1 TIMOTEO 1:12 - Chatino Tataltepec

¹² Ndya tsa na' xlya'be ji'i̱ Jesucristo nu Xu'na na cha' ngua'ni Ni cha' caca cua'ni na' cña ji'i̱ Ni; ndya na' xlya'be ji'i̱ Ni cha' ngusubi Ni jna' cha' cua'ni na' cña ji'i̱ Ni, cha' jlo ti' Ni cha' ndaquiya' na' ji'i̱ Ni.

1 TIMOTEO 1:12 Referans Kwoze

FILIPENSES 4:13

Cua nda ycui' Cristo juersa 'na cha' talo na' ji'i̱ cua ña'a̱ ca cha', na laca nu tyacua ti xi 'na.

2 TIMOTEO 4:17

Nguxtyucua ycui' nu Xu'na na jna' li', cua nda Ni juersa 'na cha' tya ngulu'u la na' cha' tso'o ji'i̱ Jesucristo ña'a̱ cuayá' ndyuna lcaa ñati̱ xa' tsu' nu ndi'i̱ ca nde. Cua ngua'a ycui' Ni 'na ji'i̱ cuichi tyaala bi'.

COLOSENSES 1:25

Ycui' Ndyosi laca nu cua nda cña bi' 'na, cha' caca na' cña ji'i̱ ca ta'a ñati̱ nu ngusñi cha' ji'i̱ Ni lcaa quichi̱, cha' nguula la caca tyiquee ma̱. Nga'a̱ cha' ña'a̱ ti tya ta la na' cha' ji'i̱ Cristo lo'o xa' ñati̱ ña'a̱ cuayá' nu tye cuna ngu' cha' bi'.

FILIPENSES 2:11

Cui̱i̱ tsa chcui' lcaa ñati̱ cha' Jesucristo laca Xu'na lcaa ca chalyuu, jua'a̱ tso'o tsa cua'ni tlyu ngu' ji'i̱ ycui' Ndyosi Sti na.

2 CORINTIOS 4:1

Bi' cha' ná nchca taja ti' ya ji'i̱ cña nu ndyu'ni ya. La cui' ycui' Ndyosi laca nu cua nda cña bi' ji'i̱ ya, xqui'ya cha' tya'na ti' Ni ña'a̱ Ni ji'i̱ ya.

1 CORINTIOS 7:25

Bilya ta ycui' nu Xu'na na cha' lo'o na' ñi'ya̱ cua'ni ñati̱ nu ntucua ycui' ti, si caja clyo'o ngu', si ná caja clyo'o ngu'; bi' cha' cuentya jna' ti, ta na' xi cha' lo'o ma̱. Taca xñi ma̱ cha' jna', xqui'ya cha' lo'o na' ngua'ni tya'na ti' Ni 'na; bi' cha' ndyu'ni na' cña ji'i̱ Ni.

LOS HECHOS 9:22

Lye la ngulu'u Saulo ji'i̱ ngu' cha' chañi cha' Cristo laca ycui' Jesús, la cui' nu cua nda ycui' Ndyosi ji'i̱ ya̱a̱ chalyuu. Nga'aa ngujui la ñi'ya̱ nu xacui̱ ngu' cha' ji'i̱ nu Saulo bi' li', lcaa tya'a ngu' judío nu ndi'i̱ quichi̱ Damasco bi'.

LOS HECHOS 9:15

Nguxacui̱ ycui' nu Xu'na na cha' ji'i̱ Ananías li': ―Ntsu'u cha' tsaa nu'u̱ ca slo nu Saulo bi' ―nacui̱ Ni ji'i̱―. Cua ngusubi na' ji'i̱ yu cha' cua'ni yu cña jna' ―nacui̱ Ni―. Tsaa yu bi' ca slo ngu' xa' loyuu, tsaa yu ca slo nu laca xu'na loyuu tyijyu', lo'o jua'a̱ tsaa yu ca slo tya'a ma̱, nu ngu' Israel bi'. Ta yu cha' jna' lo'o lcaa ñati̱ ca su tya'a̱ yu, bi' laca cña jna' nu cua'ni yu.

LOS HECHOS 16:15

Li' ntyucuatya ngu' ji'i̱ Lidia lo'o ji'i̱ lcaa tya'a ngu' nu ndi'i̱ slo. ―Si chañi cha' nclyacua ti' ma̱ cha' laca na' ñati̱ ji'i̱ Jesucristo ―nacui̱ nu cuna'a̱ bi' ji'i̱ ya―, tya̱a̱ ma̱ to' tyi na', tyanu ma̱ xi slo cua lacua. Tyu̱u̱ quiya' nchcui' ma' lo'o ya cha' tsaa ya, bi' cha' ndyaa ya lo'o ma' ca toni'i̱ ji'i̱ ma'.

1 TIMOTEO 1:11

La cui' cha' tso'o bi' nclu'u na' chacuayá' ji'i̱ ycui' Ndyosi juani, lo'o nclu'u na' cha' tlyu tsa laca ycui' Ndyosi, cha' tso'o tsa ntsu'u tyiquee Ni ña'a̱ Ni ji'na.

1 CORINTIOS 15:10

Pana tya'na ti' ycui' Ndyosi, bi' cha' tso'o ti ntsu'u tyiquee Ni ña'a̱ Ni jna'; jua'a̱ ngua'ni Ni cha' ndya'a̱ na' cña ji'i̱ Ni li'. Ni si'i na nguliji yu'u cha' bi' jua'a̱ ti lo'o ngua'ni Ni cha' tso'o lo'o na'; masi lo'o nu xa' la ngu' tya'a ya ndyu'ni ngu' la cui' cña nu ndyu'ni na', pana tlyu la cña ntsu'u jna' que ngu' bi'. Si'i na nchca tsa 'na, pana ycui' Ndyosi laca nu ndu'ni lo'o na' cha' caca chcui' na' lo'o ñati̱, cha' tso'o ti ntsu'u tyiquee Ni ña'a̱ Ni 'na.

SAN JUAN 5:23

Cua nti' Ni cha' cua'ni chi̱ lcaa ñati̱ loo na' ñi'ya̱ nu ndu'ni chi̱ ngu' loo ycui' Ni. Pana si ná tyaja'a̱ ñati̱ cua'ni chi̱ ngu' loo na' nu laca̱ Sñi' ycui' Ni, la cui' jua'a̱ ná taca cua'ni chi̱ ngu' loo ycui' Ndyosi nu nda 'na lijya̱a̱.

1 CORINTIOS 3:5

¿Tilaca laca nu Apolos bi' lacua? ¿Tilaca laca na' lacua? ¿Ha si'i cña ji'i̱ ycui' Ndyosi ndyu'ni ca ta'a ya? ¿Ha si'i xqui'ya cha' nda ya cha' lo'o ma̱, bi' cha' ngusñi ma̱ cha' ji'i̱ Cristo li'? Cua laca cña ndyu'ni scaa ya, la cui' cña ñi'ya̱ nu cua nda ycui' nu Xu'na na cha' cua'ni ya.

GÁLATAS 3:26

Sñi' ycui' Ndyosi laca lcaa cu'ma̱ juani lo'o ngusñi ma̱ cha' ji'i̱ Jesucristo, xqui'ya cha' cua ntsu'u cha' ji'i̱ ma̱ lo'o Ni.

GÁLATAS 3:28

Nu lo'o cua ngua stu'ba cha' ji'na lo'o Jesucristo, la cui' tyempo bi' ngua stu'ba cha' ji'na lo'o tya'a ñati̱ na; bi' cha' nga'aa chcui' na cha' ngu' judío laca ya, cha' ngu' xa' tsu' laca ma̱; nga'aa chcui' na cha' msu nu ngüi'ya ñati̱ laca ma̱, cha' ñati̱ nu ndi'i̱ tso'o ti laca na; nga'aa chcui' na cha' qui'yu laca na, cha' cuna'a̱ laca ma̱. Lcaa na, stu'ba cha' ji'na lo'o tya'a na juani.

1 TIMOTEO 1:1

Pablo laca na'. Sca ñati̱ nu ndya'a̱ nchcui' cha' ji'i̱ Jesucristo nde xa' quichi̱ laca na', cha' ycui' Ndyosi nu ndu'ni lyaá ji'i̱ ñati̱ ngulo cña jna' cha' cua'ni na' cña bi'; ngulo Jesucristo cña jna', la cui' nu Cristo nu ndu̱ ti' na ji'i̱ cha' tya̱a̱ Ni chaca quiya'.

1 TIMOTEO 1:2

Nscua na' quityi re cha' ca̱a̱ slo nu'u̱, Timoteo, cha' ñi'ya̱ si laca nu'u̱ sñi' na', jua'a̱ nti' na' ña'a̱ na' jinu'u̱, cha' ngusñi nu'u̱ cha' ji'i̱ Jesucristo tya lo'o ngulu'u na' cha' bi' jinu'u̱. Ndi'ya̱ nti' na', cha' ña'a̱ ti cua'ni ycui' Ndyosi Sti na cha' tso'o lo'o nu'u̱, cha' cua'ni tya'na ti' Ni jinu'u̱, cha' jua'a̱ cua'ni Ni cha' ti̱ ti tyi'i̱ cresiya jinu'u̱ xqui'ya Jesucristo nu Xu'na na.

1 TIMOTEO 6:13

Culo na' cña jinu'u̱ juani chacuayá' ji'i̱ ycui' Ndyosi nu ndu'ni cu'ú ji'i̱ lcaa na lu'ú nu ntsu'u chalyuu; la cui' jua'a̱ culo na' cña jinu'u̱ chacuayá' ji'i̱ Jesucristo nu tso'o tsa nguxacui̱ cha' ji'i̱ Poncio Pilato nu laca loo nu lo'o ngua cuayá' ji'i̱ Jesús. Ná ntsi̱i̱ yu nguxacui̱ yu cha' cuentya ji'i̱ cña nu ndyaca ji'i̱ yu cha' nu sca ti Sñi' ycui' Ndyosi laca yu.

2 TIMOTEO 2:2

Cua ndyuna nu'u̱ lcaa cha' nu ngulu'u na' ji'i̱ tyu̱u̱ tya'a ñati̱; nu juani la cui' ñi'ya̱ nu ngulu'u na', jua'a̱ culu'u nu'u̱ ji'i̱ ñati̱ nu tyucui tyiquee nti' ngu' culu'u ngu' cha' bi' ji'i̱ xi xa' la ñati̱, cha' ca tsa'a̱ tso'o nu xa' la ngu' bi' cha' ji'i̱ ycui' Ndyosi.

TITO 1:4

Nscua na' quityi re cha' ca̱a̱ slo nu'u̱, Tito, cha' ñi'ya̱ si laca nu'u̱ sñi' na', jua'a̱ nti' na' ña'a̱ na' jinu'u̱, cha' stu'ba ti ngusñi na cha' ji'i̱ ycui' Ndyosi. Ndi'ya̱ nti' na' cha' ña'a̱ ti cua'ni ycui' Ndyosi Sti na cha' tso'o lo'o nu'u̱, jua'a̱ Jesucristo nu ngua'ni lyaá ji'na; cua'ni Ni cha' ti̱ ti tyi'i̱ tyiquee nu'u̱ li'.

SAN MATEO 20:4

Li' nchcui' yu lo'o ngu' bi': “Yaa clya ma̱, cua'ni ma̱ cña ne' lo'o 'na. Stu'ba cua'ni ma̱ cña lo'o msu 'na, cha' cua ntsu'u ngu' ndyu'ni ngu' cña 'na juani. Ta na' caya' tso'o ji'i̱ ma̱ li'”, nacui̱ yu. Hora ti ndyaa ngu' ne' xña ji'i̱ xu'na msu bi' li'.