2 PEDRO 1:8 - Chatino Tataltepec

⁸ Si ndu'ni ma̱ lcaa lo cña bi', si jua'a̱ ti ndu'ni ma̱ lo'o ndi'i̱ ma̱ chalyuu, li' caca cuayá' la ti' ma̱ ñi'ya̱ ntsu'u lcaa cha' ji'i̱ Jesucristo nu Xu'na na. Ná ca taja ti' ma̱, cha' tso'o tsa cua'nijo'o ma̱ ji'i̱ ycui' Ndyosi li'.

2 PEDRO 1:8 Referans Kwoze

TITO 3:14

Ntsu'u cha' ca tsa'a̱ ca ta'a ñati̱ ji'i̱ Jesucristo tya'a na cha' cua'ni ngu' lcaa lo cha' tso'o, cha' taca xtyucua ngu' ji'i̱ tya'a ñati̱ ngu' nu lyiji xi ji'i̱; ná tso'o si taja ti ndi'i̱ ngu' chalyuu.

COLOSENSES 3:16

Nga'a̱ cha' tyanu tyucui cha' ji'i̱ Cristo ca ne' cresiya ji'i̱ ma̱. Tso'o tsa ndyu'u cha' bi', bi' cha' tso'o ti culu'u ma̱ cha' bi' ji'i̱ tya'a ma̱ ña'a̱ cuayá' nu cuna tso'o lcaa ngu'. La cui' jua'a̱ cula tu'ba ma̱ lcaa lo ji̱i̱ nu ntsu'u ji'i̱ ycui' Ndyosi, masi ji̱i̱ salmo nu nscua lo quityi nu ngua sa'ni, masi cua ña'a̱ ca ji̱i̱ nu ca'ya hique ma̱ nu nchcui' cha' ji'i̱ ycui' Ndyosi; cula tu'ba ma̱ ji̱i̱ cha' cuna ycui' Ndyosi, xqui'ya cha' tso'o tsa ntsu'u tyiquee ma̱ ña'a̱ ma̱ ji'i̱ ycui' Ni.

SAN JUAN 15:2

Tso'o tsa ña'a̱si̱i̱ Sti na' ji'i̱ lcaa sta̱' yaca bi', lo'o na' laca̱ yaca bi'. Ca quiya' sta̱' yaca nsi'yu Ni ji'i̱, nu lo'o ná nda si'yu lo tsiya' ti. Nsubii Ni xi lo yaca nu nda si'yu tso'o, cha' tya quiña'a̱ la si'yu tyu'u lo bi';

HEBREOS 6:12

Ná nti' ya cha' caca taja ma̱; na cua nti' ya cha' cua'ni ma̱ ñi'ya̱ nu ngua'ni xa' la tya'a ngusñi na cha' ji'i̱ Jesús tya clyo la, nu cua ndalo tsa tyiquee cha' ndu̱ ti' ngu' ji'i̱ ycui' Ndyosi. Bi' cha' cua ngujui lcaa cha' ji'i̱ ngu', ñi'ya̱ nu nacui̱ Ni cha' tyacua ji'i̱ ngu'.

FILIPENSES 1:9

Ndi'ya̱ laca cha' nu nchcui' na' lo'o ycui' Ndyosi cuentya ji'i̱ ma̱: ndijña na' chacuayá' ji'i̱ Ni cha' ña'a̱ ti tso'o la tyu'u tyiquee ma̱ ña'a̱ ma̱ ji'i̱ tya'a ñati̱ ma̱, cha' jua'a̱ taca ca cuayá' la ti' ma̱ lcaa cha', cha' jua'a̱ taca culacua tso'o la ti' ma̱;

1 TESALONICENSES 4:1

Cu'ma̱ ngu' tya'a na, juani ndijña ya ji'i̱ ma̱ chacuayá' ji'i̱ Jesús nu Xu'na na, cha' ña'a̱ ti cua'ni ma̱ lcaa ña'a̱ cha' tso'o nu nti' ycui' Ndyosi cha' cua'ni ma̱ laja lo'o tyi'i̱ ma̱ chalyuu. Li' tso'o la caca cua'ni ma̱ cña ji'i̱ ycui' Ndyosi. Chañi cha' tso'o tsa ndyu'ni ma̱, pana cua nti' ya cha' ña'a̱ ti tya cua'ni la ma̱ la cui' cña nu cua ngulu'u ya ji'i̱ ma̱ tya tsubi' la cuentya ji'i̱ ycui' Ndyosi.

1 CORINTIOS 15:58

Cu'ma̱ tya'a ngusñi na cha' ji'i̱ Jesús, ntsu'u tsa tyiquee na' ña'a̱a̱ ji'i̱ cu'ma̱. Ndi'ya̱ ñacui̱ na' ji'i̱ ma̱, cha' ña'a̱ ti xñi tso'o ma̱ cha' ji'i̱ ycui' Ndyosi, lcaa tsa̱ jlya ti' ma̱ ji'i̱ Ni; xcui' lye tsa cua'ni ma̱ cña ji'i̱ ycui' nu Xu'na na, ná ca taja ti' ma̱ lo'o cua'ni ma̱ cña bi'. Cua jlo ti' ma̱ cha' ná culiji jua'a̱ ti sca cña nu ndyu'ni ma̱ cuentya ji'i̱ ycui' Ndyosi.

2 PEDRO 1:2

Cua nchca cuayá' tso'o ti' ma̱ cha' ji'i̱ ycui' Ndyosi, lo'o jua'a̱ nchca cuayá' ti' ma̱ cha' ji'i̱ Jesús nu Xu'na na; bi' cha' ndi'ya̱ nti' na': ña'a̱ ti cua'ni Ni cha' tso'o lo'o ma̱ lcaa tsa̱, lo'o jua'a̱ cua'ni Ni cha' ti̱ ti tyi'i̱ tyiquee ma̱ lcaa hora.

FILEMÓN 1:6

bi' cha' ndijña na' cha' clyu ti' ji'i̱ ycui' Ndyosi, cha' ca cuayá' tso'o ti' lcaa ngu' nu ndyuna cha' nu nchcui' nu'u̱ lo'o ngu' cuentya ji'i̱ Jesucristo, cha' lo'o ña'a̱ ngu' jinu'u̱, li' ca cuayá' tso'o ti' ngu' cha' xcui' tso'o tsa ndyu'ni Cristo lo'o na.

2 TESALONICENSES 1:3

Cu'ma̱ tya'a ngusñi na cha' ji'i̱ Jesús, ntsu'u cha' tya ya xlya'be ji'i̱ ycui' Ndyosi lcaa quiya' lo'o chcui' ya lo'o Ni cuentya ji'i̱ cu'ma̱; ndu'ni tsa cha' cua'ni ya jua'a̱, xqui'ya cha' lcaa tsa̱ tachaa la ndyanu cha' ji'i̱ Jesús ne' cresiya ji'i̱ ma̱, lcaa tsa̱ ntsu'u la tyiquee ma̱ ña'a̱ ma̱ ji'i̱ tya'a ñati̱ ma̱.

FILIPENSES 2:5

Tso'o si culacua ti' ma̱ ñi'ya̱ nclyacua ti' ycui' Jesucristo. Ndi'ya̱ ngua cha' ji'i̱ yu:

2 CORINTIOS 13:5

Cua'ni cuayá' ma̱ ji'i̱ ycui' ca ma̱ lacua, cha' ca cuayá' ti' ma̱ si chañi cha' tya ndyanu tyucui cha' ji'i̱ Jesucristo ne' cresiya ji'i̱ ma̱. Nga'a̱ cha' tyi'u ti' ma̱ cha' ndyanu Xtyi'i Jesucristo ne' cresiya ji'i̱ sa scaa ma̱; sca ti si cua ngunu'u̱ cresiya ji'i̱ ma̱ lo'o ycui' Ndyosi tsiya' ti, nga'aa tyanu Ni lo'o ma̱ li'.

COLOSENSES 2:7

Jua'a̱ xñi tso'o ma̱ cha' ji'i̱ Jesús, cha' ca cuayá' ti' ma̱ lcaa cha' nu laca su̱u̱ cha' bi'; cha' nu Jesús ni, bi' laca su̱u̱ lcaa cha' nu cua ngusñi na, la cui' ti cha' nu cua ngulu'u ngu' ji'i̱ ma̱ tya tsubi' la. Lo'o jua'a̱ lcaa tsa̱ tya ma̱ xlya'be ji'i̱ nu Cristo bi' li'.

2 CORINTIOS 9:14

Li' chcui' ngu' bi' lo'o ycui' Ndyosi cuentya ji'i̱ ma̱, cha' tso'o tsa ntsu'u tyiquee ngu' ña'a̱ ngu' ji'i̱ ma̱; tyi'u ti' ngu' cha' quiña'a̱ tsa cha' tso'o ndu'ni ycui' Ndyosi lo'o ñati̱ xqui'ya msta̱ nu cua nda ma̱ ji'i̱ ngu' bi'.

1 TIMOTEO 5:13

Bi' cha' tso'o la si ná scua ngu' tsiya' ti xtañi nu cuna'a̱ cuañi' nu ndyanu ti'i. Ná tyiquee' xcui' paseya ti tya'a̱ ngu' cuañi' bi' slo ñati̱; pana si jua'a̱ cua'ni ngu', caca taja ngu' cuna'a̱ bi', chcui' tsa ngu' cuentyu ji'i̱ xa' ñati̱ li', masi ji'i̱ tya'a ngu', masi ji'i̱ xa' la ñati̱. Ni si'i sca ti cha' taja nu cuna'a̱ ti'i nu ndu'ni jua'a̱, masi lo'o chcui' tsa ngu' cuna'a̱ bi' lo'o tya'a ngu' lcua ti lo cha' nu ná tso'o cha' chcui' na.

1 TESALONICENSES 3:12

Lo'o jua'a̱ ndijña ya ji'i̱ nu Xu'na na cha' cua'ni Ni cha' tso'o la tyu'u tyiquee ma̱ ña'a̱ ma̱ ji'i̱ tya'a ma̱, lo'o jua'a̱ ji'i̱ lcaa ñati̱, cha' ntsu'u tsa tyiquee ya ña'a̱ ya ji'i̱ cu'ma̱ xqui'ya ycui' Ndyosi;

2 CORINTIOS 8:7

Nu cu'ma̱ ni, tso'o tsa jlya ti' ma̱ ji'i̱ ycui' Ndyosi, tso'o tsa nchca ji'i̱ ma̱ culu'u ma̱ cha' ji'i̱ ycui' Ndyosi ji'i̱ xa' ñati̱, tso'o tsa nchca cuayá' ti' ma̱ ñi'ya̱ ndyu'u sca cha'; na cua nti' tsa ma̱ xtyucua ma̱ ji'i̱ ngu', la cui' jua'a̱ ntsu'u tsa tyiquee ma̱ ña'a̱ ma̱ ji'i̱ ya. Nchca tsa ji'i̱ ma̱ cuentya ji'i̱ lcaa cña, nti' ya; bi' cha' nclyacua ti' ya cha' ná tyiquee' yala tsa cua'ni ma̱ cha' xti'i̱ ma̱ cñi bi'.

ROMANOS 12:11

Ná cua'ni taja ma̱ lo'o cua'ni ma̱ cña ji'i̱ ycui' Ndyosi; na cua ndyanu Xtyi'i ycui' Ndyosi ca ne' cresiya ji'i̱ ma̱, bi' cha' caca tlyu tyiquee ma̱ cha' cua'ni la ma̱ cña bi'.

SAN JUAN 5:42

Pana cu'ma̱ ni, jlo ti' na' cha' xa' ña'a̱ ndu'ni cu'ma̱, xqui'ya cha' ná ntsu'u tyiquee ma̱ tsiya' ti ji'i̱ ycui' Ndyosi Sti na'.

SAN MATEO 25:26

Ngua ñasi̱' xu'na lo'o msu bi' li'. “Sca msu xña'a̱ laca nu'u̱”, nacui̱ xu'na ji'i̱ msu bi'. “Taja tsa nu'u̱”, nacui̱. “Nacui̱ nu'u̱ cha' jlo ti' nu'u̱ ñi'ya̱ nu ndu'ni na', cha' nxuti'i̱ na' ltya masi ná ndyataa na' nscua'; lo'o jua'a̱ tyaa lo'o na' ji'i̱ nscua' masi ná ngua'ni na' cña ji'i̱”, nacui̱ nu'u̱.

SAN MATEO 20:6

Nu lo'o cua ngusi̱i̱ la ña'a̱ ti tya ndu̱ xi ñati̱ lcaya' bi'. Nchcui' xu'na msu bi' lo'o ngu' li': “¿Ni cha' laca na ndu̱ ti ma̱ ca nde tyucui tsa̱?”, nacui̱ yu ji'i̱ ñati̱ bi'. “¿Ha ná ntsu'u cña ji'i̱ ma̱ lacua?”

SAN MATEO 20:3

Nu lo'o cua ndye sna hora ntsu'u ngu' cña, li' ndyaa xu'na ngu' bi' lcaya' chaca quiya'. Ndacua na'a̱ yu ji'i̱ xa' la ñati̱, pana ndu̱ ti ngu' cha' bilya caja cña ji'i̱ ngu'.

SAN MATEO 13:22

Si'yu nu ndyalú lo yuu su ngutu̱ lti quiche' ni, bi' laca ñi'ya̱ laca ñati̱ nu cua ndyuna cha' tso'o bi', pana ndya'a̱ tsa cha' tyiquee ngu' bi' ñi'ya̱ caca ji'i̱ ngu' nde chalyuu, cha' nti' tsa ngu' caca culiya' ngu'. Bi' cha' ná nchca ji'i̱ ycui' Ndyosi cua'ni sca cña tso'o ne' cresiya ji'i̱ ngu' bi'.

SAN JUAN 17:3

Chalyuu nu ta na' ji'i̱ ngu' laca cha' tyuloo ngu' jinu'u̱, nu'u̱ nu laca sca ti ycui' Ndyosi nu ntucua nde cua̱; lo'o jua'a̱ tyuloo ngu' jna', cha' laca na' Jesucristo nu nda nu'u̱ lijya̱a̱.

FILIPENSES 3:8

Lo'o jua'a̱, masi tucuna' na' lcaa cha' nu ndiya tsa ti' na' nde chalyuu, ná cube ti' na'; tlyu la tsiya' ti laca cha' tso'o nu cua ngujui 'na juani, laja lo'o ndyuloo na' ji'i̱ Jesucristo nu Xu'na na'. Xqui'ya Cristo, bi' cha' cua nguxtyanu na' ji'i̱ lcaa cha' cusu' bi'; nga'aa tso'o cha' cusu' bi' tsiya' ti, nti' na', hasta xcua̱a̱ na' ji'i̱, nti' na'. Tsa bi' ti cha' nti' na', cha' xñi tso'o na' cha' ji'i̱ Cristo,

COLOSENSES 1:10

Lo'o li' lcaa tsa̱ lo'o ndya'a̱ ma̱ chalyuu taca cua'ni ma̱ cña, cua ña'a̱ ca cña nu nti' ycui' Ndyosi cha' cua'ni ma̱; taca cua'ni ma̱ lcaa lo cña tso'o cuentya ji'i̱ ycui' Ndyosi li', lo'o jua'a̱ taca ca cuayá' la ti' ma̱ ñi'ya̱ ndyu'u lcaa cha' ji'i̱ Ni.

2 PEDRO 1:3

Cua nda Ni chacuayá' ji'na cha' caja chalyuu nu ná nga'a̱ cha' tye ji'na, jua'a̱ cua nda Ni chacuayá' ji'na cha' tyi'i̱ na chalyuu ñi'ya̱ nu nti' Ni cha' tyi'i̱ ñati̱ ji'i̱ Ni; bi' cha' nchca ji'na, cha' nxtyucua Ni ji'na. Cua ngusubi Ni ji'na, cua nda Ni chacuayá' ji'na cha' tyuloo na ji'i̱ ycui' Ni; lo'o jua'a̱ cua ngua cuayá' ti' na cha' nga'aa ntsu'u chaca nu tlyu la, nga'aa ntsu'u chaca nu nchca la ji'i̱.

2 PEDRO 2:20

Cuxi la caca ji'i̱ ñati̱ nu cua nguxtyanu ji'i̱ cha' cuxi tsaca quiya', lo'o li' ta chacuayá' ji'i̱ nu cuxi cha' tyiji̱loo ji'i̱ chaca quiya'; na cua ngulaá ñati̱ bi' ji'i̱ lcaa cha' cuxi nu ntsu'u nde chalyuu nquicha', na cua ngua tsa'a̱ ji'i̱ Jesucristo nu Xu'na na, cha' bi' laca nu ngua'ni lyaá ji'na.

2 PEDRO 3:18

Pana tso'o la ca tsa'a̱ la ma̱ cha' tso'o ji'i̱ Jesucristo nu Xu'na na, nu cua ngua'ni lyaá ji'na; li' taca tyi'i̱ tso'o la tyiquee ma̱ cuentya ji'i̱ ycui' nu Xu'na na. Cua'ni tlyu na ji'i̱ ycui' Ni nde chalyuu, lo'o jua'a̱ ná nga'a̱ cha' tye tsa̱ nu cua'ni tlyu na ji'i̱ Ni ca slo ycui' Ni. Jua'a̱ caca cha' lacua.