EFESIOS 5:9 - Chatino Tataltepec

⁹ Na cua ntsu'u nu xee lubii ji'i̱ ycui' Ndyosi ne' cresiya ji'i̱ ma̱, bi' laca nu ndu'ni lo'o ma̱ cha' cua'ni ma̱ cha' tso'o; ndu'ni bi' cha' tso'o ti tyu'u tyiquee ma̱ ña'a̱ ma̱ ji'i̱ xa' ñati̱, cha' xcui' cha' liñi chcui' ma̱.

EFESIOS 5:9 Referans Kwoze

3 JUAN 1:11

Cusu', ná tyatí̱ yu'u ma̱ lo'o cha' cuxi nu ntsu'u chalyuu, tso'o la si tyi'u ti' ma̱ ji'i̱ lcaa cha' nu tso'o ti. Lcaa ñati̱ nu xcui' clyana cha' tso'o nu cua'ni ngu' cha' xtyucua ngu' ji'i̱ xa' la tya'a ñati̱ ngu', cua ntsu'u cha' ji'i̱ ngu' bi' lo'o ycui' Ndyosi; lcaa ñati̱ nu xcui' clyana cha' cuxi cha' cua'ni ngu', bilya tyu'u cha' ji'i̱ ngu' bi' tsiya' ti lo'o ycui' Ndyosi.

ROMANOS 15:14

Cu'ma̱ tya'a ntsu'u cha' ji'na lo'o Cristo, nslo tsa na' ji'i̱ ma̱ cha' tso'o tsa tyiquee ma̱; tso'o tsa nchca cuayá' ti' ma̱ cha' ji'i̱ Cristo, lo'o jua'a̱ nchca tsa ji'i̱ ma̱ ta ma̱ cui̱i̱ lo'o ngu' tya'a ma̱.

EFESIOS 6:14

Bi' cha' cua'ni tajua' ma̱ lacua; ñi'ya̱ lo'o ndyaaca̱' ne' sendaru lo'o juata cha' xñi ca'a̱ tso'o ste' ngu', jua'a̱ cu'ma̱, xñi tso'o ma̱ cha' nu nchcui' Ni bi'. Xcui' cha' liñi chcui' ma̱, cha' li' taca xu̱u̱ tya'a ma̱ lo'o nu cuxi. Sca sendaru ni, ndyacu̱' chcua̱ lo tyiquee yu lo'o nde chu̱' yu, cha' cua'a yu ji'i̱ tyiquee yu. Lo'o jua'a̱ cu'ma̱, ná taca sta ngu' qui'ya ji'i̱ ma̱ si xcui' cha' liñi ndu'ni ma̱.

1 TIMOTEO 6:11

Lo'o nu'u̱ Timoteo, ñati̱ ji'i̱ ycui' Ndyosi laca nu'u̱, bi' cha' xtyanu nu'u̱ ji'i̱ lcaa cha' cuxi bi'; xcui' cha' liñi cua'ni nu'u̱, cua ña'a̱ ca lo cha' tso'o nu nti' ycui' Ndyosi cha' cua'ni na. Tya nxñi tso'o nu'u̱ cha' ji'i̱ ycui' Ndyosi, jua'a̱ cua'ni nu'u̱ cha' tso'o tsa ntsu'u tyiquee nu'u̱ ña'a̱ nu'u̱ ji'i̱ lcaa ñati̱; talo nu'u̱ masi xcube' ngu' jinu'u̱, jua'a̱ cua'ni tya'na ti' nu'u̱ ji'i̱ ñati̱.

FILIPENSES 1:11

Quiña'a̱ tsa cha' tso'o taca cua'ni ma̱ lcaa su ndi'i̱ ma̱ chalyuu xqui'ya Jesucristo, cha' ndyu'ni Cristo cña ne' cresiya ji'i̱ ma̱; bi' cha' taca cua'ni tlyu ma̱ ji'i̱ ycui' Ndyosi, taca cua'ni chi̱ ma̱ loo Ni.

1 JUAN 2:29

Cua nchca cuayá' ti' ma̱ cha' lubii tsa cresiya ji'i̱ Jesucristo, bi' cha' tso'o si ca cuayá' ti' ma̱ cha' cua ña'a̱ ca ñati̱ nu ndu'ni cha' tso'o ñi'ya̱ ndyu'ni ycui' Jesús, caca ngu' bi' sñi' ycui' Ndyosi.

HEBREOS 11:33

Jlya ti' lcaa ngu' bi' ji'i̱ ycui' Ndyosi, bi' cha' ngusu̱u̱ tya'a ngu' lo'o ñati̱ cuxi nde xa' chalyuu, ntiji̱loo ngu' ji'i̱ lcaa ñati̱ nu nguti'i̱ ca bi' li'; tso'o tsa cña ngua'ni ngu' bi', bi' cha' ngua'ni Ni cua ña'a̱ ca cha' nu nacui̱ Ni cha' cua'ni Ni cuentya ji'i̱ ngu' bi'. Ngua ji'i̱ ngu' bi' cua'a ji'i̱ cuichi tyaala cha' ná ndyacu ji'i̱ ngu';

EFESIOS 4:15

Pana xa' ña'a̱ cua'ni na. Chcui' na lo'o ngu' ji'i̱ lcaa cha' liñi nu ntsu'u ji'i̱ ycui' Ndyosi; culu'u na ji'i̱ ngu' cha' ntsu'u tsa tyiquee na ña'a̱ na ji'i̱ lcaa tya'a ñati̱ na, cha' nga'a̱ cha' xñi tso'o na lcaa cha' ji'i̱ Cristo cha' caca stu'ba cha' ji'na lo'o ycui' Ni. Nu Cristo bi' ni, la cui' bi' laca loo ji'i̱ lcaa tya'a na nu tsa tlyu ti ngusñi na cha' ji'i̱ Ni;

ROMANOS 2:4

¿Ni cha' laca ná ndube ti' ma̱ cha' tso'o tsa ntsu'u tyiquee ycui' Ndyosi ña'a̱ Ni ji'na? Ntucuá Ni cña ji'na, ndalo tsa tyiquee Ni ji'na; tso'o tsa nti' ycui' Ndyosi ña'a̱ Ni ji'na, cha' caja ñi'ya̱ nu tya'a̱chu̱' na ji'i̱ cha' cuxi nu ndiya tsa ti' na ji'i̱.

HEBREOS 1:8

Xa' ña'a̱ nchcui' ycui' Ndyosi cuentya ji'i̱ Jesús nu laca Sñi' ycui' ca: Ná nga'a̱ cha' tye cha' caca nu'u̱ loo, cha' ycui' Ndyosi laca nu'u̱, nacui̱ Ni, liñi ti ndu'ni nu'u̱ lo'o ñati̱ ca su laca nu'u̱ loo.

EFESIOS 4:25

Juani nga'aa chcui' ma̱ cha' cuiñi lo'o tya'a ñati̱ ma̱ lacua; xcui' cha' liñi chcui' scaa ma̱ lo'o tya'a ma̱, cha' sca ti ñati̱ laca na, sca ti cha' ntsu'u ji'na lo'o tya'a na.

SAN JUAN 1:47

Lo'o na'a̱ Jesús cha' lijya̱ Natanael slo, li' nacui̱: ―Nde cua lijya̱ sca ngu' Israel nu chañi cha' ndyu'ni tlyu ji'i̱ ycui' Ndyosi. Ná ntsu'u cha' cuiñi ji'i̱ yu jua tsiya' ti.

SAN MATEO 3:8

Tso'o lacua, culu'u ma̱ ji'i̱ ya si chañi cha' cua ngulochu̱' ma̱ ji'i̱ cha' cuxi nu ntsu'u ji'i̱ ma̱.

COLOSENSES 3:18

Cu'ma̱ ngu' cuna'a̱ ni, taquiya' ma̱ ji'i̱ clyo'o ma̱. Ndulo tsa cha' ji'i̱ ma̱ cha' cua'ni ma̱ jua'a̱, cha' cua ntsu'u cha' ji'i̱ ma̱ lo'o Cristo nu Xu'na na.