APOCALIPSIS 11:8 - Chatino Tataltepec

⁸ Li' tyanu tyucuaa jyo'o bi' ca su ntsiya ngujuii to' calle quichi̱ tlyu bi', la cui' quichi̱ su ngujui'i̱ ca'a̱ ngu' ji'i̱ ycui' nu Xu'na na lo crusi. Xña'a̱ tsa ngu' quichi̱ bi', bi' cha' ntsu'u sca cha' nu nchcui' ñati̱ ji'i̱, cha' ñi'ya̱ ngua ngu' quichi̱ Sodoma cua sa'ni, la cui' ñi'ya̱ ngua ngu' quichi̱ Egipto cua sa'ni, jua'a̱ laca ngu' quichi̱ tlyu bi' juani.

APOCALIPSIS 11:8 Referans Kwoze

APOCALIPSIS 18:10

Tyijyu' ti tsatu̱ ngu' cha' tyutsi̱i̱ tsa ngu' lo'o ña'a̱ ngu' cha' cati̱ quichi̱ bi': ―Ti'i tsa cu'ma̱ juani, ngu' quichi̱ Babilonia ―nacui̱ ngu' li'―. Tlyu tsa quichi̱ tyi ma̱ nquicha', si̱i̱ tsa loo chalyuu su ngua loo quichi̱ tyi ma̱; pana juani ni, sca hora ti ndye nchcube' ma̱.

APOCALIPSIS 18:21

Lo'o li' ya̱a̱ sca xca̱ ji'i̱ ycui' Ndyosi nu tlyu tsa cña ngua ji'i̱ cua'ni. Ngusicua̱ xca̱ bi' sca quee tonu nu lo scuii ti ña'a̱; ñi'ya̱ ña'a̱ sca quee ji'i̱ molino, jua'a̱ ña'a̱ quee bi'. Ngu̱ ji'i̱ ndyaa nde lo hitya tyujo'o li'. ―La cui' jua'a̱ caca ji'i̱ quichi̱ Babilonia, quichi̱ tlyu bi' ―nacui̱ xca̱ bi'―, cha' xlyú ngu' ji'i̱ quichi̱ bi' ca lo yuu tsiya' ti; nga'aa ña'a̱ ngu' ji'i̱ quichi̱ bi' chaca quiya' li'.

HEBREOS 13:12

La cui' ti ca to' quichi̱ nchcube' Jesús, cha' caja ñi'ya̱ nu cati̱ cha' cuxi nu ntsu'u ji'i̱ ñati̱, nu lo'o ndyalú tañi ycui' ca yu lo'o ngujuii yu lo crusi ca bi'.

APOCALIPSIS 18:18

xi'ya tsa ngu' lo'o ña'a̱ ngu' tyatu̱ sñii cha' ndyaqui̱ quichi̱ tlyu bi': ―Bilya ña'a̱ na chaca quichi̱ nu culiya' la, ñi'ya̱ ngua culiya' tsa quichi̱ re ―ñacui̱ ngu' ji'i̱ tya'a ngu'.

APOCALIPSIS 11:9

Lo'o li' tya̱a̱ ñati̱ tyucui ña'a̱ chalyuu mala su ndi'i̱ ñati̱, lcaa lo ñati̱ chalyuu, masi ñati̱ nu ngutu'u cua ña'a̱ ca quichi̱ tyi ngu', masi ñati̱ nu nchcui' cua ña'a̱ ca lo cha'cña nu nchcui' ñati̱ chalyuu; tyu'u scua sna tsa̱ cla'be nu tya̱a̱ ngu' tya̱a̱ na'a̱ ngu' ji'i̱ jyo'o bi' ca su nscua ngu'. Ná ta ngu' chacuayá' cha' tyatsi' jyo'o bi'.

JUDAS 1:7

Lo'o jua'a̱ tyi'u ti' ma̱ ji'i̱ quichi̱ Sodoma lo'o quichi̱ Gomorra lo'o xa' la quichi̱ nu ndi'i̱ cacua ti; ñi'ya̱ ngua'ni ngu' xca̱ bi' cha' cuxi, jua'a̱ lye tsa ngua'ni cuxi nu jyo'o cusu' nu nguti'i̱ quichi̱ bi', hasta nu ngua'ni suba' ngu' lo'o tya'a qui'yu ti ngu'. Cua ndyujuii ycui' Ndyosi ji'i̱ lcaa ngu' quichi̱ bi' lo'o quii' tlyu ji'i̱ Ni li'. Jua'a̱ ca cuayá' ti' lcaa ñati̱ ña'a̱ cha' tlyu nu nchca ji'i̱ ycui' Ndyosi ndu'ni Ni; la cui' lo'o sca quii' tlyu nu ná nga'a̱ cha' tyubi' tsiya' ti, jua'a̱ xcube' Ni ji'i̱ lcaa ñati̱ nu ndu'ni cha' cuxi.

2 PEDRO 2:6

La cui' ti cha' ngua cuxi ji'i̱ ngu' quichi̱ Sodoma lo'o ji'i̱ ngu' quichi̱ Gomorra, cha' cuxi tsa ngua'ni ngu' bi'; ngua'ni ñu'u̱ Ni tsiya' ti ji'i̱ tyucuaa quichi̱ bi'. Lo'o ndye ndyaqui̱ quichi̱ bi', jii lo'o nchcubi' tya ndyanu su nscua quichi̱ bi' nquicha'. Jua'a̱ ngua'ni ycui' Ndyosi nu ngua li', cha' ca cuayá' ti' lcaa ñati̱ nu ndiya ti' ndu'ni lcaa lo cha' cuxi, masi juani ti, masi nde loo la; xcube' Ni ji'i̱ ngu' bi' ña'a̱ cuayá' nu tye cha' ji'i̱ ngu' bi' tsiya' ti.

SAN MATEO 10:15

Cha' liñi nchcui' na' lo'o ma̱, cha' nu lo'o tyalaa tsa̱ nu cua'ni cuayá' ycui' Ndyosi ji'i̱ lcaa ñati̱, li' xcube' tsa Ni ji'i̱ ngu' quichi̱ su ná ntaja'a̱ ngu' cuna ngu' cha' nu culu'u ma̱ ji'i̱ ngu'; tsa̱ bi' ca tso'o la cha' ji'i̱ ngu' cuxi nu nguti'i̱ quichi̱ Sodoma, nu nguti'i̱ quichi̱ Gomorra nu ngua sa'ni.

APOCALIPSIS 18:2

Cui̱i̱ tsa nchcui' xca̱ bi': ―Cua ndye cha' ji'i̱ quichi̱ Babilonia bi' ―nacui̱―, ndye quichi̱ tlyu bi' nguti̱. Ca su nguti'i̱ quichi̱ bi' cua tsubi' la, ca bi' laca to' tyi cuxee juani, masi tyi cuiñaja laca bi' juani. Ca bi' ntucua to' tyi lcaa lo cui'i̱ cuxi, lcaa lo na'ni cuityi nu ntucua lu'be nu chiya'a̱ ña'a̱.

APOCALIPSIS 16:19

Ti'í tsa ngutsu yuu su nscua quichi̱ tlyu, nu quichi̱ Babilonia bi'; sna yu'be ngua quichi̱ bi' li'. Lo'o jua'a̱ nguti̱ lcaa quichi̱ tonu nu ndi'i̱ xa' chalyuu, cha' ndyi'u ti' Ni nchcube' Ni ji'i̱ ngu' quichi̱ tlyu bi'; tlyu tsa cha' ti'í ngua'ni ycui' Ndyosi lo'o ngu' bi', cha' ñasi̱' tsa Ni ji'i̱ ngu'.

APOCALIPSIS 14:8

Lo'o ndyaa xca̱ bi', li' ndyalaa chaca xca̱ cha' chcui' lo'o ñati̱: ―Cua nguti̱ quichi̱ ―nacui̱ nu chaca xca̱ bi'―. Cua nguti̱ quichi̱ tlyu nu naa Babilonia, xqui'ya cha' ngua'ni ñu'u̱ ngu' quichi̱ bi' ji'i̱ lcaa ñati̱ chalyuu. Cuxi tsa cña nu ngua'ni ngu' quichi̱ bi', xqui'ya cha' ndu'ni tlyu ngu' ji'i̱ lcui̱ jo'ó; jua'a̱ ngulu'u qui'i̱ ngu' ji'i̱ xa' ñati̱ cha' cua'ni ngu' la cui' ti cha' cuxi slo jo'ó ―nacui̱ xca̱ nu nchca tyucuaa bi'.

APOCALIPSIS 11:13

La cui' hora bi' lye tsa ngulacui̱ chalyuu; su nchca tii tya'a bariyu quichi̱ bi', tyucui ña'a̱ sca bariyu ndye nguti̱ li'. Cati mil tya'a ñati̱ ngujuii li', xqui'ya cha' ngulacui̱ chalyuu. Lye tsa ndyutsi̱i̱ nu xa' la ñati̱ nu ndyanu li', ndyutsi̱i̱ tsa ngu' ji'i̱ ycui' Ndyosi nu ndi'i̱ nde cua̱ cha' nchca ji'i̱ Ni cua'ni Ni cña nu jua'a̱ tonu tsa; ndube tsa ti' ngu' cha' ngua'ni Ni jua'a̱.

HEBREOS 6:6

Lo'o li' cua ndya'a̱chu̱' ngu' bi' ji'i̱ Jesús. Nga'aa caca cua'ni na cha' chaca quiya' xñi tso'o ngu' bi' cha' ji'i̱ Jesús; xcui' na nda ngu' bi' cha' ti'í ji'i̱ Jesús nu sca ti Sñi' ycui' Ndyosi, cha' ndyu'ni ngu' ñi'ya̱ laca si ntyiji'i̱ ca'a̱ ngu' ji'i̱ Jesús lo crusi chaca quiya', cha' xa' xtyí lo'o ti ñati̱ chalyuu ji'i̱ yu.

LOS HECHOS 9:4

Nclyú yu lo yuu lo'o ndyuna yu cha' nu nda ycui' Ndyosi lo'o yu: ―Saulo, Saulo ―nacui̱ Ni―, ¿ni cha' laca lye tsa nxu̱u̱ tya'a nu'u̱ lo'o na'?

APOCALIPSIS 18:24

Bi' cha' cua nchcube' ycui' Ndyosi ji'i̱ ngu' quichi̱ Babilonia bi', xqui'ya cha' cua nquijeloo ji'i̱ Ni qui'ya nu ntsu'u ji'i̱ ngu' bi'; tyucui ña'a̱ chalyuu cua ndyujuii ngu' bi' ji'i̱ jyo'o cusu' nu ngua tu'ba ji'i̱ ycui' Ndyosi, lo'o jua'a̱ cua ndyujuii ngu' bi' ji'i̱ xa' la ñati̱ chalyuu nu ntsu'u cha' ji'i̱ lo'o Ni.

APOCALIPSIS 17:5

Nde tyaca̱a̱ nscua sca xtañi nu cuna'a̱ bi', pana ná ca cuayá' ti' na ji'i̱ si ná nslo na xtañi bi': “Babilonia tonu laca re, cha' nde laca quichi̱ tyi lcaa ñati̱ nu ndyu'ni cha' suba' tyucui ña'a̱ chalyuu”. Jua'a̱ nscua nde tyaca̱a̱ nu cuna'a̱ bi'.

APOCALIPSIS 17:1

Li' ya̱a̱ sca xca̱ ca slo na', sca ngu' tya'a nu cati tya'a xca̱ nu ntucua ca'ña oro ya' bi'. Nchcui' lo'o na' li': ―Cua̱a̱ nu'u̱ ca nde cha' culu'u na' jinu'u̱ ñi'ya̱ xcube' Ni ji'i̱ ngu' quichi̱ tlyu nu lye tsa ndyu'ni ñu'u̱ ji'i̱ ñati̱ chalyuu; la cui' quichi̱ tlyu laca su ntsu'u tyu̱u̱ tya'a sta'a̱ cacua ti to' quichi̱.

APOCALIPSIS 14:20

To' quichi̱ nscua su ngusi̱ si'yu bi', la cui' su ngujuii ñati̱ cha' nchcube' Ni ji'i̱ ngu'. Clyaa tsa tañi ndyalú lijya̱ lo yuu li'; tsa ña'a̱ cuayá' nu ndyalaa tu'ba cuayu, tsa lo cua clyaa tañi ndyalú bi'. Sna siyento kilómetro cuayá' tyijyu' ngusna tañi bi' ndyaa.

APOCALIPSIS 17:18

Nu cuna'a̱ nu na'a̱ nu'u̱ ni, ñi'ya̱ nti' nu quichi̱ tlyu nu laca loo bi', jua'a̱ laca nu cuna'a̱ bi'; nclyo bi' cña ji'i̱ lcaa ngu' nu laca loo chalyuu.