Ná ta ma̱ chacuayá' culu'u ñati̱ xi xa' la cha' ji'i̱ ma̱, sca cha' nu ná stu'ba nchcui' lo'o cha' bi', cha' ná xtyanu ma̱ jua'a̱ ji'i̱ tyucui̱i̱ liñi. Tso'o la si tyanu tso'o lcaa cha' ji'i̱ ycui' Ndyosi ne' cresiya ji'na, si cube ti' na ji'i̱ lcaa cha' tso'o nu ndu'ni Ni lo'o na lcaa hora; pana ná taca tyanu tso'o cha' ji'i̱ ycui' Ndyosi ne' cresiya ji'na lo'o taquiya' na ji'i̱ cua ña'a̱ ca cña nu tatsaa ngu' ji'na, ñi'ya̱ nti' si nacui̱ ngu' cha' ná tso'o cacu na sca lo na nu ndacu ngu'. Masi cua ndaquiya' tsa na ji'i̱ cña bi' tya tsubi' la, si'i na tso'o la ngua ti' na lo'o ngua'ni na jua'a̱.
EFESIOS 4:14 - Chatino Tataltepec14 Li' nga'aa cua'ni na ñi'ya̱ ndu'ni nu sube nu lu'ba ti ncha'a̱ cña ji'i̱, cha' nu ndijya ngu'; ni ná ta na chacuayá' cojolaqui ngu' ji'na xa' tyucui̱i̱, nu lo'o chcui' ngu' lo'o na cua ña'a̱ ca cha' nu bilya cuna na ji'i̱. Ntsu'u tsa cha' cuiñi nu nda ñati̱ nu tajua' tsa nchcui' lo'o na, ñati̱ nu nti' tsa cha' tsalo'o ji'na nde tyucui̱i̱ cuxi. Gade chapit la |
EFESIOS 4:14
44 Referans Kwoze
Cu'ma̱ tya'a ngusñi na cha' ji'i̱ Cristo nu tyaca'a tsa ma̱ 'na, ná xñi ma̱ cha' ji'i̱ cua ña'a̱ ca ñati̱ nu ñacui̱ cha' cua nda ycui' Ndyosi Xtyi'i ycui' Ni ji'i̱ ngu' bi'. Cua'ni cuayá' ma̱ ji'i̱ ngu' bi' clyo, cha' quijeloo cha' ji'i̱ ma̱ lo'o ngu' si chañi cha' cua ndyanu Xtyi'i ycui' Ndyosi ne' cresiya ji'i̱ ngu' bi', si cha' cuiñi ti laca nu nchcui' ngu' bi'. Cua ndu'u tucua tyu̱u̱ tsa tya'a ngu' cuiñi chalyuu juani, nu nñilo'o ji'i̱ ñati̱ cha' cuentya ji'i̱ ycui' Ndyosi nchcui' ngu'.
Tsa bi' ti cha', nu lo'o jña ma̱ sca cha' ji'i̱ ycui' Ndyosi, li' nga'a̱ cha' jlya ti' ma̱ cha' nchca ji'i̱ Ni cua'ni Ni jua'a̱; ná tso'o si tya'a̱chu̱' ma̱ ji'i̱ cha' bi', ñi'ya̱ si ñacui̱ ma̱ cha' ná nchca ji'i̱ Ni cua'ni Ni jua'a̱. Ñati̱ nu jua'a̱ ñacui̱ cha' ná nchca ji'i̱ ycui' Ni, laca ngu' bi' ñi'ya̱ laca sca clyoo' nu ndya'a̱ lo tyujo'o; ndyatu̱ clyoo' ndyaa macala su nducuni'i̱ cui'i̱ ji'i̱ cha' tsaa.
cha' Cristo cuiñi caca nu bi'. Lo'o jua'a̱ tyu'u tucua xi ngu' cuiñi nu chcui' cha' tu'ba ji'i̱ ycui' Ndyosi laca ycui' ca ngu', nu cuiñi ti cua'ni cha' tlyu cha' cube tsa ti' xa' ñati̱; cua'ni ngu' cuiñi bi' jua'a̱, cha' nti' ngu' cua'ni ngu' ngana ji'i̱ ma̱, lo'o jua'a̱ ji'i̱ lcaa ñati̱ nu cua ngusubi ycui' Ndyosi ji'i̱.
Masi cuxi tsa ndu'ni nu ngu' cuiñi bi', ná ntyuju'u ti' ngu' tsiya' ti cha' ndi'i̱ ngu' lo'o ma̱ nu lo'o ndyu'u ti'i̱ ma̱ cha' cacu ma̱ si̱i̱ lo'o tya'a ma̱, xqui'ya cha' ngusñi ma̱ cha' ji'i̱ Jesucristo. Quiña'a̱ tsa ndacu ngu' bi' li', quiña'a̱ tsa ndyi'yu ngu', cha' tsa bi' ti cha' nti' ngu' ndya'a̱ ngu' slo ma̱; ná ndube ti' ngu' bi' tsiya' ti. Ñi'ya̱ laca sca xu'na xlya' nu ná ña'a̱si̱i̱ tso'o ji'i̱ xlya' ji'i̱, jua'a̱ laca ngu' bi'; ñi'ya̱ nti' coo btyi nu nxna lijya̱ lo'o cui'i̱ ti masi ná ca'ya tyo, jua'a̱ nti' nu ngu' cuiñi bi'; ñi'ya̱ laca sca yaca si'yu nu ná nda si'yu, jua'a̱ laca ngu' bi'. Pana sca yaca nu cua ngüityi, ntsu'u cha' xcua̱a̱ na ji'i̱, cha' nga'aa ntsu'u juersa ji'i̱ cha' cu'ú la li'; cua ndye ngujuii yaca bi'.
Nxu̱u̱ tya'a ngu', lo'o li' ngua nu na'ni chiya'a̱ ña'a̱ bi' preso; lo'o jua'a̱ nu cuiñi nu ndu'ni cha' tu'ba ji'i̱ ycui' Ndyosi laca, lo'o bi' ngua preso. La cui' nu cuiñi bi' ngua'ni cha' tlyu ca slo na'ni bi' tya tsubi' la, cha' xcutsi̱i̱ ji'i̱ ñati̱; cua ngüiñilo'o bi' ji'i̱ lcaa ñati̱, bi' cha' nda ngu' chacuayá' chca'a̱ cuayá' ji'i̱ na'ni chiya'a̱ ña'a̱ bi' nde tyaca̱a̱ ngu', jua'a̱ ngua'ni tlyu ngu' ji'i̱ lcui̱ ji'i̱ ni' li'. Lo'o li' nchcua̱a̱ ycui' Ndyosi ji'i̱ nu na'ni chiya'a̱ ña'a̱ bi' lo'o nu cuiñi bi', ndyaa ngu' ña'a̱ lu'ú ti ngu' nde lo tayu' su ntsu'u quii' tlyu nu ti'í tsa ndyumi̱' ngu' cha' lo'o yuu sufri ndyaqui̱.
Na tonto tsa ma̱, cu'ma̱ ngu' gálatas, cha' nduna ma̱ cha' nu nda nu ngu' cuiñi bi'; laca ma̱ ñi'ya̱ si ntsu'u nu ngua'ni cucha'a̱ ji'i̱ ma̱. Bi' cha' juani nga'aa nti' ma̱ xñi la ma̱ cha' liñi nu cua nda Cristo lo'o na. Pana lo'o nda ya cha' ji'i̱ Cristo lo'o ma̱ tya clyo, li' ngulu'u tsa ya ji'i̱ ma̱ ñi'ya̱ ngua lo'o ngujuii Jesucristo lo crusi xqui'ya na; jua'a̱ ngulu'u ya ji'i̱ ma̱ ña'a̱ cuayá' nu ngua cuayá' tso'o ti' ma̱ cha' bi'.
Cua nguxtyanu ya ji'i̱ lcaa cha' cuxi nu ndyu'ni ngu' cuaana ti, lcaa cha' nu ntyuju'u tsa ti' ngu' cua'ni ngu' ji'i̱. Si'i na nñilo'o ya ji'i̱ ngu', la cui' jua'a̱ ná nchcutsa'a̱ ya cha' ji'i̱ ycui' Ndyosi lo'o xi xa' la cha', nu lo'o nchcui' ya cha' bi' lo'o ngu'; tso'o ti nclyu'u ya tyucui cha' ji'i̱ Jesús ji'i̱ ngu'. Lo'o jua'a̱ chañi tsa laca cha' bi', cha' jua'a̱ caca cuayá' ti' lcaa ñati̱ cha' tyucui tyiquee ya ndu'ni ya cña ji'i̱ ycui' Ndyosi; jua'a̱ nti' ycui' Ni ña'a̱ Ni ji'i̱ ya.
Lo'o cua ndyaa ngu' bi', li' nguxana Jesús nchcui' yu cha' ji'i̱ Juan bi' lo'o nu quiña'a̱ tsa ñati̱ nu ndi'i̱ cajua: ―Nu lo'o ndyaa ma̱ ne' quixi̱' su nguti'i̱ Juan ca su ná ndi'i̱ ñati̱, ¿na ca ngulacua ti' ma̱ cha' ña'a̱ ma̱ ca ndacua? ―nacui̱ Jesús ji'i̱ ngu'―. ¿Ha na'a̱ ma̱ sca yaca quii nu nchcuta̱ cui'i̱ ji'i̱? Si'i jua'a̱.
Cha' cuiñi laca bi'. Cua ntsu'u masi tu'ba tya'a ñati̱ nu ntajatya ngu' ji'i̱ ma̱ cuaana ti to' tyucui̱i̱ bi'; cua nchcui' ngu' bi' lo'o ycui' Ndyosi cha' ná cacu ngu' ná co'o ngu' tsiya' ti, ña'a̱ cuayá' nu cua ndyujuii ngu' ji'i̱ nu Pablo bi'. Lo'o jua'a̱ cua laca ndi'i̱ ngu' juani, ntajatya ngu' cha' chcui' ngu' lo'o nu'u̱.
Tya clyo ndyu'u ti'i̱ nu ngu' cuiñi bi' lo'o na, lo'o li' ngutu'u ngu' bi' ndyaa ngu'; si'i ñati̱ tya'a ntsu'u cha' ji'na lo'o Jesucristo laca ngu' bi'. Si chañi cha' tya'a ndya'a̱ na laca ngu' bi', cua ndyanu ngu' lo'o na nquicha'; pana ngutu'u ngu' bi', cha' taca ca cuayá' ti' na cha' si'i lcaa ñati̱ nu ndyu'u ti'i̱ lo'o na laca tya'a ngusñi na cha' ji'i̱ Jesucristo.
Jlo tsa ti' nu ngu' cuiñi bi' ñi'ya̱ chcui' ngu' sca cha' tso'o, pana tucua lo cha' ntsu'u tyiquee ngu' bi'; na cñilo'o ngu' bi' ji'i̱ ngu' nu ngusñi ca ti cha' tso'o ji'i̱ Jesucristo, cha' lo'o ngu' cua'ni suba' ngu' chaca quiya' nti' nu ngu' cuiñi bi'. Ñi'ya̱ ngua'ni ngu' cha' cuxi tya tsubi' la, nu lo'o bilya cuna ngu' cha' tso'o ji'i̱ ycui' Ndyosi, jua'a̱ nti' ngu' cuiñi bi' cha' cua'ni ngu' chaca quiya'.
Xa' ña'a̱ ndu'ni ngu' lo'o nclya' ngu' sca yaca ni'i̱: nu ñati̱ nu laca loo ji'i̱ yaca ni'i̱ ni, lo'o cala' ngu' sca ya' piti nu ntucua nde siyu' yaca ni'i̱ bi', taca ji'i̱ ngu' tsalo'o ngu' ji'i̱ macala su nti' ngu' cha' tsaa ngu' lo'o. Masi tonu tsa yaca ni'i̱ bi', masi lye tsa ndyaca cui'i̱ nu ndyalo'o ji'i̱, taca ji'i̱ ngu' tsalo'o ngu' ji'i̱ macala su nti' ngu' tsaa ngu'.
Masi ndu'ni ñati̱ chalyuu cha' ngua tsa ji'i̱, cha' tso'o tsa nclyacua ti' ngu', si'i jua'a̱ nti' ycui' Ndyosi ña'a̱ Ni ji'i̱ ngu' bi'; ná tso'o tsiya' ti cha' nu nchcui' ñati̱ chalyuu nti' Ni. Cua nscua sca cha' lo quityi cusu' nu nchcui' ndi'ya̱: “Ndu'ni ycui' Ndyosi cha' quichi̱ yaa cha' hique ñati̱ chalyuu, masi tso'o tsa ndu'ni ngu' nti' ngu'”, nacui̱ lo quityi.
Piblisite