GÁLATAS 4:3 - Chatino Tataltepec

³ La cui' jua'a̱ laca ji'na lo'o Jesús. Lo'o tya lyiji cuna na cha' ji'i̱ Jesús, caca ñacui̱ na cha' tya sube na, xqui'ya cha' tya ndu'ni na cña nu ndatsaa cua ña'a̱ ca jo'ó ji'na, ñi'ya̱ nu ndu'ni ti xa' ñati̱.

GÁLATAS 4:3 Referans Kwoze

COLOSENSES 2:20

Pana cu'ma̱ ni, cua nguxtyanu ma̱ ji'i̱ xa' la jo'ó nu ngua xu'na ma̱ cua tsubi' la, cua nguxtyanu ma̱ ji'i̱ lcaa cha' nu jlya tsa ti' ñati̱ chalyuu ji'i̱. Tya lo'o ngujuii Cristo lo crusi cha' cua'ni tye ji'i̱ cha' bi', tya li' cua nguxtyanu ma̱ ji'i̱ cha' bi'. Nga'aa nti' cha' tya cua'ni ma̱ ñi'ya̱ nu ndu'ni xa' la ñati̱ chalyuu; nga'aa nti' cha' taquiya' ma̱ ji'i̱ lcaa xa' la cña nu nclyo ngu' ji'i̱ ma̱,

COLOSENSES 2:8

Cui'ya tso'o ma̱ cuentya lacua, cha' ná tucui taca cñilo'o ji'i̱ ma̱ lo'o cua ña'a̱ ca cha' cuiñi nu chcui' ngu' lo'o ma̱, masi tajua' tsa chcui' ngu' bi'. Si'i ycui' Cristo nu ntucua quiya' cha' ji'i̱ ngu' lo'o nchcui' ngu' jua'a̱; bi' laca cña cua̱ ti, bi' laca cha' cuiñi nu nchcui' ñati̱ chalyuu ti, masi nchcui' ngu' cha' ji'i̱ sca jo'ó, masi nchcui' ngu' cha' ji'i̱ sca cui'i̱ nu ntsu'u nde chalyuu ti.

GÁLATAS 4:9

Lo'o juani cua nslo ma̱ ji'i̱ ycui' Ndyosi; hasta tso'o la ñacui̱ na, cua ndyuloo ycui' Ni ji'i̱ ma̱. ¿Ni cha' laca nti' ma̱ tya'a̱chu̱' ma̱ ji'i̱ cha' ji'i̱ ycui' Ndyosi lacua? Xa' cua'ni ma̱ cña nu ndatsaa cua ña'a̱ ca jo'ó nu cuxi ti bi' ji'i̱ ma̱ li', jo'ó nu ntsu'u ji'i̱ ñati̱ ti; pana ná ndyu'u tso'o cha' bi' tsiya' ti, ná caca cua'ni lyaá jo'ó bi' ji'na.

GÁLATAS 2:4

Pana ngulaa xi xa' la ñati̱ slo ya li', ngu' nu cuiñi ti nchcui' cha' ntsu'u cha' ji'i̱ ngu' lo'o Cristo; na ndu'ni ti ngu' cha' tya'a na laca ngu' bi'. Cuaana ti nguti'i̱ ngu' bi' laja lcaa tya'a na cha' ña'a̱ cuayá' ngu' bi' ji'i̱ ya, si culacua̱ ngu' nu ndya'a̱ lo'o ya, si ná culacua̱ ngu'. Ngua ti' ngu' bi' tacu̱' cha' tso'o ji'i̱ Jesús lo'o na, cha' ná ndiya ti' ngu' cha' tso'o ndi'i̱ tyiquee na chalyuu xqui'ya Jesús; ngua ti' ngu' bi' tatsaa ngu' ji'na cha' cua'ni na lcaa lo cña nu ngulo jyo'o cusu' ji'i̱ ngu' judío tya'a ya.

GÁLATAS 4:31

Lo'o lcaa na tya'a ngusñi na cha' ji'i̱ Cristo ni, si'i sñi' nu cuna'a̱ nu ndi'i̱ ndyu'ni cña msu ti laca na; na ndi'i̱ tso'o ti na ñi'ya̱ nguti'i̱ Isaac, sñi' nu cuna'a̱ nu ndi'i̱ tso'o ti bi'.

LOS HECHOS 15:10

Lo'o nu juani, ná ndiya ti' ma̱ cña nu ngua'ni ycui' Ni lo'o ngu' bi'; nti' ma̱ cha' cua'ni ngu' bi' lcaa cña ñi'ya̱ nu nguxtyanu jyo'o Moisés ji'na. Pana tucui tsa cña bi', ná ngua ji'na tsiya' ti cua'ni na lcaa cña bi'; ni lcaa jyo'o cusu' ji'na, ná ngua ji'i̱ ngu' cua'ni ngu' cña tucui bi'.

ROMANOS 8:15

Na cua nda ycui' Ndyosi Xtyi'i Ni ji'i̱ ma̱, cha' ndu'ni Xtyi'i Ni cha' caca ma̱ sñi' ycui' Ndyosi; ndu'ni bi' cha' ndi'ya̱ taca chcui' na lo'o ycui' Ndyosi: “Sti ya”, ñacui̱ na ji'i̱ Ni. Si'i cha' cuxi ndu'ni Xtyi'i Ni nu lo'o nclyo bi' cña ji'i̱ ma̱, si'i cha' xcutsi̱i̱ ji'i̱ ma̱ ñi'ya̱ nu ntsi̱i̱ ma̱ cua sa'ni la, si'i jua'a̱ cña ndu'ni nu bi'.

SAN JUAN 8:31

Lo'o li' nda Jesús cha' lo'o ngu' judío nu jlya ti' ji'i̱ yu. ―Lo'o tyanu cha' nu nclyu'u na' ji'i̱ ma̱ ne' cresiya ji'i̱ ma̱, cha' ji'i̱ ycui' Ndyosi bi', li' chañi cha' laca ma̱ ñati̱ nu ndyaca tsa'a̱ jna' ―nacui̱ Jesús ji'i̱ ngu'―.

HEBREOS 7:16

Cua nda ycui' Ndyosi cña ji'i̱ Jesús cha' caca Ni sti jo'ó, xqui'ya cha' ná ngua ji'i̱ ñati̱ chalyuu cujuii ngu' ji'i̱ yu sca ti quiya'; cua ndyu'ú Jesús chaca quiya' lo'o cua ngujuii yu. Juani ná nga'a̱ cha' tye chalyuu ji'i̱ Ni; bi' cha' laca Jesús sti jo'ó cuentya ji'na juani, si'i cha' cua'ni Ni lcaa cña nu ndyu'ni ngu' tya'a Leví nu laca ñati̱ chalyuu ti.

GÁLATAS 4:25

Stu'ba ña'a̱ naa Agar bi' lo'o ca'ya Sinaí bi', cha' jua'a̱ ndyu'u cha' bi' cha'cña ji'i̱ ngu' Arabia; la cui' ca'ya bi' laca su nda ycui' Ndyosi cha' lo'o ngu' judío tya clyo. Hasta juani tlyu tsa cña nga'a̱ cha' cua'ni lcaa ngu' judío cuentya ji'i̱ cha' cusu' bi', tsa lo cña ñi'ya̱ nu ngua'ni jyo'o Agar cuentya ji'i̱ jyo'o Abraham nu ngua sa'ni la. Lo'o nu ngu' judío nu ndi'i̱ quichi̱ Jerusalén ni, cua nti' ngu' bi' tatsaa ngu' ji'na juani cha' taquiya' na ji'i̱ lcaa cña bi'.

GÁLATAS 3:19

¿Ni cha' laca ngulo ycui' Ndyosi cña ji'i̱ nu jyo'o Moisés bi', cha' nguscua yu cña bi' lo quityi cuentya ji'i̱ Ni lacua? Tiya' la ngua cha' nda Ni cha' bi' lo'o Moisés, cha' caca cuayá' ti' na ñi'ya̱ nu nacui̱ ycui' Ndyosi cha' laca scaa cha' cuxi. Pana xti ti tyempo ndalo cha' bi' ña'a̱ cuayá' nu ndyalaa Cristo, la cui' tya'a ñati̱ ji'i̱ jyo'o Abraham; na cua nchcui' ycui' Ndyosi cha' ji'i̱ nu Cristo bi' nu lo'o cua ngüiñi cha' ji'i̱ ycui' Ni lo'o jyo'o cusu' Abraham bi' tya clyo. Nu lo'o nda Ni cha' bi' lo'o nu jyo'o Moisés bi' ni, lo'o xca̱ ji'i̱ ycui' Ni ndu̱ lo xlya ca'ya bi' cuentya ji'i̱ ycui' Ndyosi, cha' chcui' lo'o nu cusu' Moisés bi'. Cla'be la bi' ngutu̱ jyo'o Moisés bi' cha' chcui' yu lo'o ñati̱, cha' tu'ba ji'i̱ ycui' Ndyosi ngua nu cusu' bi'.

SAN MATEO 11:28

Lcaa cu'ma̱ nu nga'aa talo ma̱ cha' ti'i̱ tsa cña nu ntsu'u ji'i̱ ma̱ nde chalyuu, nti' ma̱, ca̱a̱ ma̱ tyu'u cha' ji'i̱ ma̱ lo'o na' juani; ta na' chacuayá' cha' ti̱ ti tyi'i̱ tyiquee ma̱ li'.

ROMANOS 7:14

Jlo ti' na cha' cña nu ngulo ycui' Ndyosi laca nu cha' cusu' bi'; sca ti si lo'o Xtyi'i ycui' Ndyosi cua'ni cña ne' cresiya ji'na, li' taca ji'na taquiya' na ji'i̱ cña bi'. Pana nu na' ni, ñati̱ chalyuu ti laca na', loo la laca nu cha' cuxi bi' ne' cresiya jna'.

2 CORINTIOS 11:20

Na ndalo tsa tyiquee ma̱ ji'i̱ lcaa ngu' tonto bi', masi lye tsa nclyo ngu' cña ji'i̱ ma̱, masi ndyu'ni ngu' ngana ji'i̱ ma̱, masi ndatsaa tsa ngu' ji'i̱ ma̱ cha' cua'ni ma̱ cha' cuxi, masi ndu'ni tyucuaa tsa ti' ngu' lo'o ma̱, masi lu'ba ti ntyiji'i̱ ngu' saca' ma̱; cua ndalo tsa tyiquee ma̱ ji'i̱ ngu' bi'.

GÁLATAS 4:2

Ni jacua' tyalaa tsa̱ nu caja cha' nu nguxtyanu jyo'o sti nu sube bi' ji'i̱, xa' ñati̱ laca loo ji'i̱ nu sube bi', xa' ñati̱ laca nu ndyi'ya loo cña ji'i̱ nu sube bi'.

GÁLATAS 4:8

Sa'ni la lo'o tya lyiji caca cuayá' tso'o ti' ma̱ cha' ji'i̱ ycui' Ndyosi, xa' la jo'ó ndatsaa ji'i̱ ma̱ cha' cua'ni ma̱ cña ji'i̱, jo'ó nu si'i jo'ó nu chañi ca.

GÁLATAS 4:24

Sca cui̱i̱ nu nda na' lo'o ma̱ laca cha' bi': tucua tya'a ngu' cuna'a̱ ngua bi', nu jua'a̱ nti' ñacui̱ cha' ntsu'u tucua lo cha' nu nda ycui' Ndyosi lo'o ñati̱ chalyuu. Lo xlya ca'ya Sinaí nu nscua nde Arabia, ca bi' nguxana tsaca cha'; stu'ba nti' cha' bi' lo'o Agar, nu cuna'a̱ nu ngüi'ya ti jyo'o Abraham. Ñati̱ nu jlya tsa ti' ji'i̱ cha' bi', laca ngu' ñi'ya̱ laca sca msu nu ngüi'ya ti ñati̱.

HEBREOS 5:12

Tya sa'ni tsa ngua lo'o ndyuna ma̱ cha' ji'i̱ Cristo tya clyo; cua nteje tacui tyu̱u̱ tsa tyempo, ña'a̱ cuayá' taca caca ma̱ mstru cuentya ji'i̱ Cristo nquicha', pana ña'a̱ ti ndi'i̱ ma̱ juani. Tya nti' cha' culu'u la ngu' ji'i̱ ma̱ tya chaca quiya' ñi'ya̱ ntucua quiya' cha' ji'i̱ ycui' Ndyosi, la cui' cha' nu ngua ti' Ni cha' cacha' Ni ji'i̱ ñati̱ chalyuu. Ñi'ya̱ ndu'ni sca cubi' nu tya ntyi', cha' bilya cacu bi' tyaja, jua'a̱ ndyu'ni ma̱, cha' ná nchca ca cuayá' ti' ma̱ cha' ji'i̱ ycui' Ndyosi bi'.