1 JUAN 3:21 - Chatino Tataltepec

²¹ Cu'ma̱ ngu' tya'a na nu tyaca'a tsa ma̱ 'na, si jlo ti' na cha' ná ntsu'u qui'ya ji'na, tyucui tyiquee na taca chcui' na lo'o ycui' Ndyosi li';

1 JUAN 3:21 Referans Kwoze

1 JUAN 2:28

Nu juani ti, cu'ma̱ sñi' na', xñi tso'o ma̱ cha' ji'i̱ Jesucristo. Lo'o li', lo'o ca̱a̱ Jesucristo chalyuu chaca quiya', nga'aa ntsu'u cha' ca tyuju'u ti' na lo'o ña'a̱ na ji'i̱ Ni cha' ca̱a̱ Ni; tyucui tyiquee na tyacua tya'a na lo'o Ni li'.

HEBREOS 4:16

Ná cutsi̱i̱ na tsiya' ti lacua, tyucui tyiquee na jña na sca cha' ji'i̱ ycui' Ndyosi ca su tlyu ca su laca Ni loo; chcui' na lo'o ycui' Ndyosi nu xcui' tso'o tsa ndu'ni lo'o ñati̱, cha' cui'ya Ni cha' clyu ti' ji'na, cha' xtyucua Ni ji'na, masi la cui' ca hora nu lyiji tsa cha' ji'na.

2 CORINTIOS 1:12

Tso'o tsa nti' ya cha' xcui' ngua'ni tyucui tyiquee ya lo'o ma̱, xcui' nda ya cha' liñi lo'o ma̱, ñi'ya̱ nu ngua'ni ya lo'o xa' ñati̱; jua'a̱ nti' ya. Ngua ji'i̱ ya cua'ni ya jua'a̱ lo'o ma̱ xqui'ya cha' lye tsa ngua'ni tya'na ti' ycui' Ndyosi ji'na laja ti; si'i cha' nda'ya cha' hique ti ya, bi' cha' ndu'ni ya jua'a̱.

1 JUAN 5:14

Tyucui tyiquee na taca chcui' na lo'o ycui' Ndyosi lacua. Lo'o jña na sca cha' ji'i̱ ycui' Ndyosi nu stu'ba nti' lo'o sca cha' nu nti' ycui' Ni, li' taca jlo ti' na cha' taquiya' Ni ji'i̱ cha' nu chcui' na lo'o Ni.

1 JUAN 4:17

Tso'o ti ntsu'u tyiquee na ña'a̱ na ji'i̱ ycui' Ndyosi, cha' nu lo'o tyalaa tsa̱ lo'o tya̱a̱ Jesucristo chaca quiya' cha' cua'ni cuayá' Ni ji'i̱ lcaa ñati̱, li' tyucui tyiquee na taca tyacua tya'a na lo'o ycui' Ni. Ndya'a̱ Ni lo'o na laja lo'o ndi'i̱ na chalyuu, ñi'ya̱ nguta'a̱ Ni lo'o Jesucristo lo'o nguti'i̱ yu nde chalyuu, bi' cha' nga'aa ntsu'u cha' cutsi̱i̱ na.

HEBREOS 10:22

Tya̱a̱ na ca slo ycui' Ndyosi lacua; tyucui tyiquee na cua'ni na cha' caca stu'ba cha' ji'na lo'o ycui' Ndyosi Sti na, cha' taca xñi tso'o na cha' ji'i̱ Ni li'. Cua ngüityi̱ Ni lcaa cha' cuxi nu ngua'ni cha' ngua tyuju'u ti' na tya tsubi' la; cua ngua lubii cresiya ji'na juani, ñi'ya̱ laca lo'o cua ndyaata na chcu lo'o hitya lubii ti.

1 CORINTIOS 4:4

lo'o jua'a̱ cuentya ji'i̱ ycui' Ndyosi, ná ntsu'u cha' cuxi nu ngua'ni na', nti' na'. Pana ná ñacui̱ na' cha' ná ntsu'u cha' sta Ni qui'ya 'na tsiya' ti, sca ti ycui' Ndyosi nu Xu'na na taca cua'ni cuayá' Ni jna' ca lo'o tye chalyuu.

1 TIMOTEO 2:8

Bi' cha' lacua, lcaa se'i̱ su ndyu'u ti'i̱ ngu' nu ntsu'u cha' ji'i̱ lo'o Jesucristo tsa tlyu ti, nti' na' cha' chcui' ngu' lo'o ycui' Ndyosi. Tso'o ti tyiquee ngu' ta ngu' cha' lo'o ycui' Ndyosi li', cha' ná tso'o chcui' ngu' lo'o Ni si ñasi̱' ngu', ni ná tso'o chcui' ngu' lo'o Ni laja lo'o nxu̱u̱ tya'a ngu'.

ROMANOS 14:22

Nu lo'o nti' ma̱ cha' tso'o tsa cuentya ji'i̱ ycui' Ndyosi laca sca cña nu ndu'ni ma̱, masi ntsu'u ñati̱ nu ná ndiya ti' cha' ndu'ni ma̱ jua'a̱, tsiya' ti cua'ni ma̱ cña bi' li' ca su nga'a̱ ycui' ti ma̱, ca su ña'a̱ sca ti ycui' Ndyosi ji'i̱ ma̱. Tso'o tsa ntsu'u tyiquee ñati̱ nu ngui'i̱ ndu'ni jua'a̱, ná ntsu'u cha' culacua tsa ti' ngu' bi'; cua jlo ti' ngu' bi' cha' si'i cha' cuxi nu ndu'ni ngu'.

EFESIOS 3:12

Lo'o juani cua ntsu'u chacuayá' ji'na cha' tyu'u cha' ji'na lo'o ycui' Ndyosi xqui'ya la cui' Jesucristo bi'; tyucui tyiquee na taca chcui' na lo'o ycui' Ndyosi xqui'ya cha' ngusñi na cha' ji'i̱ Jesucristo Sñi' ycui' Ni. Lo'o jua'a̱ nga'aa ntsu'u cha' cutsi̱i̱ na lo'o chcui' na lo'o ycui' Ndyosi.

1 JUAN 2:7

Cu'ma̱ tya'a ngusñi na cha' ji'i̱ Jesús, cua nscua cha' lo quityi re cha' tyaja'a̱ ma̱ tyu'u tso'o tyiquee ma̱ ña'a̱ ma̱ ji'i̱ tya'a ñati̱ ma̱. Si'i sca cha' nu bilya cuna ma̱ laca cha' bi'; cua ndyuna ma̱ cha' bi' tya lo'o ngusñi ma̱ cha' ji'i̱ Jesucristo tya clyo la, cha' la cui' ti cha' bi' laca nu cua nscua cua sa'ni.

1 JUAN 3:2

Cu'ma̱ ngu' tya'a na nu tyaca'a tsa ma̱ 'na, nu juani ti laca na sñi' ycui' Ndyosi; pana bilya caja cha' ji'na ñi'ya̱ nu tso'o la ña'a̱ na, nu lo'o tyi'i̱ na lo'o ycui' Ni nde loo la. Ñi'ya̱ laca ycui' Jesucristo, jua'a̱ caca na lo'o culu'u loo Jesucristo ji'na lo'o cua ndye chalyuu re; li' taca ña'a̱ na ji'i̱ Jesucristo ñi'ya̱ nu laca ycui'. Tsa bi' ti cha' nchca cuayá' ti' na juani.

1 JUAN 3:20

Nu lo'o jlo ti' cresiya ji'na cha' ntsu'u qui'ya ji'na, li' taca ca cuayá' ti' na cha' lo'o ycui' Ni jlo ti' Ni cha' bi'. Lo'o jua'a̱ tlyu la laca ycui' Ni, taca ji'i̱ Ni cua'ni lyaá Ni ji'na ji'i̱ cha' cuxi bi'.