2 CORINTIOS 7:10 - Chatino Tataltepec

¹⁰ Nu lo'o ndube ti' na ji'i̱ ycui' Ndyosi laja lo'o nga'a̱ na xñi'i̱ ti' na, li' caja ñi'ya̱ xtyanu na ji'i̱ cha' cuxi nu ndyu'ni na; clyaá na ji'i̱ nu cuxi li', nga'aa ntsu'u cha' culacua tsa ti' na li'. Pana ñati̱ nu xñi'i̱ xi ti', nu ná ndube ti' ji'i̱ ycui' Ndyosi ni, ná ntaja'a̱ ñati̱ bi' ca tyuju'u ti' ji'i̱ qui'ya nu ntsu'u ji'i̱; chcuna' chalyuu ji'i̱ ngu' bi' jua'a̱ ti li'.

2 CORINTIOS 7:10 Referans Kwoze

LOS HECHOS 3:19

Bi' cha' ntsu'u cha' ca tyuju'u ti' ma̱ ji'i̱ lcaa cha' cuxi nu ntsu'u tyiquee ma̱ ji'i̱, cuati jña ma̱ cha' clyu ti' ji'i̱ ycui' Ndyosi cha' cuityi̱ Ni lcaa cha' cuxi nu ngua'ni ma̱. Cua'ni nu Xu'na na cha' taca ca tso'o cresiya ji'i̱ ma̱ chaca quiya' li'.

LOS HECHOS 11:18

Nu lo'o ndyuna ngu' cha' nu nchcui' Pedro lo'o ngu', nga'aa ngua chcui' tyaala ngu' bi' lo'o Pedro. Li' ngua'ni tlyu ngu' bi' ji'i̱ ycui' Ndyosi. Ndi'ya̱ nchcui' ngu' lo'o Ni li': ―Ndyosi Sti ya, tso'o tsa ndu'ni nu'u̱ lo'o ngu' xa' tsu', masi si'i ngu' judío laca ngu' bi' ―nacui̱ ngu' ji'i̱ ycui' Ndyosi―. Ndu'ni nu'u̱ cha' ca tyuju'u ti' ngu' ji'i̱ lcaa cha' cuxi nu ntsu'u ji'i̱ ngu', cha' caja chalyuu nu ná nga'a̱ cha' tye ji'i̱ ngu' bi'.

SAN LUCAS 18:13

Pana nu qui'yu nu nclyo cñi cña loo ngu' ni, tyijyu' ti ndyatu̱ yu; ná ntsu'u tyiquee yu cha' sicua̱a̱ yu xi cloo yu nde cua̱, cha' xñi'i̱ tsa ti' yu ndu̱ yu ndyu'u̱ ti yu tyiquee yu laja lo'o nchcui' yu lo'o ycui' Ndyosi: “Cua'ni tya'na ti' nu'u̱ jna', Ndyosi Sti na', cha' ntsu'u tsa qui'ya jna'”, nacui̱ nu qui'yu bi'. Tsa bi' ti cha' nchcui' yu.

SAN LUCAS 15:10

Chaa ti' nu cuna'a̱ bi', cha' cua nquije cñi ji'i̱; la cui' jua'a̱ ca slo ycui' Ndyosi, chaa tsa ti' ycui' Ni lo'o ñati̱ ji'i̱ Ni nde cua̱, masi sca ti ñati̱ chalyuu ca tyuju'u ti' ji'i̱ cha' cuxi nu ntsu'u ji'i̱, culochu̱' yu ji'i̱ cha' cuxi bi' li'.

HEBREOS 12:17

Cua jlo ti' ma̱ ñi'ya̱ ngua ca tiya' la: nu lo'o ngua ti' yu cha' culacua̱ sti yu ji'i̱ yu, li' nga'aa ndaquiya' sti yu ji'i̱ cha' nu nda yu lo'o; nga'aa ngujui ñi'ya̱ nu tya'a̱chu̱' yu ji'i̱ cha' nu cua ngua'ni yu, masi ngusi'ya tsa yu lo'o ngüijña yu cha' bi' ji'i̱ sti yu.

2 CORINTIOS 12:21

Nu lo'o tyalaa na' chaca quiya' ca slo ma̱ juani ti, si quije cha' jna' cha' jua'a̱ ndu'ni ma̱, ná tyiquee' quiña'a̱ tsa cha' tyuju'u ti' caca 'na cuentya ji'i̱ ycui' Ndyosi nu laca Xu'na na', nu lo'o ña'a̱ na' ji'i̱ cu'ma̱. Xi'ya tsa na' li', ña'a̱ cuayá' xñii hitya cloo na'; xi'ya na' xqui'ya ngu' nu ngua'ni cha' cuxi bi' tya tsubi' la, cha' bilya ca tyuju'u ti' ngu' bi' ji'i̱ cha' suba' nu ngua'ni ngu', cha' ntsu'u tsa cha' cuxi nu ndyu'ni ngu' lo'o tya'a ngu', cha' ná lubii cresiya ji'i̱ ngu' bi' tsiya' ti.

SAN MATEO 26:75

Lo'o li' ndyi'u ti' Pedro cha' nu nchcui' Jesús lo'o yu tya tsa̱ la, nu lo'o ndi'ya̱ nacui̱ Jesús ji'i̱ yu: “Nu lo'o bilya xi'ya ndye'e talya juani, sna quiya' chcui' nu'u̱ lo'o ñati̱ cha' ná nslo nu'u̱ 'na”. Jua'a̱ nacui̱ Jesús tsa̱ la, bi' cha' ndu'u Pedro ndyaa yu li'; nxi'ya tsa yu ndyaa yu cha' xñi'i̱ tsa ti' yu li'.

2 CORINTIOS 7:9

Nu juani tso'o tsa ntsu'u tyiquee na' cha' cua ndaquiya' ma̱ cha' bi', cha' cua ngua xñi'i̱ xi ti' ma̱, lo'o li' nguxtyanu ma̱ cha' cuxi nu ngua'ni ma̱ tya li'. Ngua xñi'i̱ ti' ma̱ tu'ni, pana ngua ti' ycui' Ndyosi cha' caca tso'o ji'i̱ ma̱ lo'o cua ndye cha', bi' cha' si'i na cua ngunu'u̱ tyiquee ma̱ juani xqui'ya cha' ngua tyaala na' ji'i̱ ma̱ li'.