APOCALIPSIS 12:11 - Chatino Tataltepec

¹¹ Nu ngu' tya'a ngusñi na cha' ji'i̱ Jesús ni, cua ntiji̱loo ngu' ji'i̱ nu xña'a̱ bi', xqui'ya cha' ngujuii Jesús nu ñi'ya̱ ña'a̱ xlya' bi'. Ná ntsi̱i̱ ngu' bi' ta ngu' cha' tso'o ji'i̱ Jesús lo'o xa' ñati̱; ntaja'a̱ ngu' bi' chcui' ngu' cha' bi', masi cujuii ñati̱ ji'i̱ ngu' bi' xqui'ya cha' ñasi̱' tsa ñati̱ ji'i̱ Jesús.

APOCALIPSIS 12:11 Referans Kwoze

SAN JUAN 16:33

Cua nda na' lcaa cha' bi' lo'o ma̱ cha' ti̱ ti tyi'i̱ tyiquee ma̱ xqui'ya na' ―nacui̱―. Nde chalyuu ti'í ti' ñati̱ ña'a̱ ji'i̱ ma̱. Pana ná cube ti' ma̱, cua'ni tlyu tyiquee ma̱; na' laca̱ loo nde chalyuu, cha' cua ntiji̱loo na' tsiya' ti ji'i̱ nu xña'a̱.

1 JUAN 5:5

Pana ñati̱ nu jlya ti' cha' Jesús laca nu sca ti Sñi' ycui' Ndyosi, bi' ti ñati̱ nu caca ji'i̱ tyiji̱loo ji'i̱ lcaa nu cuxi nu ntsu'u chalyuu.

1 CORINTIOS 15:57

Pana cua xa' ña'a̱ laca juani, cua nda Ni chacuayá' cha' tyiji̱loo na ji'i̱ nu xña'a̱ xqui'ya cña nu ngua'ni Jesús nu lo'o ndyu'ú yu chaca quiya', bi' cha' quiña'a̱ tsa xlya'be ta na ji'i̱ ycui' Ndyosi lacua.

APOCALIPSIS 2:26

Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱, ñati̱ nu ndalo, cha' ndu'ni ngu' cua ña'a̱ ca cña nu nti' na' cha' cua'ni ngu' ña'a̱ cuayá' tye chalyuu, nacui̱ Ni. Stu'ba ti tyucua ngu' bi' lo'o na', cha' caca ya loo ji'i̱ lcaa ñati̱ chalyuu ca li',

ROMANOS 16:20

Ná tyu̱u̱ tsa̱ lyiji cha' cua'ni tye ycui' Ndyosi ji'i̱ nu xña'a̱, cha' nga'aa tyaca̱' cña cuxi nu ndu'ni nu xña'a̱ bi' tsiya' ti. Cua'ni Ni cha' ti̱ ti tyi'i̱ tyiquee ma̱, ñi'ya̱ ntsu'u tyiquee ycui' Ni; lo'o jua'a̱ ña'a̱ ti cua'ni Jesucristo nu Xu'na na cha' tso'o lo'o lcaa tya'a ma̱.

LOS HECHOS 20:24

Pana ná ntsi̱i̱ na' xqui'ya cha' nu nchcui' ngu' bi', ná ndu'ni cha' jna' masi cujuii ngu' jna'. Sca ti cha' nti' na', cha' tso'o ti tye cña nu nda ycui' Jesús jna', cha' ta na' cha' tso'o ji'i̱ ycui' Ndyosi lo'o xa' ñati̱, cha' ntsu'u tsa tyiquee Ni ña'a̱ Ni ji'i̱ ñati̱ chalyuu.

1 JUAN 4:4

Cu'ma̱ sñi' na', cua ntsu'u cha' ji'i̱ ma̱ lo'o ycui' Ndyosi, jua'a̱ cua ngua nguula la ti' tyiquee ma̱ xqui'ya Xtyi'i ycui' Ndyosi nu ndyanu ne' cresiya ji'i̱ ma̱ li'; bi' cha' nchca ji'i̱ ma̱ tyiji̱loo ma̱ ji'i̱ ngu' cuiñi nu cua ntsu'u cha' ji'i̱ lo'o ycui' nu xña'a̱. La cui' nu xña'a̱ laca nu nclyo cña ji'i̱ ñati̱ cuxi nde chalyuu.

APOCALIPSIS 3:5

cha' xcui' ngati̱ tsa late' cacu' ñati̱ nu cua ntiji̱loo ji'i̱ nu xña'a̱, nacui̱ Ni. Nga'aa cuityi̱ na' xtañi ngu' bi' ji'i̱ quityi ca su nscua xtañi ñati̱ nu ngujui chalyuu cucui ji'i̱ jua'a̱. Lo'o tyalaa na' ca su ntucua ycui' Sti na' lo'o ngu' xca̱ ji'i̱ Ni, li' ñacui̱ na' ji'i̱ Ni cha' ñati̱ 'na laca ngu' bi', nacui̱ Ni.

APOCALIPSIS 3:21

Cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu, ta na' su tyucua ñati̱ bi' ca su ntucua na' cha' laca na loo; cha' jua'a̱ na', cua ntiji̱loo na' ji'i̱ nu xña'a̱ bi', lo'o juani nga'a̱ na' slo ycui' Sti na' su laca Ni loo.

APOCALIPSIS 3:12

Cua ña'a̱ ca ñati̱ nu tyiji̱loo ji'i̱ nu xña'a̱ ni, tlyu tsa caca ñati̱ bi' laja ñati̱ 'na lo'o cua ndyee chalyuu; tso'o tsa tyi'i̱ ngu' bi' ca su ndi'i̱ na'. Scua na' xtañi ycui' Ndyosi Sti na' loo ngu' bi', lo'o jua'a̱ scua na' ni naa quichi̱ tlyu nu ca ji'i̱ ycui' Ni; Jerusalén cucui naa quichi̱ bi'. Tyu'u bi' nde su ntucua ycui' Ndyosi, ca̱a̱ ca'ya bi' lo yuu. Jua'a̱ scua na' xtañi ycui' na' loo ngu' bi', cha' laca ngu' ñati̱ 'na.

APOCALIPSIS 2:7

Cua'a̱ jyaca̱ ma̱ xi ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱: Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu ji'i̱ ngu'; caja chalyuu nu ná nga'a̱ cha' tye ji'i̱ ngu' bi', lo'o jua'a̱ ta na' chacuayá' cacu ngu' si'yu yaca tso'o nu ndu̱ ca cla'be yuu tso'o su ndi'i̱ ycui' Ni, nacui̱ Jesús.”

APOCALIPSIS 20:4

Lo'o li' na'a̱ na' su ntucua tyu̱u̱ tya'a yaca xlya tlyu. Ndyuloo na' ji'i̱ ngu' nu ntucua lo yaca xlya bi', cha' laca ngu' nu ntsu'u chacuayá' ji'i̱ cua'ni cuayá' ji'i̱ ñati̱ chalyuu. Laja ngu' nu ntucua bi' na'a̱ na' ji'i̱ ñati̱ chalyuu nu cua ndyujuii tya'a ñati̱ ji'i̱, xqui'ya cha' ná ntsi̱i̱ ngu' cacha' liñi ngu' cha' tso'o ji'i̱ tya'a ñati̱, cha' nu cua nda Jesús lo'o na cuentya ji'i̱ ycui' Ndyosi Sti yu. Ná ngua'ni tlyu jyo'o bi' ji'i̱ na'ni chiya'a̱ ña'a̱ bi', la cui' ti ná ngua'ni tlyu ngu' ji'i̱ lcui̱ ji'i̱ na'ni bi', jua'a̱ ná ngua'a̱ cuayá' na'ni bi' nde tyaca̱a̱ ngu', nde chu̱' ya' ngu'; cua ndyu'ú ngu' bi' chaca quiya', lo'o juani laca ngu' cña lo'o Cristo ca su ntucua ycui' Ndyosi ña'a̱ cuayá' tyu'u scua sca mil yija̱.

SAN LUCAS 14:26

―¿Ha nti' ma̱ tya'a̱ ma̱ lo'o na'? Ná caca ji'i̱ ma̱ xñi ma̱ cha' jna' si lye la ntsu'u tyiquee ma̱ ji'i̱ sti ma̱, masi ji'i̱ xtya'a̱ ma̱, masi ji'i̱ clyo'o ma̱, masi ji'i̱ sñi' ma̱, masi ji'i̱ tya'a ngula ma̱ masi qui'yu masi cuna'a̱; masi lye la ntsu'u tyiquee ma̱ ji'i̱ ycui' ca ti ma̱ cha' ña'a̱si̱i̱ ma̱ ji'i̱ ycui' ca ma̱, ná taca caca ma̱ ñati̱ jna' jua'a̱.

APOCALIPSIS 11:7

Lo'o tye cña nu cua'ni tyucuaa ñati̱ bi' nde chalyuu, li' xana nu na'ni xña'a̱ nu ntsu'u ca tyuquee bi', xu̱u̱ tya'a ni' lo'o tyucuaa ñati̱ nu ndu̱ bi' li'; tyiji̱loo nu bi' ji'i̱ ngu' bi' li', cuati cujuii ji'i̱ ngu'.

APOCALIPSIS 1:2

Nde nscua na' lcaa cha' nu cua na'a̱ ycui' na'; jua'a̱ nchcui' liñi na' lo'o ñati̱ ji'i̱ Ni lcaa cha' nu cua nda ycui' Ndyosi lo'o ngu', la cui' cha' tso'o nu nchcui' tsa Jesús ji'i̱ lo'o ñati̱.

LOS HECHOS 21:13

―¿Ni cha' laca nxi'ya ma̱? ―nacui̱ Pablo ji'i̱ ya li'―. ¿Ni cha' laca ndyu'ni ma̱ cha' ca xñi'i̱ ti' na'? ―nacui̱―. Cua laca cha' tsa'a̱ ca Jerusalén; tyaja'a̱ na' tsa'a̱, masi lo'o sca̱' ngu' jna', masi lo'o cujuii ngu' jna' cajua xqui'ya Jesucristo nu Xu'na na.

APOCALIPSIS 19:10

Li' ngutu̱ sti̱' na' ngustii na' nde loo su ndu̱ xca̱ bi', cha' cua'ni tlyu na' ji'i̱ ngua ti' na', pana nga'aa nda bi' chacuayá' 'na: ―Nga'aa cua'ni nu'u̱ jua'a̱ lo'o na' ―nacui̱ nu xca̱ bi' 'na―. La cui' tya'a ndyu'ni na cña ji'i̱ ycui' Ni laca na. La cui' tya'a na' laca lcaa cu'ma̱ nu ngusñi tso'o ma̱ cha' tso'o nu cua nda Jesús lo'o ma̱. Ji'i̱ ycui' Ndyosi cua'ni tlyu nu'u̱ tso'o la ―nacui̱ xca̱ jna'. Nu cha' tso'o nu nda Jesús lo'o ñati̱, la cui' cha' laca nu nda ycui' Ndyosi lo'o ñati̱ nu laca tu'ba ji'i̱ Ni.

APOCALIPSIS 6:9

Lo'o li' nu nchca ca'yu quiya' ngusuu nu ñi'ya̱ ña'a̱ xlya' bi' nguiña' nu nga'a̱ tu'ba quityi bi'. Li' na'a̱ na' sca mesa tlyu nde loo su ntucua ycui' Ndyosi, mesa bi' laca nu tyucua msta̱ lo. Nde ne' mesa bi' ntsiya tyu̱u̱ tya'a ngu' nu ngujuii; cua ndyujuii ñati̱ ji'i̱ ngu' bi' xqui'ya cha' nu nda ycui' Ndyosi lo'o ngu' bi', cha' ná ntsi̱i̱ ngu' bi' nchcui' ngu' cha' bi' lo'o tya'a ñati̱ ngu' li'.

APOCALIPSIS 2:17

Cua'a̱ jyaca̱ ma̱ xi ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱: Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu ji'i̱ ngu'; caca tyaala' ti' tyiquee ngu' bi', cacu ngu' cha' tso'o nu cua nguxco'o na' cha' caja ji'i̱ ngu'. Lo'o jua'a̱ ta na' sca quee sube ti nu ngati̱ ña'a̱, nu nscua xtañi scaa ngu' chu̱', cha' ca cuayá' ti' ngu' bi', cha' tso'o ti nti' na' ña'a̱ na' ji'i̱ ngu'; chaca xtañi nu tso'o la laca nu nscua chu̱' quee bi'. Ná caja chacuayá' ji'i̱ xa' ñati̱ tyuloo xtañi bi'; cua laca ti ñati̱ nu caja xtañi bi' ji'i̱, bi' laca nu caja chacuayá' cha' tyuloo ji'i̱, nacui̱ Ni.”

APOCALIPSIS 2:13

Cua jlo ti' na' lcaa ña'a̱ nu ndu'ni ma̱, nacui̱ Ni. Jlo ti' na' cha' laca Satanás loo ca su ndi'i̱ cu'ma̱; pana masi jua'a̱ laca cha', tya tso'o tsa nxñi ma̱ cha' 'na, nacui̱ Ni. Bilya tya'a̱chu̱' ma̱ ji'i̱ cha' jna'; ña'a̱ ti jlya ti' ma̱ 'na, masi tyempo cuxi nu ngua li', nu lo'o ndyujuii ngu' ji'i̱ jyo'o Antipas. Ná ndyutsi̱i̱ yu bi', nchcui' yu cha' 'na ca quichi̱ tyi ma̱ su ntucua Satanás loo.

APOCALIPSIS 1:9

Juan laca na', tya'a ntsu'u cha' ji'na lo'o Jesús laca na'. Ñi'ya̱ nu ndyaca ji'i̱ cu'ma̱, la cui' jua'a̱ ndyaca jna', cha' stu'ba ti ndyiji cha' ti'í ji'na cuentya ji'i̱ Jesús; pana jlya ti' na cha' Cristo laca loo ji'na juani, bi' cha' ndalo na ji'i̱ cha' ti'í nu tyacua ji'na. Nde cha' nu ngua 'na lo'o ndi'i̱ na' loyuu su naa Patmos, sca yuu piti ti nu nscua cla'be hitya. Ca bi' ntsu'u na' ne' chcua̱, xqui'ya cha' ná ntsi̱i̱ na' nchcui' na' cha' ji'i̱ ycui' Ndyosi lo'o ñati̱; nchcui' na' lcaa cha' tso'o nu cua nda Jesús lo'o na.

APOCALIPSIS 12:17

Ngunasi̱' tsa nu cuaña bi' ji'i̱ nu cuna'a̱ bi' li', ndyaa ndyaana ni' cha' cusu̱u̱ lo'o lcaa ñati̱ nu tyu'u ji'i̱ nu cuna'a̱ ca tiya' la; nxu̱u̱ tya'a ni' lo'o lcaa ñati̱ nu taquiya' ji'i̱ cña nu ngulo ycui' Ndyosi ji'na, nu ña'a̱ ti ná ntsi̱i̱ ngu' cha' cacha' liñi ngu' cha' ji'i̱ Jesús ji'i̱ xa' ñati̱.