EFESIOS 4:25 - Chatino Tataltepec

²⁵ Juani nga'aa chcui' ma̱ cha' cuiñi lo'o tya'a ñati̱ ma̱ lacua; xcui' cha' liñi chcui' scaa ma̱ lo'o tya'a ma̱, cha' sca ti ñati̱ laca na, sca ti cha' ntsu'u ji'na lo'o tya'a na.

EFESIOS 4:25 Referans Kwoze

COLOSENSES 3:9

nga'aa ta ma̱ cha' cuiñi lo'o tya'a ma̱; na cua nguxtyanu ma̱ ji'i̱ chalyuu cusu' ji'i̱ ma̱, jua'a̱ cua nguxtyanu ma̱ ji'i̱ lcaa cha' cuxi nu ngua'ni ma̱ tya tsubi' la,

ROMANOS 12:5

Lo'o jua'a̱ laca na, lcaa tya'a na nu ntsu'u cha' ji'na lo'o Cristo, cha' masi tyu̱u̱ tsa ngu' tya'a na, pana sca ti taju ñati̱ laca na lo'o tya'a na; sca ti ñati̱ laca tsaca na, pana lcaa na stu'ba ti ntsu'u cha' ji'na lo'o tya'a na.

EFESIOS 4:15

Pana xa' ña'a̱ cua'ni na. Chcui' na lo'o ngu' ji'i̱ lcaa cha' liñi nu ntsu'u ji'i̱ ycui' Ndyosi; culu'u na ji'i̱ ngu' cha' ntsu'u tsa tyiquee na ña'a̱ na ji'i̱ lcaa tya'a ñati̱ na, cha' nga'a̱ cha' xñi tso'o na lcaa cha' ji'i̱ Cristo cha' caca stu'ba cha' ji'na lo'o ycui' Ni. Nu Cristo bi' ni, la cui' bi' laca loo ji'i̱ lcaa tya'a na nu tsa tlyu ti ngusñi na cha' ji'i̱ Ni;

APOCALIPSIS 21:8

Pana lcaa ñati̱ nu ntsi̱i̱ tsa cha' tyu'u cha' ji'i̱ lo'o na', jua'a̱ ñati̱ nu ná ndaquiya' jna' tsiya' ti, jua'a̱ nu chiya'a̱ tsa ndu'ni, jua'a̱ nu ndujuii ji'i̱ tya'a ñati̱, jua'a̱ nu ndu'ni suba' lo'o nu cuna'a̱, jua'a̱ nu cucha'a̱, jua'a̱ ñati̱ nu jlya tsa ti' ji'i̱ cha' cucha'a̱, jua'a̱ ñati̱ nu ndu'ni tlyu ji'i̱ lcui̱ jo'ó, jua'a̱ nu cuiñi, lcaa ngu' bi' tyaa ngu' ca lo tayu' tlyu ca su ntsu'u quii' nu ndyaqui̱ lo'o yuu sufri. Lcaa ngu' nu cua ndyaa nde tayu' bi' ni, cua ndyaa ngu' nde chalyuu talya; cua ndye cha' ngujuii ngu' tsiya' ti li'.

TITO 1:2

lo'o jua'a̱ taca jatya na ji'i̱ chalyuu nu ná nga'a̱ cha' tye ji'na li'. Ná cuiñi ycui' Ndyosi. Sa'ni tsa nchcui' Ni cha' caja chalyuu bi' ji'na, tya lo'o ngüiñá Ni chalyuu; tya li' nda Ni cha' lo'o ñati̱ ji'i̱ Ni nde chalyuu cha' taca tyi'i̱ ngu' slo Ni.

1 TIMOTEO 4:2

Ntsu'u ngu' nu nchcui' tucua lo cha', nu nga'aa ntyuju'u ti' cha' ngusñi ngu' cha' cuiñi nu nchcui' nu xña'a̱; ji'i̱ ngu' cuiñi bi' cuna xi ngu' tya'a na, tyu'utsu' ngu' ji'i̱ tyucui̱i̱ tso'o li'.

APOCALIPSIS 22:15

To' lo'o nde liya' tyanu lcaa ñati̱ nu chiya'a̱ tsa ndu'ni, lo'o jua'a̱ ñati̱ nu jlya tsa ti' ji'i̱ cha' cucha'a̱, lo'o ñati̱ nu ndu'ni suba' lo'o nu cuna'a̱, lo'o nu ndujuii ji'i̱ ñati̱; la cui' jua'a̱ lcaa ñati̱ nu ndu'ni tlyu ji'i̱ lcui̱ jo'ó ti, lo'o ñati̱ nu ndiya ti' ndu'ni ngu' cha' cuiñi, lcaa ñati̱ bi' tyanu nde chu̱' lo'o ji'i̱ quichi̱ bi'. Ni sca ñati̱ bi' ná ntsu'u chacuayá' tyatí̱ ngu' ne' lo'o quichi̱ bi'.

1 TIMOTEO 1:10

xqui'ya ñati̱ nu ndu'ni suba' lo'o nu cuna'a̱, xqui'ya nu cuna'a̱ nu ndu'ni suba' lo'o nu qui'yu, xqui'ya nu qui'yu nu ndu'ni suba' lo'o tya'a qui'yu ti, xqui'ya ñati̱ nu ntucuaana ji'i̱ tya'a ñati̱ cha' tsalo'o ji'i̱ ngu' jua'a̱ ti, xqui'ya nu cuiñi, xqui'ya ñati̱ nu nchcui' cha' cuiñi slo ngu' tisiya. Nda ycui' Ndyosi cha' cusu' bi', cha' jua'a̱ ca cuayá' ti' lcaa ñati̱ nu ná nti' taquiya' ji'i̱ cua ña'a̱ ca cha' nu liñi ca nu nclu'u na cuentya ji'i̱ ycui' Ndyosi.

2 CORINTIOS 7:14

Lo'o tya ndi'i̱ yu ca slo na', cua ni na' ji'i̱ yu cha' tso'o tsa ngusñi ma̱ cha' ji'i̱ Jesús, lo'o jua'a̱ chañi tsa cha' bi'. La cui' jua'a̱ lcaa quiya' lo'o nchcui' ya, chañi tsa laca cha' ji'i̱ Jesús nu nchcui' ya lo'o ma̱; lo'o jua'a̱ chañi ngua cha' nu ni na' ji'i̱ Tito, cha' tso'o ti nti' ycui' ya ña'a̱ ya ji'i̱ ma̱.

TITO 1:12

Cha' liñi nchcui' sca jyo'o cusu' tya'a quichi̱ tyi ngu' Creta su ndi'i̱ nu'u̱, nu ngua tu'ba ji'i̱ jo'ó ji'i̱ ngu' cua sa'ni. Ndi'ya̱ nchcui' bi': “Cuiñi tsa lcaa ngu' Creta tya'a na', xña'a̱ tsa ngu'. Lo'o jua'a̱ ndacu tsa ngu', pana ná ntaja'a̱ ngu' cua'ni ngu' cña tsiya' ti”, nacui̱ jyo'o cusu' bi'.

1 CORINTIOS 10:17

Sca ti ycu' xlyá nscua lo mesa su ndacu na stu'ba ti; lo'o ndya'be xlyá bi', li' ndyiji na cacu ca ta'a na, masi tyu̱u̱ tsa tya'a na. Tsa tlyu ti ndi'i̱ na cha' stu'ba ti laca na ñati̱ ji'i̱ Jesús.

SAN JUAN 8:44

Ycui' nu xña'a̱ laca sti cu'ma̱, lo'o jua'a̱ nti' ma̱ cua'ni ma̱ la cui' cña nu ngulo nu bi' ji'i̱ ma̱. Tya lo'o nguxana chalyuu, tya li' nguxana ndyu'ni ñu'u̱ nu bi' ji'i̱ cresiya ji'i̱ ñati̱ ―nacui̱ Jesús―. Ná ngutu'u nu bi' ca su ntsu'u su̱u̱ cha' liñi, ná ntsu'u cha' liñi ji'i̱ nu bi' tsiya' ti ―nacui̱―. Lo'o ñilo'o nu bi' ji'i̱ ñati̱, xquicha' ycui' ca laca cha' cuiñi nu nda nu bi' lo'o ngu'. Sca nu cuiñi laca nu xña'a̱, bi' laca sti lcaa nu cuiñi.

EFESIOS 5:30

cha' sca ti taju laca ca ta'a na cuentya ji'i̱ Cristo, cha' ntsu'u cña nu ndu'ni scaa na cuentya ji'i̱ Ni.

EFESIOS 4:22

bi' cha' cua'ni tye ma̱ ji'i̱ cha' cuxi nu ngua'ni ma̱ tya sa'ni la. Quiña'a̱ tsa cha' ndatsaa cha' cuxi bi' ji'i̱ ma̱ nu ngua li', ndacui tsa ti' ma̱ ji'i̱ cha' cuxi bi', ña'a̱ cuayá' nu chcuna' tsiya' ti chalyuu ji'i̱ ma̱ xqui'ya cha' cuxi bi'.

EFESIOS 4:31

Cua'ni tye ma̱ ji'i̱ lcaa cha' su chi̱i̱ nti' ma̱ ña'a̱ ma̱ ji'i̱ tya'a ñati̱ ma̱ lacua; jua'a̱ cha' liye' ti' ma̱, jua'a̱ cha' ñasi̱' ti' ma̱, cua'ni tye ma̱ ji'i̱ lcaa cha' bi'. Nga'aa xi'ya cui̱i̱ ma̱ cha' suba' ji'i̱ tya'a ma̱, nga'aa chcui' ma̱ cuentyu ji'i̱ tya'a ma̱, nga'aa ntsu'u cha' chcui' cuxi ma̱ ji'i̱ tya'a ma̱ tsiya' ti.

COLOSENSES 3:8

pana juani nga'a̱ cha' xtyanu ma̱ ji'i̱ lcaa cha' cuxi bi'; masi nchca ñasi̱' tsa ma̱ cua sa'ni la, masi lu'ba ti nxu'ba ñasi̱' ma̱ ji'i̱ ycui' ca ma̱ tya li', masi liye' ti' ma̱ ji'i̱ tya'a ñati̱ ma̱ tya tsubi' la, pana nga'aa cua'ni ma̱ jua'a̱ juani. La cui' jua'a̱ nga'aa chcui' ma̱ cuentyu ji'i̱ tya'a ñati̱ ma̱, nga'aa chcui' suba' ma̱ lo'o ngu',

HEBREOS 12:1

Lo'o juani, ¿ñi'ya̱ cua'ni na lacua? Ndi'ya̱ cua'ni na nde chalyuu: Ñi'ya̱ si tya ndi'i̱ jyo'o cusu' bi' tsa tlyu ti lo'o na, jua'a̱ cua'ni na, cha' jua'a̱ tyi'u tso'o ti' na lcaa ña'a̱ cha' tlyu nu ngua'ni ngu' bi' tya sa'ni la, xqui'ya cha' jlya ti' ngu' ji'i̱ ycui' Ndyosi. Ndu'ni cha' xtyanu na lcaa cha' nu ndaca'a ji'na cha' ná xñi tso'o na cha' ji'i̱ Jesús; xtyanu na lcaa cha' cuxi nu tiji̱' tsa ti' na ji'i̱, culochu̱' na cha' bi'. Lo'o li' nguula ti' tyiquee na cua'ni na cha' tso'o nde chalyuu, tsa lo cua tyempo nu tya ta ti Ni ji'na.

SANTIAGO 1:21

Lo'o jua'a̱ nga'a̱ cha' culochu̱' na lcaa cha' suba', lcaa cha' cuxi nu tya ntsu'u ne' cresiya ji'na; tucuá na cha' ji'i̱ ycui' Ndyosi lacua, xñi tso'o na lcaa cha' nu nda Ni cha' tyanu ne' cresiya ji'na, cha' bi' laca cha' nu taca cua'ni lyaá ji'na ji'i̱ nu cuxi nu ntsu'u ji'na.

1 PEDRO 2:1

Lo'o cu'ma̱ ni, nga'a̱ cha' xtyanu ma̱ ji'i̱ lcaa cha' cuxi nu ntsu'u tyiquee ma̱ ña'a̱ ma̱ ji'i̱ tya'a ñati̱ ma̱: nga'aa cñilo'o ma̱ ji'i̱ tya'a ma̱, nga'aa si'i tucua cha' tyu'u tyiquee ma̱, nga'aa tyacui ti' ma̱ ji'i̱ sca na nu ntsu'u ji'i̱ tya'a ñati̱ ma̱, nga'aa chcui' ma̱ cuentyu ji'i̱ tya'a ñati̱ ma̱.