1 TIMOTEO 5:1 - Chatino Tataltepec

¹ Ná cua'ni tyaala nu'u̱ ji'i̱ sca ngu' cusu' si ngua'ni cuxi yu; ta nu'u̱ sca cui̱i̱ lo'o yu ñi'ya̱ lo'o nchcui' na lo'o sti na. La cui' ti cha' lo'o nu ngu' qui'yu cuañi' ni, ta sca cui̱i̱ lo'o ngu' ñi'ya̱ lo'o nclu'u na ji'i̱ tya'a na.

1 TIMOTEO 5:1 Referans Kwoze

TITO 2:2

Culu'u nu'u̱ ji'i̱ ngu' nu cusu' la cha' ná caca cu'bi ngu', cha' xcui' cha' liñi jlya ti' ngu', cha' cua'a ngu' ji'i̱ ycui' ca ngu', cha' xcui' cha' tso'o cua'ni ngu' li'; culu'u nu'u̱ ji'i̱ ngu' bi' cha' jlya tso'o ti' ngu' lcaa cha' liñi, cha' tyu'u tyiquee ngu' ña'a̱ ngu' ji'i̱ tya'a ñati̱ ngu', cha' talo tyiquee ngu' lo'o ndyu'ni lya' ti' ñati̱ ji'i̱ ngu'.

1 PEDRO 5:1

Sca ngu' cusu' nu laca loo laca na', lo'o juani nti' na' ta na' sca cui̱i̱ lo'o cu'ma̱ tya'a cusu' na. Lo'o na', cua na'a̱ na' ji'i̱ Cristo lo'o nguxcube' ngu' ji'i̱ yu, bi' cha' jlo ti' na' cha' stu'ba ti tyi'i̱ lcaa tya'a na ca slo ycui' Ndyosi; ña'a̱ na cha' tlyu nu caca li'.

GÁLATAS 6:1

Cu'ma̱ ngu' tya'a na, ndi'ya̱ nga'a̱ cha' cua'ni ma̱ lo'o ña'a̱ ma̱ cha' ngua cuxi cresiya ji'i̱ sca ngu' tya'a ngusñi ma̱ cha' ji'i̱ ycui' Ndyosi, xqui'ya cha' ngua'ni yu sca cha' cuxi: nga'a̱ cha' xtyucua ma̱ xi ji'i̱ yu bi', cha' cati̱ qui'ya nu ntsu'u ji'i̱ yu, cha' tucuá yu cña ji'i̱ Cristo chaca quiya', cha' tya'a ntsu'u cha' ji'i̱ ma̱ lo'o Xtyi'i ycui' Ndyosi laca yu. Tsa tso'o ti chcui' ma̱ lo'o yu bi'. Lo'o jua'a̱ tii ti ti' ma̱ tyi'i̱ ycui' ca ma̱ cha' ná cua'ni ma̱ la cui' cha' cuxi ñi'ya̱ nu ngua'ni yu bi'.

TITO 2:6

La cui' jua'a̱, ta nu'u̱ cui̱i̱ lo'o nu ngu' qui'yu cuañi' cha' cua'a ngu' ji'i̱ ycui' ca ngu', cha' xcui' cha' tso'o cua'ni ngu'.

SAN MATEO 23:8

’Pana cu'ma̱ ni, ná tso'o si ñacui̱ ngu' ji'i̱ ma̱ cha' mstru laca ma̱; tso'o la si sca ti cha' ntsu'u tyiquee ma̱ lo'o tya'a ma̱, cha' sca ti mstru ntsu'u ji'i̱ ma̱, bi' laca Cristo.

1 TIMOTEO 5:17

Cua'ni chi̱ ma̱ loo ngu' cusu' nu laca loo ji'i̱ taju ji'i̱ ma̱ si tso'o ti ndu'ni ngu' lo'o ma̱. Lye la cua'ni chi̱ ma̱ loo ngu' cusu' nu nchcui' cha' ji'i̱ ycui' Ndyosi lo'o ma̱, ngu' cusu' nu nclu'u cha' bi' ji'i̱ ma̱. Ta ma̱ caya' ji'i̱ ngu' cusu' bi'.

ROMANOS 13:7

Tya ma̱ ji'i̱ ngu' laca cña lcaa na nu ntsu'u chacuayá' ji'i̱ ngu' cha' jña ngu' ji'i̱ ma̱. Ná tyacui ma̱ cñi cña loo, ni ná tyacui ma̱ cñi ji'i̱ sca cña nu cua ngua'ni ngu'; tya ma̱ caya' bi' ji'i̱ ngu'. Lo'o jua'a̱ cua'ni tlyu ma̱ ji'i̱ ngu' bi', cua'ni chi̱ ma̱ loo ngu', tucuá ma̱ cña ji'i̱ ngu' bi'.

LOS HECHOS 15:4

Ndyalaa Pablo lo'o Bernabé lo'o tya'a ndya'a̱ ngu' ca quichi̱ Jerusalén li'. Tso'o nchcui' ñati̱ ji'i̱ Jesucristo bi' lo'o ngu' li'; jua'a̱ ndi'i̱ ngu' nu ngua tsa'a̱ ji'i̱ Jesús tya clyo, ndi'i̱ ngu' nu laca loo ji'i̱ taju ñati̱ quichi̱ bi'. Lo'o li' nguxana Pablo lo'o Bernabé ndacha' ngu' ji'i̱ ngu' bi' ñi'ya̱ nu ngua'ni ycui' Ndyosi lo'o ñati̱ xa' tsu' ca su ndyaa ngu'.

LOS HECHOS 14:23

Lo'o jua'a̱ ngusubi Pablo lo'o Bernabé ji'i̱ ñati̱ cha' caca ngu' loo ji'i̱ scaa taju ñati̱ ji'i̱ Jesucristo nu ndi'i̱ scaa quichi̱ tyi ngu'; ngua'ni Pablo lo'o Bernabé cña bi' lcaa quichi̱ su ndyaa ngu'. Tyu̱u̱ hora ná ndyacu ngu' tyaja tsa̱ nu lo'o nchcui' ngu' lo'o ycui' Ndyosi cha' subi ngu' ji'i̱ ñati̱ nu caca loo ji'i̱ taju tya'a ngu'. Ndijña ngu' ji'i̱ ycui' nu Xu'na na cha' cua'a Ni ji'i̱ ngu' bi', cha' ná caca cuxi ji'i̱ ngu', cha' tso'o tsa ngusñi lcaa ñati̱ bi' cha' ji'i̱ ycui' Ni.

APOCALIPSIS 4:4

Nde chu̱' la ntucua xa' la yaca xlya; lo yaca bi' ntyucua calaa ntucua jacua tya'a ngu' cusu', tsa lo scuii ti ntucua ngu' tyi'i̱ ca chu̱' su ntucua Ni. Lacu' ngu' bi' late' ngati̱, jua'a̱ ntucua sne' oro hique scaa ngu'.

3 JUAN 1:1

La cui' nu cusu' Juan laca na'. Nscua na' quityi re cha' ca̱a̱ ca slo nu'u̱, Gayo; jlya ti' nu'u̱ lcaa cha' nu laca ji'i̱ Jesucristo, bi' cha' tso'o tsa ntsu'u tyiquee na' cha' chcui' na' lo'o nu'u̱.

2 JUAN 1:1

La cui' nu cusu' Juan laca na'. Nscua na' sca quityi re, ma' cusu', jua'a̱ sñi' nu'u̱, cha' ca̱a̱ quityi re ca slo cu'ma̱ ngu' tya'a ngusñi na cha' ji'i̱ Jesús, cha' cua ngusubi ycui' Ni ji'i̱ ma̱ cha' caca ma̱ ñati̱ ji'i̱ Ni. Chañi cha' ntsu'u tsa tyiquee na' ña'a̱ na' ji'i̱ ma̱; ni si'i sca ti na', lo'o lcua ti ña'a̱ ñati̱ lcaa quichi̱ nu nduna cha' liñi ji'i̱ Jesús, lo'o lcaa ñati̱ bi', ntsu'u tsa tyiquee ngu' ña'a̱ ngu' ji'i̱ ma̱.

SANTIAGO 5:14

Lo'o ntsiya sca ngu' tya'a ma̱ nu quicha, li' tso'o cuane ma̱ ji'i̱ ngu' cusu' tya'a ngusñi ma̱ cha' ji'i̱ ycui' Ni, cha' ca̱a̱ ngu' cua'ni ngu' jo'o ji'i̱ nu quicha bi'. Lo'o li' jña ngu' bi' cha' clyu ti' ji'i̱ ycui' Ndyosi, cha' cua'ni Ni cha' tyaca tso'o nu quicha bi'; cuati salú ngu' setye nu ntsu'u taná lo hichu̱' yu quicha bi' chacuayá' ji'i̱ ycui' nu Xu'na na.

SANTIAGO 3:17

Pana lcaa cha' nu nda ycui' Ndyosi cha' chcui' na lo'o ñati̱, xcui' cha' tso'o laca bi'; ná nguxa' cha' tso'o bi' lo'o cha' cuxi, ná ntsu'u cha' xu̱u̱ tya'a na lo'o tya'a ñati̱ na. Cha' tso'o ti laca nu nda Ni cha' chcui' na lo'o ñati̱, cha' xcui' na tso'o ti cua'ni na lo'o ñati̱ li'. Lo'o jua'a̱ ndu'ni cha' bi', cha' cua'ni tya'na ti' na ji'i̱ ñati̱, ña'a̱ cuayá' nu cua'ni na cha' tso'o cha' xtyucua na ji'i̱ ngu'; ndu'ni cha' sca ti cha' liñi chcui' na lo'o ñati̱, si'i cha' cuiñi chcui' na lo'o ngu'.

LOS HECHOS 20:17

Laja lo'o ndyanu ya ca Mileto bi', nda Pablo sca cha' ndyaa slo ngu' cusu' ji'i̱ taju ñati̱ ji'i̱ Jesucristo ca quichi̱ Efeso, si tya̱a̱ ngu' slo yu.

LOS HECHOS 15:6

Li' ndyu'u ti'i̱ lcaa ngu' nu ngua tsa'a̱ ji'i̱ Jesucristo tya clyo lo'o lcaa ngu' nu laca loo ji'i̱ taju ñati̱ bi'; nda ngu' cha' lo'o tya'a ngu', si tso'o cha' culacua̱ ngu' jua'a̱, si ná tso'o laca cha' culacua̱ ngu'.

1 TIMOTEO 5:2

Lo'o sca ma' cusu' ni, ta sca cui̱i̱ lo'o ma' ñi'ya̱ lo'o nchcui' na lo'o xtya'a̱ na; la cui' ti cha' lo'o nu ngu' cuna'a̱ cuañi' ni, ta sca cui̱i̱ lo'o ngu' ñi'ya̱ lo'o nclu'u na ji'i̱ sca nu cuna'a̱ tya'a na. Pana xcui' lubii ti cresiya jinu'u̱ ña'a̱ nu'u̱ ji'i̱ ngu' bi'.