GÁLATAS 2:2 - Chatino Tataltepec

² Ndyaa ya Jerusalén, xqui'ya cha' cua ngua'ni ycui' Ndyosi cha' ngua'ya sca cha' hique na' cha' tyaa ya; bi' cha' lo'o cua ndyalaa ya quichi̱ bi', li' ndya'a̱ ca su ntucua ngu' ycui' ti ngu', nchcui' na' lo'o ngu' nu laca loo la ji'i̱ taju tya'a ñati̱ ji'i̱ Cristo quichi̱ bi'. Li' ndacha' na' ji'i̱ ngu' bi', nchcui' na' ni cha' nu nda na' lo'o ngu' xa' tsu' cuentya ji'i̱ Cristo, cha' ngua'ni lyaá Cristo ji'na ji'i̱ nu cuxi. Jua'a̱ nchcui' na' lo'o ngu' bi', xqui'ya cha' ná nti' na' cha' culacua cuxi ti' ngu' bi' ña'a̱ ngu' jna'; ná nti' na' cha' chcui' ngu' cha' ná tso'o laca cha' nu nda na' lo'o cu'ma̱ ngu' xa' tsu' tya tsubi' la, masi chcui' ngu' cha' ná tso'o ndu'ni na' juani.

GÁLATAS 2:2 Referans Kwoze

GÁLATAS 2:6

Ná ndube ti' na' masi nacui̱ ngu' cha' tlyu tsa ñati̱ laca nu ngu' nu laca loo ji'na bi'; jlo ti' na' cha' sca ti cuayá' laca lcaa na cuentya ji'i̱ ycui' Ndyosi. Pana masi loo laca ngu' bi', ná ngulo ngu' bi' cña jna' cha' culu'u na' xa' la cha' ji'i̱ cu'ma̱ ngu' xa' tsu'.

FILIPENSES 2:16

nu lo'o ta ma̱ cha' lo'o ngu', si chcui' ma̱ cha' tso'o ji'i̱ Cristo nu taca ta chalyuu nu ná nga'a̱ cha' tye ji'i̱ ngu'. Si jua'a̱ cua'ni ma̱, tso'o tsa caca tyiquee na' ña'a̱ na' ji'i̱ ma̱ lo'o tyalaa tsa̱ nu cua'ni cuayá' Cristo ji'i̱ lcaa ñati̱. Li' taca ca cuayá' ti' na' cha' tso'o ti ngutu'u scua cña bi' 'na, si'i na nguliji yu'u cña bi' jua'a̱ ti.

1 TESALONICENSES 3:5

Lo'o ngua cuayá' ti' na' cha' bi', nga'aa ndalo na' li'; xñi'i̱ tsa ti' na' cha' ná jlo ta̱' ñi'ya̱ ndyaca cha' ji'i̱ ma̱. Bi' cha' nda na' ji'i̱ yu tya'a na ñaa yu slo ma̱, cha' ca cuayá' ta̱' si ña'a̱ ti nxñi tso'o ma̱ cha' tso'o ji'i̱ ycui' Ndyosi, si tyiji̱loo ma̱ ji'i̱ nu xña'a̱ nu nti' cha' cua'ni ma̱ cha' cuxi. Cua nguna' cña ji'i̱ ya lo'o ma̱ si ná caca tyiji̱loo ma̱ ji'i̱ nu xña'a̱ bi'.

GÁLATAS 2:9

Bi' cha' ngutucuá ngu' cña 'na, nu Jacobo lo'o Pedro lo'o Juan bi', la cui' ngu' nu laca loo ji'i̱ ngu' tya'a ngusñi na cha' ji'i̱ Cristo. Stu'ba ti nchcui' ngu' bi', cha' tso'o tsa ngua'ni ycui' Ndyosi lo'o na' nu lo'o nda Ni cña bi' 'na. Li' ngusñi ya' tya'a ya lo'o ngu' bi', na' lo'o Bernabé, cha' caca cuayá' ti' ya cha' tso'o ti nti' ngu' ña'a̱ ngu' ji'i̱ ya, cha' stu'ba ntsu'u cha' ji'i̱ ngu' lo'o ya, cha' tya tsaa la ya quichi̱ tyi ngu' xa' tsu'. Tyanu ycui' ngu' bi' ca su ndi'i̱ tya'a ya, nu ngu' judío bi' li'.

1 CORINTIOS 9:26

Lo'o na', ñi'ya̱ laca sca ñati̱ nu nxna posta, jua'a̱ ndu'ni na' nde chalyuu; liñi tsa nxna na' ña'a̱ cuayá' tyalaa na' su ndye tyucui̱i̱. La cui' ñi'ya̱ laca si nxu̱u̱ tya'a na' lo'o ndacu̱' ti na', ná nducu̱ na' ndacu̱' na' lo cui'i̱ ti.

1 CORINTIOS 1:23

Pana nu na ni, ndacha' na ji'i̱ ngu' cha' ji'i̱ Cristo nu cua ngujuii lo crusi cha' cua'ni lyaá ji'na. Li' chiya'a̱ nti' ngu' judío lo'o ndyuna ngu' cha' nu nchcui' na re; lo'o jua'a̱ ngu' xa' tsu', cha' tonto nchcui' na nti' ngu' bi', si'i cha' bi' tsiya' ti nti' ngu' bi'.

1 CORINTIOS 9:24

Ndi'ya̱ laca cña nu nda Ni 'na, ñi'ya̱ ndyaca lo'o cua'ni ngu' sca posta lo'o nxna ngu'. Tyu̱u̱ tya'a ngu' xna ngu' stu'ba ti li', masi sca ti yu tyiji̱loo ji'i̱ ca ta'a ngu' su tye cha' bi'. La cui' jua'a̱ caca lo'o na, nga'a̱ cha' tsa cu' ti cua'ni na cña ña'a̱ cuayá' nu tye chalyuu ji'na.

1 CORINTIOS 2:2

Laja lo'o nguti'i̱ na' quichi̱ tyi ma̱, ngüiñi ti' na' cha' ná ta na' xi xa' la cha' lo'o ma̱ tsiya' ti; sca ti cha' ji'i̱ ycui' Jesucristo, la cui' Cristo nu ngujui'i̱ ca'a̱ ngu' ji'i̱ lo crusi, tsa bi' ti cha' nchcui' na' lo'o ma̱ li'.

LOS HECHOS 15:12

Cuaana ti ndi'i̱ lcaa ngu' li'. Tso'o ti ndyuna ngu' lo'o nda Bernabé lo'o Pablo cha' lo'o ngu', lcaa ña'a̱ cha' tlyu nu ngua'ni ycui' Ndyosi ca su nguta'a̱ ngu' slo ñati̱ xa' tsu'.

LOS HECHOS 15:4

Ndyalaa Pablo lo'o Bernabé lo'o tya'a ndya'a̱ ngu' ca quichi̱ Jerusalén li'. Tso'o nchcui' ñati̱ ji'i̱ Jesucristo bi' lo'o ngu' li'; jua'a̱ ndi'i̱ ngu' nu ngua tsa'a̱ ji'i̱ Jesús tya clyo, ndi'i̱ ngu' nu laca loo ji'i̱ taju ñati̱ quichi̱ bi'. Lo'o li' nguxana Pablo lo'o Bernabé ndacha' ngu' ji'i̱ ngu' bi' ñi'ya̱ nu ngua'ni ycui' Ndyosi lo'o ñati̱ xa' tsu' ca su ndyaa ngu'.

FILIPENSES 2:29

Caca chaa ti' ma̱ lo'o yu lacua; tso'o tsa chcui' ma̱ lo'o yu lo'o tyalaa yu ca slo ma̱, cha' laca yu tya'a ngusñi ma̱ cha' ji'i̱ nu Xu'na na. Lo'o jua'a̱ cua'ni chi̱ ma̱ loo cua ña'a̱ ca ñati̱ nu cua'ni ñi'ya̱ nu ngua'ni yu bi';

GÁLATAS 1:16

Lo'o jua'a̱ ngua'ni Ni cha' ndyuloo na' ji'i̱ Jesús, nu sca ti Sñi' ycui' Ni, cha' li' nchca 'na ta na' cha' ji'i̱ Ni lo'o lcaa cu'ma̱, ñati̱ nu ndi'i̱ xa' tsu'. Li' ndacha' na' ji'i̱ lcaa ma̱ cha' xqui'ya Jesús taca clyaá ma̱ ji'i̱ cha' cuxi nu ntsu'u ji'i̱ ma̱. Nu lo'o ngusñi ca ti na' cha' bi', li' hora ti ndu'u na' nguta'a̱ na' nde loyuu su naa Arabia; ca bi' nguti'i̱ na' ycui' ti na'. Ná nguta'a̱ na' ndyaana na' sca cui̱i̱ nu ta sca ñati̱ lo'o na'; la cui' ti jua'a̱ ná nguta'a̱ na' nde quichi̱ Jerusalén cha' chcui' na' lo'o ngu' tya'a ndyu'ni na' cña nu ndi'i̱ nde jua, masi cua nda ngu' bi' cha' ji'i̱ Jesús lo'o ñati̱ clyo la, nu lo'o tya lyiji cuna na' cha' bi'. Pana nguta'a̱ na' nde Arabia, lo'o tiya' la li' nguxtyu̱u̱ na' nguta'a̱ na' nde quichi̱ Damasco.

LOS HECHOS 23:11

Lo'o ngua talya lye, li' ndyalaa ycui' nu Xu'na na slo Pablo. ―Cua'ni tlyu tyiquee nu'u̱ Pablo ―nacui̱ Ni―. Ñi'ya̱ cua nchcui' nu'u̱ cha' jna' nde quichi̱ Jerusalén re, jua'a̱ ntsu'u cha' chcui' nu'u̱ cha' jna' ca quichi̱ Roma.

LOS HECHOS 18:9

Lo'o li' cua na'a̱ Pablo ji'i̱ Jesús nu Xu'na na, ñi'ya̱ si na nchcui' xcalá yu ngua. ―Ná cutsi̱i̱ nu'u̱ ―nacui̱ Jesús ji'i̱ yu―. Ná ca taja ti' nu'u̱ cha' culu'u nu'u̱ cha' jna' ji'i̱ ñati̱ ―nacui̱ Ni―.

LOS HECHOS 5:34

Pana hora ti ndatu̱ sca nu cusu' slo ngu' li'. Gamaliel naa nu cusu' bi'. Ngu' fariseo laca nu Gamaliel bi', nu tso'o tsa nclyu'u cha' ji'i̱ ycui' Ndyosi ji'i̱ tya'a quichi̱ tyi yu. Nclyu'u yu cha' nu nguscua jyo'o cusu' lo quityi sa'ni, lo'o jua'a̱ ndiya tsa ti' lcaa ñati̱ ña'a̱ ngu' ji'i̱ nu cusu' bi'. Juani nchcui' yu lo'o ngu' cha' tso'o la si tsaa nu ngu' nu ngua tsa'a̱ ji'i̱ Jesucristo bi' nde liya' sca hora ti.

SAN MATEO 10:16

’Cua'a̱ jyaca̱ ma̱ 'na: Ta na' ji'i̱ ma̱ cha' tsaa ma̱ xa' quichi̱ ñi'ya̱ si laca ma̱ xlya' nu ndya'a̱ laja bo'o tyaala; bi' cha' tii ti ti' ma̱ tya'a̱ ma̱ laja ñati̱, ñi'ya̱ nti' ndya'a̱ cuaña nu tii tsa ti'. Tso'o ti tya'a̱ ma̱, ná cua'ni tyaala ma̱ ji'i̱ ngu' tsiya' ti. Caca ma̱ ñi'ya̱ laca paloma, cha' masu tsa ni', ná tyaala ni' tsiya' ti.

LOS HECHOS 15:2

Li' nguxana Pablo lo'o Bernabé nxlyú ngu' cha' hichu̱' ngu' bi'. Xqui'ya cha' ná nchca caca stu'ba cha' bi' lo'o ngu' tsiya' ti, bi' cha' nu ñati̱ ji'i̱ Jesucristo bi' ni, ngusubi ngu' ji'i̱ Pablo, lo'o ji'i̱ Bernabé, lo'o ji'i̱ xi xa' la ñati̱, cha' tsaa ngu' nde quichi̱ Jerusalén. Tsaa ngu' slo ngu' nu ngua tsa'a̱ ji'i̱ Jesucristo tya clyo, slo ngu' cusu' nu ji'i̱ la cui' tya'a taju ngu', cha' chcui' tube ngu' ñi'ya̱ caca cha' bi' ji'i̱ ngu': si xi'yu ngu' quiji̱ ngu', si ná xi'yu ngu' quiji̱ ngu'.

ROMANOS 9:16

Bi' cha' laca cha' si'i na ndu'ni clyu ti' ycui' Ndyosi ji'na xqui'ya cha' nu ndiya ti ti' na ji'i̱ Ni, si'i na ndu'ni clyu ti' Ni ji'na xqui'ya cha' nguula tsa ndyu'ni na cña ji'i̱ Ni; laca cha' tya'na ti ti' Ni ña'a̱ Ni ji'na, bi' cha' ngua'ni lyaá Ni ji'na.

2 CORINTIOS 12:1

Tya nti' cha' chcui' na' la xi cha' ji'i̱ ycui' ca ti na', masi ná tso'o chcui' na' jua'a̱ lo'o xa' ñati̱. Juani ta na' sca cha' lo'o ma̱ ñi'ya̱ nu cua nchcui' xcalá na' tsaca quiya'. Laja xcalá ti na', li' ngulu'uloo ycui' nu Xu'na na 'na, lo'o jua'a̱ nda Ni sca cha' lo'o na' li'.

GÁLATAS 1:6

Ndube tsa ti' na' cha' yala ti nguta'a̱chu̱' ma̱ ji'i̱ ycui' Ndyosi, masi ngusubi Ni ji'i̱ ma̱ xqui'ya cha' ntsu'u tsa tyiquee Cristo ña'a̱ ji'na; ndube ti' na' cha' nduna ma̱ chaca cha' nu si'i cha' ji'i̱ ycui' Ndyosi laca, nu nacui̱ ngu' cha' taca cua'ni lyaá ji'na ji'i̱ nu cuxi.

GÁLATAS 1:12

Si'i ñati̱ laca nu nda cha' bi' lo'o na' tya clyo, ni sca ñati̱ chalyuu ná ngulu'u cha' bi' 'na; ycui' Jesucristo ngulu'u loo yu 'na, ycui' bi' laca nu cua nda cha' bi' lo'o na' li'.

GÁLATAS 5:7

Tso'o tsa ndyu'ni ma̱ nquicha'. ¿Tilaca laca nu ndacu̱' cha' ji'i̱ ma̱, cha' nga'aa taquiya' la ma̱ ji'i̱ cha' liñi nu cua nda Cristo lo'o ma̱?

2 TIMOTEO 4:7

Cua ngusu̱u̱ tya'a na' lo'o nu cuxi; cua ndye nguta'a̱ na' tyucui̱i̱ ji'i̱ Jesucristo, bi' cha' cua tyalaa ti na' ca slo ycui' Ndyosi. Nu cha' tso'o nu cua ngusñi na' ni, cua ndyanu tso'o cha' bi' ne' cresiya 'na,

HEBREOS 12:1

Lo'o juani, ¿ñi'ya̱ cua'ni na lacua? Ndi'ya̱ cua'ni na nde chalyuu: Ñi'ya̱ si tya ndi'i̱ jyo'o cusu' bi' tsa tlyu ti lo'o na, jua'a̱ cua'ni na, cha' jua'a̱ tyi'u tso'o ti' na lcaa ña'a̱ cha' tlyu nu ngua'ni ngu' bi' tya sa'ni la, xqui'ya cha' jlya ti' ngu' ji'i̱ ycui' Ndyosi. Ndu'ni cha' xtyanu na lcaa cha' nu ndaca'a ji'na cha' ná xñi tso'o na cha' ji'i̱ Jesús; xtyanu na lcaa cha' cuxi nu tiji̱' tsa ti' na ji'i̱, culochu̱' na cha' bi'. Lo'o li' nguula ti' tyiquee na cua'ni na cha' tso'o nde chalyuu, tsa lo cua tyempo nu tya ta ti Ni ji'na.