APOCALIPSIS 5:13 - Chatino Tataltepec

¹³ Li' nguañi ndyula tu'ba lcaa ñati̱ tyucui ña'a̱ chalyuu, lcaa ngu' nu cua nda ycui' Ndyosi ji'i̱ lijya̱ nde chalyuu; masi nde cua̱ su ntucua ycui' Ni, masi nde lo yuu chalyuu, masi chaca ba'a chalyuu su ndyaa ñati̱ nu ngujuii, masi lo tyujo'o, lcaa ñati̱ bi' ndyu'ni tlyu ngu' ji'i̱ ycui' Ndyosi. Ndi'ya̱ nchcui' ngu': Cua'ni tlyu na ji'i̱ ycui' nu Cusu' nu ntucua ca su tlyu, nacui̱ ngu', cua'ni chi̱ na loo Ni. Jua'a̱ nu ñi'ya̱ ña'a̱ xlya' bi', cua'ni tlyu na ji'i̱ Ni. Sca ti ycui' Ndyosi ntsu'u chacuayá' ji'i̱ Ni cha' cua'ni Ni lcaa lo cña tsiya' ti; lo'o jua'a̱ ná nga'a̱ cha' tye cha' ji'i̱ ycui' Ni tsiya' ti, nacui̱ ngu'.

APOCALIPSIS 5:13 Referans Kwoze

FILIPENSES 2:10

cha' jua'a̱ tyu̱ sti̱' lcaa na lu'ú nde loo Jesús, masi ñati̱, masi cui'i̱. Ná ntsu'u su tye cha' cua'ni chi̱ ngu' loo yu xqui'ya chacuayá' nu cua nda Ni ji'i̱ yu, masi nu ndi'i̱ ca nde cua̱, masi nu ndi'i̱ nde lo yuu chalyuu, masi ngu' nu cua nguatsi', lo'o jyo'o bi' cua'ni chi̱ ngu' loo yu.

APOCALIPSIS 5:3

Li' masi tyucui ña'a̱ su ntucua ycui' Ndyosi bi', masi tyucui ña'a̱ lo yuu chalyuu, masi tyucui ña'a̱ chaca ba'a chalyuu su ndyaa ñati̱ nu cua ngujuii, ná ngujui nu scana ji'i̱ quityi cha' chcui' ngu' lo.

APOCALIPSIS 5:12

Cui̱i̱ tsa ndyula tu'ba ngu' li': Cua ndyujuii ngu' ji'i̱ nu ñi'ya̱ ña'a̱ xlya' bi' tsaca quiya', nacui̱ ngu'. Xqui'ya ñati̱ chalyuu, bi' cha' ngujuii Ni. Lo'o juani nga'a̱ cha' chcui' na ji'i̱ Ni, cha' lcaa lo cña tsiya' ti nchca ji'i̱ Ni cua'ni Ni; jua'a̱ na ji'i̱ Ni laca lcaa lo na tsiya' ti. Lcaa cha' jlo ti' Ni, lcaa cña nchca ji'i̱ Ni; bi' cha' ndyu'ni chi̱ na loo Ni, ndyu'ni tlyu na ji'i̱ Ni, lo'o jua'a̱ tso'o tsa chcui' na ji'i̱ Ni lo'o ñati̱. Jua'a̱ nacui̱ xca̱ ji'i̱ ycui' Ndyosi lo'o ndyula tu'ba ngu'.

ROMANOS 11:36

Lcaa na nu ntsu'u chalyuu, na ji'i̱ ycui' Ndyosi laca bi', cha' cua ngüiñá ycui' Ni lcaa na, cha' caca bi' cña ji'i̱ Ni. Nga'aa caca tye cha' cua'ni tlyu na ji'i̱ ycui' Ndyosi. Lo'o jua'a̱ chañi tsa cha' bi'.

1 PEDRO 5:11

Ná nga'a̱ cha' tye tsa̱ nu cua'ni tlyu na ji'i̱ ycui' Ndyosi li', cha' laca Ni loo tsiya' ti. Jua'a̱ caca cha' tu'ni.

SAN LUCAS 2:14

Cua'ni tlyu na ji'i̱ ycui' Ndyosi, masi ca bi' ca su tlyu su ntucua Ni, masi nde lo yuu chalyuu, cha' tlyu tsa laca ycui' Ni, nacui̱ ngu' xca̱ bi' li'. Cua'ni Ni cha' ti̱ ti tyi'i̱ tyiquee ñati̱ chalyuu lo'o ca cuayá' ti' ngu' cha' ntsu'u tsa tyiquee Ni ña'a̱ Ni ji'i̱ ngu', nacui̱ ngu' xca̱ li'.

APOCALIPSIS 6:16

Li' ngusi'ya ngu' ji'i̱ ca'ya lo'o ji'i̱ quee tlyu: ―Cua̱a̱ clya ma̱ xasu ma̱ hichu̱' ya, cha' ná ña'a̱ ycui' nu Cusu' nu ntucua su tlyu ji'i̱ ya; ñasi̱' tsa nu ñi'ya̱ ña'a̱ xlya' bi' ña'a̱ Ni ji'i̱ ya ―nacui̱ ngu'.

ROMANOS 16:27

Sca ti ycui' Ndyosi jlo ti' lcaa cha', bi' cha' lcaa tyempo ná nga'a̱ cha' tye cha' cua'ni tlyu na ji'i̱ ycui' Ni chacuayá' ji'i̱ Jesucristo. Jua'a̱ nti' na cha' caca tu'ni.

ROMANOS 9:5

Sñi' jyo'o cusu' ji'na laca ngu' bi'. Nu lo'o ngula Cristo chalyuu ngua Ni ñati̱, la cui' tya'a ngu' Israel ngua yu li'. La cui' jua'a̱ laca Cristo ycui' Ndyosi nu laca loo ji'i̱ lcaa na tsiya' ti, bi' cha' lcaa tyempo ndu'ni tlyu ngu' ji'i̱ Ni. Chañi tsa cha' bi'.

APOCALIPSIS 5:6

Li' na'a̱ na' ndu̱ sca ñati̱; ñi'ya̱ ña'a̱ sca xlya' cuañi', jua'a̱ ña'a̱ ñati̱ bi'. Ndu̱ yu bi' nde loo su tlyu su ntucua ycui' Ndyosi, laja su ndu̱ nu ngu' cusu' bi', laja nu na'ni tacati bi'. Tya tyaca̱' nscua cuayá' hichu̱' yu tya lo'o ndyujuii ngu' ji'i̱ yu tsaca quiya', jua'a̱ ña'a̱ yu bi'. Cati tya'a sata ntucua hique nu ñi'ya̱ ña'a̱ xlya' nu ndu̱ cuentya ji'i̱ Jesús. La cui' jua'a̱ ntucua cati tya'a cloo Ni; nu cloo Ni ni, bi' laca cati tya'a cui'i̱ lubii nu laca Xtyi'i ycui' Ndyosi nu ndu'u ndyaa tyucui ña'a̱ chalyuu.

APOCALIPSIS 1:6

Cua ngua'ni Jesús cha' laca na sca lo ñati̱ nu ndulo tsa cuentya ji'i̱ ycui' Ndyosi, nu ndyu'ni cña nu nti' ycui' Ndyosi Sti Jesús cha' cua'ni na. Cua nti' na cha' lcaa yija̱ nu lijya̱ nde loo la ná tye cha' cua'ni tlyu na ji'i̱ ycui' Ndyosi, cha' nchca ji'i̱ Ni cua'ni Ni lcaa lo cña tsiya' ti. Jua'a̱ caca cha' lacua.

1 PEDRO 4:11

Culu'u ma̱ cha' ji'i̱ ñati̱, si bi' laca cña nu cua nda Ni ji'i̱ ma̱ cha' cua'ni ma̱; culu'u ma̱ tsa ña'a̱ cha' nu nti' ycui' Ndyosi chcui' Ni lo'o ngu'. Lo'o jua'a̱ xtyucua ma̱ ji'i̱ tya'a ñati̱ ma̱ lo'o tyucui juersa nu nda ycui' Ndyosi ji'i̱ ma̱, si bi' laca cña nu cua nda Ni ji'i̱ ma̱ cha' cua'ni ma̱. Nu lo'o ña'a̱ ngu' cña tso'o nu ndyu'ni ma̱ bi', li' cua'ni tlyu ngu' ji'i̱ ycui' Ndyosi xqui'ya Jesucristo. Lo'o li' ná nga'a̱ cha' tye cha' cua'ni tlyu ngu' ji'i̱ Cristo bi', cha' laca Cristo loo tsiya' ti. Jua'a̱ caca cha' tu'ni.

EFESIOS 3:21

Cua'ni tlyu na ji'i̱ ycui' Ndyosi, lcaa na nu tsa tlyu ti ndyu'ni tlyu na ji'i̱ Ni; la cui' ti tlyu tsa laca Ni cuentya ji'i̱ Jesucristo. Jua'a̱ caca ji'i̱ Ni tyucui tyempo nde chalyuu, la cui' ti ná ntsu'u tsa̱ nu tye cha' ji'i̱ Ni tsiya' ti. Jua'a̱ caca cha' tu'ni.

APOCALIPSIS 5:9

Li' ndyula tu'ba ngu' bi' sca ji̱i̱ cha' cua'ni chi̱ ngu' loo nu ñi'ya̱ ña'a̱ xlya' bi'. Bilya cuna na' ji̱i̱ nu ndyula tu'ba ngu' bi': Cua nda ycui' Ni chacuayá' jinu'u̱ cha' xñi nu'u̱ quityi nchcu̱' bi', nacui̱ ngu', cha' suu nu'u̱ nguiña' nu nga'a̱ tu'ba quityi bi'. Na cua ndyujuii ñati̱ jinu'u̱ tsaca quiya'; pana lo'o ngujuii nu'u̱ ni, li' ngua'ni nu'u̱ cña cuentya ji'i̱ ya cha' caca ya ñati̱ ji'i̱ ycui' Ndyosi. Ñati̱ nu cua ndyu'u cua ña'a̱ ca quichi̱ tyi ngu', ñati̱ nu nchcui' cua ña'a̱ ca lo cha'cña nu nchcui' ñati̱ chalyuu, ñati̱ nu ndyu'u tyucui ña'a̱ chalyuu mala su ndi'i̱ ñati̱, bi' ñati̱ nu ngusubi nu'u̱ ji'i̱.

COLOSENSES 1:23

Pana juani ña'a̱ ti ndulo tsa cha' ji'i̱ ma̱ cha' tyanu tachaa la cha' ji'i̱ Cristo ne' cresiya ji'i̱ ma̱, cha' ycui' yu bi' laca su̱u̱ lcaa cha' bi'. Ná ta ma̱ chacuayá' cha' cñilo'o ngu' ji'i̱ ma̱, cha' si jua'a̱, nga'aa culacua ti' ma̱ ji'i̱ cha' tso'o nu tyacua ji'i̱ ma̱ nde loo la, la cui' cha' nu cua ndyuna ma̱ ji'i̱ tya clyo. Xqui'ya cha' tso'o ji'i̱ Cristo bi', bi' cha' ndya'a̱ ngu' tyucui ña'a̱ chalyuu nchcui' ngu' cha' bi' lo'o ñati̱. Lo'o jua'a̱ na', Pablo, ndya'a̱ tsa na' lo cña bi'.

SAN MATEO 6:13

Ná ta nu'u̱ chacuayá' cha' cojolaqui cha' cuxi ji'i̱ ya, pana cua'ni lyaá nu'u̱ ji'i̱ ya ya' nu xña'a̱. Nu'u̱ laca loo tsiya' ti; lcaa chacuayá' nu ntsu'u nde chalyuu, lo'o jua'a̱ chacuayá' nu ntsu'u nde cua̱, jinu'u̱ ntsu'u lcaa chacuayá' bi'. Ná nga'a̱ cha' tye cha' tlyu tsa laca nu'u̱. Jua'a̱ caca cha' tu'ni. Jua'a̱ ñacui̱ ma̱ ji'i̱ ycui' Ndyosi.

1 TIMOTEO 4:16

Talo nu'u̱ ji'i̱ cña bi'. Cua'a nu'u̱ ji'i̱ ycui' ca cha' xcui' cha' tso'o ti cua'ni nu'u̱. Tso'o ti culu'u nu'u̱ ji'i̱ ngu' tya'a na, cha' jua'a̱ cuna tso'o ngu' cha' nu nclu'u nu'u̱ ji'i̱ ngu', cha' cua'ni lyaá ycui' Ndyosi ji'i̱ ngu' bi' li'. Lo'o jua'a̱ cua'ni lyaá Ni jinu'u̱ li'.

SAN JUAN 1:29

Ca chaca tsa̱ na'a̱ Juan cha' cua lijya̱ ti Jesús slo. Lo'o li' nacui̱ Juan ji'i̱ ñati̱ nu ndu̱ slo: ―Ña'a̱ tso'o ma̱ ji'i̱ nu cusu' cua ―nacui̱―. Cua ngusubi ycui' Ndyosi ji'i̱ nu cua cha' caca yu sca msta̱ lu'ú, cha' cuityi̱ lcaa qui'ya nu ntsu'u ji'i̱ ñati̱ chalyuu ―nacui̱―.

APOCALIPSIS 5:1

Li' na'a̱ na' cha' ntsu'u quityi ya' tsu' cui̱ nu cusu' laca loo nu ntucua lo yaca xlya bi'. Sca quityi nchcu̱', nu ngutu ti ña'a̱ laca bi'; jua'a̱ tyucuaa chu̱' quityi bi' cua nscua cha'. Cati se'i̱ nga'a̱ nguiña' tu'ba quityi su ndyacu̱' bi'.

APOCALIPSIS 13:8

lcaa ñati̱ tyucui ña'a̱ chalyuu cua'ni tlyu ngu' ji'i̱ na'ni bi' li', si ná nscua xtañi ngu' lo quityi ji'i̱ ycui' Ndyosi. Nu ngua tya clyo la lo'o tya lyiji cuiñá Ni chalyuu, tya li' nguscua Ni xtañi ñati̱ nu ná nga'a̱ cha' tye chalyuu ji'i̱. Cua ndyanu quityi bi' cuentya ji'i̱ nu ñi'ya̱ ña'a̱ xlya' nu cua ndyujuii ñati̱ ji'i̱ tsaca quiya'.