APOCALIPSIS 5:9 - Chatino Tataltepec

⁹ Li' ndyula tu'ba ngu' bi' sca ji̱i̱ cha' cua'ni chi̱ ngu' loo nu ñi'ya̱ ña'a̱ xlya' bi'. Bilya cuna na' ji̱i̱ nu ndyula tu'ba ngu' bi': Cua nda ycui' Ni chacuayá' jinu'u̱ cha' xñi nu'u̱ quityi nchcu̱' bi', nacui̱ ngu', cha' suu nu'u̱ nguiña' nu nga'a̱ tu'ba quityi bi'. Na cua ndyujuii ñati̱ jinu'u̱ tsaca quiya'; pana lo'o ngujuii nu'u̱ ni, li' ngua'ni nu'u̱ cña cuentya ji'i̱ ya cha' caca ya ñati̱ ji'i̱ ycui' Ndyosi. Ñati̱ nu cua ndyu'u cua ña'a̱ ca quichi̱ tyi ngu', ñati̱ nu nchcui' cua ña'a̱ ca lo cha'cña nu nchcui' ñati̱ chalyuu, ñati̱ nu ndyu'u tyucui ña'a̱ chalyuu mala su ndi'i̱ ñati̱, bi' ñati̱ nu ngusubi nu'u̱ ji'i̱.

APOCALIPSIS 5:9 Referans Kwoze

1 JUAN 1:7

Pana si lubii cresiya ji'na ñi'ya̱ lo'o lubii cresiya ji'i̱ ycui' Ni, ndu'ni na cha' tso'o li'; stu'ba ti caca tyiquee na lo'o tya'a ngusñi na cha' ji'i̱ Jesús li'. Lo'o jua'a̱ cuityi̱ Ni qui'ya nu ntsu'u ji'na, xqui'ya cha' cua ndyalú tañi Jesús Sñi' ycui' Ni lo'o ngujuii yu lo crusi.

SAN MATEO 26:28

cha' ñi'ya̱ nti' tañi na', jua'a̱ nti' nu nde. Laca bi' sca cha' nu culu'u liñi ji'i̱ ma̱ cha' chaca quiya' quiñi cha' ji'i̱ ycui' Ndyosi lo'o ñati̱ chalyuu, nu lo'o tyalú tañi na' lo crusi. Jua'a̱ cua'ni lyaá Ni ji'i̱ quiña'a̱ tsa tya'a ma̱, nu lo'o cua'ni clyu ti' Ni ji'i̱ qui'ya nu ntsu'u ji'i̱ ma̱.

APOCALIPSIS 14:6

Na'a̱ na' ndyaa chaca xca̱ ji'i̱ ycui' Ndyosi li', nu cua̱ tsa ndacui ndyaa; ndyalo'o bi' ji'i̱ sca cha' tso'o nu ngua ti' ycui' Ndyosi chcui' lo'o lcaa ñati̱ chalyuu, sca cha' nu ndulo tsa ji'i̱ ñati̱ cha' cuna ngu'. Lcaa tyempo ná tye chca cha' bi'. Slo lcaa lo ñati̱ chalyuu tyucui ña'a̱ chalyuu mala su ndi'i̱ ñati̱, cua ña'a̱ ca quichi̱ tyi ngu', ñati̱ nu nchcui' cua ña'a̱ ca lo cha'cña nu nchcui' ñati̱ chalyuu, ca bi' ndyaa xca̱ bi', cha' chcui' lo'o lcaa ñati̱.

APOCALIPSIS 5:12

Cui̱i̱ tsa ndyula tu'ba ngu' li': Cua ndyujuii ngu' ji'i̱ nu ñi'ya̱ ña'a̱ xlya' bi' tsaca quiya', nacui̱ ngu'. Xqui'ya ñati̱ chalyuu, bi' cha' ngujuii Ni. Lo'o juani nga'a̱ cha' chcui' na ji'i̱ Ni, cha' lcaa lo cña tsiya' ti nchca ji'i̱ Ni cua'ni Ni; jua'a̱ na ji'i̱ Ni laca lcaa lo na tsiya' ti. Lcaa cha' jlo ti' Ni, lcaa cña nchca ji'i̱ Ni; bi' cha' ndyu'ni chi̱ na loo Ni, ndyu'ni tlyu na ji'i̱ Ni, lo'o jua'a̱ tso'o tsa chcui' na ji'i̱ Ni lo'o ñati̱. Jua'a̱ nacui̱ xca̱ ji'i̱ ycui' Ndyosi lo'o ndyula tu'ba ngu'.

APOCALIPSIS 4:11

Ndyosi Xu'na ya, nga'a̱ cha' cua'ni tlyu ya jinu'u̱, cha' cua'ni chi̱ ya loo nu'u̱, nacui̱ ngu'. Nchca jinu'u̱ cua'ni nu'u̱ lcaa lo cña tsiya' ti nu nti' nu'u̱ cua'ni nde chalyuu. Na cua ngüiñá nu'u̱ lcaa lo na nu ntsu'u nde chalyuu; chacuayá' jinu'u̱ lu'ú lcaa na, cha' nda nu'u̱ chacuayá' cha' ndya'a̱ lcaa na lu'ú. Jua'a̱ nacui̱ ngu' lo'o ndyula tu'ba ngu' li'.

LOS HECHOS 20:28

Nu juani ntsu'u cha' ña'a̱si̱i̱ ma̱ ji'i̱ ycui' ca ma̱, lo'o jua'a̱ ña'a̱si̱i̱ ma̱ ji'i̱ ca ta'a ñati̱ ji'i̱ Jesucristo ca quichi̱ tyi ma̱, cha' cua nda Xtyi'i ycui' Ndyosi cña ji'i̱ ma̱ cha' caca ma̱ loo ji'i̱ taju ñati̱ bi'. Tlyu tsa cña nu ngua'ni ycui' nu Xu'na na cha' ca ti̱ qui'ya nu ntsu'u ji'na tya lo'o ngujuii yu lo crusi, nu lo'o ndyalú tañi ycui' ca yu.

SAN MATEO 20:28

Na' nu cua nda Ni 'na lijya̱a̱ cha' caca na' ñati̱, ná lijya̱ na' nde chalyuu cha' caja msu 'na; ycui' na' laca na' msu ji'i̱ ñati̱, bi' cha' lijya̱ na'. Na cua lijya̱ na' cha' cajaa na' cha' cati̱ qui'ya nu ntsu'u ji'i̱ ñati̱, cha' cua'ni lyaá na' ji'i̱ quiña'a̱ tsa ñati̱ li' ―nacui̱ Jesús ji'i̱ ngu'.

APOCALIPSIS 5:6

Li' na'a̱ na' ndu̱ sca ñati̱; ñi'ya̱ ña'a̱ sca xlya' cuañi', jua'a̱ ña'a̱ ñati̱ bi'. Ndu̱ yu bi' nde loo su tlyu su ntucua ycui' Ndyosi, laja su ndu̱ nu ngu' cusu' bi', laja nu na'ni tacati bi'. Tya tyaca̱' nscua cuayá' hichu̱' yu tya lo'o ndyujuii ngu' ji'i̱ yu tsaca quiya', jua'a̱ ña'a̱ yu bi'. Cati tya'a sata ntucua hique nu ñi'ya̱ ña'a̱ xlya' nu ndu̱ cuentya ji'i̱ Jesús. La cui' jua'a̱ ntucua cati tya'a cloo Ni; nu cloo Ni ni, bi' laca cati tya'a cui'i̱ lubii nu laca Xtyi'i ycui' Ndyosi nu ndu'u ndyaa tyucui ña'a̱ chalyuu.

TITO 2:14

Nu lo'o nda Jesús chacuayá' cha' ndyujuii ngu' ji'i̱, nda yu tyucui ña'a̱ ycui' ca yu cha' taca clyaá na ji'i̱ nu cuxi. Ngua'ni lubii Ni ji'i̱ cresiya ji'na li' cha' caca na ñati̱ ji'i̱ Ni, cha' tyaja'a̱ na cua'ni na xcui' cha' tso'o li'.

2 PEDRO 2:1

Cua ntsu'u xi ngu' cuiñi nu nguti'i̱ laja ngu' Israel sa'ni la; tu'ba ji'i̱ ycui' Ndyosi ngua ngu', nacui̱ ycui' ngu' cuiñi bi'. La cui' jua'a̱ tyu'u tucua ñati̱ cuiñi laja cu'ma̱ nde loo la; li' culu'u ngu' cuiñi bi' ji'i̱ ma̱, culu'u ngu' cua ña'a̱ ca cha' nu ca'ya hique ycui' ca ngu'. Lo'o li' ñacui̱ ngu' bi' cha' cuentya ji'i̱ ycui' Ndyosi nchcui' ngu'. Si cuna ma̱ cha' nu chcui' ngu' bi', li' xana cha' cusu̱u̱ ji'i̱ ma̱ lo'o tya'a ma̱ ña'a̱ cuayá' nu tya'be tya'a ma̱. Li' caca ma̱ tucua latya ma̱ xqui'ya cha' cuiñi bi'. Tlyu tsa cña nu ngua'ni ycui' nu Xu'na na cha' cua'ni lyaá Ni ji'i̱ lcaa na lo'o ji'i̱ ngu' bi', pana ná nti' nu ngu' cuiñi bi' cha' caca ycui' Ndyosi Xu'na ngu' bi' tsiya' ti; ná ntsu'u cha' tsiya' ti ji'i̱ ngu' bi' lo'o ycui' Ndyosi, bi' cha' yala ti tye cha' ji'i̱ nu ngu' cuiñi bi'.

COLOSENSES 1:14

xqui'ya Cristo cua ngulaá na ji'i̱ nu cuxi, xqui'ya Cristo cua ngüi'ya Ni cha' clyu ti' ji'na ji'i̱ qui'ya nu ntsu'u ji'na lo'o Ni.

EFESIOS 1:7

Cua ngulaá na ji'i̱ nu cuxi nu ntsu'u ji'na, xqui'ya cha' cua ngujuii Sñi' ycui' Ni lo crusi cuentya ji'na, cha' cua ngüi'ya Ni cha' clyu ti' ji'na ji'i̱ qui'ya nu ntsu'u ji'na li'; tlyu tsa cha' tso'o nu cua ngua'ni ycui' Ndyosi lo'o na laca bi'.

1 JUAN 2:2

Ngua cuxi tyiquee na cuentya ji'i̱ ycui' Ndyosi Sti na, xqui'ya cha' ngua'ni na cha' cuxi; bi' cha' nchcube' Jesucristo cña loo na, cha' qui'ya ycui' yu yabe' nu ntsu'u ji'na xqui'ya cha' cuxi nu ngua'ni na. La cui' jua'a̱ qui'ya Jesucristo yabe' nu ntsu'u ji'i̱ lcaa ñati̱ chalyuu nu tso'o ntsu'u tyiquee ña'a̱ ji'i̱ ycui' Ni.

1 CORINTIOS 7:23

Quiña'a̱ tsa cha' tso'o ngua'ni ycui' Ndyosi cuentya ji'na, cha' ngulaá ma̱ ji'i̱ nu xña'a̱; bi' cha' ná ta ma̱ chacuayá' ji'i̱ ñati̱ chalyuu ti nu nti' cua'a ji'i̱ ma̱ cha' ná tyi'i̱ tso'o ti ma̱.

APOCALIPSIS 13:8

lcaa ñati̱ tyucui ña'a̱ chalyuu cua'ni tlyu ngu' ji'i̱ na'ni bi' li', si ná nscua xtañi ngu' lo quityi ji'i̱ ycui' Ndyosi. Nu ngua tya clyo la lo'o tya lyiji cuiñá Ni chalyuu, tya li' nguscua Ni xtañi ñati̱ nu ná nga'a̱ cha' tye chalyuu ji'i̱. Cua ndyanu quityi bi' cuentya ji'i̱ nu ñi'ya̱ ña'a̱ xlya' nu cua ndyujuii ñati̱ ji'i̱ tsaca quiya'.

APOCALIPSIS 11:9

Lo'o li' tya̱a̱ ñati̱ tyucui ña'a̱ chalyuu mala su ndi'i̱ ñati̱, lcaa lo ñati̱ chalyuu, masi ñati̱ nu ngutu'u cua ña'a̱ ca quichi̱ tyi ngu', masi ñati̱ nu nchcui' cua ña'a̱ ca lo cha'cña nu nchcui' ñati̱ chalyuu; tyu'u scua sna tsa̱ cla'be nu tya̱a̱ ngu' tya̱a̱ na'a̱ ngu' ji'i̱ jyo'o bi' ca su nscua ngu'. Ná ta ngu' chacuayá' cha' tyatsi' jyo'o bi'.

HEBREOS 11:14

Jlya ti' ngu' cha' ntsu'u sca se'i̱ tso'o la su tyalaa ngu' ca nde loo la, bi' cha' ngua ti' ngu' jua'a̱.

COLOSENSES 1:23

Pana juani ña'a̱ ti ndulo tsa cha' ji'i̱ ma̱ cha' tyanu tachaa la cha' ji'i̱ Cristo ne' cresiya ji'i̱ ma̱, cha' ycui' yu bi' laca su̱u̱ lcaa cha' bi'. Ná ta ma̱ chacuayá' cha' cñilo'o ngu' ji'i̱ ma̱, cha' si jua'a̱, nga'aa culacua ti' ma̱ ji'i̱ cha' tso'o nu tyacua ji'i̱ ma̱ nde loo la, la cui' cha' nu cua ndyuna ma̱ ji'i̱ tya clyo. Xqui'ya cha' tso'o ji'i̱ Cristo bi', bi' cha' ndya'a̱ ngu' tyucui ña'a̱ chalyuu nchcui' ngu' cha' bi' lo'o ñati̱. Lo'o jua'a̱ na', Pablo, ndya'a̱ tsa na' lo cña bi'.

EFESIOS 5:19

Cula tu'ba ma̱ lcaa lo ji̱i̱ ji'i̱ ycui' Ndyosi nu lo'o tyu'u ti'i̱ ma̱ lo'o tya'a ma̱ cha' cua'ni tlyu ma̱ ji'i̱ Ni, masi ji̱i̱ salmo nu nscua lo quityi tya sa'ni, masi cua ña'a̱ ca ji̱i̱ nu nchcui' cha' ji'i̱ ycui' Ndyosi nu ca'ya hique ma̱; tyucui tyiquee ma̱ cua'ni tlyu ma̱ ji'i̱ ycui' Ndyosi lo'o ji̱i̱ bi'.

APOCALIPSIS 10:11

Li' nchcui' Ni lo'o na': ―Tya chaca quiya' ntsu'u cha' chcui' nu'u̱ cha' lo'o ñati̱, lcaa cha' nu cua nti' ycui' Ndyosi ta Ni lo'o lcaa lo ñati̱ chalyuu, masi lo'o ngu' nu laca loo, masi lo'o ñati̱ tyucui ña'a̱ chalyuu mala su ndi'i̱ ñati̱; masi lo'o ñati̱ nu nchcui' cua ña'a̱ ca lo cha'cña nu nchcui' ñati̱ chalyuu chcui' nu'u̱.

APOCALIPSIS 13:7

Ngujui chacuayá' ji'i̱ ni' cha' xu̱u̱ tya'a ni' lo'o ñati̱ nu ntsu'u cha' ji'i̱ lo'o ycui' Ndyosi, cha' tyiji̱loo ni' ji'i̱ ngu' bi'. Lo'o li' ngujui chacuayá' ji'i̱ ni' cha' caca ni' loo ji'i̱ tyucui ña'a̱ chalyuu mala su ndi'i̱ ñati̱, masi lcaa lo ñati̱ chalyuu nu ngutu'u cua ña'a̱ ca quichi̱ tyi ngu', nu nchcui' cua ña'a̱ ca lo cha'cña nu nchcui' ñati̱ chalyuu;

APOCALIPSIS 15:3

Ndyula tu'ba ngu' sca ji̱i̱ nu cua ndyula tu'ba jyo'o Moisés nu ngua sa'ni, la cui' Moisés nu ngua'ni cña ji'i̱ ycui' Ndyosi; lo'o nu ñi'ya̱ ña'a̱ xlya' bi' ndyula tu'ba la cui' ji̱i̱ bi'. Ndi'ya̱ nchcui' ji̱i̱ bi': Ndyosi Xu'na ya, lcaa cña nchca jinu'u̱; tlyu tsa cña ndu'ni nu'u̱, hasta ndube tsa ti' lcaa ñati̱ ji'i̱ cña bi'. Xcui' ndu'ni liñi nu'u̱ lo'o ñati̱ chalyuu, chañi tsa laca lcaa cha' nu nchcui' nu'u̱ lo'o ñati̱. Sca ti nu'u̱ laca Xu'na lcaa ñati̱ tyucui ña'a̱ chalyuu.

APOCALIPSIS 17:15

Tya nchcui' la nu xca̱ ji'i̱ ycui' Ndyosi bi' lo'o na' li': ―Ñi'ya̱ laca sta'a̱ nu nscua cacua ti to' quichi̱ tlyu bi', jua'a̱ laca ñati̱ chalyuu, cha' tsa tlyu ti lijya̱ lcaa lo ñati̱ chalyuu ca quichi̱ bi'; ngutu'u ngu' tyucui ña'a̱ chalyuu mala su ndi'i̱ ñati̱, nchcui' ngu' lcaa lo cha'cña nu nchcui' ñati̱ chalyuu.