1 PEDRO 3:9 - Chatino Tataltepec

⁹ Ná cua'ni cuxi ma̱ lo'o tya'a ñati̱ ma̱, masi ngua'ni cuxi ngu' lo'o ma̱; lo'o jua'a̱ ná chcui' tyaala ma̱ lo'o tya'a̱ ñati̱ ma̱, masi tyaala tsa nchcui' ngu' lo'o ma̱. Na cua ngusubi ycui' Ni ji'i̱ ma̱ cha' xtyucua Ni ji'i̱ cu'ma̱, bi' cha' tso'o la si chcui' ma̱ lo'o ycui' Ndyosi cha' xtyucua Ni ji'i̱ ngu' tyaala bi'.

1 PEDRO 3:9 Referans Kwoze

ROMANOS 12:17

Nu lo'o cuxi ti cua'ni ngu' lo'o ma̱, ná tya ma̱ cha' cuxi ji'i̱ ngu' chaca quiya'; clyana ma̱ sca cña tso'o nu caca cua'ni ma̱ cuentya ji'i̱ ngu', cha' jua'a̱ ña'a̱ tsa ñati̱ ji'na.

ROMANOS 12:14

Chcui' ma̱ lo'o ycui' Ndyosi cuentya ji'i̱ ñati̱ nu ndyu'ni lya' ti' ji'i̱ ma̱; pana ná jña ma̱ cha' tyanu yabe' ji'i̱ ngu' bi', masi xcui' cha' tso'o ti jña ma̱ cuentya ji'i̱ ngu' bi'.

1 TESALONICENSES 5:15

Si cua'ni xña'a̱ ñati̱ lo'o ma̱, ná chcui' ma̱ cha' ti'í ji'i̱ ngu' bi' li'; xtyucua ma̱ ji'i̱ ngu' tya'a ma̱ cha' talo ma̱ ji'i̱ ngu' xña'a̱, cha' xcui' tso'o ti cua'ni ma̱ lo'o lcaa ñati̱, masi lo'o tya'a ma̱, masi lo'o xa' ñati̱.

SAN MATEO 5:44

Pana, quiña'a̱ la cha' chcui' na' lo'o ma̱ juani, cha' tso'o ti tyu'u tyiquee ma̱ ña'a̱ ma̱ ji'i̱ tya'a cusu̱u̱ ma̱, lo'o jua'a̱ tso'o ti chcui' ma̱ ji'i̱ ngu' nu nchcui' cuentyu ji'i̱ ma̱, tso'o ti cua'ni ma̱ lo'o ngu' nu ti'í ti' ji'i̱ ma̱; chcui' ma̱ lo'o ycui' Ndyosi cuentya ji'i̱ ngu', masi ndyu'ni lya' ti' ngu' ji'i̱ ma̱, masi nxtyí lo'o ngu' ji'i̱ ma̱.

EFESIOS 4:32

Xa' ña'a̱ cua'ni ma̱ juani. Xcui' tso'o ti cua'ni ma̱ lo'o tya'a ñati̱ ma̱, tyu'u tsa cha' clyu ti' ji'i̱ ma̱ lo'o tya'a ma̱; cua'ni clyu ti' ma̱ ji'i̱ qui'ya nu ntsu'u ji'i̱ ngu', cha' jua'a̱ cua ngua'ni clyu ti' ycui' Ndyosi ji'na xqui'ya Cristo.

SAN MATEO 5:39

Pana, quiña'a̱ la cha' chcui' na' lo'o ma̱ juani, cha' nga'aa xu̱u̱ tya'a ma̱ lo'o ñati̱ nu ngua'ni cha' cuxi lo'o ma̱. Lo'o quiji'i̱ ya' ngu' loo ma̱ la'a tsu' cui̱, li' ta ma̱ chacuayá' quiji'i̱ ngu' chaca tsu' loo ma̱, si nti' ngu'.

1 PEDRO 5:10

Pana xti ti tsa̱ tyacua cha' ti'í ji'i̱ ma̱. Lo'o tye tsa̱ nu nchcube' ma̱, li' cua'ni ycui' Ndyosi cha' caca tso'o ma̱, cua'ni Ni cha' caca nguula ti' tyiquee ma̱ chaca quiya'; ta Ni juersa ji'i̱ ma̱, cha' xcui' tso'o tsa ndu'ni ycui' Ni lo'o na. Xqui'ya Cristo cua ngusubi Ni ji'na cha' taca tyi'i̱ na ca su tlyu su ntucua ycui' Ni.

ROMANOS 8:28

Jlo ti' na cha' cua nda ycui' Ndyosi chacuayá' ñi'ya̱ caca lcaa cha' nu ndyaca chalyuu, cha' caca tso'o chalyuu su ndi'i̱ na si ntsu'u tyiquee na ña'a̱ na ji'i̱ Ni. Na cua ngusubi Ni ji'na juani, cha' caca na ñi'ya̱ nu ngua ti' Ni tya clyo cha' caca na.

SAN MATEO 25:34

Ca li' lo'o caca na' loo tsiya' ti, chcui' na' lo'o taju ñati̱ nu ndi'i̱ la'a tsu' cui̱ 'na: “Tya̱a̱ ma̱ ca su ntucua ycui' Ni nu laca loo, lcaa cu'ma̱ nu tso'o tsa nti' ycui' Ndyosi Sti na' ña'a̱ Ni ji'i̱ ma̱, cha' cua ngua'ni cho'o ycui' Ni su tyi'i̱ ma̱ slo Ni, tya lo'o ngüiñá Ni chalyuu.

HEBREOS 6:14

Xa' nchcui' Ni lo'o jyo'o bi' li': “Chañi cha' nu chcui' na' lo'o nu'u̱, cha' tso'o tsa cua'ni na' lo'o nu'u̱, cha' quiña'a̱ tsa ñati̱ jinu'u̱ tyatu̱ nde lo yuu tyempo ca nde loo la”. Jua'a̱ nacui̱ Ni nu ngua li'.

SAN LUCAS 18:18

Ndacua ndu̱ sca ñati̱ tlyu nu laca loo ji'i̱ ngu' judío. Li' nchcuane yu bi' ji'i̱ Jesús: ―Mstru, tso'o tsa ndu'ni nu'u̱ ―nacui̱―. ¿Ñi'ya̱ cua'ni na' cha' caja chalyuu nu ná nga'a̱ cha' tye 'na? ―nacui̱ nu qui'yu bi'.

SAN LUCAS 10:25

Li' ndatu̱ sca mstru cha' jo'ó cha' chcui' cuayá' yu lo'o Jesús. Lo'o li' nchcuane yu ji'i̱ Jesús: ―Mstru ―nacui̱―, ¿ñi'ya̱ cua'ni na' cha' caja chalyuu nu ná nga'a̱ cha' tye tsiya' ti jna'?

SAN MATEO 19:29

Lo'o jua'a̱ cua ña'a̱ ca ñati̱ nu ntsu'u cha' tsaa tyijyu' cha' cua'ni ngu' cña cuentya jna', nu nguxtyanu lcaa na nu ntsu'u ji'i̱ ngu' cha' ndyu'ni ngu' cña bi', ná xtyanu na' ji'i̱ ngu' bi' jua'a̱ ti; masi tyi ngu', masi tya'a ngula ngu', masi sti ngu', masi xtya'a̱ ngu', masi sñi' ngu', masi yuu nu ntsu'u ji'i̱ ngu', masi xtyanu ngu' lcaa cha' bi', pana caja chalyuu nu ná nga'a̱ cha' tye ji'i̱ ngu'. Lo'o jua'a̱ xa' caja quiña'a̱ la cha' ji'i̱ ngu' bi', tsa ña'a̱ nu nguna' ji'i̱ ngu' bi' ngua ti' ngu'.

ROMANOS 8:30

Jua'a̱ ngua ti' Ni tya clyo la cha' caca na, bi' cha' ngusubi Ni ji'na. Nu lo'o cua ngusubi Ni ji'na, li' ngua'ni Ni cha' caca tso'o cresiya ji'na cuentya ji'i̱ Ni; nu lo'o ndye caca tso'o cresiya ji'na, li' ta Ni su tyi'i̱ na ca su tlyu ca su ntucua ycui' Ni.

SAN MARCOS 10:17

Tya ndyaa la Jesús tyucui̱i̱ bi', lo'o li' nxna sca nu qui'yu lijya̱ lca'a̱ ji'i̱ Jesús. Ndyatu̱ sti̱' slo Jesús li'. ―Mstru, tso'o tsa ndu'ni nu'u̱ ―nacui̱ ji'i̱ Jesús―. Cacha' nu'u̱ jna', ¿na laca cua'ni na' cha' caja chalyuu nu ná nga'a̱ cha' tye 'na? ―nacui̱ yu.

GÁLATAS 3:14

Jua'a̱ ngua cha' lo'o ngu' xa' tsu' caja cha' tso'o ji'i̱ ngu' xqui'ya Jesucristo, cha' tso'o nu cua ngüiñi ji'i̱ ycui' Ndyosi lo'o nu jyo'o Abraham bi' nu ngua sa'ni. Li' caca ji'i̱ ngu' xa' tsu' ñi'ya̱ nu nchcui' ycui' Ndyosi lo'o Abraham, cha' caja Xtyi'i ycui' Ni ji'i̱ lcaa na nu lo'o xñi na cha' ji'i̱ Cristo.

HEBREOS 12:17

Cua jlo ti' ma̱ ñi'ya̱ ngua ca tiya' la: nu lo'o ngua ti' yu cha' culacua̱ sti yu ji'i̱ yu, li' nga'aa ndaquiya' sti yu ji'i̱ cha' nu nda yu lo'o; nga'aa ngujui ñi'ya̱ nu tya'a̱chu̱' yu ji'i̱ cha' nu cua ngua'ni yu, masi ngusi'ya tsa yu lo'o ngüijña yu cha' bi' ji'i̱ sti yu.