu bi' lo yuu, li' culu'u Ni lcaa cha' liñi nu ntsu'u 'na ji'i̱ ma̱ ―nacui̱ Jesús―.

SAN LUCAS 11:2

Li' nacui̱ Jesús ji'i̱: ―Nu lo'o chcui' ma̱ lo'o ycui' Ndyosi, ndi'ya̱ chcui' ma̱: Ndyosi Sti ya nu ntucua nde cua̱, tacati tsa cha' jinu'u̱. Ca̱a̱ nu'u̱ nde chalyuu cha' caca nu'u̱ loo ji'i̱ ya. Cua nti' ya cha' caca lcaa cha' nu nti' nu'u̱ cha' caca nde chalyuu, ñi'ya̱ nu ndyaca cha' nu nti' nu'u̱ nde cua̱.

SAN JUAN 3:34

Nda Ni ji'i̱ nu Jesucristo bi' ya̱a̱ chalyuu, lo'o jua'a̱ xcui' cha' ji'i̱ ycui' Ndyosi nda yu lo'o na xqui'ya Xtyi'i ycui' Ndyosi. Lo'o ycui' Ndyosi ni, ná ntsu'u cha' tye cha' ta Ni Xtyi'i ycui' Ni ji'na.

1 PEDRO 1:11

Xtyi'i ycui' Cristo ngulu'u lcaa cha' ji'i̱ ngu' bi', ñi'ya̱ nu caca ji'i̱ ycui' Cristo nde loo la, ñi'ya̱ nu chcube' yu nde loyuu chalyuu, ñi'ya̱ nu tlyu tsa cha' tso'o nu caca ji'i̱ yu lo'o tyaa yu ca slo ycui' Ndyosi chaca quiya'. Lo'o li' ngulana tsa nu ngu' jyo'o bi', cha' quije cha' ji'i̱ ngu' tilaca caca nu Cristo bi', ni tsa̱ tyu'u tucua yu nde chalyuu.

EFESIOS 6:18

Chcui' ma̱ lo'o ycui' Ndyosi nu lo'o nxu̱u̱ tya'a ma̱ lo'o nu cuxi, cha' jña ma̱ chacuayá' ji'i̱ Ni; lcaa tyempo xtyucua Xtyi'i ycui' Ndyosi ji'i̱ ma̱ cha' taca chcui' ma̱ lo'o Ni. Lo'o jua'a̱ chcui' ma̱ lo'o Ni cuentya ji'i̱ lcaa ñati̱ nu cua ngusñi cha' ji'i̱ Ni. Bi' cha' lacua, tii ti ti' ma̱ chcui' ma̱ lo'o Ni, cha' ná ca taja ti' ma̱.

APOCALIPSIS 19:10

Li' ngutu̱ sti̱' na' ngustii na' nde loo su ndu̱ xca̱ bi', cha' cua'ni tlyu na' ji'i̱ ngua ti' na', pana nga'aa nda bi' chacuayá' 'na: ―Nga'aa cua'ni nu'u̱ jua'a̱ lo'o na' ―nacui̱ nu xca̱ bi' 'na―. La cui' tya'a ndyu'ni na cña ji'i̱ ycui' Ni laca na. La cui' tya'a na' laca lcaa cu'ma̱ nu ngusñi tso'o ma̱ cha' tso'o nu cua nda Jesús lo'o ma̱. Ji'i̱ ycui' Ndyosi cua'ni tlyu nu'u̱ tso'o la ―nacui̱ xca̱ jna'. Nu cha' tso'o nu nda Jesús lo'o ñati̱, la cui' cha' laca nu nda ycui' Ndyosi lo'o ñati̱ nu laca tu'ba ji'i̱ Ni.

EFESIOS 1:13

Lo'o li' la cui' jua'a̱ ndyaca lo'o cu'ma̱. Clyo ndyuna ma̱ cha' liñi bi' ji'i̱ Cristo; tso'o tsa ngua ti' ma̱ lo'o ndacha' ngu' cha' bi' ji'i̱ ma̱, cha' cua ngua'ni lyaá Ni ji'i̱ ma̱ ya' nu cuxi. Ngusñi ma̱ cha' ji'i̱ Cristo li', lo'o li' nda Ni Xtyi'i ycui' Ni cha' tyanu ne' cresiya ji'i̱ ma̱, ñi'ya̱ si na cua ngusta Ni cuayá' nu ji'i̱ ycui' ca Ni hichu̱' ma̱ cha' laca ma̱ ñati̱ ji'i̱ Ni; la cui' cña nu nacui̱ Ni cha' cua'ni Ni, cua laca ngua'ni Ni li'.

1 CORINTIOS 15:45

Ndi'ya̱ nscua lo quityi ji'i̱ ycui' Ndyosi: “Ñati̱ lu'ú ngua Adán nu ñati̱ nu nguti'i̱ chalyuu clyo, lo'o jua'a̱ ycui' Ndyosi laca nu cua nda cresiya ji'i̱ yu”. Jua'a̱ cha' nda quityi cusu'. Tiya' la li' nda Ni ji'i̱ chaca ñati̱ nu ya̱a̱ chalyuu; ngua bi' ñati̱, la cui' ñi'ya̱ nu ngua Adán ñati̱. Pana tso'o la ña'a̱ ñati̱ ngua nu Jesús bi'; cua nda ycui' yu chaca cresiya nu tso'o la ji'i̱ ñati̱, cha' caca stu'ba cha' ji'i̱ yu lo'o ycui' Ndyosi.

LOS HECHOS 16:7

ndyalaa ngu' tyucui̱i̱ nu tsaa ca loyuu su cuentya Misia li'. Ngulacua ti' ngu' cha' tya tsaa la ngu' ca loyuu su cuentya Bitinia, pana ná nda Xtyi'i ycui' Jesús chacuayá' cha' tsaa ngu' cajua;

SAN JUAN 7:39

Cua nti' Jesús chcui' lo'o ngu' cha' cua ta ti Ni Xtyi'i ycui' Ni cha' tyanu ne' cresiya ji'i̱ ñati̱ nu cua ngusñi cha' ji'i̱ ycui' Ni, bi' cha' nacui̱ yu jua'a̱. Bilya ta ycui' Ndyosi Xtyi'i ycui' Ni ca̱a̱ nde chalyuu, xqui'ya cha' bilya tyaa Jesús ca su tlyu su ntucua ycui' Ndyosi Sti yu.

SAN MARCOS 14:36

―Sti na' ―nacui̱ Jesús ji'i̱ ycui' Ndyosi―, lcaa lo cña nchca cua'ni nu'u̱. Bi' cha' juani, ná ta nu'u̱ chacuayá' tyacua cha' cuxi re 'na, si cajá la ñi'ya̱ nu caca cua'ni na' cña re ―nacui̱ Jesús ji'i̱ ycui' Ndyosi Sti yu―. Pana si'i ñi'ya̱ nu nti' na' cha' caca, masi cua'ni nu'u̱ lo'o na' ñi'ya̱ nu nti' ycui' nu'u̱.

1 TESALONICENSES 4:8

Si'i sca cha' nu nchcui' ñati̱ chalyuu ti laca cha' nu nchcui' na' lo'o ma̱ juani, cha' liñi nu cua nda ycui' Ndyosi lo'o na laca cha' bi'; bi' cha' si ná taquiya' ma̱ ji'i̱ cha' bi', na cua nguxtyanu ma̱ ji'i̱ ycui' Ndyosi nu nda Xtyi'i ycui' Ni cha' tyanu Ni ne' cresiya ji'na.