2 CORINTIOS 8:6 - Chatino Tataltepec

⁶ Bi' cha' cua nchcui' ya lo'o yu Tito bi', cha' cua'ni lyiji yu cha' xti'i̱ yu msta̱ nu nda cu'ma̱ cha' tso'o ntsu'u tyiquee ma̱, cha' tya tsubi' la cua nguxana nxti'i̱ yu msta̱ bi'.

2 CORINTIOS 8:6 Referans Kwoze

2 CORINTIOS 12:18

Chañi cha' nchcui' na' lo'o yu Tito bi', cha' tsubi' ti tsaa yu ca su ndi'i̱ ma̱; ndyaa yu lo'o chaca yu tya'a ngusñi na cha' ji'i̱ Jesús bi' li'. Pana si'i Tito laca nu ngua'ni ngana ji'i̱ ma̱; sca ti cuayá' ndyu'ni yu cña ñi'ya̱ nu ndyu'ni na' cña, sca ti cha' ntsu'u tyiquee tyucuaa ya.

2 CORINTIOS 8:19

La cui' jua'a̱ nu ñati̱ ji'i̱ Cristo nu ndyu'u ti'i̱ lcaa quichi̱ cua ngusubi ngu' ji'i̱ yu tya'a na bi', cha' tya'a̱ yu lo'o ya, cha' xtyucua yu ji'i̱ ya lo'o ndyu'ni ya cña cha' xti'i̱ ya msta̱ nu nda ngu'. Ndyu'ni ya cña bi' cuentya ji'i̱ nu Xu'na na, cha' jua'a̱ taca cua'ni chi̱ ya loo Ni; lo'o jua'a̱ nti' ya cha' yala ti cua'ni ma̱ cña bi', xqui'ya cha' ndiya ti' ma̱ ndu'ni ma̱ jua'a̱.

2 CORINTIOS 8:4

Hasta ngüijña ngu' chacuayá' ji'i̱ ya cha' ta ngu' msta̱ bi', cha' xtyucua ngu' ji'i̱ xa' la tya'a ñati̱, ngu' nu cua ngusñi cha' ji'i̱ Jesús ca xa' quichi̱ su ntsu'u tsa na nu lyiji ji'i̱ ngu'.

1 PEDRO 4:10

Nda xlya'be ti ycui' Ndyosi ñi'ya̱ taca cua'ni scaa ma̱ sca cña tso'o, lcaa ma̱ nu ngusñi ma̱ cha' ji'i̱ Jesús. Ñi'ya̱ lo'o nxtyucua ycui' Ndyosi ji'na cha' caca tya'na ti' na ji'i̱ tya'a ñati̱ na, la cui' jua'a̱ nga'a̱ cha' xtyucua na ji'i̱ ngu' lo'o cua'ni na cña nu nda Ni cha' cua'ni sa scaa na.

FILIPENSES 4:18

Ndi'ya̱ xacui̱ na' cha' ji'i̱ ma̱ juani: Cua quiña'a̱ tsa na nda ma̱ 'na, bi' cha' cua nti' tsa na' tya na' tsa xlya'be ji'i̱ ma̱; nga'aa ntsu'u chaca na nu lyiji 'na tsiya' ti juani, tya lo'o ya̱a̱ yu Epafrodito, ya̱lo'o yu lcaa cha' tso'o nu cua nda ma̱ 'na. Ñi'ya̱ laca sca msta̱ nu ndiya tsa ti' ycui' Ndyosi ji'i̱, cha' tyixi tsa xtyi'i nda bi' nu ndacui lcua ti se'i̱, jua'a̱ laca cha' tso'o nu nda ma̱ 'na cuentya ji'i̱ ycui' Ndyosi.

2 CORINTIOS 9:5

Bi' cha' cua nchcui' na' lo'o ngu' tya'a na re, cha' tsaa ngu' nde loo la que na', cha' xtyucua ngu' ji'i̱ ma̱ cha' cua'ni cho'o ma̱ msta̱, ñi'ya̱ nu nacui̱ ma̱ 'na cha' ta ma̱; cua laca nscua se'i̱ ti cha' bi' lo'o ca̱a̱ na' li'. Jua'a̱ laca bi' sca cña tso'o nu ngua'ni ma̱ xqui'ya cha' ndiya ti' ma̱ ndu'ni ma̱ ji'i̱, si'i sca cña nu ndatsaa tsa ya ji'i̱ ma̱ laca nu ngua'ni ma̱ li'.

LOS HECHOS 24:17

’Tyu̱u̱ yija̱ ndya'a̱ na' xa' quichi̱ tyijyu' la, lo'o tsubi' ti nguxtyu̱u̱ na' ndyalaa na' nde loyuu su ndi'i̱ quichi̱ tyi ya chaca quiya', cha' ta na' sca msta̱ nu xtyucua xi ji'i̱ ngu' ti'i nde jua, la cui' msta̱ nu cua nda ngu' tyijyu' cha' tsaa slo ngu' ti'i bi'. Lo'o jua'a̱ na', ngua ti' na' cha' ta na' sca msta̱ ji'i̱ ycui' Ndyosi.

ROMANOS 15:25

Pana clyo la ntsu'u cha' tsa'a na' nde quichi̱ Jerusalén. Nu ngu' tya'a ntsu'u cha' ji'na lo'o Cristo nu ndi'i̱ nde Macedonia, nu ndi'i̱ nde Acaya ni, tso'o tsa tyiquee ngu' ña'a̱ ngu' ji'i̱ xa' ñati̱; bi' cha' cua nguxuti'i̱ ngu' tsa ycu' cñi nu caca msta̱, cha' cua nti' ngu' xtyucua ngu' ji'i̱ ngu' ti'i tya'a na, nu ñati̱ ji'i̱ Cristo nu ndi'i̱ nde Jerusalén. Bi' cha' tsa'a na' tsaa lo'o na' ji'i̱ cñi bi' ca slo ngu' ti'i bi'.

2 CORINTIOS 2:13

Pana ná ndalo na' ca bi', cha' ngulacua tsa ti' na' ni cha' laca bilya tyalaa Tito tya'a ndya'a̱ ya cña slo na'; bi' cha' yala ti ngusalya' na' lo'o ngu' quichi̱ bi'. Li' tya ndyaa la na' nde loyuu su cuentya Macedonia.

2 CORINTIOS 8:10

Ndi'ya̱ nti' na', tso'o la si cua'ni ma̱ cha' xcua se'i̱ cña bi' lacua, cha' tya yija̱ na ndyu'ni ma̱ ji'i̱. Si'i la xña cua'ni ti ma̱ ji'i̱; pana xqui'ya cha' ndiya ti' ma̱ ndu'ni ma̱ jua'a̱, bi' cha' ta ma̱ msta̱ bi'.

2 CORINTIOS 8:23

Bi' cha' juani si xcuane ngu' ji'i̱ ma̱ ni cña laca ndya'a̱ Tito, ndi'ya̱ ñacui̱ ma̱ ji'i̱ ngu': Tya'a ndya'a̱ na cña laca yu re. Lo'o jua'a̱ xacui̱ ma̱ cha' ji'i̱ ngu' cha' stu'ba ndyu'ni yu cña lo'o cua cuentya ji'i̱ cu'ma̱. La cui' jua'a̱ si xcuane ngu' ji'i̱ ma̱, ni cña laca nu ndya'a̱ xa' la tya'a ndya'a̱ Tito bi', ndi'ya̱ xacui̱ ma̱ cha' ji'i̱ ngu' li': Ndya'a̱ ngu' bi' cuentya ji'i̱ lcaa latya ngu' xa' quichi̱ nu ndyu'ni tlyu ji'i̱ Cristo, cha' ndu'ni chi̱ ngu' loo Cristo.