APOCALIPSIS 21:7 - Chatino Tataltepec

⁷ Ndi'ya̱ caca ji'i̱ ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu; cua'ni tlyu ngu' bi' 'na cha' na' laca̱ ycui' Ndyosi cuentya ji'i̱ ngu', lo'o jua'a̱ caca ngu' bi' sñi' na'.

APOCALIPSIS 21:7 Referans Kwoze

2 CORINTIOS 6:18

caca na' Sti ma̱; jua'a̱ cu'ma̱ caca ma̱ sñi' na', masi nu cuna'a̱, masi nu qui'yu. Jua'a̱ nacui̱ ycui' Ndyosi nu Xu'na ma̱, nu lcaa tsiya' ti cña nchca ji'i̱ Ni.

HEBREOS 8:10

Lo'o juani nde laca cha' cucui nu cua quiñi ti 'na lo'o ngu' Israel juani, nacui̱ Ni. Nu lo'o tyalaa tyempo, li' cua'ni na' cha' tyanu tso'o lcaa cha' ne' cresiya ji'i̱ ngu', ñi'ya̱ nu chcui' na' lo'o ngu' li'. Tyucui ti' tyiquee ngu' cua'ni ngu' cña 'na li'; caca na' ycui' Ndyosi nu Xu'na ngu' li', lo'o jua'a̱ caca ngu' bi' ñati̱ jna'.

APOCALIPSIS 21:3

Cui̱i̱ tsa nchcui' sca nu ndu̱ cacua ti su tlyu ca su ntucua ycui' Ndyosi li': ―Ca juani ntucua tyi ycui' Ndyosi la cui' ca su ndi'i̱ ñati̱ nu ngusñi cha' ji'i̱ Ni nde chalyuu. Tyi'i̱ ycui' Ni ca su ndi'i̱ ñati̱ ji'i̱ Ni li'; jua'a̱ caca ngu' bi' ñati̱ ji'i̱ ycui' Ni, caca ycui' Ni loo ji'i̱ ngu' bi' li'.

APOCALIPSIS 2:11

Cua'a̱ jyaca̱ ma̱ ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱ xi: Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu ji'i̱ ngu'; ná sca caca ji'i̱ ngu' bi' tsiya' ti tsa̱ bi', nu lo'o culo ycui' Ndyosi cña ji'i̱ ñati̱ cuxi nu ntsu'u ca bilyaa cha' tyaa ngu' nde chalyuu talya, nacui̱ Jesús.”

SAN MATEO 25:34

Ca li' lo'o caca na' loo tsiya' ti, chcui' na' lo'o taju ñati̱ nu ndi'i̱ la'a tsu' cui̱ 'na: “Tya̱a̱ ma̱ ca su ntucua ycui' Ni nu laca loo, lcaa cu'ma̱ nu tso'o tsa nti' ycui' Ndyosi Sti na' ña'a̱ Ni ji'i̱ ma̱, cha' cua ngua'ni cho'o ycui' Ni su tyi'i̱ ma̱ slo Ni, tya lo'o ngüiñá Ni chalyuu.

APOCALIPSIS 2:17

Cua'a̱ jyaca̱ ma̱ xi ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱: Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu ji'i̱ ngu'; caca tyaala' ti' tyiquee ngu' bi', cacu ngu' cha' tso'o nu cua nguxco'o na' cha' caja ji'i̱ ngu'. Lo'o jua'a̱ ta na' sca quee sube ti nu ngati̱ ña'a̱, nu nscua xtañi scaa ngu' chu̱', cha' ca cuayá' ti' ngu' bi', cha' tso'o ti nti' na' ña'a̱ na' ji'i̱ ngu'; chaca xtañi nu tso'o la laca nu nscua chu̱' quee bi'. Ná caja chacuayá' ji'i̱ xa' ñati̱ tyuloo xtañi bi'; cua laca ti ñati̱ nu caja xtañi bi' ji'i̱, bi' laca nu caja chacuayá' cha' tyuloo ji'i̱, nacui̱ Ni.”

SAN MATEO 19:29

Lo'o jua'a̱ cua ña'a̱ ca ñati̱ nu ntsu'u cha' tsaa tyijyu' cha' cua'ni ngu' cña cuentya jna', nu nguxtyanu lcaa na nu ntsu'u ji'i̱ ngu' cha' ndyu'ni ngu' cña bi', ná xtyanu na' ji'i̱ ngu' bi' jua'a̱ ti; masi tyi ngu', masi tya'a ngula ngu', masi sti ngu', masi xtya'a̱ ngu', masi sñi' ngu', masi yuu nu ntsu'u ji'i̱ ngu', masi xtyanu ngu' lcaa cha' bi', pana caja chalyuu nu ná nga'a̱ cha' tye ji'i̱ ngu'. Lo'o jua'a̱ xa' caja quiña'a̱ la cha' ji'i̱ ngu' bi', tsa ña'a̱ nu nguna' ji'i̱ ngu' bi' ngua ti' ngu'.

APOCALIPSIS 2:7

Cua'a̱ jyaca̱ ma̱ xi ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱: Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu ji'i̱ ngu'; caja chalyuu nu ná nga'a̱ cha' tye ji'i̱ ngu' bi', lo'o jua'a̱ ta na' chacuayá' cacu ngu' si'yu yaca tso'o nu ndu̱ ca cla'be yuu tso'o su ndi'i̱ ycui' Ni, nacui̱ Jesús.”

1 PEDRO 3:9

Ná cua'ni cuxi ma̱ lo'o tya'a ñati̱ ma̱, masi ngua'ni cuxi ngu' lo'o ma̱; lo'o jua'a̱ ná chcui' tyaala ma̱ lo'o tya'a̱ ñati̱ ma̱, masi tyaala tsa nchcui' ngu' lo'o ma̱. Na cua ngusubi ycui' Ni ji'i̱ ma̱ cha' xtyucua Ni ji'i̱ cu'ma̱, bi' cha' tso'o la si chcui' ma̱ lo'o ycui' Ndyosi cha' xtyucua Ni ji'i̱ ngu' tyaala bi'.

APOCALIPSIS 2:25

masi sca ti cha' chcui' na' lo'o ma̱, cha' ña'a̱ ti tya tyanu tso'o cha' ne' cresiya ji'i̱ ma̱, lcaa cha' nu cua ndyuna ma̱ tya tsubi' la; tyanu cha' bi' ña'a̱ cuayá' nu ca̱a̱ na', nacui̱ Jesús.

SAN MARCOS 10:17

Tya ndyaa la Jesús tyucui̱i̱ bi', lo'o li' nxna sca nu qui'yu lijya̱ lca'a̱ ji'i̱ Jesús. Ndyatu̱ sti̱' slo Jesús li'. ―Mstru, tso'o tsa ndu'ni nu'u̱ ―nacui̱ ji'i̱ Jesús―. Cacha' nu'u̱ jna', ¿na laca cua'ni na' cha' caja chalyuu nu ná nga'a̱ cha' tye 'na? ―nacui̱ yu.

SAN MATEO 25:21

“Tso'o tsa cña nu ngua'ni nu'u̱”, nacui̱ xu'na msu bi' ji'i̱. “Sca msu tso'o laca nu'u̱, cha' tso'o tsa ndaquiya' nu'u̱ ji'i̱ cha' 'na. Sca cña sube ti nda na' jinu'u̱ tsubi', pana ta na' cña nu cua tlyu la jinu'u̱, cha' cua'ni nu'u̱ nde loo la. Stu'ba ti tyi'i̱ nu'u̱ slo na', cha' stu'ba ti ca tso'o tyiquee nu'u̱ lo'o na'”, nacui̱ xu'na bi' li'.

ROMANOS 8:14

Cua ña'a̱ ca na, cua laca na sñi' ycui' Ndyosi si ndu'ni na cua ña'a̱ ca cña nu nclyo Xtyi'i ycui' Ndyosi ji'na.

ROMANOS 8:19

Lcaa ca na lu'ú nu cua ngüiñá ycui' Ndyosi nde chalyuu ni, ntajatya tsa na bi' ji'i̱ ycui' Ndyosi, ni jacua' culu'u Ni ji'i̱ ñati̱ chalyuu tilaca nu chañi cha' laca ngu' sñi' ycui' Ni.

2 CORINTIOS 6:16

Ñi'ya̱ nti' cu'ma̱ nu tyaca'a tsa ma̱ ji'i̱ ycui' Ndyosi ni, ná taca cua'ni tya'a ma̱ lo'o xa' ñati̱ nu ngusñi cha' ji'i̱ cua ña'a̱ ca jo'ó; tyaca'a tsa na ji'i̱ ycui' Ndyosi nu lu'ú ca xqui'ya cha' ndyanu Xtyi'i ycui' Ndyosi ne' cresiya ji'na. Ndi'ya̱ nacui̱ ycui' Ndyosi: Tyi'i̱ na' ca slo ñati̱ bi', lo'o jua'a̱ tya'a̱ na' lo'o ñati̱ bi'; caca na' ycui' Ndyosi cuentya ji'i̱ ngu' bi', bi' cha' taca caca ngu' bi' ñati̱ 'na. Jua'a̱ nacui̱ Ni.