APOCALIPSIS 2:26 - Chatino Tataltepec

²⁶ Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱, ñati̱ nu ndalo, cha' ndu'ni ngu' cua ña'a̱ ca cña nu nti' na' cha' cua'ni ngu' ña'a̱ cuayá' tye chalyuu, nacui̱ Ni. Stu'ba ti tyucua ngu' bi' lo'o na', cha' caca ya loo ji'i̱ lcaa ñati̱ chalyuu ca li',

APOCALIPSIS 2:26 Referans Kwoze

APOCALIPSIS 3:21

Cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu, ta na' su tyucua ñati̱ bi' ca su ntucua na' cha' laca na loo; cha' jua'a̱ na', cua ntiji̱loo na' ji'i̱ nu xña'a̱ bi', lo'o juani nga'a̱ na' slo ycui' Sti na' su laca Ni loo.

APOCALIPSIS 20:4

Lo'o li' na'a̱ na' su ntucua tyu̱u̱ tya'a yaca xlya tlyu. Ndyuloo na' ji'i̱ ngu' nu ntucua lo yaca xlya bi', cha' laca ngu' nu ntsu'u chacuayá' ji'i̱ cua'ni cuayá' ji'i̱ ñati̱ chalyuu. Laja ngu' nu ntucua bi' na'a̱ na' ji'i̱ ñati̱ chalyuu nu cua ndyujuii tya'a ñati̱ ji'i̱, xqui'ya cha' ná ntsi̱i̱ ngu' cacha' liñi ngu' cha' tso'o ji'i̱ tya'a ñati̱, cha' nu cua nda Jesús lo'o na cuentya ji'i̱ ycui' Ndyosi Sti yu. Ná ngua'ni tlyu jyo'o bi' ji'i̱ na'ni chiya'a̱ ña'a̱ bi', la cui' ti ná ngua'ni tlyu ngu' ji'i̱ lcui̱ ji'i̱ na'ni bi', jua'a̱ ná ngua'a̱ cuayá' na'ni bi' nde tyaca̱a̱ ngu', nde chu̱' ya' ngu'; cua ndyu'ú ngu' bi' chaca quiya', lo'o juani laca ngu' cña lo'o Cristo ca su ntucua ycui' Ndyosi ña'a̱ cuayá' tyu'u scua sca mil yija̱.

APOCALIPSIS 2:7

Cua'a̱ jyaca̱ ma̱ xi ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱: Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu ji'i̱ ngu'; caja chalyuu nu ná nga'a̱ cha' tye ji'i̱ ngu' bi', lo'o jua'a̱ ta na' chacuayá' cacu ngu' si'yu yaca tso'o nu ndu̱ ca cla'be yuu tso'o su ndi'i̱ ycui' Ni, nacui̱ Jesús.”

APOCALIPSIS 22:5

Nga'aa caca talya su ndi'i̱ ngu' ca bi'; bi' cha' nga'aa cua'nijo'o xee cuichaa ji'i̱ ngu', nga'aa nti' cha' cua'a̱ ngu' xee nde ni'i̱. Ycui' Ndyosi nu Xu'na na, bi' laca nu ta xee ji'i̱ ngu', ni ná tye tyempo cha' stu'ba ti caca ngu' loo lo'o ycui' Ni.

1 JUAN 5:5

Pana ñati̱ nu jlya ti' cha' Jesús laca nu sca ti Sñi' ycui' Ndyosi, bi' ti ñati̱ nu caca ji'i̱ tyiji̱loo ji'i̱ lcaa nu cuxi nu ntsu'u chalyuu.

SAN JUAN 6:29

―Ndi'ya̱ laca cña nu nti' ycui' Ndyosi cha' cua'ni ma̱ ―nacui̱ Jesús―. Xñi ma̱ cha' jna', cha' na' laca̱ Sñi' ycui' Ndyosi, cha' cua nda Ni 'na lijya̱a̱ chalyuu.

SAN MATEO 24:13

Pana ná cube ti' ma̱, lcaa cu'ma̱ nu talo tyiquee ma̱ ji'i̱ cha' cuxi bi', cua'ni lyaá na' ji'i̱ cu'ma̱ li', ña'a̱ cuayá' nu tye chalyuu ―nacui̱ Jesús―.

APOCALIPSIS 2:11

Cua'a̱ jyaca̱ ma̱ ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱ xi: Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu ji'i̱ ngu'; ná sca caca ji'i̱ ngu' bi' tsiya' ti tsa̱ bi', nu lo'o culo ycui' Ndyosi cña ji'i̱ ñati̱ cuxi nu ntsu'u ca bilyaa cha' tyaa ngu' nde chalyuu talya, nacui̱ Jesús.”

APOCALIPSIS 3:12

Cua ña'a̱ ca ñati̱ nu tyiji̱loo ji'i̱ nu xña'a̱ ni, tlyu tsa caca ñati̱ bi' laja ñati̱ 'na lo'o cua ndyee chalyuu; tso'o tsa tyi'i̱ ngu' bi' ca su ndi'i̱ na'. Scua na' xtañi ycui' Ndyosi Sti na' loo ngu' bi', lo'o jua'a̱ scua na' ni naa quichi̱ tlyu nu ca ji'i̱ ycui' Ni; Jerusalén cucui naa quichi̱ bi'. Tyu'u bi' nde su ntucua ycui' Ndyosi, ca̱a̱ ca'ya bi' lo yuu. Jua'a̱ scua na' xtañi ycui' na' loo ngu' bi', cha' laca ngu' ñati̱ 'na.

APOCALIPSIS 2:17

Cua'a̱ jyaca̱ ma̱ xi ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱: Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu ji'i̱ ngu'; caca tyaala' ti' tyiquee ngu' bi', cacu ngu' cha' tso'o nu cua nguxco'o na' cha' caja ji'i̱ ngu'. Lo'o jua'a̱ ta na' sca quee sube ti nu ngati̱ ña'a̱, nu nscua xtañi scaa ngu' chu̱', cha' ca cuayá' ti' ngu' bi', cha' tso'o ti nti' na' ña'a̱ na' ji'i̱ ngu'; chaca xtañi nu tso'o la laca nu nscua chu̱' quee bi'. Ná caja chacuayá' ji'i̱ xa' ñati̱ tyuloo xtañi bi'; cua laca ti ñati̱ nu caja xtañi bi' ji'i̱, bi' laca nu caja chacuayá' cha' tyuloo ji'i̱, nacui̱ Ni.”

1 JUAN 3:23

Nde laca cña nu cua nda ycui' Ndyosi cha' cua'ni sa scaa na: nga'a̱ cha' xñi tso'o na cha' ji'i̱ Jesucristo Sñi' ycui' Ni; la cui' jua'a̱ tso'o ti tyu'u tyiquee na ña'a̱ na ji'i̱ tya'a ñati̱ na, ñi'ya̱ nu cua nacui̱ ycui' Ni ji'na.

SANTIAGO 2:20

Nga'a̱ cha' ca cuayá' ti' ma̱, cha' ná chañi cha' ngusñi na cha' ji'i̱ ycui' Ndyosi si ná lo'o cua'ni na cha' tso'o cha' xtyucua na ji'i̱ tya'a ñati̱ na.

ROMANOS 8:37

Masi jua'a̱, lye tsa ntyiji̱loo na ji'i̱ nu cuxi bi'; nga'aa nchca ji'i̱ nu cuxi bi' culo cña ji'na tsiya' ti xqui'ya Jesús, cha' ntsu'u tsa tyiquee Ni ña'a̱ Ni ji'na.

ROMANOS 2:7

sca chalyuu tso'o nu ná nga'a̱ cha' tye, bi' laca nu ta Ni ji'i̱ ngu' tso'o, nu ná nchca taja ti' ndu'ni ngu' cña tso'o lo'o tya'a ngu'. Xcui' ndya'a̱ cha' tyiquee ngu' bi' ji'i̱ cha' tso'o nu ntsu'u ca slo ycui' Ndyosi, xcui' nti' ngu' cha' tyi'i̱ tso'o ti ngu' cuentya ji'i̱ Ni, xcui' ndube ti' ngu' ji'i̱ chalyuu nu lijya̱ nde loo la.

APOCALIPSIS 21:7

Ndi'ya̱ caca ji'i̱ ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu; cua'ni tlyu ngu' bi' 'na cha' na' laca̱ ycui' Ndyosi cuentya ji'i̱ ngu', lo'o jua'a̱ caca ngu' bi' sñi' na'.

HEBREOS 3:6

Pana nu Cristo bi' ni, tso'o la cña ndu'ni yu, xqui'ya cha' laca yu Sñi' ycui' Ndyosi, lo'o jua'a̱ laca yu loo ji'i̱ lcaa ñati̱ nu ntsu'u cuentya ji'i̱ Ni. La cui' ñati̱ ji'i̱ ycui' Ni laca na, si ña'a̱ ti ná ntsi̱i̱ na ña'a̱ cuayá' tye chalyuu ji'na, si ña'a̱ ti tya tso'o ntsu'u tyiquee na laja lo'o ndu̱ ti' na ji'i̱ Cristo cha' cua'ni lyaá lyiji yu ji'na.

SAN MATEO 19:28

―Cha' liñi nchcui' na' lo'o ma̱ juani ―nacui̱ Jesús ji'i̱ ngu'―, cha' nu lo'o caca chalyuu cucui bi' ni, li' ca̱a̱ na' nu cua nda Ni 'na lijya̱a̱ cha' caca na' ñati̱; tsaa tucua na' ca su tso'o tsa ña'a̱ ca bi', cha' cua'ni cuayá' na' ji'i̱ lcaa ñati̱ chalyuu li'. Lo'o cu'ma̱ nu ndya'a̱ ma̱ lo'o na', tiya' la tyucua ma̱ lo tii tyucuaa tya'a yaca nu tso'o tsa ña'a̱, cha' cua'ni cuayá' ma̱ ji'i̱ tya'a ñati̱ ma̱, nu tii tyucuaa tya'a taju ngu' Israel bi'.

APOCALIPSIS 3:5

cha' xcui' ngati̱ tsa late' cacu' ñati̱ nu cua ntiji̱loo ji'i̱ nu xña'a̱, nacui̱ Ni. Nga'aa cuityi̱ na' xtañi ngu' bi' ji'i̱ quityi ca su nscua xtañi ñati̱ nu ngujui chalyuu cucui ji'i̱ jua'a̱. Lo'o tyalaa na' ca su ntucua ycui' Sti na' lo'o ngu' xca̱ ji'i̱ Ni, li' ñacui̱ na' ji'i̱ Ni cha' ñati̱ 'na laca ngu' bi', nacui̱ Ni.

1 JUAN 2:19

Tya clyo ndyu'u ti'i̱ nu ngu' cuiñi bi' lo'o na, lo'o li' ngutu'u ngu' bi' ndyaa ngu'; si'i ñati̱ tya'a ntsu'u cha' ji'na lo'o Jesucristo laca ngu' bi'. Si chañi cha' tya'a ndya'a̱ na laca ngu' bi', cua ndyanu ngu' lo'o na nquicha'; pana ngutu'u ngu' bi', cha' taca ca cuayá' ti' na cha' si'i lcaa ñati̱ nu ndyu'u ti'i̱ lo'o na laca tya'a ngusñi na cha' ji'i̱ Jesucristo.

1 TESALONICENSES 3:5

Lo'o ngua cuayá' ti' na' cha' bi', nga'aa ndalo na' li'; xñi'i̱ tsa ti' na' cha' ná jlo ta̱' ñi'ya̱ ndyaca cha' ji'i̱ ma̱. Bi' cha' nda na' ji'i̱ yu tya'a na ñaa yu slo ma̱, cha' ca cuayá' ta̱' si ña'a̱ ti nxñi tso'o ma̱ cha' tso'o ji'i̱ ycui' Ndyosi, si tyiji̱loo ma̱ ji'i̱ nu xña'a̱ nu nti' cha' cua'ni ma̱ cha' cuxi. Cua nguna' cña ji'i̱ ya lo'o ma̱ si ná caca tyiji̱loo ma̱ ji'i̱ nu xña'a̱ bi'.

SAN MATEO 10:22

Lo'o jua'a̱ caca ti'í ti' lcaa ngu' ña'a̱ ngu' ji'i̱ ma̱ xqui'ya na'. Pana ñati̱ nu talo ji'i̱ lcaa cha' cuxi bi', clyaá ngu' li', caja chalyuu nu ná nga'a̱ cha' tye ji'i̱ ngu' bi'.