GÁLATAS 4:12 - Chatino Tataltepec

¹² Cu'ma̱ tya'a ntsu'u cha' ji'na lo'o Jesucristo, tya'na chcui' na' lo'o ma̱ juani, cha' cua nti' na' cha' caca ma̱ ñi'ya̱ nu laca na' tsiya' ti. Nga'aa nchca tatsaa ngu' 'na juani lo'o cha' cusu' bi', masi ngu' judío laca na'; stu'ba ti laca na' lo'o cu'ma̱ juani, cha' cua ngulaá na' ji'i̱ nu cha' cusu' nu ndatsaa tsa 'na. Tya lo'o ñaa na' ca slo ma̱ tya clyo, ná sca cha' cuxi ngua'ni ma̱ lo'o na'.

GÁLATAS 4:12 Referans Kwoze

2 CORINTIOS 2:5

Cua ngua xñi'i̱ ti' ma̱ xqui'ya cha' cuxi nu ngua'ni nu ñati̱ bi'. Lo'o ngua'ni yu jua'a̱ ni, si'i sca ti na' ngua xñi'i̱ ti' na' li'; lo'o lcaa cu'ma̱ ngua xñi'i̱ xi ti' tyiquee ma̱ xqui'ya cha' cuxi bi'. Pana juani nga'aa ntsu'u cha' cuxi bi', bi' cha' nga'aa nti' na' cua'ni tyaala na' ji'i̱ cu'ma̱.

GÁLATAS 6:14

Pana nu na' ni, sca ti cha' tso'o ntsu'u chalyuu nti' na', cha' nu ngujuii ycui' Jesucristo nu Xu'na na lo crusi cuentya ji'na; bi' cha' nga'aa nti' na' ta na' xa' la cha' lo'o ñati̱. Lo'o jua'a̱ xqui'ya cha' ngujuii ycui' Cristo, nga'aa caca tatsaa nu cuxi nu ntsu'u chalyuu jna', cha' nga'aa ntsu'u cha' jna' lo'o cha' cuxi nu ntsu'u chalyuu juani.

GÁLATAS 2:14

Pana nu lo'o ngua cuayá' ti' na' cha' ná ndyu'ni ngu' ñi'ya̱ nu ndyu'u cha' tso'o nu ngulu'u Cristo ji'na cha' clyaá na ji'i̱ nu cuxi, li' nchcui' na' lo'o Pedro slo lcaa ngu' nu ngusñi cha' ji'i̱ Cristo quichi̱ bi'. Ndi'ya̱ ni na' ji'i̱ yu li': “Ngu' judío laca nu'u̱”, nacui̱ na' ji'i̱ Pedro bi'. “Tya lo'o ndyalaa nu'u̱ ca nde, cua ngua'ni nu'u̱ ñi'ya̱ nu ndu'ni ngu' xa' tsu' re, cha' tya'a na laca ngu' cuentya ji'i̱ Cristo; ná ngua'ni nu'u̱ ñi'ya̱ nu ndu'ni ngu' judío tya'a quichi̱ tyi na. Bi' cha' lacua, ná tso'o si juani nti' nu'u̱ cha' tatsaa nu'u̱ ji'i̱ ngu' xa' tsu' re, cha' cua'ni ngu' ñi'ya̱ nu ndu'ni ngu' judío.” Jua'a̱ nacui̱ na' ji'i̱ yu.

2 CORINTIOS 6:13

bi' cha' juani tya'na tsa nchcui' na' lo'o cu'ma̱. Ndi'ya̱ nti' na' chcui' na' lo'o cu'ma̱, ñi'ya̱ nchcui' ngu' lo'o sñi' ngu': Cui'ya ma̱ cha' clyu ti' ji'i̱ ya, tyucui tyiquee ma̱ cua'ni cho'o ma̱ tyiquee ma̱ ña'a̱ ma̱ ji'i̱ ya.

LOS HECHOS 21:21

Lo'o jua'a̱ cua nquijeloo cha' ji'i̱ ngu' cha' ngulu'u nu'u̱ ji'i̱ ngu' judío tya'a na nu ndi'i̱ xa' quichi̱, cha' nga'aa ntsu'u cha' taquiya' ngu' bi' ji'i̱ cha' cusu' nu nguscua jyo'o Moisés bi', ni ná ntsu'u cha' xi'yu ngu' quiji̱ sñi' ngu' cha' culacua̱ ngu'; ngulu'u nu'u̱ cha' ná nga'a̱ cha' cua'ni ngu' bi' ñi'ya̱ nu ndu'ni na cha' laca na ngu' judío, nacui̱ ngu'.

GÁLATAS 6:18

Cu'ma̱ tya'a ngusñi na cha' ji'i̱ ycui' Ndyosi, lcaa hora tyi'u ti' ma̱ ji'i̱ ycui' Jesucristo nu Xu'na na, cha' xcui' tso'o ti ndu'ni Ni lo'o ma̱. Lo'o jua'a̱ chañi tsa cha' caca cha' bi'.

2 CORINTIOS 6:11

Cu'ma̱ ngu' tya'a na, ngu' Corinto, ntsu'u tsa tyiquee ya ña'a̱ ya ji'i̱ ma̱, bi' cha' cua liñi tsa nchcui' ya lo'o cu'ma̱ lcaa cha' nu ntsu'u tyiquee ya.

GÁLATAS 4:11

bi' cha' quiña'a̱ tsa cha' nclyacua ti' na' si ná ngua'nijo'o tsiya' ti lcaa cha' nu ngulu'u na' ji'i̱ ma̱, si xlya'be ti ngulu'u na' cha' bi' ji'i̱ ma̱.

GÁLATAS 4:13

Cua jlo ti' ma̱ ñi'ya̱ ngua 'na nu lo'o nda na' cha' lo'o ma̱ tya clyo, cha' taca cua'ni lyaá Cristo ji'na; quicha tsa na' nu ngua li', bi' cha' ngua laja 'na cha' ta na' cha' bi' lo'o ma̱.