GÁLATAS 4:14 - Chatino Tataltepec

¹⁴ Lo'o jua'a̱ ná nchcui' cuxi ma̱ 'na li', ná ngulo'o ma̱ 'na, masi tya xi tya ndalo ma̱ 'na cha' quicha tsa na'; xa' ña'a̱ ngua'ni ma̱ lo'o na' li', ntucuá ma̱ cha' jna' ñi'ya̱ si cua laca na' sca xca̱ ji'i̱ ycui' Ndyosi, ñi'ya̱ si cua laca na' ycui' Jesucristo.

GÁLATAS 4:14 Referans Kwoze

SAN MATEO 10:40

’Chaca cha' ni: lo'o ta ñati̱ su tyi'i̱ ma̱ to' tyi ngu', stu'ba ndyu'u cha' ñi'ya̱ si cua nda ngu' bi' su tyi'i̱ na' to' tyi ngu'. Lo'o jua'a̱, lo'o ta ngu' su tyi'i̱ na' lo'o ngu', stu'ba ndyu'u cha' ñi'ya̱ si cua nda ngu' bi' su tyi'i̱ ycui' Ndyosi lo'o ngu', cha' la cui' ycui' Ndyosi laca nu cua nda Ni 'na lijya̱ na' ca nde.

1 TESALONICENSES 2:13

Lo'o jua'a̱ lcaa hora ndya ya xlya'be ji'i̱ ycui' Ndyosi cuentya ji'i̱ ma̱, xqui'ya cha' nu lo'o ndyuna ma̱ cha' tso'o ji'i̱ ycui' Ndyosi, la cui' cha' nu cua nda ya lo'o ma̱, li' jlya ti' ma̱ cha' bi'. Ngua cuayá' ti' ma̱ cha' laca cha' bi' nu cha' liñi ji'i̱ ycui' Ndyosi, si'i cha' ngua'ya hique sca ñati̱ ti; ngusñi ma̱ cha' bi' li', bi' cha' ndyu'ni ycui' Ndyosi cña ne' cresiya ji'i̱ ma̱.

HEBREOS 13:2

Tyi'u ti' ma̱ cha' chcui' tso'o ma̱ lo'o cua ña'a̱ ca ngu' xta, ngu' xa' quichi̱, si tyalaa ngu' toni'i̱ ji'i̱ ma̱; ta ma̱ su tyi'i̱ ngu' bi', cha' jua'a̱ ngua'ni xi jyo'o cusu' ji'i̱ ma̱ nu ngua sa'ni la, lo'o tiya' la li' nquijeloo ji'i̱ ngu' cha' xca̱ ji'i̱ ycui' Ndyosi nu ntsu'u nde cua̱ laca ñati̱ nu ngulaa toni'i̱ ji'i̱ ngu' bi'.

2 CORINTIOS 5:20

bi' cha' laca ndya'a̱ ya ca slo ma̱ chacuayá' ji'i̱ ycui' Cristo. Ndi'ya̱ laca lo'o nchcui' ya lo'o ma̱, ñi'ya̱ laca si ycui' Ndyosi nchcuane Ni ji'i̱ ma̱ cha' cua'a̱ jyaca̱ ma̱ ji'i̱ cha' nu nchcui' Cristo. Nchcui' ya lo'o cu'ma̱ chacuayá' ji'i̱ Cristo lacua, cha' cua'ni ma̱ cha' caca stu'ba cha' ji'i̱ ma̱ lo'o ycui' Ndyosi.

1 TESALONICENSES 4:8

Si'i sca cha' nu nchcui' ñati̱ chalyuu ti laca cha' nu nchcui' na' lo'o ma̱ juani, cha' liñi nu cua nda ycui' Ndyosi lo'o na laca cha' bi'; bi' cha' si ná taquiya' ma̱ ji'i̱ cha' bi', na cua nguxtyanu ma̱ ji'i̱ ycui' Ndyosi nu nda Xtyi'i ycui' Ni cha' tyanu Ni ne' cresiya ji'na.

GÁLATAS 4:13

Cua jlo ti' ma̱ ñi'ya̱ ngua 'na nu lo'o nda na' cha' lo'o ma̱ tya clyo, cha' taca cua'ni lyaá Cristo ji'na; quicha tsa na' nu ngua li', bi' cha' ngua laja 'na cha' ta na' cha' bi' lo'o ma̱.

1 CORINTIOS 4:10

¡Xqui'ya ycui' Cristo tonto tsa ya tu'ni! Lo'o cu'ma̱ ni, nti' ma̱ cha' tso'o tsa jlo ti' ma̱ cha' ji'i̱ Cristo. ¡Xti la cña nchca ji'i̱ cuare, nguula la cña nchca ji'i̱ cu'ma̱ nti' ma̱! ¡Chiya'a̱ la ndu'ni ngu' lo'o cuare tu'ni; chi̱ la ndu'ni ngu' loo cu'ma̱!

1 CORINTIOS 1:28

Ndu'ni Ni cha' nga'aa nchca chcui' tsiya' ti nu ñati̱ nu ndulo tsa ji'i̱ ycui' ca; bi' cha' nsubi Ni ji'i̱ ngu' ti'i, nsubi Ni ji'i̱ ngu' nu nxtyí lo'o ñati̱ ji'i̱, nsubi Ni ji'i̱ ngu' nu ná sca na ntsu'u ji'i̱ tsiya' ti, bi' ngu' laca nu nsubi ycui' Ndyosi ji'i̱ cha' caca ngu' ñati̱ ji'i̱.

SAN JUAN 13:20

Ta na' sca cha' liñi lo'o ma̱ ―nacui̱ yu―. Nu lo'o taquiya' ma̱ ji'i̱ sca ñati̱ nu ta na' cha' tya'a̱ slo ma̱, li' stu'ba laca si taquiya' ma̱ jna'; lo'o taquiya' ma̱ jna', li' stu'ba laca si taquiya' ma̱ ji'i̱ ycui' Ndyosi Sti na' nu nda jna' lijya̱a̱.

SAN LUCAS 10:16

―Ñati̱ nu cua'a̱ jyaca̱ ji'i̱ cha' nu ta cu'ma̱ lo'o, ñi'ya̱ si ndaca'a̱ jyaca̱ ngu' bi' ji'i̱ cha' nu ta na' lo'o ngu' laca; lo'o ñati̱ nu xlyú cha' hichu̱' cu'ma̱, ñi'ya̱ si nxlyú ngu' bi' cha' hichu̱' na' laca. Lo'o jua'a̱ ñati̱ nu xlyú cha' hichu̱' na' ni, na nxlyú ngu' cha' bi' hichu̱' ycui' Ndyosi nu nda jna' lijya̱a̱; jua'a̱ laca cha' ―nacui̱ Jesús ji'i̱ ngu'. Ndu'u ngu' ndyaa ngu' li'.

SAN MATEO 25:40

Lo'o li' na' nu laca na' loo tsiya' ti, chcui' na' chaca quiya' lo'o ngu' bi': “Cha' liñi nchcui' na' lo'o ma̱ juani, cha' lo'o nguxtyucua ma̱ ji'i̱ sca ngu' tya'a na' nu ntsu'u cha' ji'i̱ lo'o na', masi nguxtyucua ma̱ ji'i̱ sca ngu' ti'i ti, bi' tyempo ngua lo'o nguxtyucua ma̱ 'na”.

SAN MATEO 18:5

Nu lo'o xtyucua ma̱ ji'i̱ sca ñati̱ ñi'ya̱ nti' nu piti re xqui'ya cha' ngusñi tso'o ma̱ cha' jna', la cui' jua'a̱ na nxtyucua ma̱ 'na laca.

GÁLATAS 3:26

Sñi' ycui' Ndyosi laca lcaa cu'ma̱ juani lo'o ngusñi ma̱ cha' ji'i̱ Jesucristo, xqui'ya cha' cua ntsu'u cha' ji'i̱ ma̱ lo'o Ni.

GÁLATAS 3:28

Nu lo'o cua ngua stu'ba cha' ji'na lo'o Jesucristo, la cui' tyempo bi' ngua stu'ba cha' ji'na lo'o tya'a ñati̱ na; bi' cha' nga'aa chcui' na cha' ngu' judío laca ya, cha' ngu' xa' tsu' laca ma̱; nga'aa chcui' na cha' msu nu ngüi'ya ñati̱ laca ma̱, cha' ñati̱ nu ndi'i̱ tso'o ti laca na; nga'aa chcui' na cha' qui'yu laca na, cha' cuna'a̱ laca ma̱. Lcaa na, stu'ba cha' ji'na lo'o tya'a na juani.

GÁLATAS 4:15

Tso'o tsa ntsu'u tyiquee ma̱ ña'a̱ ma̱ 'na nu ngua tyempo bi'; hasta culo ma̱ la cui' ca si'yu cloo ma̱ cha' ta ma̱ 'na ngua ti' ma̱ nquicha', cha' cua nti' tsa ma̱ xtyucua ma̱ jna'. Lo'o juani ni, ¿na laca ngua ji'i̱ ma̱ juani?