2 CORINTIOS 7:11 - Chatino Tataltepec

¹¹ Culacua xi ti' ma̱ ñi'ya̱ ndyaca ji'i̱ ma̱ juani, tya lo'o ngua'ni na' cha' ngua xñi'i̱ ti' ma̱ nu ngua li': tyucui tyiquee ma̱ nclyacua ti' ma̱ juani, cha' cua nti' tsa ma̱ juani cha' tyu'u lubii ma̱ ji'i̱ cha' bi'; tsa cla'be ngua ñasi̱' ma̱, tsa cla'be ti ndyutsi̱i̱ ma̱, pana ndyi'u tsa ti' ma̱ jna' li', ña'a̱ cuayá' nu lye tsa ngua ti' ma̱ cha' ña'a̱ loo ma̱ 'na chaca quiya'; yala ti ngua ti' ma̱ chcube' ma̱ ji'i̱ yu nu ngua'ni cha' cuxi bi'. Jua'a̱ nchca cuayá' ti' ya cha' nga'aa ndyanu yabe' ji'i̱ ma̱ xqui'ya cha' cuxi bi'.

2 CORINTIOS 7:11 Referans Kwoze

ROMANOS 14:18

Li' tso'o ntsu'u tyiquee Ni ña'a̱ Ni ji'i̱ ma̱, lo'o jua'a̱ ñati̱ chalyuu cua'ni chi̱ ngu' loo ma̱, si cua'ni ma̱ lcaa ña'a̱ cña nu ngulu'u Cristo ji'na.

2 TIMOTEO 2:15

Lye tsa cua'ni nu'u̱ cña nu cua nda ycui' Ndyosi jinu'u̱, cha' ná ca tyuju'u ti' nu'u̱ xqui'ya cña nu ngua'ni nu'u̱ nu lo'o tsaa nu'u̱ tyi'i̱ ca slo Ni. Chañi tsa laca cha' ji'i̱ ycui' Ndyosi, bi' cha' tya culu'u la nu'u̱ cha' liñi bi' ji'i̱ ngu' lacua; tso'o ti caca tyiquee Ni ña'a̱ Ni jinu'u̱ li'.

2 CORINTIOS 7:7

Lo'o jua'a̱ tso'o tsa cha' nu nda yu lo'o ya cuentya ji'i̱ cña nu ndyu'ni cu'ma̱; nacui̱ yu cha' cua nti' tsa cu'ma̱ ña'a̱ loo ma̱ ji'i̱ ya chaca quiya', lo'o jua'a̱ nacui̱ yu cha' ntyuju'u ti ti' ma̱ ndi'i̱ ma̱ xqui'ya cha' cuxi nu ngua ji'i̱ ma̱ tya li', nacui̱ yu cha' nga'aa ndiya ti' ma̱ cha' cuxi nu nchcui' ngu' 'na tsubi' la. Xqui'ya lcaa cha' bi', chaa la ti' na' ndi'i̱ na' juani.

APOCALIPSIS 3:19

Lcaa ñati̱ nu tyaca'a tsa 'na, ndaca'a na' xi ji'i̱ ngu', nchcube' na' xi ji'i̱ ngu'. Cua'ni clya ma̱ lacua, cha' culochu̱' ma̱ cha' cuxi nu ndyu'ni ma̱.

JUDAS 1:23

Cua'ni lyaá ma̱ ji'i̱ ngu' nu cua tyumi̱' ti lo quii' ji'i̱ nu xña'a̱, culo ma̱ ji'i̱ ngu' bi' ya' nu xña'a̱. Ña'a̱ ti tya cua'ni tya'na ti' ma̱ ji'i̱ ngu' nu xcui' cha' cuxi ndu'ni; ña'a̱ ti xtyucua ma̱ ji'i̱ ngu' bi', cha' taca ca cuayá' tso'o la ti' ngu' cha' liñi ji'i̱ ycui' Ni, masi cutsi̱i̱ ma̱ xi ji'i̱ cha' cuxi nu ndu'ni ngu', ñi'ya̱ si cojolaqui nu cha' cuxi bi' ji'i̱ ma̱.

1 PEDRO 2:2

Ñi'ya̱ laca sca cubi' cuañi' nu ngula ca ti, jua'a̱ laca cu'ma̱ cuentya ji'i̱ ycui' Ndyosi, cha' tsubi' ti ngusñi ma̱ cha' ji'i̱ ycui' Ni. Lu'ba ti ntyi' cubi' cuañi' cha' ntyute' tsa; si ná cati' lu'ba ti, ná caluu cubi' tsiya' ti. Lo'o jua'a̱ cu'ma̱ ni, tso'o la si cua'ni cña ti' ma̱ cha' ca tsa'a̱ la ma̱ cha' ji'i̱ ycui' Ndyosi, cha' ñi'ya̱ nti' styi', jua'a̱ laca cha' ji'i̱ ycui' Ndyosi cuentya ji'i̱ ma̱. Cua'ni bi' cha' caca nguula la ti' tyiquee ma̱ cuentya ji'i̱ ycui' Ndyosi, cha' taca clyaá ma̱ ji'i̱ cha' cuxi.

1 PEDRO 1:17

Xcui' liñi ti ndu'ni cuayá' Ni ji'i̱ ñati̱, ñi'ya̱ laca cha' tso'o nu ngua'ni scaa ngu', ñi'ya̱ laca cha' cuxi nu ngua'ni scaa ngu' laja lo'o ndi'i̱ ngu' chalyuu. Bi' cha' ntsu'u cha' cutsi̱i̱ ma̱ xi lo'o chcui' ma̱ lo'o ycui' Ndyosi ndi'ya̱: “Sti ya”, ñacui̱ ma̱ ji'i̱ Ni. Ntsu'u cha' taquiya' ma̱ ji'i̱ ycui' Ndyosi Sti na lcaa tsa̱ lo'o tyi'i̱ ma̱ chalyuu, cha' xcui' cha' tso'o cua'ni ma̱ cuentya ji'i̱ Ni.

HEBREOS 4:1

Cha' nu laca juani, cua nguxtyanu Ni sca cha' lo'o na, cha' taca tyalaa na ca slo Ni, cha' tyi'i̱ tso'o ti na ca bi'. Tso'o si cube ti' na ji'i̱ lcaa ngu' tya'a na, cha' ná tyu'utsu' ni tsaca ngu' ji'i̱ tyucui̱i̱ liñi nu tsaa ca su tyi'i̱ na lo'o ycui' Ndyosi.

TITO 3:8

Nga'a̱ cha' jlya tso'o ti' ma̱ cha' liñi nu nscua na' re, bi' cha' lye chcui' nu'u̱ cha' bi' lo'o lcaa ñati̱ nu ngusñi cha' ji'i̱ ycui' Ndyosi ca bi', cha' xcui' cha' tso'o cua'ni ma̱ li'. Tso'o tsa laca cha' liñi, taca xtyucua cha' bi' ji'i̱ cua ña'a̱ ca ñati̱;

FILIPENSES 2:12

Cu'ma̱ ngu' tya'a na nu tyaca'a tsa ma̱ 'na, cua ndaquiya' tsa ma̱ ji'i̱ cha' nu nchcui' na' lcaa tsa̱ lo'o nguti'i̱ na' lo'o ma̱; ña'a̱ ti tya ndulo tsa cha' ji'i̱ ma̱ cha' taquiya' la ma̱ ji'i̱ cha' nu nchcui' na', masi tyijyu' tsa nga'a̱ na' ca su ndi'i̱ ma̱ juani. Ña'a̱ ti cua'ni cña ti' ma̱ cha' caca lyiji lcaa cha' nu ngua ti' ycui' Ndyosi cua'ni Ni ne' cresiya ji'i̱ ma̱ lo'o ngua'ni lyaá Jesucristo ji'i̱ ma̱. Xti ti cha' tyu'u tyiquee ma̱ cuentya ji'i̱ ycui' ma̱, pana cube la ti' ma̱ ji'i̱ ycui' Ndyosi.

EFESIOS 5:11

Ná tyu'u cha' ji'i̱ ma̱ lo'o ñati̱ nu xcui' cha' cuijya ti, nu xcui' cha' tonto ti ndu'ni ngu', xqui'ya cha' talya chalyuu nu ntsu'u ji'i̱ ngu'; ta ma̱ sca cui̱i̱ lo'o ngu' bi', cha' ca cuayá' ti' ngu' cha' cuxi ti ndyu'ni ngu'.

EFESIOS 4:26

Lo'o ntsu'u quiya' ñasi̱' ma̱ xi, cui'ya ma̱ cuentya cha' ná tyanu qui'ya ji'i̱ ma̱ li'; ná tso'o si caca ñasi̱' ti' ma̱ tyucui tsa̱, tsa tyeje tacui ti cha' cua'ni ma̱ ji'i̱.

2 CORINTIOS 13:7

Lu'ba ti ndijña ya cha' ji'i̱ ycui' Ndyosi, cha' ná ta Ni chacuayá' cha' cua'ni ma̱ xa' la cha' cuxi; na cua nti' ya cha' xtyucua Ni ji'i̱ ma̱ cha' tso'o ti caca tyiquee ma̱. Ná ndube ti' ya, masi ñacui̱ ngu' cha' ná nchca ji'i̱ ya tsiya' ti.

2 CORINTIOS 9:2

cha' cua jlo ti' na' cha' tso'o ti nti' ma̱ ña'a̱ ma̱ ji'i̱ ngu'. Lu'ba ti nchcui' na' lo'o ngu' ca tyi re, ca loyuu su cuentya Macedonia re, cha' tso'o tsa ndyu'ni ma̱, cu'ma̱ ngu' ca tyi nde loyuu su cuentya Acaya bi'; ni na' ji'i̱ ngu' cha' yala tsa ti' cu'ma̱, cha' tya yija̱ na ngua'ni cña ti' ma̱ cha' xti'i̱ ma̱ msta̱ bi'. Lo'o nu ngu' Macedonia re ni, cua ngua chaa la ti' tyiquee ngu' lo'o na'a̱ ngu' cha' yala tsa ndyu'ni ma̱ cña.

2 CORINTIOS 7:1

Cu'ma̱ ngu' tya'a na, nu ntsu'u tsa tyiquee na' ña'a̱ na' ji'i̱ ma̱, jua'a̱ laca cha' nu cua nda ycui' Ndyosi lo'o na, cha' nu caca ji'na nde loo la. Bi' cha' lacua, ntsu'u cha' cua'ni tye na ji'i̱ lcaa cha' cuxi nu nti' cua'ni ñu'u̱ ji'i̱ cresiya ji'na, ji'i̱ tyucui ña'a̱ na. Lo'o jua'a̱ lye tsa cua'ni na cña cha' caca na ñati̱ ji'i̱ ycui' Ni; na laca nu cua'ni na nde chalyuu, cua'ni na ji'i̱ ñi'ya̱ nti' si cua ndu̱ ycui' Ndyosi ña'a̱ Ni ji'na.

2 CORINTIOS 6:4

Tso'o la nti' ya si caca cuayá' ti' ngu' cha' ndya'a̱ ya lo cña ji'i̱ ycui' Ndyosi, nu lo'o ña'a̱ ngu' cña nu ndyu'ni ya cuentya ji'i̱ Ni. Ndalo tsa ya ji'i̱ cha' ti'í nu ndu'ni ngu' lo'o ya, masi ntsu'u tsa na nu lyiji ji'i̱ ya, masi ntsu'u tsa cha' tucui nu ndyaca ji'i̱ ya.

2 CORINTIOS 2:6

Cuayá' tsa cha' nu ngua'ni cu'ma̱ lo'o yu bi', cha' cati̱ xqui'ya yu bi', nu lo'o ndyu'u ti'i̱ ma̱ tsa tlyu ti nu ngua li'.

1 CORINTIOS 12:25

Pana stu'ba ti ndu'ni lcaa tyijya̱ laja cuaña' na cña, stu'ba ti cha' ji'i̱ sca tyijya̱ na su ngalya lo'o xi xa' la tyijya̱ na.

1 CORINTIOS 5:2

Lo'o ña'a̱ ti tya ndu'ni tyucuaa ti' ma̱ ji'i̱ tya'a ma̱, masi nga'a̱ cha' ca xñi'i̱ tsa ti' ma̱ xqui'ya cha' cuxi bi'. Nga'a̱ tsa cha' culo'o ma̱ ji'i̱ ñati̱ nu ngua'ni cha' cuxi bi', cha' nga'aa tya'a̱ yu stu'ba ti lo'o cu'ma̱.

ROMANOS 11:20

Chañi cha' ji'i̱ ma̱. Pana ndi'ya̱ laca cha': cua ngulotsu' ycui' Ndyosi ji'i̱ ngu' judío ji'i̱ yaca bi', xqui'ya cha' ná ngusñi ngu' cha' ji'i̱ Ni; pana cu'ma̱ ni, xqui'ya cha' ngusñi ma̱ cha' ji'i̱ ycui' Ni, bi' ti cha' cua ngujui chacuayá' ji'i̱ ma̱ cha' xñi ca'a̱ ma̱ ji'i̱ yaca bi' ca su ntucua ma̱ juani. Bi' cha' ná ntsu'u cha' cua'ni tyucuaa ti' ma̱ lo'o ngu' judío bi'. Culacua tso'o ti' ma̱ xi.

LOS HECHOS 17:16

Ntajatya Pablo ji'i̱ Silas lo'o Timoteo ña'a̱ cuayá' nu tyalaa ngu' ca quichi̱ Atenas. Xñi'i̱ tsa ti' Pablo lo'o na'a̱ yu cha' quiña'a̱ tsa jo'ó ntsu'u quichi̱ bi';

SAN JUAN 2:17

Li' ndyi'u ti' nu ngu' nu ndyaca tsa'a̱ bi' ji'i̱ sca cha' nu nscua lo quityi ji'i̱ ycui' Ndyosi cua sa'ni la: “Caca ñu'u̱ ti' na' cha' tiji̱' tsa ti' na' ji'i̱ ni'i̱ su laca tyi nu'u̱”, nacui̱ quityi bi'.

SAN MARCOS 3:5

Ñasi̱' xi Jesús ña'a̱ yu ji'i̱ ngu' bi', jua'a̱ xñi'i̱ xi ti' yu cha' ná ntaja'a̱ ngu' cui'ya ngu' cuentya ji'i̱ cha' nu nclyu'u yu ji'i̱ ngu'. Li' nchcui' yu lo'o nu quicha bi': ―Xquiñi nu'u̱ ya' ―nacui̱ Jesús ji'i̱. Nguxquiñi yu ya' yu li', lo'o hora ti ngua tso'o ya' yu.

2 CORINTIOS 7:9

Nu juani tso'o tsa ntsu'u tyiquee na' cha' cua ndaquiya' ma̱ cha' bi', cha' cua ngua xñi'i̱ xi ti' ma̱, lo'o li' nguxtyanu ma̱ cha' cuxi nu ngua'ni ma̱ tya li'. Ngua xñi'i̱ ti' ma̱ tu'ni, pana ngua ti' ycui' Ndyosi cha' caca tso'o ji'i̱ ma̱ lo'o cua ndye cha', bi' cha' si'i na cua ngunu'u̱ tyiquee ma̱ juani xqui'ya cha' ngua tyaala na' ji'i̱ ma̱ li'.

ROMANOS 3:5

Cha' nu na ni, ntsu'u tsa cha' cuxi nu ndyu'ni na; lo'o nu cha' cuxi bi' ni, ndu'ni cha' taca ca cuayá' la ti' na cha' liñi tsa laca ycui' Ndyosi. ¿Ñi'ya̱ ta ñacui̱ na li'? ¿Ha ná liñi ndu'ni Ni lo'o na? ¿Ha ná tso'o si xcube' Ni ji'na lo'o ndyu'ni na cha' cuxi? Ntsu'u ñati̱ nu nchcui' jua'a̱.

1 TESALONICENSES 4:6

Nga'aa xlyaá ma̱ ji'i̱ nu cuna'a̱ ji'i̱ ngu' tya'a ma̱, masi ji'i̱ clyo'o ngu', masi ji'i̱ sñi' ngu'. Cua nchcui' tsa ya lo'o ma̱ cha' lcaa cha' ña'a̱ ycui' nu Xu'na na; jlo ti' ycui' Ndyosi, lo'o jua'a̱ ntsu'u cha' xcube' Ni ji'i̱ lcaa ñati̱ nu ná taquiya' ji'i̱ cha' bi',

1 TIMOTEO 5:20

Si chañi cha' ndyu'ni ngu' cusu' bi' cha' cuxi, li' chcui' nu'u̱ lo'o nu cusu' bi' slo tyucui taju ñati̱ ji'i̱ Jesucristo bi', cha' cube ti' lcaa ngu', cha' ná cua'ni cuxi ngu' jua'a̱.

SANTIAGO 3:17

Pana lcaa cha' nu nda ycui' Ndyosi cha' chcui' na lo'o ñati̱, xcui' cha' tso'o laca bi'; ná nguxa' cha' tso'o bi' lo'o cha' cuxi, ná ntsu'u cha' xu̱u̱ tya'a na lo'o tya'a ñati̱ na. Cha' tso'o ti laca nu nda Ni cha' chcui' na lo'o ñati̱, cha' xcui' na tso'o ti cua'ni na lo'o ñati̱ li'. Lo'o jua'a̱ ndu'ni cha' bi', cha' cua'ni tya'na ti' na ji'i̱ ñati̱, ña'a̱ cuayá' nu cua'ni na cha' tso'o cha' xtyucua na ji'i̱ ngu'; ndu'ni cha' sca ti cha' liñi chcui' na lo'o ñati̱, si'i cha' cuiñi chcui' na lo'o ngu'.