1 JUAN 2:6 - Chatino Tataltepec

⁶ Ñati̱ nu nchcui' lo'o xa' la ngu' cha' ñati̱ ji'i̱ Jesucristo laca ycui', ntsu'u cha' cua'ni ñati̱ bi' cña, cua ña'a̱ ca cña nu ngua'ni ycui' Jesucristo.

1 JUAN 2:6 Referans Kwoze

1 PEDRO 2:21

Tya lo'o ngusubi Ni ji'i̱ ma̱, tya li' jlo ti' Ni cha' jua'a̱ xcube' ngu' ji'i̱ ma̱, cha' la cui' jua'a̱ nguxcube' ngu' ji'i̱ ycui' Cristo tya clyo la cuentya ji'i̱ cu'ma̱. Jua'a̱ ngua cha' ngulu'u Cristo ji'i̱ ma̱ ñi'ya̱ caca talo tyiquee ma̱ lo'o xcube' ngu' ji'i̱ ma̱.

SAN JUAN 13:15

Ngua ti' na' cha' ña'a̱ ma̱ ñi'ya̱ nu ngua'ni na', cha' ñi'ya̱ ngua'ni na' lo'o nguxtyucua na' ji'i̱ ma̱, jua'a̱ ntsu'u cha' cua'ni ma̱ cha' xtyucua ma̱ ji'i̱ tya'a ma̱ ―nacui̱ Jesús ji'i̱ ngu' nu ndyaca tsa'a̱ ji'i̱―.

1 CORINTIOS 11:1

Bi' cha' cui'ya tso'o ma̱ cuentya ña'a̱ cña nu ndu'ni na', lo'o la cui' jua'a̱ cua'ni ma̱ li', cha' ñi'ya̱ laca cña nu ngua'ni Cristo, jua'a̱ laca cña nu ndu'ni na'.

1 JUAN 3:6

Ni sca ñati̱ nu nxñi tso'o cha' ji'i̱ Jesucristo lcaa tsa̱, nga'aa nscua cha' cua'ni ngu' bi' cha' cuxi. Nu ñati̱ nu ndu'ni cha' cuxi lcaa tsa̱, ndu'ni ngu' cha' cuxi xqui'ya cha' bilya tyu'u cha' ji'i̱ ngu' bi' lo'o Jesucristo, bilya xñi ngu' cha' ji'i̱ Ni.

EFESIOS 5:2

Tso'o ti tyu'u tyiquee ma̱ ña'a̱ ma̱ ji'i̱ ñati̱, cha' la cui' jua'a̱ ntsu'u tsa tyiquee Cristo ña'a̱ Ni ji'na. Nu lo'o ñaa Jesús chalyuu ni, cua ntaja'a̱ Jesús nda yu tyucui ña'a̱ ycui' ca yu cha' caca sca msta̱ ji'i̱ ycui' Ndyosi cuentya ji'na. Tso'o tsa ngua ti' ycui' Ndyosi li'.

SAN MATEO 11:29

Xñi ma̱ cña nu ta na' ji'i̱ ma̱, lo'o li' ca tsa'a̱ ma̱ lcaa cha' 'na. Tya'na tsa ti' na' ña'a̱ na' ji'i̱ ma̱, lo'o jua'a̱ talo tsa tyiquee na' ji'i̱ ma̱; ti̱ ti tyi'i̱ tyiquee ma̱ lo'o cua ngüityi̱ na' cha' cuxi nu ntsu'u ne' cresiya ji'i̱ ma̱.

1 JUAN 2:4

Cuiñi tsa ñati̱ nu nacui̱ cha' ntsu'u cha' ji'i̱ ngu' lo'o Jesucristo, si ná ndaquiya' ngu' ji'i̱ cña nu nclyo Ni ji'i̱ ngu'; ná liñi cha' nu ntsu'u tyiquee ngu' bi'.

1 JUAN 2:28

Nu juani ti, cu'ma̱ sñi' na', xñi tso'o ma̱ cha' ji'i̱ Jesucristo. Lo'o li', lo'o ca̱a̱ Jesucristo chalyuu chaca quiya', nga'aa ntsu'u cha' ca tyuju'u ti' na lo'o ña'a̱ na ji'i̱ Ni cha' ca̱a̱ Ni; tyucui tyiquee na tyacua tya'a na lo'o Ni li'.

SAN JUAN 15:10

Lcaa tsa̱ tyi'u ti' ma̱ su ndi'i̱ ma̱ cha' ntsu'u tsa tyiquee na' ña'a̱ na' ji'i̱ ma̱. Jua'a̱ tso'o tsa caca tyiquee na' ña'a̱ na' ji'i̱ ma̱ si taquiya' ma̱ ji'i̱ lcaa cha' nu nda na' lo'o ma̱. Lo'o jua'a̱ na' ―nacui̱ Jesús― cua ngua'ni na' lcaa cña nu ngulo Sti na' 'na. Jlo ti' na' cha' ntsu'u tsa tyiquee Ni ña'a̱ Ni jna' tyucui su ndi'i̱ na'.

1 JUAN 3:24

Nu lo'o taquiya' na ji'i̱ cña nu cua ngulo ycui' Ndyosi ji'na cha' cua'ni na, li' cua ntsu'u cha' ji'na lo'o ycui' Ndyosi, lo'o jua'a̱ ntsu'u cha' ji'i̱ Ni lo'o na li'. Jlo ti' na cha' bi', xqui'ya cha' cua nda ycui' Ndyosi Xtyi'i ycui' Ni cha' tyanu ne' cresiya ji'na.

1 JUAN 4:17

Tso'o ti ntsu'u tyiquee na ña'a̱ na ji'i̱ ycui' Ndyosi, cha' nu lo'o tyalaa tsa̱ lo'o tya̱a̱ Jesucristo chaca quiya' cha' cua'ni cuayá' Ni ji'i̱ lcaa ñati̱, li' tyucui tyiquee na taca tyacua tya'a na lo'o ycui' Ni. Ndya'a̱ Ni lo'o na laja lo'o ndi'i̱ na chalyuu, ñi'ya̱ nguta'a̱ Ni lo'o Jesucristo lo'o nguti'i̱ yu nde chalyuu, bi' cha' nga'aa ntsu'u cha' cutsi̱i̱ na.