Pana cu'ma̱ ni, cua ngusubi ycui' Ndyosi ji'i̱ cu'ma̱ cha' caca ma̱ ña'a̱ tsaca taju ñati̱ nu ndyu'ni tlyu ji'i̱ ycui' Ni. Laca ma̱ ñi'ya̱ laca sca latya sti jo'ó nu cuentya ji'i̱ ycui' Ndyosi nu laca loo tsiya' ti; ñi'ya̱ tsaca taju ñati̱ lubii laca ma̱ cha' cua'ni tlyu ma̱ ji'i̱ ycui' Ndyosi lcaa tsa̱. Ndu'ni Ni lo'o ma̱: “Ñati̱ 'na laca ma̱”, nacui̱ Ni. Bi' cha' nti' tsa Ni cha' chcui' ma̱ lo'o lcaa ñati̱ lcaa ña'a̱ cha' tso'o nu ngua'ni ycui' Ndyosi lo'o ma̱; cua ngulo Ni ji'i̱ ma̱ ji'i̱ chalyuu cuxi su talya tsa ña'a̱, cha' tya'a̱ ma̱ ca su ndubi tsa xee ji'i̱ ycui' Ni.
1 PEDRO 2:5 - Chatino Tataltepec5 cha' lo'o cu'ma̱ caca ma̱ ñi'ya̱ si laca ma̱ tyuu cha' tya' sca ni'i̱ ji'i̱ ycui' Ndyosi, masi ña'a̱ lu'ú ti ma̱. Li' xñi ycui' Ni tyuu bi', cha' cuiñá Ni sca ni'i̱ nu tacati tsa cuentya ji'i̱ ycui' Ni. Chaca cha' ni, ñi'ya̱ nti' sti jo'ó nu lubii cresiya ji'i̱ tsiya' ti, jua'a̱ caca lcaa cu'ma̱, cha' taca ji'i̱ ma̱ sta ma̱ msta̱ slo ycui' Ndyosi juani xqui'ya Jesucristo; nu msta̱ bi' laca ycui' ca ma̱, si chañi cha' tyucui tyiquee ma̱ nti' ma̱ taquiya' ma̱ ji'i̱ cha' nu nchcui' ycui' Ndyosi. Gade chapit la |
1 PEDRO 2:5
34 Referans Kwoze
Nu laa tlyu su ndu'ni tlyu ngu' judío ji'i̱ ycui' Ndyosi tyaca'a tsa ji'i̱ Ni laca bi', cha' cuentya ji'i̱ Ni ndya' ni'i̱ bi'; tyaala tsa ycui' Ni si cua'ni ñu'u̱ ñati̱ ji'i̱ laa bi'. Lo'o cu'ma̱ ni, tyucui ña'a̱ taju cu'ma̱ nu ngusñi ma̱ cha' ji'i̱ Cristo, tyaca'a tsa ma̱ cuentya ji'i̱ ycui' Ndyosi; na cua ndyanu Xtyi'i ycui' Ndyosi ne' cresiya ji'i̱ ma̱. Lo'o jua'a̱ cua'ni tye ycui' Ni ji'i̱ cua ña'a̱ ca ñati̱ nu cua'ni ñu'u̱ tyucui̱i̱ ji'i̱ sca ñati̱ nu tya'a ngusñi na cha' ji'i̱ Jesús.
Pana nu Cristo bi' ni, tso'o la cña ndu'ni yu, xqui'ya cha' laca yu Sñi' ycui' Ndyosi, lo'o jua'a̱ laca yu loo ji'i̱ lcaa ñati̱ nu ntsu'u cuentya ji'i̱ Ni. La cui' ñati̱ ji'i̱ ycui' Ni laca na, si ña'a̱ ti ná ntsi̱i̱ na ña'a̱ cuayá' tye chalyuu ji'na, si ña'a̱ ti tya tso'o ntsu'u tyiquee na laja lo'o ndu̱ ti' na ji'i̱ Cristo cha' cua'ni lyaá lyiji yu ji'na.
Tso'o tsa caca tyiquee ñati̱ nu yala la tyu'ú chaca quiya', cha' ñati̱ ji'i̱ ycui' Ndyosi laca ngu' bi'; ná ntsu'u cha' chcube' ngu' bi' tsiya' ti lo'o tyaa lcaa ñati̱ cuxi nde chalyuu talya, nu lo'o cua ndye lcaa cha'. Cua'ni ngu' bi' cña ji'i̱ ycui' Ndyosi; la cui' jua'a̱ cua'ni ngu' cña ji'i̱ Cristo, cha' stu'ba ti caca ngu' loo lo'o Cristo ña'a̱ cuayá' tyu'u scua sca mil yija̱.
¿Ha ná nda ma̱ cuentya cha' tyaca'a tsa ma̱ ji'i̱ ycui' Ndyosi, xqui'ya cha' nda Ni Xtyi'i ycui' Ni nu ndyanu ne' cresiya ji'i̱ ma̱? Nga'aa si'i cuentya ji'i̱ ycui' ti ma̱ ndya'a̱ ma̱, cuentya ji'i̱ ycui' Ndyosi laca ma̱. Quiña'a̱ tsa cha' tso'o ngua'ni Ni cuentya ji'na cha' ngulaá ma̱ ji'i̱ nu cuxi, cha' laca ma̱ ñati̱ ji'i̱ ycui' Ni; bi' cha' cua'ni tlyu ma̱ ji'i̱ ycui' Ndyosi lcaa su ndya'a̱ ma̱, tyi'u ti' ma̱ ji'i̱ Ni, lo'o jua'a̱ tyucui tyiquee ma̱ cua'ni ma̱ lcaa cña nu culo ycui' Ni ji'i̱ ma̱.
Cu'ma̱ ngu' tya'a ntsu'u cha' ji'na lo'o Cristo, xqui'ya cha' lye tsa ndu'ni tya'na ti' Ni ji'na, bi' cha' nchcui' na' lo'o ma̱ juani. Ta ma̱ tyucui ña'a̱ ma̱ ji'i̱ ycui' Ndyosi, cha' cua'ni ma̱ cua ña'a̱ ca cña nu nti' Ni cha' cua'ni ma̱ nde chalyuu; ta ma̱ tyucui ña'a̱ ma̱ ji'i̱ Ni cha' xcui' na tyi'i̱ ma̱ chalyuu cuentya ji'i̱ ycui' Ni, cha' laca ma̱ ñi'ya̱ nti' sca msta̱ lu'ú ti. La cui' jua'a̱ nti' ycui' Ndyosi, cha' laca ma̱ ñati̱ ji'i̱ Ni. Na cua laca ntsu'u cha' cua'ni ma̱ jua'a̱.
Cua ngua'ni Jesús cha' laca na sca lo ñati̱ nu ndulo tsa cuentya ji'i̱ ycui' Ndyosi, nu ndyu'ni cña nu nti' ycui' Ndyosi Sti Jesús cha' cua'ni na. Cua nti' na cha' lcaa yija̱ nu lijya̱ nde loo la ná tye cha' cua'ni tlyu na ji'i̱ ycui' Ndyosi, cha' nchca ji'i̱ Ni cua'ni Ni lcaa lo cña tsiya' ti. Jua'a̱ caca cha' lacua.
Ndi'ya̱ xacui̱ na' cha' ji'i̱ ma̱ juani: Cua quiña'a̱ tsa na nda ma̱ 'na, bi' cha' cua nti' tsa na' tya na' tsa xlya'be ji'i̱ ma̱; nga'aa ntsu'u chaca na nu lyiji 'na tsiya' ti juani, tya lo'o ya̱a̱ yu Epafrodito, ya̱lo'o yu lcaa cha' tso'o nu cua nda ma̱ 'na. Ñi'ya̱ laca sca msta̱ nu ndiya tsa ti' ycui' Ndyosi ji'i̱, cha' tyixi tsa xtyi'i nda bi' nu ndacui lcua ti se'i̱, jua'a̱ laca cha' tso'o nu nda ma̱ 'na cuentya ji'i̱ ycui' Ndyosi.
Ñi'ya̱ nti' cu'ma̱ nu tyaca'a tsa ma̱ ji'i̱ ycui' Ndyosi ni, ná taca cua'ni tya'a ma̱ lo'o xa' ñati̱ nu ngusñi cha' ji'i̱ cua ña'a̱ ca jo'ó; tyaca'a tsa na ji'i̱ ycui' Ndyosi nu lu'ú ca xqui'ya cha' ndyanu Xtyi'i ycui' Ndyosi ne' cresiya ji'na. Ndi'ya̱ nacui̱ ycui' Ndyosi: Tyi'i̱ na' ca slo ñati̱ bi', lo'o jua'a̱ tya'a̱ na' lo'o ñati̱ bi'; caca na' ycui' Ndyosi cuentya ji'i̱ ngu' bi', bi' cha' taca caca ngu' bi' ñati̱ 'na. Jua'a̱ nacui̱ Ni.
Cua ña'a̱ ca ñati̱ nu tyiji̱loo ji'i̱ nu xña'a̱ ni, tlyu tsa caca ñati̱ bi' laja ñati̱ 'na lo'o cua ndyee chalyuu; tso'o tsa tyi'i̱ ngu' bi' ca su ndi'i̱ na'. Scua na' xtañi ycui' Ndyosi Sti na' loo ngu' bi', lo'o jua'a̱ scua na' ni naa quichi̱ tlyu nu ca ji'i̱ ycui' Ni; Jerusalén cucui naa quichi̱ bi'. Tyu'u bi' nde su ntucua ycui' Ndyosi, ca̱a̱ ca'ya bi' lo yuu. Jua'a̱ scua na' xtañi ycui' na' loo ngu' bi', cha' laca ngu' ñati̱ 'na.
Cua ngusubi ycui' Ndyosi 'na cha' cua'ni na' cña ji'i̱ Jesucristo; cña bi' laca cha' tsa'a na' ta na' cha' tso'o ji'i̱ ycui' Ndyosi lo'o ngu' xa' tsu', lcaa su ndi'i̱ ngu'. Jua'a̱ ndyu'ni na', cha' tyucui tyiquee ngu' caca ngu' bi' ñati̱ ji'i̱ ycui' Ndyosi xqui'ya cña nu cua'ni Xtyi'i ycui' Ndyosi ne' cresiya ji'i̱ ngu'. Li' tyaja'a̱ Ni quiñi cha' ji'i̱ Ni lo'o ngu' bi' xqui'ya na'.
Jlo ti' na' cha' si'i cha' xca ti laca nu ngua'ni ma̱ lo'o ngusñi ma̱ cha' ji'i̱ ycui' Ndyosi; quiña'a̱ tsa na nguxtyanu ma̱, tyu̱u̱ quiya' cua nda ma̱ tyucui ña'a̱ ma̱ cha' caca ma̱ cña ji'i̱ Cristo, xqui'ya cha' cua ngusñi ma̱ cha' ji'i̱ Ni. Lo'o juani lo'o na' ni, cujuii ngu' 'na, nti' na'; chcuna' chalyuu 'na jua'a̱ ti cuentya ji'i̱ cu'ma̱. Pana ná ntsi̱i̱ na'; masi jua'a̱ caca 'na, chaa tsa ti' na' ndi'i̱i̱. Lo'o jua'a̱ nti' na' cha' ca chaa ti' cu'ma̱, cha' stu'ba ti ca chaa ti' na' lo'o cu'ma̱.
Culu'u ma̱ cha' ji'i̱ ñati̱, si bi' laca cña nu cua nda Ni ji'i̱ ma̱ cha' cua'ni ma̱; culu'u ma̱ tsa ña'a̱ cha' nu nti' ycui' Ndyosi chcui' Ni lo'o ngu'. Lo'o jua'a̱ xtyucua ma̱ ji'i̱ tya'a ñati̱ ma̱ lo'o tyucui juersa nu nda ycui' Ndyosi ji'i̱ ma̱, si bi' laca cña nu cua nda Ni ji'i̱ ma̱ cha' cua'ni ma̱. Nu lo'o ña'a̱ ngu' cña tso'o nu ndyu'ni ma̱ bi', li' cua'ni tlyu ngu' ji'i̱ ycui' Ndyosi xqui'ya Jesucristo. Lo'o li' ná nga'a̱ cha' tye cha' cua'ni tlyu ngu' ji'i̱ Cristo bi', cha' laca Cristo loo tsiya' ti. Jua'a̱ caca cha' tu'ni.
Cua ndyalaa hora cha' xana cua'ni cuayá' Ni ji'i̱ lcaa ñati̱, pana clyo nguxana Ni lo'o ñati̱ nu ji'i̱ ycui' Ni; bi' cha' laca si ntsu'u xi cha' ti'í ji'na juani lo'o nguxana ca ti Ni ndyu'ni cuayá' Ni ji'i̱ ñati̱, caca cuayá' ti' na cha' tlyu la cha' caca lo'o chcube' ngu' cuxi nde loo la. Li' chcube' ñati̱ nu ná ntaja'a̱ taquiya' ji'i̱ cha' tso'o nu ji'i̱ ycui' Ndyosi.
Piblisite