2 TIMOTEO 1:1 - Chatino Tataltepec

¹ Pablo laca na'. Cua nda ycui' Ndyosi cña 'na cha' lijya̱ na' tyijyu' ca nde quichi̱ tyi ma̱, cha' ta na' cha' ji'i̱ Jesucristo lo'o ma̱. Nacui̱ Ni cha' ná nga'a̱ cha' tye chalyuu ji'i̱ ñati̱ nu xñi cha' ji'i̱ Jesucristo.

2 TIMOTEO 1:1 Referans Kwoze

HEBREOS 9:15

Bi' cha' lacua, Cristo laca nu ngüiñi sca cha' cucui ji'i̱ ycui' Ndyosi lo'o ñati̱ chalyuu, masi lo'o cua ña'a̱ ca ñati̱ nu cua ngusubi ycui' Ndyosi ji'i̱. Jua'a̱ ngua'ni Cristo, nu lo'o ngujuii yu, cha' jua'a̱ ngulaá na ji'i̱ lcaa cha' cuxi nu ngua'ni na lo'o tya ndaquiya' tsa na ji'i̱ cha' cusu' bi'. Nu juani taca tyacua lcaa cha' nu cua nacui̱ ycui' Ndyosi Sti na ji'na cha' tyacua ji'i̱ lcaa ngu' nu ngusubi Ni ji'i̱; ná nga'a̱ cha' culiji yu'u cha' bi' ji'na tsiya' ti.

SAN JUAN 17:3

Chalyuu nu ta na' ji'i̱ ngu' laca cha' tyuloo ngu' jinu'u̱, nu'u̱ nu laca sca ti ycui' Ndyosi nu ntucua nde cua̱; lo'o jua'a̱ tyuloo ngu' jna', cha' laca na' Jesucristo nu nda nu'u̱ lijya̱a̱.

2 CORINTIOS 1:1

Pablo laca na'. Se'i̱ ti ndi'i̱ na' ca nde lo'o Timoteo tya'a ngusñi na cha' ji'i̱ Cristo. Nscua ya quityi re cha' ca̱a̱ slo lcaa cu'ma̱ ca quichi̱ Corinto nu tsa tlyu ti ndyu'ni tlyu ma̱ ji'i̱ ycui' Ndyosi, lo'o jua'a̱ tyaa quityi re slo lcaa ñati̱ nu ntsu'u cha' ji'i̱ lo'o ycui' Ndyosi tyucui ña'a̱ loyuu su cuentya Acaya. Cua nda ycui' Ndyosi cña 'na cha' tsa'a na' chcui' na' lo'o ngu' xa' quichi̱ ca tyijyu' la, lcaa cha' nu ji'i̱ Jesucristo.

SAN JUAN 10:28

Ná nga'a̱ cha' tye chalyuu nu ta na' ji'i̱ ngu' bi', ná chcuna' cresiya ji'i̱ ngu' li'. Ná tucui caca ji'i̱ xlyaá ji'i̱ ñati̱ bi' 'na, cha' tso'o tsa ña'a̱si̱i̱ na' ji'i̱ ñati̱ bi' ―nacui̱ Jesús―.

TITO 1:2

lo'o jua'a̱ taca jatya na ji'i̱ chalyuu nu ná nga'a̱ cha' tye ji'na li'. Ná cuiñi ycui' Ndyosi. Sa'ni tsa nchcui' Ni cha' caja chalyuu bi' ji'na, tya lo'o ngüiñá Ni chalyuu; tya li' nda Ni cha' lo'o ñati̱ ji'i̱ Ni nde chalyuu cha' taca tyi'i̱ ngu' slo Ni.

EFESIOS 3:6

Bilya cuna ñati̱ chalyuu cha' nu ndacha' Ni 'na. Pana ndi'ya̱ ndyu'u cha' bi': Ngu' nu si'i ngu' judío laca ngu' ni, caca ngu' bi' la cui' ñi'ya̱ laca ngu' judío nu ntsu'u cha' ji'i̱ lo'o ycui' Ndyosi, nu lo'o ca cuayá' ti' ngu' cha' ji'i̱ Cristo; si xñi ngu' bi' cha' ji'i̱ Jesucristo, lo'o ngu' bi' caca tso'o cresiya ji'i̱ ngu' cuentya ji'i̱ ycui' Ndyosi li'. Caca stu'ba cha' ji'i̱ tyucuaa lo ngu' li', cha' tsa tlyu ti tya'a ngusñi ngu' cha' ji'i̱ Cristo caca ngu'. Lo'o ji'i̱ ngu' nu si'i ngu' judío laca ngu' bi', tyacua lcaa cha' nu cua nacui̱ Ni cha' tyacua ji'i̱ ngu' xqui'ya Jesucristo.

SAN JUAN 6:40

Nde laca cña nu nti' Sti na' nu cua nda jna' lijya̱a̱ cha' caca: cua nti' Ni cha' ná tye chalyuu su tyi'i̱ ngu' lo'o Ni, lcaa ñati̱ nu ndyuloo jna' cha' laca̱ Sñi' Ni, lcaa ñati̱ nu xñi cha' jna'. Lo'o li' chañi cha' cua'ni na' cha' tyu'ú ngu' chaca quiya' lo'o cua tye ti chalyuu.

1 JUAN 2:25

Bi' laca cha' nu ngüiñi ji'i̱ Jesucristo lo'o na, cha' taca caja chaca chalyuu cucui nu ná nga'a̱ cha' tye ji'na.

1 TIMOTEO 6:19

Jua'a̱ ti caca culiya' ngu' slo ycui' Ndyosi xqui'ya cha' tso'o nu ngua'ni ngu' ca nde, xqui'ya cha' ngusñi ngu' cha' tso'o ji'i̱ ycui' Ni. Ná nga'a̱ cha' tye chalyuu ji'i̱ ngu' bi' li'.

2 CORINTIOS 1:20

sca ti nu Cristo bi' nu ndu'ni cha' chañi cha' tyu'u tucua lcaa cha' nu nda ycui' Ndyosi lo'o na; bi' cha' xqui'ya Jesucristo taca chcui' na: “Amén, jua'a̱ caca cha' lacua”. Jua'a̱ ñacui̱ na laja lo'o ndu'ni tlyu na ji'i̱ ycui' Ndyosi.

1 CORINTIOS 1:1

Pablo laca na' nu nscua̱ quityi re, lo'o jua'a̱ stu'ba ti ntucua na' lo'o Sóstenes tya'a ndyu'ni na' cña. Chacuayá' ji'i̱ ycui' Ndyosi ndya'a̱ na' nchcui' na' cha' ji'i̱ Jesucristo lo'o lcaa ñati̱.

ROMANOS 6:23

Tsa bi' ti caya' caja ji'na lo'o ndu'ni na cha' cuxi, cha' chcuna' lyiji cresiya ji'na lo'o; pana si stu'ba ntsu'u cha' ji'na lo'o Jesús nu Xu'na na, li' ta ycui' Ndyosi sca chalyuu nu ná nga'a̱ cha' tye ji'na. Sca cha' xlya'be nu nda ti Ni ji'na laca.

ROMANOS 5:21

Nu cuxi laca loo ji'na, bi' cha' ndyijii na; pana juani nti' ycui' Ndyosi caca Ni loo ji'na, cha' tya'na tsa ti' Ni ji'na. Lo'o caca tso'o cresiya ji'na cuentya ji'i̱ Ni, li' ta Ni sca chalyuu nu ná nga'a̱ cha' tye ji'na xqui'ya Jesús nu Xu'na na.

ROMANOS 1:1

Pablo laca na' nu nscua̱ quityi re cha' ca̱a̱ nde quichi̱ Roma ca su ndi'i̱ ma̱, cu'ma̱ nu ngusñi ma̱ cha' ji'i̱ Jesucristo. Ndyu'ni na' cña ji'i̱ ycui' Ndyosi, cha' ycui' Ni ngusubi Ni jna' cha' tsa'a na' chcui' na' cha' tso'o ji'i̱ Ni lo'o ñati̱.

SAN JUAN 6:54

Cua ña'a̱ ca ñati̱ nu jua'a̱ ti caja tyucui ña'a̱ ycui' na' ji'i̱ ngu', ná nga'a̱ cha' tye chalyuu ji'i̱ ngu' bi'. Cua'ni na' cha' tyu'ú ngu' bi' chaca quiya' lo'o cua tye ti chalyuu ―nacui̱ Jesús―.

SAN JUAN 5:24

’Liñi tsa cha' nu ta na' lo'o ma̱ juani: Cua ña'a̱ ca ñati̱ nu taquiya' ji'i̱ lcaa cha' nu chcui' na' lo'o ngu', lcaa ñati̱ nu jlya ti' ji'i̱ ycui' Ndyosi Sti na' nu nda jna' lijya̱a̱, bi' ngu' laca nu ná nga'a̱ cha' tye chalyuu tso'o nu ta ycui' Ndyosi ji'i̱ ngu' bi'. Ná cua'ni cuayá' Ni ji'i̱ ngu' bi', ná nscua cha' cajaa ngu' bi'; lcaa tyempo tyi'i̱ ngu' bi' lo'o ycui' Ndyosi ―nacui̱ Jesús ji'i̱ ngu'―.

GÁLATAS 3:26

Sñi' ycui' Ndyosi laca lcaa cu'ma̱ juani lo'o ngusñi ma̱ cha' ji'i̱ Jesucristo, xqui'ya cha' cua ntsu'u cha' ji'i̱ ma̱ lo'o Ni.

GÁLATAS 3:28

Nu lo'o cua ngua stu'ba cha' ji'na lo'o Jesucristo, la cui' tyempo bi' ngua stu'ba cha' ji'na lo'o tya'a ñati̱ na; bi' cha' nga'aa chcui' na cha' ngu' judío laca ya, cha' ngu' xa' tsu' laca ma̱; nga'aa chcui' na cha' msu nu ngüi'ya ñati̱ laca ma̱, cha' ñati̱ nu ndi'i̱ tso'o ti laca na; nga'aa chcui' na cha' qui'yu laca na, cha' cuna'a̱ laca ma̱. Lcaa na, stu'ba cha' ji'na lo'o tya'a na juani.

2 TIMOTEO 1:9

cha' ycui' Ndyosi laca nu ngua'ni lyaá ji'na; cua ngusubi Ni ji'na cha' cua'ni na cña nu nti' Ni cha' cua'ni na. Ntaja'a̱ Ni cua'ni lyaá Ni ji'na cha' tso'o tyiquee ti Ni, masi si'i xqui'ya cha' tso'o nu ngua'ni ycui' ca na. Ntsu'u tsa tyiquee Ni ña'a̱ Ni ji'na; jua'a̱ laca cha' nu ngulu'u Jesucristo ji'na, cha' ngua ti' ycui' Ndyosi cua'ni Ni cha' tso'o lo'o na nu lo'o tya lyiji cuiñá Ni chalyuu.

2 TIMOTEO 1:10

Cua nchca cuayá' ti' na cha' bi' juani, xqui'ya cha' cua ya̱a̱ Jesucristo chalyuu, cha' bi' laca nu ngua'ni lyaá ji'na; ntiji̱loo Jesús tsiya' ti ji'i̱ nu xña'a̱ nu lo'o ndyu'ú yu chaca quiya' lo'o cua ngujuii yu, bi' cha' ná nga'a̱ cha' tye chalyuu ji'i̱ lcaa na nu xñi na cha' ji'i̱ Ni, cha' ngua'ni lyaá Jesús ji'na.

2 TIMOTEO 1:13

Ña'a̱ ti tya tyi'u ti' nu'u̱ lcaa cha' nu cua ngulu'u na' jinu'u̱ lacua. Cha' liñi laca bi', jua'a̱ tso'o tsa si xñi tso'o nu'u̱ cha' bi'. Tso'o ti tyu'u tyiquee nu'u̱ ña'a̱ nu'u̱ ji'i̱ ñati̱, xqui'ya cha' ntsu'u cha' jinu'u̱ lo'o Jesucristo.

2 TIMOTEO 2:1

Sñi' na', nti' na' cha' ta na' chaca cui̱i̱ lo'o nu'u̱ juani: Caca tlyu tyiquee nu'u̱ xqui'ya Jesucristo nu xcui' cha' tso'o ndu'ni lo'o na.

2 TIMOTEO 2:3

Ñi'ya̱ ndalo sca sendaru lo'o ndya'a̱ yu cusu̱u̱, jua'a̱ talo nu'u̱ si cajá cha' ti'í jinu'u̱ lo'o ndyu'ni lya' ti' ngu' jinu'u̱, cha' sendaru ji'i̱ Jesucristo laca nu'u̱ juani.

2 TIMOTEO 2:10

bi' cha' talo tyiquee na' ji'i̱ ngu', masi nchcube' tsa ngu' jna'. Talo na' ji'i̱ cha' cuxi bi' cuentya ji'i̱ ca ta'a ñati̱ nu ngusubi ycui' Ndyosi ji'i̱, cha' lo'o ñati̱ bi' ngua'ni lyaá Jesucristo ji'i̱, cha' caja chalyuu nu ná nga'a̱ cha' tye ji'i̱ ñati̱ bi'. Caca tyi'i̱ ngu' bi' ca slo ycui' Ndyosi su tso'o tsa ña'a̱ lcaa cha'.

2 TIMOTEO 3:15

Tya cuañi' tsa nu'u̱ lo'o nguxana nu'u̱ ndyaca tsa'a̱ nu'u̱ lo quityi ji'i̱ ycui' Ndyosi; quityi bi' laca nu culu'u liñi ji'na ñi'ya̱ taca clyaá na ji'i̱ nu cuxi, si xñi tso'o na cha' ji'i̱ Jesucristo.

TITO 1:4

Nscua na' quityi re cha' ca̱a̱ slo nu'u̱, Tito, cha' ñi'ya̱ si laca nu'u̱ sñi' na', jua'a̱ nti' na' ña'a̱ na' jinu'u̱, cha' stu'ba ti ngusñi na cha' ji'i̱ ycui' Ndyosi. Ndi'ya̱ nti' na' cha' ña'a̱ ti cua'ni ycui' Ndyosi Sti na cha' tso'o lo'o nu'u̱, jua'a̱ Jesucristo nu ngua'ni lyaá ji'na; cua'ni Ni cha' ti̱ ti tyi'i̱ tyiquee nu'u̱ li'.