FILIPENSES 2:12 - Chatino Tataltepec

¹² Cu'ma̱ ngu' tya'a na nu tyaca'a tsa ma̱ 'na, cua ndaquiya' tsa ma̱ ji'i̱ cha' nu nchcui' na' lcaa tsa̱ lo'o nguti'i̱ na' lo'o ma̱; ña'a̱ ti tya ndulo tsa cha' ji'i̱ ma̱ cha' taquiya' la ma̱ ji'i̱ cha' nu nchcui' na', masi tyijyu' tsa nga'a̱ na' ca su ndi'i̱ ma̱ juani. Ña'a̱ ti cua'ni cña ti' ma̱ cha' caca lyiji lcaa cha' nu ngua ti' ycui' Ndyosi cua'ni Ni ne' cresiya ji'i̱ ma̱ lo'o ngua'ni lyaá Jesucristo ji'i̱ ma̱. Xti ti cha' tyu'u tyiquee ma̱ cuentya ji'i̱ ycui' ma̱, pana cube la ti' ma̱ ji'i̱ ycui' Ndyosi.

FILIPENSES 2:12 Referans Kwoze

1 CORINTIOS 15:58

Cu'ma̱ tya'a ngusñi na cha' ji'i̱ Jesús, ntsu'u tsa tyiquee na' ña'a̱a̱ ji'i̱ cu'ma̱. Ndi'ya̱ ñacui̱ na' ji'i̱ ma̱, cha' ña'a̱ ti xñi tso'o ma̱ cha' ji'i̱ ycui' Ndyosi, lcaa tsa̱ jlya ti' ma̱ ji'i̱ Ni; xcui' lye tsa cua'ni ma̱ cña ji'i̱ ycui' nu Xu'na na, ná ca taja ti' ma̱ lo'o cua'ni ma̱ cña bi'. Cua jlo ti' ma̱ cha' ná culiji jua'a̱ ti sca cña nu ndyu'ni ma̱ cuentya ji'i̱ ycui' Ndyosi.

HEBREOS 4:11

Lcaa tsa̱ cua'ni cña ti' na lacua, cha' ña'a̱ ti tyu'u cha' ji'na lo'o ycui' Ni, cha' taca tyi'i̱ tso'o ti na. Ná cua'ni na ñi'ya̱ nu ngua'ni jyo'o cusu' bi', nu ná ndaquiya' tsiya' ti ji'i̱ ycui' Ndyosi, cha' li' ná ngua tyalaa ngu' bi' ca su nacui̱ Ni cha' tsaa ngu'.

1 PEDRO 2:11

Cu'ma̱ ngu' tya'a tso'o na, cua nscua cha' tyi'i̱ na ca slo ycui' Ni tyempo ca nde loo la, bi' cha' nga'a̱ cha' tyi'i̱ na chalyuu juani ñi'ya̱ si laca na ngu' tyijyu' nu ná ntsu'u tyi ngu'. Lye tsa chcui' na' lo'o ma̱ juani cha' nga'aa cua'ni ma̱ cua ña'a̱ ca cha' cuxi nu ndijña tyiquee ma̱ cha' cua'ni ma̱; nga'aa taquiya' ma̱ ji'i̱ cha' cuxi bi', cha' jua'a̱ nga'aa caca ji'i̱ nu cha' cuxi bi' cua'ni ñu'u̱ ji'i̱ ma̱.

SAN MATEO 11:29

Xñi ma̱ cña nu ta na' ji'i̱ ma̱, lo'o li' ca tsa'a̱ ma̱ lcaa cha' 'na. Tya'na tsa ti' na' ña'a̱ na' ji'i̱ ma̱, lo'o jua'a̱ talo tsa tyiquee na' ji'i̱ ma̱; ti̱ ti tyi'i̱ tyiquee ma̱ lo'o cua ngüityi̱ na' cha' cuxi nu ntsu'u ne' cresiya ji'i̱ ma̱.

FILIPENSES 1:27

Bi' cha' juani, cui'ya ma̱ cuentya ñi'ya̱ nga'a̱ cha' cua'ni ma̱ chalyuu cuentya ji'i̱ cha' ji'i̱ Cristo nu cua ngusñi ma̱. Si jua'a̱ ndu'ni ma̱, li' ná ndu'ni cha' masi ca̱a̱ na' ca quichi̱ tyi ma̱, masi ná caca ca̱a̱ na'. Ná tyiquee' caja cha' 'na cha' sca ti cha' ntsu'u tyiquee ma̱ lo'o tya'a ma̱, cha' ndalo tsa tyiquee ma̱ ji'i̱ tya'a cusu̱u̱ ma̱ ca bi'; ná tyiquee' stu'ba ti culacua ti' ma̱ lo'o tya'a ma̱ laja lo'o tyiquee' tsa nchcui' ma̱ lo'o ngu' cha' xñi ngu' cha' tso'o bi' ji'i̱ Cristo.

2 PEDRO 3:18

Pana tso'o la ca tsa'a̱ la ma̱ cha' tso'o ji'i̱ Jesucristo nu Xu'na na, nu cua ngua'ni lyaá ji'na; li' taca tyi'i̱ tso'o la tyiquee ma̱ cuentya ji'i̱ ycui' nu Xu'na na. Cua'ni tlyu na ji'i̱ ycui' Ni nde chalyuu, lo'o jua'a̱ ná nga'a̱ cha' tye tsa̱ nu cua'ni tlyu na ji'i̱ Ni ca slo ycui' Ni. Jua'a̱ caca cha' lacua.

HEBREOS 5:9

Tiya' la li', lo'o cua ngua lcaa cha' ji'i̱ Jesús cha' cua ngua'ni yu cña nu cua nda ycui' Ndyosi ji'i̱ yu cha' cua'ni yu, tya li' ntucua quiya' cha' cua'ni lyaá Jesús ji'i̱ cua ña'a̱ ca ñati̱ chalyuu nu tyaja'a̱ cua'a̱ jyaca̱ ji'i̱ cha' nu cua nchcui' yu lo'o; ná tye tsiya' ti cha' cua'ni lyaá Ni ji'na ji'i̱ cha' cuxi nu ntsu'u ji'na.

2 TIMOTEO 2:10

bi' cha' talo tyiquee na' ji'i̱ ngu', masi nchcube' tsa ngu' jna'. Talo na' ji'i̱ cha' cuxi bi' cuentya ji'i̱ ca ta'a ñati̱ nu ngusubi ycui' Ndyosi ji'i̱, cha' lo'o ñati̱ bi' ngua'ni lyaá Jesucristo ji'i̱, cha' caja chalyuu nu ná nga'a̱ cha' tye ji'i̱ ñati̱ bi'. Caca tyi'i̱ ngu' bi' ca slo ycui' Ndyosi su tso'o tsa ña'a̱ lcaa cha'.

HEBREOS 4:1

Cha' nu laca juani, cua nguxtyanu Ni sca cha' lo'o na, cha' taca tyalaa na ca slo Ni, cha' tyi'i̱ tso'o ti na ca bi'. Tso'o si cube ti' na ji'i̱ lcaa ngu' tya'a na, cha' ná tyu'utsu' ni tsaca ngu' ji'i̱ tyucui̱i̱ liñi nu tsaa ca su tyi'i̱ na lo'o ycui' Ndyosi.

HEBREOS 12:1

Lo'o juani, ¿ñi'ya̱ cua'ni na lacua? Ndi'ya̱ cua'ni na nde chalyuu: Ñi'ya̱ si tya ndi'i̱ jyo'o cusu' bi' tsa tlyu ti lo'o na, jua'a̱ cua'ni na, cha' jua'a̱ tyi'u tso'o ti' na lcaa ña'a̱ cha' tlyu nu ngua'ni ngu' bi' tya sa'ni la, xqui'ya cha' jlya ti' ngu' ji'i̱ ycui' Ndyosi. Ndu'ni cha' xtyanu na lcaa cha' nu ndaca'a ji'na cha' ná xñi tso'o na cha' ji'i̱ Jesús; xtyanu na lcaa cha' cuxi nu tiji̱' tsa ti' na ji'i̱, culochu̱' na cha' bi'. Lo'o li' nguula ti' tyiquee na cua'ni na cha' tso'o nde chalyuu, tsa lo cua tyempo nu tya ta ti Ni ji'na.

FILIPENSES 4:1

Cu'ma̱ tya'a ngusñi na cha' ji'i̱ Jesús, tyaca'a tsa cu'ma̱ 'na; ñati̱ nu cua nda ycui' Ndyosi jna' laca cu'ma̱, xqui'ya cha' ndyu'ni na' cña ji'i̱ Ni. Tso'o tsa ntsu'u tyiquee na' xqui'ya cu'ma̱, lo'o jua'a̱ xñi'i̱ xi ti' na' lo'o ná ndi'i̱ na' ca slo cu'ma̱. Nga'a̱ cha' cua'ni ma̱ cha' tyanu tso'o cha' ji'i̱ ycui' nu Xu'na na ne' cresiya ji'i̱ ma̱.

ROMANOS 2:7

sca chalyuu tso'o nu ná nga'a̱ cha' tye, bi' laca nu ta Ni ji'i̱ ngu' tso'o, nu ná nchca taja ti' ndu'ni ngu' cña tso'o lo'o tya'a ngu'. Xcui' ndya'a̱ cha' tyiquee ngu' bi' ji'i̱ cha' tso'o nu ntsu'u ca slo ycui' Ndyosi, xcui' nti' ngu' cha' tyi'i̱ tso'o ti ngu' cuentya ji'i̱ Ni, xcui' ndube ti' ngu' ji'i̱ chalyuu nu lijya̱ nde loo la.

1 TESALONICENSES 1:3

Ntsu'u ti' ya cha' ntsu'u tsa cha' tso'o nu ndyu'ni ma̱, cha' ntsu'u tsa tyiquee ma̱ ña'a̱ ma̱ ji'i̱ tya'a ma̱, xqui'ya cha' ngusñi ma̱ cha' ji'i̱ Jesucristo. Ndalo tsa tyiquee ma̱ xqui'ya cha' jlo ti' ma̱ cha' ntucua Jesucristo nu Xu'na na ca slo ycui' Ndyosi Sti na; bi' cha' xcui' cha' tso'o ndyu'ni ma̱, masi tlyu tsa cña.

FILIPENSES 1:29

Tso'o tsa laca cha' nda ycui' Ndyosi chacuayá' cha' ngusñi ma̱ cha' ji'i̱ Cristo; pana cua nscua cha' caja xi cha' ti'í ji'i̱ ma̱, nu lo'o cua ngusñi ma̱ cha' ji'i̱ Cristo bi'.

2 CORINTIOS 7:15

Tya cuayá' nu tso'o la ntsu'u tyiquee Tito ña'a̱ yu ji'i̱ ma̱ juani, nu lo'o ndyi'u ti' yu ji'i̱ lcaa cu'ma̱ cha' cua ndaquiya' tsa ma̱ ji'i̱ lcaa cha' nu cua nacui̱ yu ji'i̱ ma̱; na'a̱ yu cha' ndube tsa ti' ma̱ xqui'ya cha' nu cua nda yu lo'o ma̱, lo'o jua'a̱ ná nguxtyacui ma̱ xi xa' la cha' lo'o yu li'.

1 CORINTIOS 2:3

Lo'o ndyalaa na' su ndi'i̱ ma̱, nguna'a̱ tya ti' na' ndu̱ na' li'; nchcua̱ tya na' cha' ngulacua tsa ti' na' ni cha' xacui̱ ma̱ 'na li'.

EFESIOS 6:5

Cu'ma̱ ngu' msu nu ngüi'ya ñati̱ ji'i̱ ma̱ cha' cua'ni ma̱ cña ji'i̱ ngu' laja ti, cua'ni ma̱ lcaa cña nu culo xu'na ma̱ ji'i̱ ma̱ nde loyuu chalyuu. Cube xi ti' ma̱ ñi'ya̱ nu cua'ni ma̱ cña ji'i̱ ngu', cha' tyucui tyiquee ma̱ cua'ni ma̱ cña bi'; cua'ni ma̱ cña bi' ñi'ya̱ laca si cña ji'i̱ Cristo laca cña nu ndyu'ni ma̱.

SAN MATEO 11:12

’Tya lo'o lijya̱ Juan bi' tya clyo hasta juani quiña'a̱ tsa cha' nchcui' ngu', cha' nti' tsa ngu' cha' caca ycui' Ndyosi loo ji'i̱ ñati̱. Lo'o jua'a̱ ntsu'u tsa ngu' nu lye tsa ndu'ni juersa cha' tyalaa ngu' slo ycui' Ndyosi jua'a̱ ti.

FILIPENSES 1:5

Tya lo'o ndyuna ma̱ cha' tso'o ji'i̱ Cristo tya clyo, ña'a̱ ti tsa cu' ti nxtyucua ma̱ 'na cha' chcui' na' cha' bi' lo'o xa' la ñati̱;

LOS HECHOS 9:6

Lye tsa nchcua̱ Saulo cha' ndyutsi̱i̱ yu li'. ―¿Ñi'ya̱ nu nti' nu'u̱ cha' cua'ni na', Xu'na? ―nacui̱ Saulo li'. ―Tyatu̱ nu'u̱ ni ―nacui̱ Jesús ji'i̱― cha' tye tyalaa ca quichi̱ Damasco jua. Ca ndacua ndi'i̱ sca ñati̱ nu culu'u jinu'u̱ ñi'ya̱ caca cña nu cua'ni nu'u̱ cuentya jna'.

FILIPENSES 2:19

Chacuayá' ji'i̱ Jesús nu Xu'na na, ná tyiquee' ta na' ji'i̱ yu Timoteo cha' tsaa yu ca su ndi'i̱ ma̱ yala ti, cha' quije xi cha' 'na ñi'ya̱ nu ndi'i̱ ca ma̱; tso'o tsa caca tyiquee na' lo'o cuna na' cha' bi'.

1 CORINTIOS 4:14

Lo'o nscua na' quityi re, ná nti' na' cha' ca tyuju'u ti' ma̱; tsa bi' ti cha' nti' na' cha' cua'a na' ji'i̱ ma̱ cha' ná cua'ni tyixi ma̱ lo'o ya. Na tyaca'a cu'ma̱ jna' ñi'ya̱ si laca ma̱ sñi' na'.

FILIPENSES 4:15

Cu'ma̱ ngu' Filipos, cua jlo ti' ma̱ ñi'ya̱ ngua lo'o ngutu'u na' nde loyuu su cuentya Macedonia, ndya'a̱ na' nchcui' na' cha' ji'i̱ Jesús lo'o ngu' bi'; li' sca ti taju cu'ma̱ nu ndyu'ni tlyu ma̱ ji'i̱ ycui' Ndyosi ca jua, cua ndya ma̱ msta̱ cha' caca sca xlya'be 'na, xqui'ya cha' tso'o tsa ngua tsa'a̱ ma̱ cha' ji'i̱ Jesús laja lo'o nguti'i̱ na' lo'o ma̱.

LOS HECHOS 16:29

Ngusi'ya nu laca loo cha' ca̱a̱ lo'o ngu' ji'i̱ quii'. Li' ndyatí̱ yu ni'i̱ chcua̱, lye tsa nchcua̱ yu lijya̱ yu li', cha' ndyutsi̱i̱ tsa yu. Ndatu̱ sti̱' yu slo Pablo lo'o Silas li'.

FILIPENSES 1:6

bi' cha' cua jlo ti' na' juani cha' ña'a̱ ti tya cua'ni ycui' Ndyosi cña ne' cresiya ji'i̱ ma̱, ña'a̱ cuayá' nu tyu'u scua cña bi', nu lo'o tya̱a̱ Jesucristo chaca quiya', cha' la cui' ycui' Ni laca nu nguxana ngua'ni cña ne' cresiya ji'i̱ ma̱ tya clyo.