1 PEDRO 1:21 - Chatino Tataltepec

²¹ Xqui'ya Cristo, bi' cha' jlya ti' ma̱ ji'i̱ ycui' Ndyosi, cha' cua ngua'ni ycui' Ni cha' ndyu'ú Cristo chaca quiya' lo'o cua ngujuii yu. Lo'o li' nda ycui' Ndyosi sca su tso'o su tyi'i̱ Cristo, ca su tlyu su ntucua ycui' Ni. Ngua'ni Cristo cña tonu bi', cha' taca xñi ma̱ cha' ji'i̱ ycui' Ndyosi, lo'o li' taca tyu̱ ti' ma̱ cha' caca lcaa ña'a̱ cha' nu nacui̱ Ni cha' caca.

1 PEDRO 1:21 Referans Kwoze

LOS HECHOS 2:24

Pana ná nscua cha' tyanu Jesús ne' cuaá ña'a̱ jyo'o ti yu, bi' cha' ngua'ni ycui' Ndyosi Sti yu cha' ndyu'ú yu chaca quiya'.

HEBREOS 2:9

Pana cua jlo ti' na ñi'ya̱ ngua ji'i̱ Jesús nu ngua li', cha' xti ti tyempo ngua lcaa xca̱ ji'i̱ ycui' Ndyosi loo la ji'i̱ ycui' Jesús. Ngujuii yu lo crusi cuentya ji'i̱ lcaa ñati̱ chalyuu, xqui'ya cha' xcui' tso'o tsa ndu'ni ycui' Ndyosi lo'o na. Lo'o jua'a̱ ndube tsa ti' na ñi'ya̱ ndyaca ji'i̱ yu juani, cha' tso'o tsa ndyu'ni chi̱ ngu' loo yu; ndyu'ni tlyu ngu' ji'i̱ yu xqui'ya cha' cua ngujuii yu, xqui'ya cha' ti'í tsa ngua ti' yu cuentya ji'na.

SAN JUAN 12:44

Li' cui̱i̱ tsa nchcui' Jesús lo'o ngu': ―Nu lo'o ngusñi ñati̱ cha' jna' ni, si'i ji'i̱ sca ti na' jlya ti' ngu' bi' li'; lo'o ji'i̱ ycui' Ndyosi nu nda 'na lijya̱a̱ nde chalyuu xñi ngu' cha' li' ―nacui̱―.

1 PEDRO 3:22

Na cua ndyaa Jesucristo nde cua̱, lo'o juani ndi'i̱ yu la'a tsu' cui̱ ca su ntucua ycui' Ndyosi. Nu Jesucristo bi' ni, laca yu loo ji'i̱ lcaa xca̱ ji'i̱ ycui' Ndyosi, ji'i̱ lcaa ngu' nu laca cña, ji'i̱ lcaa cui'i̱ tso'o nu nchca xi ji'i̱; laca yu loo tsiya' ti.

1 PEDRO 1:11

Xtyi'i ycui' Cristo ngulu'u lcaa cha' ji'i̱ ngu' bi', ñi'ya̱ nu caca ji'i̱ ycui' Cristo nde loo la, ñi'ya̱ nu chcube' yu nde loyuu chalyuu, ñi'ya̱ nu tlyu tsa cha' tso'o nu caca ji'i̱ yu lo'o tyaa yu ca slo ycui' Ndyosi chaca quiya'. Lo'o li' ngulana tsa nu ngu' jyo'o bi', cha' quije cha' ji'i̱ ngu' tilaca caca nu Cristo bi', ni tsa̱ tyu'u tucua yu nde chalyuu.

HEBREOS 7:25

Lcaa ca tyempo, masi juani, masi nde loo la, taca ji'i̱ Ni cua'ni lyaá Ni ji'i̱ cua ña'a̱ ca ñati̱ nu xñi cha' ji'i̱ ycui' Ndyosi xqui'ya Jesús. Tyucui tyempo ndi'i̱ Jesús ca slo ycui' Ndyosi, cha' chcui' Ni lo'o ycui' Sti Ni cuentya ji'na.

EFESIOS 1:15

Cua ndyuna na' ñi'ya̱ nu ndyu'ni ma̱ tya lo'o ngusñi tso'o ma̱ cha' ji'i̱ Jesús nu Xu'na na; nacui̱ ngu' cha' ntsu'u tsa tyiquee ma̱ ña'a̱ ma̱ ji'i̱ ñati̱ tya'a ngusñi ma̱ cha' ji'i̱ ycui' Ndyosi.

1 TIMOTEO 1:1

Pablo laca na'. Sca ñati̱ nu ndya'a̱ nchcui' cha' ji'i̱ Jesucristo nde xa' quichi̱ laca na', cha' ycui' Ndyosi nu ndu'ni lyaá ji'i̱ ñati̱ ngulo cña jna' cha' cua'ni na' cña bi'; ngulo Jesucristo cña jna', la cui' nu Cristo nu ndu̱ ti' na ji'i̱ cha' tya̱a̱ Ni chaca quiya'.

COLOSENSES 1:27

Sca cha' tlyu nu tso'o tsa laca cha' bi', sca cha' nu caja ji'i̱ lcaa lo ñati̱ chalyuu laca cha' ji'i̱ ycui' Ndyosi bi'; pana ná ngujui chacuayá' cha' caca cuayá' ti' ñati̱ ji'i̱ ycui' Ndyosi cha' bi' nu ngua cua sa'ni la. Ndi'ya̱ ndyu'u cha' bi', cha' nu bilya cuna ngu': Taca tyi'i̱ Cristo lo'o na nde chalyuu, masi juani ti; lo'o jua'a̱ tiya' la li' taca tyu'u cha' ji'na lo'o ycui' Ndyosi ca su tlyu su xee tsa ca su ntucua ycui' Ni.

ROMANOS 10:9

Tsa bi' ti cha' nti', cha' cacha' na ji'i̱ ngu' cha' Jesús laca nu Xu'na na, lo'o jua'a̱ tyucui tyiquee na jlya ti' na cha' ngua'ni ycui' Ndyosi cha' ndyu'ú Jesús chaca quiya' ca su nguatsi'. Li' taca ji'i̱ Ni cua'ni lyaá Ni ji'na,

ROMANOS 4:24

masi lo'o cuentya ji'na nscua cha' caca jua'a̱; lo'o ji'na cua nchcui' ycui' Ndyosi cha' caca tso'o cresiya ji'na cuentya ji'i̱ ycui' Ni si xñi na cha' ji'i̱ Ni, la cui' Ni nu ngua'ni cha' ndyu'ú Jesús nu Xu'na na chaca quiya' lo'o ngujuii yu.

LOS HECHOS 4:10

Cua'a̱ jyaca̱ ma̱ xi lacua. Ta na' sca cha' lo'o ma̱, lo'o lcaa ngu' loyuu re, cha' ycui' Jesucristo laca nu ngua'ni cha' ndyaca tso'o nu quicha re. La cui' Jesús Nazaret nu ndyujuii ma̱ ji'i̱ lo crusi, bi' laca nu cua ngua'ni ycui' Ndyosi cha' ndyu'ú chaca quiya' lo'o ngujuii. Ycui' Jesús bi' nda chacuayá' cha' ngua tso'o quiya' yu re, bi' cha' ndu̱ yu ca nde tso'o ti yu juani.

LOS HECHOS 3:15

Lo'o li' ngüijña ma̱ chacuayá' cujuii ngu' ji'i̱ Jesús, masi ycui' Jesús laca nu nda chalyuu nu ná nga'a̱ cha' tye ji'i̱ ñati̱. Li' ngua'ni ycui' Ndyosi cha' ndyu'ú Jesús chaca quiya' lo'o cua ngujuii yu. Jlo ti' ya cha' chañi laca cha' cua ndyu'ú yu chaca quiya', cha' cua na'a̱ ya ji'i̱ yu ña'a̱ lu'ú ti yu chaca quiya'.

LOS HECHOS 3:13

Ycui' Ndyosi Sti na ni, la cui' Ni laca nu ngua'ni tlyu jyo'o cusu' ji'na ji'i̱ tya sa'ni la, masi jyo'o Abraham, masi jyo'o Isaac, masi jyo'o Jacob; lcaa jyo'o cusu' ji'na ngua'ni tlyu ngu' ji'i̱ ycui' Ndyosi bi'. Ycui' Ndyosi laca nu cua nda chacuayá' ji'i̱ Jesús Sñi' ycui' Ni cha' caca tlyu yu. Ntejeya' ma̱ ji'i̱ nu Jesús bi' tsubi' ti, ndyaa lo'o ma̱ ji'i̱ yu, ndyaa ma̱ ngusta ma̱ qui'ya ji'i̱ yu slo ngu' nu laca loo; nu lo'o ngua ti' gobernador Pilato cha' tyu'u Jesús laja ti, ná ntaja'a̱ ma̱ li'.

SAN JUAN 17:1

Lo'o ndye nchcui' Jesús cha' bi', li' nguxña'a̱ yu nde cua̱, lo'o jua'a̱ cui̱i̱ tsa nchcui' yu lo'o ycui' Ndyosi Sti yu: ―Chcui' na' lo'o nu'u̱, cha' nu'u̱ laca Sti na' ―nacui̱―. Cua ndyalaa hora 'na cha' caja̱a̱. Lo'o juani cua'ni nu'u̱ cha' caca tlyu la na', cha' laca na' Sñi' nu'u̱, cha' li' taca cua'ni na' cha' caca tlyu la ycui' nu'u̱.

SAN JUAN 14:6

―Na' laca̱ nu nclyu'u̱ tyucui̱i̱ ―nacui̱ Jesús li'―, na' nclyu'u̱ lcaa cha' nu liñi ca; na' nda̱ chalyuu tso'o ji'i̱ ngu', chalyuu nu ná nga'a̱ cha' tye. Ná taca ji'i̱ ngu' tyalaa ngu' ca slo ycui' Ndyosi si ná lo'o na' ―nacui̱ Jesús―.

SAN JUAN 14:1

’Ná quiña'a̱ tsa cha' culacua ti' ma̱ cuentya 'na ―nacui̱ Jesús ji'i̱ ngu' li'―. Cua ngusñi ma̱ cha' ji'i̱ ycui' Ndyosi, jua'a̱ xñi tso'o ma̱ cha' jna' li'.

SAN JUAN 3:34

Nda Ni ji'i̱ nu Jesucristo bi' ya̱a̱ chalyuu, lo'o jua'a̱ xcui' cha' ji'i̱ ycui' Ndyosi nda yu lo'o na xqui'ya Xtyi'i ycui' Ndyosi. Lo'o ycui' Ndyosi ni, ná ntsu'u cha' tye cha' ta Ni Xtyi'i ycui' Ni ji'na.

SAN MATEO 28:18

Li' ñaa Jesús cacua la, nchcui' lo'o ngu': ―Cua nda ycui' Ndyosi Sti na' lcaa chacuayá' 'na cha' laca na' loo ji'i̱ lcaa na, masi lcaa na nu ntsu'u ca slo ycui' Ni nde cua̱, masi lcaa na nu ntsu'u nde chalyuu ―nacui̱ Jesús ji'i̱ ngu'―.

HEBREOS 6:1

Cua'ni yala na lacua, cha' cuna tso'o na lcaa cha' nu ntsu'u ji'i̱ Cristo; cua'ni na cha' caca na ñati̱ nu nclyacua tso'o ti ti', cha' ná tso'o si xcui' na nchcui' na ji'i̱ cha' nu ngua tsa'a̱ na tya clyo ti. Juani cua jlo tso'o ti' na macala ntucua quiya' cha' ji'i̱ Cristo: cua nchcui' na ñi'ya̱ caca tyu'utsu' na ji'i̱ cha' cuxi nu ngua'ni na tya sa'ni la, ñi'ya̱ caca xñi na cha' ji'i̱ Cristo;

SAN JUAN 17:5

Sti na' laca nu'u̱, bi' cha' cua'ni nu'u̱ cha' caca tlyu la na', ñi'ya̱ ngua nu lo'o nguti'i̱ na' lo'o nu'u̱ tya clyo lo'o tya lyiji xana chalyuu. Cua'ni nu'u̱ cha' caca tlyu na', la cui' ñi'ya̱ laca tlyu nu'u̱ ca su ntucua nu'u̱.

SAN JUAN 17:24

’Sti na' ―nacui̱ Jesús ji'i̱ ycui' Ndyosi Sti yu―, cua nti' na' cha' tyi'i̱ ñati̱ nu nda nu'u̱ 'na ca su tyucua na'. Li' ña'a̱ ngu' bi' 'na nde su tlyu la su nda nu'u̱ 'na, cha' tyaca'a tsa na' jinu'u̱ tya lo'o tya lyiji xana chalyuu.

2 CORINTIOS 6:15

Ná taca tsiya' ti ca stu'ba cha' ji'i̱ Cristo lo'o Satanás; lo'o jua'a̱ ñati̱ nu cua ngusñi cha' ji'i̱ Cristo ni, ná taca cua'ni tya'a ngu' lo'o ñati̱ nu ná ntaja'a̱ xñi cha' bi' tsiya' ti.

1 TIMOTEO 3:16

Chañi cha' tlyu tsa cha' tso'o ji'i̱ Jesucristo nu ngusñi na. Ndi'ya̱ nchcui' cha' bi': Nu ngua sa'ni la ni, ni sca ñati̱ ná ngua cuayá' ti' ñi'ya̱ cua'ni lyaá ycui' Ndyosi ji'i̱ ngu'; pana nu juani jlo ti' na, xqui'ya cha' ngula Jesucristo chalyuu, cha' ngua ycui' Ni sca ñati̱. Lo'o jua'a̱ nchcui' Xtyi'i ycui' Ni cha' ji'i̱ yu, cha' sca ñati̱ nu lubii tsa laca yu; cua na'a̱ xca̱ ji'i̱ ycui' Ndyosi ji'i̱ Jesús, nu ñati̱ lubii bi'. Li' nclyu'u ngu' cha' ji'i̱ Jesucristo bi' ji'i̱ ñati̱ ca quiña'a̱ tsa quichi̱ tyucui ña'a̱ chalyuu; ngusñi ñati̱ lcaa quichi̱ cha' nu nchcui' ngu' ji'i̱ Ni li'. Cua ndyaa Jesús ca slo ycui' Ndyosi Sti na nde cua̱, lo'o juani tlyu tsa laca Jesús cajua.

1 PEDRO 1:3

Cua'ni tlyu na ji'i̱ ycui' Ndyosi, la cui' bi' laca nu ndu'ni tlyu Jesucristo nu Xu'na na ji'i̱, la cui' Sti Jesucristo nu Xu'na na laca bi'. Tya'na tsa ti' ycui' Ni ña'a̱ Ni ji'na, bi' cha' ngua'ni cucui Ni cresiya ji'na; ntsu'u chalyuu cucui ji'na juani, xqui'ya cha' ndyu'ú ycui' Jesucristo chaca quiya' nu lo'o ngujuii yu. Lo'o nu juani cua ndu̱ ti' na cha' caja chalyuu nu ná nga'a̱ cha' tye ji'na,