EFESIOS 4:28 - Chatino Tataltepec

²⁸ Cu'ma̱ nu nguaana ma̱ na nu ntsu'u ji'i̱ ñati̱ tya tsubi' la, nga'a̱ cha' xtyanu ma̱ cña bi' ji'i̱ ma̱, clyana ma̱ cña tso'o la nu cua'ni ycui' ma̱; tso'o la si cua'ni ma̱ cña lo'o ya' ycui' ma̱, cha' jua'a̱ caja xi ñi'ya̱ nu xtyucua ma̱ ji'i̱ tya'a ma̱ nu lyiji tsa ji'i̱.

EFESIOS 4:28 Referans Kwoze

1 TIMOTEO 6:18

Culo nu'u̱ cña ji'i̱ ngu' culiya' bi' ndi'ya̱: Xcui' cha' tso'o cua'ni ngu'; cua'ni tya'na ti' ngu' ji'i̱ xa' ñati̱, lo'o jua'a̱ tyi'u ti' ngu' ji'i̱ ngu' ti'i, cha' ta ngu' na nu lyiji ji'i̱ ngu' ti'i bi'.

GÁLATAS 6:10

Bi' cha' tso'o si lcaa quiya' lo'o ña'a̱ na ñi'ya̱ caca xtyucua na ji'i̱ cua ña'a̱ ca ñati̱, li' cua'ni clya na cha' xtyucua na ji'i̱ ngu' bi'. Clyo ndu'ni cha' xtyucua na ji'i̱ tya'a na, nu ngu' nu ntsu'u cha' ji'i̱ lo'o Cristo.

SAN JUAN 12:6

Cha' cuaana Judas, bi' cha' nacui̱ jua'a̱, si'i cha' tya'na ti' ji'i̱ ngu' ti'i. Ycui' ca Judas laca loo ji'i̱ cuiji̱ su ntsu'u cñi ji'i̱ ngu' tya'a ndya'a̱ lo'o Jesús, pana na ntyucuaana Judas cñi nu ntsu'u ji'i̱ lcaa ngu' bi'.

SAN LUCAS 19:8

Li' ndatu̱ Zaqueo cha' chcui' lo'o Jesús: ―Ña'a̱ xi ya'a̱, cusu' ―nacui̱ yu―. Ta na' sa cla'be cha' tso'o nu ntsu'u 'na ji'i̱ ngu' ti'i. Si tya ntsu'u na nu nguaana na' cha' cua ngüiñilo'o na' ji'i̱ ngu', tya na' na bi' ji'i̱ ngu', masi jacua tsa lo cua quije ji'i̱ ngu' ―nacui̱ Zaqueo li'.

2 CORINTIOS 8:12

Si chañi cha' ntsu'u tyiquee ngu' ta ngu' tsa ña'a̱ nu ntsu'u xi ji'i̱ ngu', tso'o ti xñi ycui' Ndyosi msta̱ bi' ji'i̱ ngu', ñi'ya̱ nu nchca ti ji'i̱ ngu' li'; ná nti' Ni cha' ta ngu' msta̱ si ná sca na ntsu'u ji'i̱ ngu'.

ROMANOS 12:13

Nu lo'o lyiji sca na ji'i̱ sca ngu' tya'a ngusñi ma̱ cha' ji'i̱ Cristo, nga'a̱ cha' tya'be cha' tso'o nu ntsu'u ji'i̱ ycui' ca ma̱, cha' ta ma̱ na ji'i̱ ngu' bi', na laca nu lyiji ji'i̱ ngu'. Lcaa tyempo ta ma̱ to' tyi ma̱ cha' tyi'i̱ ñati̱ nu lijya̱ ti.

SAN JUAN 13:29

La cui' Judas laca nu laca loo ji'i̱ cujui̱ cñi nu tsa tlyu ntsu'u cñi ji'i̱ lcaa ngu' bi'; bi' cha' ntsu'u ngu' nu ngua ti' cha' cua ngulo Jesús cña ji'i̱ cha' tsaa cui'ya sca na nu cua'nijo'o ji'i̱ ngu' cha' caca ta'a; jua'a̱ ngua ti' xa' la ngu' cha' ntsu'u cña ji'i̱ Judas cha' tsaa ta msta̱ ji'i̱ ngu' ti'i.

SAN LUCAS 3:8

Tso'o lacua, culu'u ma̱ ji'i̱ ya si chañi cha' cua ngulochu̱' ma̱ cha' cuxi nu ntsu'u ji'i̱ ma̱; ná ñacui̱ ma̱ cha' sñi' ycui' Ndyosi laca ma̱, xqui'ya cha' ndyu'u ma̱ ji'i̱ jyo'o Abraham. Cha' liñi ta na' lo'o ma̱ ―nacui̱ Juan―, cha' taca ji'i̱ ycui' Ndyosi subi Ni ji'i̱ xa' la ñati̱ nu caca sñi' Abraham ñi'ya̱ laca na juani, masi nti' ma̱ cha' na ple ti nu xa' la ñati̱ bi', masi nti' ma̱ cha' ñi'ya̱ laca quee re, jua'a̱ ti laca ngu' ―nacui̱ Juan ji'i̱ ngu'―.

1 CORINTIOS 4:12

Ti'i̱ tsa cña nu ndu'ni ya cha' caja ñi'ya̱ nu tyiji̱ yu'u ji'i̱ ya chalyuu. Nu lo'o ti'í tsa cha' nu nda ngu' lo'o ya, ná nsacui̱ tu'ba ya ji'i̱ ngu'; tso'o ti nchcui' ya lo'o ngu' li'. Lo'o ndu'ni lya' ti' ngu' ji'i̱ ya, ndalo ya li'; ná nsacui̱ ya' ya ji'i̱ ngu' tsiya' ti.

TITO 3:8

Nga'a̱ cha' jlya tso'o ti' ma̱ cha' liñi nu nscua na' re, bi' cha' lye chcui' nu'u̱ cha' bi' lo'o lcaa ñati̱ nu ngusñi cha' ji'i̱ ycui' Ndyosi ca bi', cha' xcui' cha' tso'o cua'ni ma̱ li'. Tso'o tsa laca cha' liñi, taca xtyucua cha' bi' ji'i̱ cua ña'a̱ ca ñati̱;

TITO 3:14

Ntsu'u cha' ca tsa'a̱ ca ta'a ñati̱ ji'i̱ Jesucristo tya'a na cha' cua'ni ngu' lcaa lo cha' tso'o, cha' taca xtyucua ngu' ji'i̱ tya'a ñati̱ ngu' nu lyiji xi ji'i̱; ná tso'o si taja ti ndi'i̱ ngu' chalyuu.