2 CORINTIOS 13:7 - Chatino Tataltepec

⁷ Lu'ba ti ndijña ya cha' ji'i̱ ycui' Ndyosi, cha' ná ta Ni chacuayá' cha' cua'ni ma̱ xa' la cha' cuxi; na cua nti' ya cha' xtyucua Ni ji'i̱ ma̱ cha' tso'o ti caca tyiquee ma̱. Ná ndube ti' ya, masi ñacui̱ ngu' cha' ná nchca ji'i̱ ya tsiya' ti.

2 CORINTIOS 13:7 Referans Kwoze

SANTIAGO 1:12

Tso'o caca tyiquee ñati̱ nu ña'a̱ ti nxñi cha' ji'i̱ Jesús, masi tyacua cua ña'a̱ ca cha' ti'í ji'i̱ ngu'. Tso'o si talo ngu' tyiquee', ña'a̱ cuayá' tye cha' ti'í bi' ji'i̱ ngu', cha' caja chalyuu nu ná nga'a̱ cha' tye ji'i̱ ngu' bi' li'; bi' laca cha' tso'o nu cua nacui̱ Ni cha' ta Ni ji'i̱ ñati̱ nu ntsu'u tsa tyiquee ña'a̱ ji'i̱ ycui' Ni.

2 TIMOTEO 4:18

Lo'o jua'a̱ tya cua'a Ni jna' ji'i̱ lcaa lo cha' cuxi nu tyacua na' ji'i̱; jlo ti' na' cha' ña'a̱ ti tya ña'a̱si̱i̱ Ni jna', cha' tso'o ti tyalaa na' su nclyo ycui' Ndyosi cña. Nga'aa tye tsa̱ cha' cua'ni tlyu na ji'i̱ ycui' Ndyosi ca bi'. Jua'a̱ caca cha' tu'ni.

2 TIMOTEO 2:15

Lye tsa cua'ni nu'u̱ cña nu cua nda ycui' Ndyosi jinu'u̱, cha' ná ca tyuju'u ti' nu'u̱ xqui'ya cña nu ngua'ni nu'u̱ nu lo'o tsaa nu'u̱ tyi'i̱ ca slo Ni. Chañi tsa laca cha' ji'i̱ ycui' Ndyosi, bi' cha' tya culu'u la nu'u̱ cha' liñi bi' ji'i̱ ngu' lacua; tso'o ti caca tyiquee Ni ña'a̱ Ni jinu'u̱ li'.

1 TIMOTEO 2:2

Nga'a̱ cha' chcui' na lo'o ycui' Ndyosi cuentya ji'i̱ lcaa ngu' nu laca loo, cuentya ji'i̱ lcaa ngu' nu laca cña; jña ma̱ cha' cua'ni Ni cha' ti̱ ti tyi'i̱ tyiquee na, cha' ná xu̱u̱ tya'a ngu' laca loo bi' lo'o na, cha' ta ngu' bi' chacuayá' cha' cua'ni na lcaa lo cha' tso'o, ñi'ya̱ nu nti' ycui' Ndyosi cha' cua'ni na.

1 TESALONICENSES 5:23

Ndu'ni ycui' Ndyosi cha' ti̱ ti tyi'i̱ tyiquee na. Bi' cha' juani cua'ni Ni cha' caca ma̱ ñati̱ liñi tsiya' ti; caca tso'o tyiquee ma̱, caca lubii cresiya ji'i̱ ma̱, caca ma̱ ñati̱ nu tyucui tyiquee tsiya' ti. Si lubii cresiya ji'i̱ ma̱ lo'o ca̱a̱ ycui' Jesucristo nu Xu'na na chaca quiya', li' nga'aa ntsu'u cha' sta Ni qui'ya ji'i̱ ma̱;

FILIPENSES 4:8

Cu'ma̱ tya'a ngusñi na cha' ji'i̱ Cristo, ndi'ya̱ ti culacua ti' ma̱ tyucui tyempo nu ndi'i̱ ma̱ chalyuu: Cua ña'a̱ ca cha' nu chañi tsa cha' jua'a̱ laca, bi' laca nu nga'a̱ cha' tyu'u tyiquee ma̱ ji'i̱; jua'a̱ lcaa cha' nu cua'ni chi̱ ngu' loo, lcaa cha' nu liñi ca, lcaa cha' su lubii ntsu'u tyiquee na, lcaa cha' nu tso'o tsa ña'a̱, lcaa cha' nu tso'o tsa nti' ngu' ña'a̱ ngu' ji'i̱, masi lcaa cha' tso'o bi', nu jua'a̱ tso'o tsa nchcui' ngu' ji'i̱, bi' laca nu nga'a̱ cha' tyu'u tyiquee ma̱ ji'i̱.

1 PEDRO 2:12

Xcui' cha' liñi cua'ni ma̱ lacua; xcui' cha' tso'o cua'ni ma̱, xqui'ya nu ñati̱ nu ná jlya ti' ji'i̱ ycui' Ndyosi tsiya' ti, cha' lo'o ngu' bi' taca ca cuayá' ti' ngu' cha' ñati̱ tso'o laca ma̱. Nu juani nti' ngu' bi' cha' cuxi tsa ñati̱ laca ma̱, bi' cha tso'o la si cua'ni ma̱ xcui' cha' tso'o ti cha' ña'a̱ ñati̱ bi' ji'i̱ ma̱; li' ta ngu' bi' cuentya cha' chañi cha' ñati̱ tso'o laca ma̱. Lo'o ñati̱ bi' cua'ni tlyu ji'i̱ ycui' Ndyosi tsa̱ nu cua'ni cuayá' Ni ji'i̱ ñati̱ li'.

2 CORINTIOS 13:9

Si tso'o tsa ndyanu tachaa cha' ji'i̱ ycui' Ndyosi ne' cresiya ji'i̱ ma̱, tso'o tsa nti' ya li', masi xti ti cha' nchca ji'i̱ ycui' ya; bi' cha' ndijña ya cha' ji'i̱ ycui' Ndyosi cuentya ji'i̱ cu'ma̱ lacua, cha' jua'a̱ caca tyucui la ti' tyiquee ma̱ ña'a̱ ma̱ ji'i̱ ycui' Ndyosi.

2 CORINTIOS 10:18

Si'i na taquiya' tso'o la Ni ji'i̱ ñati̱ nu nchcui' tsa ji'i̱ cña nu ndyu'ni ycui' ca ngu'; nu lo'o tso'o ti nti' Ni ña'a̱ Ni ji'i̱ ñati̱, li' taquiya' Ni ji'i̱ cña nu ndyu'ni ngu' bi'.

2 CORINTIOS 10:10

Nacui̱ ngu': Tonu tsa cha' nu nda nu Pablo bi', tyaala tsa ndu'ni yu lo'o na, nu lo'o ndi'i̱ yu tyijyu'. Nda yu cha' nu lijya̱ ca slo na, nacui̱ ngu' ji'i̱ ma̱, pana ná nchca culo tso'o yu cña ji'na nu lo'o ndi'i̱ yu slo na; ná nduna na tsiya' ti cha' nu nda yu li', nacui̱ ngu' bi' li'.

2 CORINTIOS 8:21

Ndube ti' ya ji'i̱ ycui' nu Xu'na na, lo'o jua'a̱ ndube ti' ya ñi'ya̱ nu chcui' ñati̱; bi' cha' nti' ya cha' xcui' lubii ti cua'ni ya lcaa cña bi'.

2 CORINTIOS 6:4

Tso'o la nti' ya si caca cuayá' ti' ngu' cha' ndya'a̱ ya lo cña ji'i̱ ycui' Ndyosi, nu lo'o ña'a̱ ngu' cña nu ndyu'ni ya cuentya ji'i̱ Ni. Ndalo tsa ya ji'i̱ cha' ti'í nu ndu'ni ngu' lo'o ya, masi ntsu'u tsa na nu lyiji ji'i̱ ya, masi ntsu'u tsa cha' tucui nu ndyaca ji'i̱ ya.

1 CORINTIOS 11:19

Si jua'a̱ ná stu'ba ntsu'u cha' ji'i̱ ma̱ lo'o tya'a ma̱, chañi tiya' la li' taca ca cuayá' ti' na tilaca nu chañi ca ndaquiya' cha' ji'i̱ Jesús.

ROMANOS 16:10

jua'a̱ ji'i̱ Apeles, cha' cua jlo ti' na cha' ngusñi tso'o yu cha' ji'i̱ Cristo xqui'ya lcaa cña nu ngua ji'i̱ yu cuentya ji'i̱ Cristo; jua'a̱ ji'i̱ lcaa ngu' tya'a Aristóbulo;

ROMANOS 13:13

Clyana na ñi'ya̱ caca tyi'i̱ tso'o ti na lo'o ñati̱, ñi'ya̱ si laca na ñati̱ nu xcui' ndya'a̱ ndacua̱ ti su caca ña'a̱ ñati̱ ji'na. Li' ná tso'o laca si culiji na chalyuu ji'na jua'a̱ ti lo'o ndya'a̱ na cha' cu'bi na, masi xa' la juersa ji'na culiji na lo'o xcui' ndi'i̱ ti na ta'a. Ná tso'o bi'. Lo'o jua'a̱ ná ntsu'u cha' cua'ni suba' na lo'o xa' ñati̱, ná ntsu'u cha' clyana na xa' la cha' cuxi nu cua'ni na lo'o ñati̱; ni nga'aa clyana na cha' cusu̱u̱ lo'o ngu', nga'aa cua'ni liye' ti' na ji'i̱ ngu'.

ROMANOS 12:17

Nu lo'o cuxi ti cua'ni ngu' lo'o ma̱, ná tya ma̱ cha' cuxi ji'i̱ ngu' chaca quiya'; clyana ma̱ sca cña tso'o nu caca cua'ni ma̱ cuentya ji'i̱ ngu', cha' jua'a̱ ña'a̱ tsa ñati̱ ji'na.

SAN JUAN 17:15

Bi' cha' chcui' na' lo'o nu'u̱ juani, Sti na' ―nacui̱ Jesús―, cha' nti' na' cha' ña'a̱si̱i̱ nu'u̱ ji'i̱ ngu' bi', cha' ná cua'ni lya' ti' nu xña'a̱ ji'i̱ ngu', masi si'i cha' ca̱a̱ ca̱qui'ya nu'u̱ ji'i̱ ngu' bi' chcui' na' lo'o nu'u̱.

SAN MATEO 6:13

Ná ta nu'u̱ chacuayá' cha' cojolaqui cha' cuxi ji'i̱ ya, pana cua'ni lyaá nu'u̱ ji'i̱ ya ya' nu xña'a̱. Nu'u̱ laca loo tsiya' ti; lcaa chacuayá' nu ntsu'u nde chalyuu, lo'o jua'a̱ chacuayá' nu ntsu'u nde cua̱, jinu'u̱ ntsu'u lcaa chacuayá' bi'. Ná nga'a̱ cha' tye cha' tlyu tsa laca nu'u̱. Jua'a̱ caca cha' tu'ni. Jua'a̱ ñacui̱ ma̱ ji'i̱ ycui' Ndyosi.

ROMANOS 1:28

Jua'a̱ laca ji'i̱ ngu', cha' ná nti' ngu' tyuloo ngu' ji'i̱ ycui' Ndyosi; bi' cha' nguxtyanu Ni ji'i̱ ngu' cha' cua'ni ngu' cha' cuxi bi', nda Ni xi tyempo cua'ni ngu' ñi'ya̱ nu nti' ti ngu' cua'ni ngu'.

2 CORINTIOS 13:6

Lo'o jua'a̱ nti' na' cha' caca cuayá' ti' ma̱ cha' ji'i̱ cuare, cha' si'i na ngunu'u̱ cresiya ji'i̱ ya lo'o Ni.

2 CORINTIOS 13:8

Ná ntsu'u cha' cua'ni tyaala ya lo'o ma̱ si ña'a̱ ti tya ndyanu tso'o cha' ne' cresiya ji'i̱ ma̱, nu cha' ji'i̱ Jesús nu cua ngusñi ma̱; pana si ndyu'ni ñu'u̱ ca ma̱ ji'i̱ nu cha' ji'i̱ Jesús bi', li' cua'ni tyaala ya lo'o ma̱.