EFESIOS 5:5 - Chatino Tataltepec

⁵ Sca cha' chañi tsa laca re: Ñati̱ nu jua'a̱ xcui' cha' cuxi ndu'ni ni, ná caja chacuayá' tyaa ngu' bi' ca su ntucua ycui' Ndyosi lo'o Cristo ca tiya' la, nu lo'o caca Ni loo; ñati̱ nu xcui' cha' ji'i̱ nu cuna'a̱ ntsu'u tyiquee ngu', ñati̱ nu ndu'ni suba', ñati̱ nu ndacui ti', ná caja chacuayá' tyaa ngu' bi' ca su ntucua Ni. Nu ndacui ti' na ji'i̱ sca cha' ni, laca cha' ntsu'u tsa tyiquee na ji'i̱ cha' bi', ñi'ya̱ lo'o ntsu'u tyiquee na ña'a̱ na ji'i̱ sca jo'ó.

EFESIOS 5:5 Referans Kwoze

GÁLATAS 5:21

la cui' jua'a̱ xcui' na nxlyaá ti ngu' na nu ntsu'u ji'i̱ tya'a ñati̱ ngu', ndujuii ngu' ji'i̱ tya'a ngu'; xcui' na cu'bi ti ngu', lo'o jua'a̱ ntsu'u ngu' nu chcu̱' tsa ndacu, cha' quiña'a̱ tsa na nti' ngu' bi' cacu ngu'; lo'o jua'a̱ tya ntsu'u xa' la cha' cuxi nu ndu'ni ngu'. Liñi tsa cha' nu ta na' lo'o ma̱ juani ñi'ya̱ nu ni na' ji'i̱ ma̱ tya tsubi' la, cha' ná caca tyu'u cha' ji'na lo'o ycui' Ndyosi nu lo'o caca ycui' Ni loo ca nde loo la, si tsa cu' ti cua'ni na cha' cuxi jua'a̱.

APOCALIPSIS 22:15

To' lo'o nde liya' tyanu lcaa ñati̱ nu chiya'a̱ tsa ndu'ni, lo'o jua'a̱ ñati̱ nu jlya tsa ti' ji'i̱ cha' cucha'a̱, lo'o ñati̱ nu ndu'ni suba' lo'o nu cuna'a̱, lo'o nu ndujuii ji'i̱ ñati̱; la cui' jua'a̱ lcaa ñati̱ nu ndu'ni tlyu ji'i̱ lcui̱ jo'ó ti, lo'o ñati̱ nu ndiya ti' ndu'ni ngu' cha' cuiñi, lcaa ñati̱ bi' tyanu nde chu̱' lo'o ji'i̱ quichi̱ bi'. Ni sca ñati̱ bi' ná ntsu'u chacuayá' tyatí̱ ngu' ne' lo'o quichi̱ bi'.

COLOSENSES 3:5

Cua'ni tye ma̱ lcaa cha' cuxi nu ndiya tsa ti' ma̱ ji'i̱ lacua: nga'aa cua'ni cuxi ma̱ lo'o clyo'o xa' ñati̱, nga'aa cua'ni ma̱ cha' suba' lo'o tya'a ñati̱ ma̱, nga'aa tyacui' ti' ma̱ ña'a̱ ma̱ ji'i̱ tya'a ñati̱ ma̱, cua'ni tye ma̱ ji'i̱ lcaa lo cha' cuxi nu ndijña tsa ti' tyiquee ma̱ cha' cua'ni ma̱ ji'i̱, nga'aa tyacui ti' ma̱ ji'i̱ scaa cha' tso'o nu ntsu'u chalyuu. Sca na nu ndacui ti' na ji'i̱ ni, stu'ba ti cuxi laca cha' bi' ñi'ya̱ nti' si cua'ni tlyu na ji'i̱ sca lcui̱ jo'ó ti;

EFESIOS 5:3

Nu juani cha' laca ma̱ ñati̱ ji'i̱ ycui' Ndyosi, ná tso'o si xcui' cha' ji'i̱ nu cuna'a̱ ntsu'u tyiquee ma̱; ná cua'ni ma̱ cha' suba' lo'o ñati̱, ni ná chcui' ma̱ tsiya' ti ji'i̱ lcaa cha' bi' lo'o tya'a ñati̱ ma̱; ná tyacui ti' ma̱ ji'i̱ cha' tso'o nu ntsu'u ji'i̱ ñati̱.

APOCALIPSIS 21:8

Pana lcaa ñati̱ nu ntsi̱i̱ tsa cha' tyu'u cha' ji'i̱ lo'o na', jua'a̱ ñati̱ nu ná ndaquiya' jna' tsiya' ti, jua'a̱ nu chiya'a̱ tsa ndu'ni, jua'a̱ nu ndujuii ji'i̱ tya'a ñati̱, jua'a̱ nu ndu'ni suba' lo'o nu cuna'a̱, jua'a̱ nu cucha'a̱, jua'a̱ ñati̱ nu jlya tsa ti' ji'i̱ cha' cucha'a̱, jua'a̱ ñati̱ nu ndu'ni tlyu ji'i̱ lcui̱ jo'ó, jua'a̱ nu cuiñi, lcaa ngu' bi' tyaa ngu' ca lo tayu' tlyu ca su ntsu'u quii' nu ndyaqui̱ lo'o yuu sufri. Lcaa ngu' nu cua ndyaa nde tayu' bi' ni, cua ndyaa ngu' nde chalyuu talya; cua ndye cha' ngujuii ngu' tsiya' ti li'.

GÁLATAS 5:19

Ndi'ya̱ laca cha' cuxi nu ndiya ti' ñati̱ chalyuu, si ná ta ngu' chacuayá' cha' caca Xtyi'i ycui' Ndyosi loo ne' cresiya ji'i̱ ngu': xcui' na nñilo'o ti ngu' ji'i̱ nu cuna'a̱, xcui' na ndu'ni suba' ngu' lo'o ñati̱, cuxi tsa ndu'ni ngu' lo'o tya'a ñati̱ ngu';

HEBREOS 13:4

Lcaa ma̱ lo'o tya'a ma̱ nga'a̱ cha' cua'ni tyaca'a ma̱ ji'i̱ clyo'o ma̱; ná cua'ni cuxi ma̱ lo'o clyo'o ma̱, ñi'ya̱ nti' si tyu'u cha' ji'i̱ ma̱ lo'o xa' ñati̱ laja ti. Xcube' ycui' Ndyosi ji'i̱ cua ña'a̱ ca ñati̱ nu cua'ni cha' suba' jua'a̱, jua'a̱ xcube' Ni ji'i̱ ñati̱ nu tyatí̱ yu'u lo'o clyo'o xa' ñati̱.

1 TIMOTEO 6:10

Lo'o ntsu'u tsa tyiquee ñati̱ ji'i̱ cñi, bi' laca su̱u̱ quiña'a̱ tsa cha' cuxi. Ntsu'u ñati̱ nu tiji̱' tsa ti' ji'i̱ cñi, bi' cha' cua ngulochu̱' ngu' cha' ji'i̱ nu Xu'na na, cha' nga'aa taquiya' ngu' bi' cha' ji'i̱ Ni. Xñi'i̱ tsa ti' ndi'i̱ ngu' bi' li', cha' nchcube' ngu' ji'i̱ ycui' ca ngu'.

1 TIMOTEO 6:17

Lo'o jua'a̱ ntsu'u cha' culo nu'u̱ cña ji'i̱ ngu' culiya' tya'a ngusñi ma̱ cha' ji'i̱ Jesús, cha' ná cua'ni tyucuaa ti' ngu' bi' lo'o tya'a ngu'. Ná tso'o si xcui' culacua tsa ti' ngu' bi' ji'i̱ cñi ji'i̱ ngu'; la cui' ti ná culacua tsa ti' ngu' ji'i̱ lcaa cha' tso'o nu ntsu'u ji'i̱ ngu', cha' yala ti ndye cñi ji'na. Tso'o la si cube ti' ngu' bi' ji'i̱ ycui' Ndyosi nu lu'ú ca, cha' cua nda Ni lcaa lo na nu ntsu'u ji'na cha' caca tso'o tyiquee na nde chalyuu.

LOS HECHOS 8:21

Ná ntsu'u cha' jinu'u̱ lo'o ycui' Ndyosi tsiya' ti, bi' cha' ná ta Ni chacuayá' jinu'u̱ cha' cua'ni nu'u̱ cña lo'o ya.

LOS HECHOS 20:32

’Xtyanu na' ji'i̱ cu'ma̱ ya' ycui' Ndyosi cha' xtyucua Ni ji'i̱ ma̱ juani. Taquiya' ma̱ ji'i̱ lcaa cha' nu cua nda ycui' Ndyosi lo'o ma̱, la cui' cha' laca nu ndu'ni cha' caca nguula ti' cresiya ji'i̱ ma̱, cha' tlyu tsa laca cha' ji'i̱ ycui' Ndyosi. Jua'a̱ caca cuayá' ti' ma̱ cha' quiña'a̱ tsa cha' tso'o tyacua ji'i̱ ma̱ stu'ba ti lo'o lcaa ñati̱ nu ngusubi ycui' Ndyosi ji'i̱.

COLOSENSES 1:13

Na cua ngua'ni lyaá Ni ji'na, cua ngua'ni tye Ni ji'i̱ chalyuu talya su nguta'a̱ na, lo'o jua'a̱ cua ngulu'u Ni chaca tyucui̱i̱ ji'na nu tsaa ca chalyuu tso'o su laca Cristo loo ji'na. Sñi' ycui' Ndyosi laca Cristo, lo'o jua'a̱ tyaca'a tsa yu ji'i̱ ycui' Ni;