1 PEDRO 4:8 - Chatino Tataltepec

⁸ Nu cha' nu ndulo tsa cha' cua'ni ma̱ ni, bi' laca cha' xcui' tso'o caca tyiquee ma̱ ña'a̱ ma̱ ji'i̱ tya'a ñati̱ ma̱. Lo'o si jua'a̱ nti' na ña'a̱ na ji'i̱ tya'a na, ndyu'ni clyu ti' na ji'i̱ qui'ya nu ntsu'u ji'i̱ tya'a na li'.

1 PEDRO 4:8 Referans Kwoze

COLOSENSES 3:14

La cui' jua'a̱ tso'o tsa caca tyiquee ma̱ ña'a̱ ma̱ ji'i̱ xa' la tya'a ñati̱ ma̱, cha' jua'a̱ stu'ba tsa caca cha' ji'i̱ ma̱ lo'o ngu' li'.

1 PEDRO 1:22

Xqui'ya cha' nxtyucua Xtyi'i ycui' Ndyosi ji'i̱ ma̱, na cua ndaquiya' ma̱ ji'i̱ cha' liñi nu nda ycui' Ndyosi lo'o na, bi' cha' ngua lubii cresiya ji'i̱ ma̱; juani taca caca tso'o tyiquee ma̱ ña'a̱ ma̱ ji'i̱ tya'a ñati̱ ma̱. Pana tyucui tyiquee ma̱ ntsu'u cha' caca tso'o tyiquee ma̱ ña'a̱ ma̱ ji'i̱ tya'a ñati̱ ma̱, si'i ñi'ya̱ ndu'ni ngu' nu ntsu'u tucua cha' tyiquee ngu' cua'ni cu'ma̱.

SANTIAGO 5:20

Si ntsu'u cu'ma̱ nu caca ji'i̱ ma̱ cua'a ma̱ ji'i̱ tya'a ñati̱ ma̱ cha' ná cua'ni ngu' cha' cuxi, cha' culu'u ma̱ cha' ji'i̱ ycui' Ndyosi ji'i̱ ngu' bi' chaca quiya', tso'o tsa cña cua'ni ma̱ li'; taca cua'ni lyaá ma̱ ji'i̱ ngu' bi' li', cha' ná chcuna' chalyuu ji'i̱ ngu'. Lo'o jua'a̱ caja ñi'ya̱ nu cui'ya ycui' Ndyosi cha' clyu ti' ji'i̱ ngu' ji'i̱ lcaa qui'ya nu ntsu'u ji'i̱ ngu' bi'.

1 CORINTIOS 13:1

Ná ndu'ni cha' masi nchca tsa chcui' na lcaa lo cha'cña ji'i̱ ñati̱ chalyuu, masi cha'cña ji'i̱ xca̱ nu ntucua ca slo ycui' Ndyosi nde cua̱ chcui' na; si ná ntsu'u tyiquee na ña'a̱ na ji'i̱ xa' la ñati̱, ná sca cha' tso'o ntsu'u tyiquee na li'. Laca na ñi'ya̱ nti' sca sniquiji̱ nu ntyiji'i̱ na ji'i̱ jua'a̱ ti, jua'a̱ laca na ñi'ya̱ laca sca cui'chcua̱ nu lye tsa nclyatu'u na ji'i̱; ná ntsu'u cha' taquiya' ngu' ji'na li'.

1 TESALONICENSES 3:12

Lo'o jua'a̱ ndijña ya ji'i̱ nu Xu'na na cha' cua'ni Ni cha' tso'o la tyu'u tyiquee ma̱ ña'a̱ ma̱ ji'i̱ tya'a ma̱, lo'o jua'a̱ ji'i̱ lcaa ñati̱, cha' ntsu'u tsa tyiquee ya ña'a̱ ya ji'i̱ cu'ma̱ xqui'ya ycui' Ndyosi;

HEBREOS 13:1

Ña'a̱ ti tyu'u tso'o tyiquee ma̱ ña'a̱ ma̱ ji'i̱ ngu' tya'a ngusñi ma̱ cha' ji'i̱ Cristo, cua'ni ma̱ cha' tso'o lo'o ngu' bi'.

1 TIMOTEO 1:5

Culo nu'u̱ cña ji'i̱ ngu' cha' tso'o tsa tyu'u tyiquee ngu' ña'a̱ ngu' ji'i̱ tya'a ngu', cha' bi' laca cña nu ndu'ni ñati̱ nu ngua lubii cresiya ji'i̱ cuentya ji'i̱ ycui' Ndyosi; jlo ti' ñati̱ bi' ñi'ya̱ laca cña tso'o, lo'o jua'a̱ ndyu'ni ngu' bi' cña tso'o bi' li'. Chañi cha' ngusñi ngu' bi' cha' ji'i̱ ycui' Ndyosi si ntsu'u tyiquee ngu' ña'a̱ ngu' ji'i̱ tya'a ngu'.

2 TESALONICENSES 1:3

Cu'ma̱ tya'a ngusñi na cha' ji'i̱ Jesús, ntsu'u cha' tya ya xlya'be ji'i̱ ycui' Ndyosi lcaa quiya' lo'o chcui' ya lo'o Ni cuentya ji'i̱ cu'ma̱; ndu'ni tsa cha' cua'ni ya jua'a̱, xqui'ya cha' lcaa tsa̱ tachaa la ndyanu cha' ji'i̱ Jesús ne' cresiya ji'i̱ ma̱, lcaa tsa̱ ntsu'u la tyiquee ma̱ ña'a̱ ma̱ ji'i̱ tya'a ñati̱ ma̱.

3 JUAN 1:2

Tso'o tsa ñati̱ laca nu'u̱, cusu'. Nchcui' na' lo'o ycui' Ndyosi cuentya jinu'u̱ cha' tso'o ti taca tyi'i̱ tyiquee nu'u̱, cha' taca ca lye ti' nu'u̱. Cua jlo ti' na' cha' tso'o tsa ngusñi nu'u̱ cha' ji'i̱ ycui' Ndyosi.

SANTIAGO 5:12

Nde laca sca cña nu ná nga'a̱ cha' cua'ni na tsiya' ti, cu'ma̱ tya'a ngusñi na cha' ji'i̱ ycui' Ndyosi: Ná cua'ni ma̱ jura laja ti lo'o xtañi ycui' Ni lo'o cua quiñi ti sca cha' ji'i̱ ma̱ lo'o xa' ñati̱; ná ñacui̱ ma̱: “Chacuayá' ji'i̱ ycui' Ndyosi nu ntucua nde cua̱”, ni ná ñacui̱ ma̱: “Chacuayá' ji'i̱ ndyosi nde lo yuu”. Ná culotu̱ ma̱ ni sca xtañi Ni tsiya' ti, cha' caja ñi'ya̱ nu tyanu tachaa cha' ji'i̱ ma̱ lo'o ñati̱. Tsa bi' ti cha' ñacui̱ ma̱ ji'i̱ ñati̱: “Cua'ni na'”, ñacui̱ ma̱, si taca cua'ni ma̱ ji'i̱; lo'o jua'a̱ “Ná cua'ni na'”, ñacui̱ ma̱, si ná nchca cua'ni ma̱ ji'i̱. Ná caja ñi'ya̱ sta Ni qui'ya ji'i̱ ma̱ li'.

1 CORINTIOS 13:4

Si chañi cha' ntsu'u tyiquee na ña'a̱ na ji'i̱ ñati̱, talo tyiquee na ji'i̱ ngu' li', cua'ni tya'na ti' na ji'i̱ ngu' li'; si'i na tyiji̱ ti' na cha' ji'i̱ ngu' li', si'i na chcui' tyucuaa ti' na lo'o ngu', ni si'i na cua'ni tyixi na lo'o ngu' li'.