FILIPENSES 2:5 - Chatino Tataltepec

⁵ Tso'o si culacua ti' ma̱ ñi'ya̱ nclyacua ti' ycui' Jesucristo. Ndi'ya̱ ngua cha' ji'i̱ yu:

FILIPENSES 2:5 Referans Kwoze

1 JUAN 2:6

Ñati̱ nu nchcui' lo'o xa' la ngu' cha' ñati̱ ji'i̱ Jesucristo laca ycui', ntsu'u cha' cua'ni ñati̱ bi' cña, cua ña'a̱ ca cña nu ngua'ni ycui' Jesucristo.

SAN MATEO 11:29

Xñi ma̱ cña nu ta na' ji'i̱ ma̱, lo'o li' ca tsa'a̱ ma̱ lcaa cha' 'na. Tya'na tsa ti' na' ña'a̱ na' ji'i̱ ma̱, lo'o jua'a̱ talo tsa tyiquee na' ji'i̱ ma̱; ti̱ ti tyi'i̱ tyiquee ma̱ lo'o cua ngüityi̱ na' cha' cuxi nu ntsu'u ne' cresiya ji'i̱ ma̱.

1 PEDRO 2:21

Tya lo'o ngusubi Ni ji'i̱ ma̱, tya li' jlo ti' Ni cha' jua'a̱ xcube' ngu' ji'i̱ ma̱, cha' la cui' jua'a̱ nguxcube' ngu' ji'i̱ ycui' Cristo tya clyo la cuentya ji'i̱ cu'ma̱. Jua'a̱ ngua cha' ngulu'u Cristo ji'i̱ ma̱ ñi'ya̱ caca talo tyiquee ma̱ lo'o xcube' ngu' ji'i̱ ma̱.

1 PEDRO 4:1

Lo'o ndyi'u ti' ma̱ cha' nchcube' Cristo nde chalyuu, li' caca nguula la ti' ma̱ cha' talo tyiquee ma̱ lo'o chcube' cu'ma̱; ñi'ya̱ nu ndalo tyiquee ycui' Cristo, jua'a̱ taca talo tyiquee ma̱ lo'o chcube' ma̱ li'. Nga'aa caca cua'ni cha' cuxi ngana ji'i̱ ma̱ si lo'o cu'ma̱ chcube' ma̱ jua'a̱.

1 CORINTIOS 10:33

Lcaa su ndyu'ni na' cña ndube ti' na' ji'i̱ xa' ñati̱, si caca tso'o cresiya ji'i̱ ngu' lo'o cua'ni na' cña bi'. Si'i na tyacua cha' tso'o ji'i̱ ycui' ca na', nti' na' cha' caca tso'o cresiya ji'i̱ cua ña'a̱ ca ñati̱, cha' caja ñi'ya̱ clyaá ngu' ji'i̱ nu cuxi li'.

EFESIOS 5:2

Tso'o ti tyu'u tyiquee ma̱ ña'a̱ ma̱ ji'i̱ ñati̱, cha' la cui' jua'a̱ ntsu'u tsa tyiquee Cristo ña'a̱ Ni ji'na. Nu lo'o ñaa Jesús chalyuu ni, cua ntaja'a̱ Jesús nda yu tyucui ña'a̱ ycui' ca yu cha' caca sca msta̱ ji'i̱ ycui' Ndyosi cuentya ji'na. Tso'o tsa ngua ti' ycui' Ndyosi li'.

ROMANOS 15:5

Lo'o jua'a̱ cua nti' ya cha' xtyucua Ni ji'i̱ cu'ma̱, la cui' nu sca ti ycui' Ndyosi nu nxtyucua ji'i̱ lcaa na cha' talo tyiquee na, nu ndu'ni cha' ca tlyu tyiquee na. Xtyucua Ni ji'i̱ cu'ma̱, cha' jua'a̱ talo tyiquee ma̱ ji'i̱ tya'a ntsu'u cha' ji'i̱ ma̱ lo'o Ni, cha' caca stu'ba tyiquee ma̱ lo'o tya'a ma̱ xqui'ya Jesucristo.

LOS HECHOS 20:35

Ngua'ni na' jua'a̱ cha' culu'u na' ji'i̱ ma̱ ñi'ya̱ nu cua'ni ma̱ lo'o ngu' nu ntsu'u tsa cha' nu lyiji ji'i̱. La cui' jua'a̱ ntsu'u cha' tyi'u ti' na ji'i̱ cha' nu cua nchcui' ycui' Jesús nu Xu'na na lo'o na ndi'ya̱: “Tso'o ntsu'u tyiquee ma̱ si ta ngu' sca cha' xlya'be ji'i̱ ma̱, pana tlyu la cha' tso'o laca si ta ma̱ sca cha' xlya'be ji'i̱ tya'a ñati̱ ma̱”, nacui̱ Jesús ji'na.

ROMANOS 15:3

ñi'ya̱ nu ngua'ni ycui' Cristo, ni sca cña ná ngua'ni yu cha' ji'i̱ ti yu. Cua ntsu'u sca cha' nu nscua lo quityi cusu', sca cha' nu nda yu lo'o ycui' Ndyosi Sti yu ndi'ya̱: “Lcaa cha' cuxi nu nchcui' ngu' jinu'u̱, cua ndyanu cha' bi' hichu̱' na'; yabe' nu ngusta ngu' jinu'u̱ laca bi'”.

SAN LUCAS 22:27

¿Tilaca laca nu ndulo la cha' ji'i̱ lacua? ¿Ha nu ntucua to' mesa cha' cacu? ¿Ha msu nu nxacu ji'i̱ yu? Chañi cha' yu nu ntucua to' mesa ni, bi' laca nu ndulo la cha' ji'i̱, cha' bi' laca xu'na ngu'. Pana nu na' ni, ñi'ya̱ si laca na' sca msu ji'i̱ ma̱, jua'a̱ ti ndi'i̱ na' laja cu'ma̱ ―nacui̱ Jesús―.

ROMANOS 14:15

Lo'o ngu' tya'a ntsu'u cha' ji'i̱ ma̱ lo'o Jesús ni, si ña'a̱ ngu' cha' ndyacu ma̱ sca na nu ná ntsu'u chacuayá' cacu ycui' ngu', nti' ngu', chiya'a̱ culacua ti' ngu' bi' li'; ñi'ya̱ laca si ná tso'o ntsu'u tyiquee ma̱ ña'a̱ ma̱ ji'i̱ ngu', bi' cha' ndyacu ma̱ na bi' culacua ti' ngu'. Ná tso'o jua'a̱. Ná ntsu'u chacuayá' ji'i̱ ma̱ cacu ma̱ na laca nu nti' ti ma̱, si jua'a̱ cua'ni ma̱ cha' xtyanu ngu' tya'a ma̱ cha' ji'i̱ Cristo xqui'ya cha' ndyacu ma̱ na bi'. Lo'o ngu' bi', laca ngu' cuentya ji'i̱ ycui' Ndyosi; xqui'ya ngu' bi', bi' cha' ngujuii Cristo.

LOS HECHOS 10:38

Jlo ti' ma̱ ñi'ya̱ nguti'i̱ Jesús chalyuu, la cui' Jesús Nazaret. Cua ngusubi ycui' Ndyosi Sti yu ji'i̱ Jesús, nda la Ni juersa ji'i̱ nu Jesús bi' nu lo'o ndyalaa Xtyi'i ycui' Ni lo yu. Lcaa su nguta'a̱ yu ngua'ni yu cha' tso'o lo'o ñati̱, lo'o jua'a̱ ngua'ni yu cha' ndyaca tso'o ngu' nu quicha tsa, masi ñati̱ nu ntsu'u tsa cha' ti'í ji'i̱ xqui'ya cha' ngusñi cui'i̱ cuxi ji'i̱ ngu'. Ngua'ni Jesús cña jua'a̱, cha' nguxtyucua ycui' Ndyosi ji'i̱ yu.

FILIPENSES 1:1

Pablo lo'o Timoteo laca cuare. Tyucuaa ya ndyu'ni ya cña ji'i̱ Jesucristo, bi' cha' nscua ya quityi re cha' ca̱a̱ ca slo cu'ma̱, cha' tya'a ñati̱ ji'i̱ ycui' Ndyosi laca na. Cua ngusñi na cha' ji'i̱ Jesucristo, bi' cha' laca na ñati̱ ji'i̱ ycui' Ndyosi. La cui' jua'a̱ lo'o quityi re chcui' ya xi lo'o lcaa ngu' cusu' nu laca loo ji'i̱ ña'a̱ taju cu'ma̱, jua'a̱ chcui' ya xi lo'o xa' la ngu' nu laca cña, nu ntsu'u cha' xtyucua ji'i̱ ma̱.