2 CORINTIOS 6:1 - Chatino Tataltepec

¹ Ngu' tya'a ndyu'ni na cña ji'i̱ ycui' Ndyosi laca ma̱; bi' cha' nchcui' tsa ya lo'o cu'ma̱, cha' ná culiji ma̱ cha' tso'o jua'a̱ ti, cha' tso'o nu cua nda Ni cha' tyanu ne' cresiya ji'i̱ ma̱. Na cua ngusñi ma̱ cha' bi' tsaca quiya', bi' cha' ña'a̱ ti taquiya' ma̱ ji'i̱ cha' bi' juani.

2 CORINTIOS 6:1 Referans Kwoze

HEBREOS 12:15

Cui'ya ma̱ cuentya cha' ni tsaca ngu' tya'a ma̱ ná xtyanu jua'a̱ ti lcaa cha' tso'o nu ndu'ni ycui' Ndyosi lo'o na. Lo'o jua'a̱ cui'ya ma̱ cuentya cha' ná cua'ni ñu'u̱ ma̱ ji'i̱ tyiquee xa' la ngu' tya'a ngusñi na cha' ji'i̱ Jesús. Ñi'ya̱ laca sca quixi̱' tyaala nu cua'ni ñu'u̱ ji'i̱ ñati̱ lo'o co'o ngu' hitya bi', jua'a̱ caca na ji'i̱ tya'a na lo'o ntsu'u sca cha' cuxi ji'na.

1 CORINTIOS 3:9

Tya'a ndyu'ni ya cña ji'i̱ ycui' Ndyosi laca cuare; lo'o cu'ma̱ ni, ndu'ni Ni cña ne' cresiya ji'i̱ ma̱, cña ji'i̱ ycui' Ndyosi laca bi'. Lo'o jua'a̱ taca ta na' chaca cui̱i̱ lo'o ma̱ juani: ñi'ya̱ si laca ma̱ sca ni'i̱ tonu, jua'a̱ laca ma̱ cuentya ji'i̱ ycui' Ndyosi;

1 PEDRO 4:10

Nda xlya'be ti ycui' Ndyosi ñi'ya̱ taca cua'ni scaa ma̱ sca cña tso'o, lcaa ma̱ nu ngusñi ma̱ cha' ji'i̱ Jesús. Ñi'ya̱ lo'o nxtyucua ycui' Ndyosi ji'na cha' caca tya'na ti' na ji'i̱ tya'a ñati̱ na, la cui' jua'a̱ nga'a̱ cha' xtyucua na ji'i̱ ngu' lo'o cua'ni na cña nu nda Ni cha' cua'ni sa scaa na.

GÁLATAS 2:21

Si'i cha' ná ndube ti' na' ji'i̱ lcaa cha' tso'o nu ngua'ni ycui' Ndyosi lo'o ngu' judío tya'a ya; laca cha' ndube tsa ti' na' cha' ná taca ca tso'o cresiya ji'na cuentya ji'i̱ ycui' Ndyosi, masi tso'o tsa ndaquiya' na ji'i̱ cña nu nclyo cha' cusu' bi' ji'na. Ndube tsa ti' na' cha' ná ngujuii Jesús jua'a̱ ti; ntsu'u cña nu ngua'ni yu lo'o ngujuii yu lo crusi bi', na cua ngua'ni tso'o yu ji'i̱ cresiya ji'na cuentya ji'i̱ ycui' Ndyosi nu ngua li'.

HEBREOS 12:25

Cui'ya ma̱ cuentya lacua, cha' cua'a̱ jyaca̱ ma̱ ji'i̱ lcaa cha' nu cua nda Cristo lo'o ma̱. Nguxcube' tsa ycui' Ndyosi ji'i̱ jyo'o cusu' ji'na, nu lo'o ná ntaja'a̱ ngu' cua'a̱ jyaca̱ ngu' ji'i̱ cha' nu nchcui' jyo'o Moisés lo'o ngu' nde chalyuu chacuayá' ji'i̱ ycui' Ndyosi; ná ngua xna ngu' bi' ji'i̱ ycui' Ndyosi. La cui' jua'a̱ tlyu la cha' caca ji'na juani, si ná taquiya' na ji'i̱ Cristo nu ngutu'u ca slo ycui' Ndyosi ya̱a̱ nde lo yuu chalyuu, lo'o jua'a̱ cua xa' ndyaa tucua Ni ca slo ycui' Ndyosi chaca quiya' juani.

ROMANOS 12:1

Cu'ma̱ ngu' tya'a ntsu'u cha' ji'na lo'o Cristo, xqui'ya cha' lye tsa ndu'ni tya'na ti' Ni ji'na, bi' cha' nchcui' na' lo'o ma̱ juani. Ta ma̱ tyucui ña'a̱ ma̱ ji'i̱ ycui' Ndyosi, cha' cua'ni ma̱ cua ña'a̱ ca cña nu nti' Ni cha' cua'ni ma̱ nde chalyuu; ta ma̱ tyucui ña'a̱ ma̱ ji'i̱ Ni cha' xcui' na tyi'i̱ ma̱ chalyuu cuentya ji'i̱ ycui' Ni, cha' laca ma̱ ñi'ya̱ nti' sca msta̱ lu'ú ti. La cui' jua'a̱ nti' ycui' Ndyosi, cha' laca ma̱ ñati̱ ji'i̱ Ni. Na cua laca ntsu'u cha' cua'ni ma̱ jua'a̱.

GÁLATAS 3:4

Masi ngua'ni Ni quiña'a̱ cha' tlyu ca slo ma̱ tya tsubi' la, ntsu'u quiya' nclyacua ti' na' cha' ná ngua tso'o cresiya ji'i̱ ma̱ tsiya' ti, nu lo'o ña'a̱ na' ñi'ya̱ nu ndyu'ni ma̱. Pana jlo ti' na' cha' ngua tso'o la xi cresiya ji'i̱ ma̱ xqui'ya cha' tlyu bi'.

LOS HECHOS 14:3

Tyiquee' xi ndyanu Pablo lo'o Bernabé quichi̱ bi', cha' ná ndyutsi̱i̱ ngu' culu'u ngu' cha' ji'i̱ nu Xu'na na ji'i̱ ngu' quichi̱ bi'. Lo'o jua'a̱ ngua'ni Pablo lo'o Bernabé cña tonu chacuayá' ji'i̱ ycui' Ndyosi, bi' cha' ngua ji'i̱ ngu' quichi̱ ta ngu' cuentya cha' xcui' cha' liñi nclyu'u ngu' bi' ji'i̱ ngu'.

TITO 2:11

Tso'o tsa ndu'ni ycui' Ndyosi lo'o ñati̱ chalyuu cha' cua nti' Ni cha' clyaá ngu' ji'i̱ nu cuxi;

SAN MATEO 23:37

’¡Tya'na̱ tsa cu'ma̱ ngu' Jerusalén! Tucui tsa cha' ntsu'u ji'i̱ ma̱. Tya sa'ni la ndyujuii ma̱ ji'i̱ ñati̱ nu ngua'a̱ lo ycui' Ndyosi cña ji'i̱, masi ngujui'i̱ ma̱ quee ji'i̱ ngu' nu laca tu'ba ji'i̱ Ni. Tyu̱u̱ tsa quiya' ngua ti' na' cha' cua'ni tyaca'a na' ji'i̱ ma̱ cha' ná ca cuxi ji'i̱ ma̱. Ñi'ya̱ nti' sca su'u̱ nu nxuti'i̱ ji'i̱ sñi' ne' lu'be ni', jua'a̱ ngua ti' na' cua'ni na' lo'o ma̱; pana ná nda ma̱ chacuayá' 'na tsiya' ti.

2 CORINTIOS 10:1

Pablo laca na' nu nchcui' na' lo'o cu'ma̱ juani; tyu'u cha' clyu ti' ji'i̱ ma̱, masi chcui' liñi na' lo'o ma̱. Nacui̱ ngu' cha' ntsi̱i̱ na' lo'o nchcui' na' lo'o ma̱ nu lo'o ndi'i̱ na' slo ma̱, pana tyaala tsa ndu'ni na' lo'o ma̱ nu lo'o nga'a̱ na' tyijyu'; jua'a̱ cha' nda ngu'. Tyi'u ti' ma̱ lacua, cha' xcui' tso'o ti nti' Cristo lo'o ña'a̱ Ni ji'na.

LOS HECHOS 11:23

Li' ndu'u Bernabé ndyaa yu, ndyalaa yu ca quichi̱ bi', na'a̱ yu ñi'ya̱ laca cha' tso'o nu ngua'ni ycui' Ndyosi lo'o ngu' bi'. Tso'o tsa ntsu'u tyiquee Bernabé li'. Nda yu sca cui̱i̱ lo'o taju ñati̱ ji'i̱ Jesucristo ca bi', cha' tyucui tyiquee ngu' cua'ni ngu' cña lcaa tsa̱, lcaa ña'a̱ cña nu nti' ycui' nu Xu'na na cha' cua'ni na.

1 TESALONICENSES 3:5

Lo'o ngua cuayá' ti' na' cha' bi', nga'aa ndalo na' li'; xñi'i̱ tsa ti' na' cha' ná jlo ta̱' ñi'ya̱ ndyaca cha' ji'i̱ ma̱. Bi' cha' nda na' ji'i̱ yu tya'a na ñaa yu slo ma̱, cha' ca cuayá' ta̱' si ña'a̱ ti nxñi tso'o ma̱ cha' tso'o ji'i̱ ycui' Ndyosi, si tyiji̱loo ma̱ ji'i̱ nu xña'a̱ nu nti' cha' cua'ni ma̱ cha' cuxi. Cua nguna' cña ji'i̱ ya lo'o ma̱ si ná caca tyiji̱loo ma̱ ji'i̱ nu xña'a̱ bi'.

HEBREOS 4:1

Cha' nu laca juani, cua nguxtyanu Ni sca cha' lo'o na, cha' taca tyalaa na ca slo Ni, cha' tyi'i̱ tso'o ti na ca bi'. Tso'o si cube ti' na ji'i̱ lcaa ngu' tya'a na, cha' ná tyu'utsu' ni tsaca ngu' ji'i̱ tyucui̱i̱ liñi nu tsaa ca su tyi'i̱ na lo'o ycui' Ndyosi.