1 JUAN 2:5 - Chatino Tataltepec

⁵ Si chañi laca cha' ntucuá na lcaa cha' nu nda Jesucristo lo'o na, li' chañi laca cha' ntsu'u tyiquee na ña'a̱ na ji'i̱ ycui' Ndyosi Sti yu; jua'a̱ caca cuayá' ti' na cha' chañi cha' laca na ñati̱ ji'i̱ Jesucristo masi tya ndi'i̱ na chalyuu.

1 JUAN 2:5 Referans Kwoze

SAN JUAN 14:23

―Ñati̱ nu chañi cha' ntsu'u tsa tyiquee jna', taquiya' ngu' ji'i̱ lcaa cha' nu nchcui' na' lo'o ngu' ―nacui̱ Jesús―. Lo'o li' tso'o tsa caca tyiquee ycui' Ndyosi Sti na' ña'a̱ Ni ji'i̱ ngu' bi'. Cuati ca̱a̱ ya lo'o Sti na' cha' tyanu ya lo'o ngu' bi' ―nacui̱ Jesús―.

SAN JUAN 14:21

Lcaa ñati̱ nu chañi cha' ntsu'u tyiquee ngu' ña'a̱ ngu' jna', bi' laca ñati̱ nu cua'a̱ jyaca̱ ji'i̱ lcaa cha' nu chcui' na' lo'o ngu'; taquiya' ngu' bi' ji'i̱ cha' bi' ―nacui̱―. Lo'o ntsu'u tsa tyiquee ngu' ña'a̱ ngu' jna', jua'a̱ Sti na' ntsu'u tyiquee Ni ña'a̱ Ni ji'i̱ ngu' bi' li'. Lo'o na', tso'o tsa caca tyiquee na' ña'a̱ na' ji'i̱ ngu' bi', cuati culu'u na' ji'i̱ ngu' bi' lcaa cha' ñi'ya̱ nu laca ycui' Na'.

SAN LUCAS 11:28

Li' nguxacui̱ Jesús cha' ji'i̱: ―Si'i cha' bi' ―nacui̱―. Tso'o la ntsu'u tyiquee ñati̱ nu cua'a̱ jyaca̱ ji'i̱ lcaa cha' nu nda ycui' Ndyosi lo'o ngu', nu taquiya' ji'i̱ lcaa cha' bi'.

1 JUAN 3:24

Nu lo'o taquiya' na ji'i̱ cña nu cua ngulo ycui' Ndyosi ji'na cha' cua'ni na, li' cua ntsu'u cha' ji'na lo'o ycui' Ndyosi, lo'o jua'a̱ ntsu'u cha' ji'i̱ Ni lo'o na li'. Jlo ti' na cha' bi', xqui'ya cha' cua nda ycui' Ndyosi Xtyi'i ycui' Ni cha' tyanu ne' cresiya ji'na.

APOCALIPSIS 14:12

Lo'o nu na ni, talo na ji'i̱ cha' cuxi sca ti si ntsu'u cha' ji'na lo'o ycui' Ndyosi, sca ti si taquiya' na cña nu ngulo Ni ji'na, sca ti si xñi tso'o na cha' ji'i̱ Jesús; sca ti jua'a̱ taca ji'na talo na ji'i̱ nu cha' cuxi bi'.

1 JUAN 5:2

Nu lo'o ntsu'u tyiquee na ña'a̱ na ji'i̱ ycui' Ndyosi Sti na, lo'o jua'a̱ taquiya' na ji'i̱ lcaa cña nu nda Ni lo'o na, li' tso'o ti taca tyu'u tyiquee na ña'a̱ na ji'i̱ xa' la sñi' ycui' Ni.

SAN JUAN 15:5

’Ñi'ya̱ laca su̱u̱ yaca nu nda si'yu tyixi ji'i̱, jua'a̱ laca na' cuentya ji'i̱ ma̱, cha' na' laca̱ su̱u̱ cha' tso'o nu ntsu'u ji'i̱ ma̱ ―nacui̱ Jesús ji'i̱ ngu'―. Ñi'ya̱ laca sta̱' yaca bi', jua'a̱ laca cu'ma̱, si ngusñi ma̱ cha' 'na. Stu'ba ti caca tyiquee ma̱ lo'o na', li' caja quiña'a̱ la cha' tso'o nu tyu'u ne' cresiya ji'i̱ ma̱ su ndi'i̱ ma̱ chalyuu, si laca na' su̱u̱ cha' tso'o ji'i̱ ma̱. Ni sca cha' ná caca ji'i̱ ma̱ si ná stu'ba caca tyiquee ma̱ lo'o na' ―nacui̱ Jesús―.

1 JUAN 4:18

Ná ntsu'u cha' cutsi̱i̱ na cha' xcube' ycui' Ndyosi ji'na, si chañi cha' ntsu'u tyiquee na ña'a̱ na ji'i̱ ycui' Ni; pana tya lyiji cha' tso'o ti tyu'u tyiquee na ña'a̱ na ji'i̱ ycui' Ndyosi, si ña'a̱ ti tya ntsi̱i̱ na cha' xcube' Ni ji'na. Ñati̱ nu ntsi̱i̱ tsa ji'i̱ ycui' Ndyosi ni, cua nda ti' ngu' cha' xcube' Ni ji'i̱ ngu'.

2 CORINTIOS 5:17

Lo'o juani nu lo'o cua ngusñi sca ñati̱ cha' ji'i̱ Cristo, li' cua nguxcutsa'a̱ Ni cha' ji'i̱ ñati̱ bi'; cua ndye cha' ji'i̱ yu lo'o cha' cuxi nu ngua'ni yu nu ngua tya tsubi' la. Chaca chalyuu cucui, bi' laca nu cua ngujui ji'i̱ yu juani.

APOCALIPSIS 12:17

Ngunasi̱' tsa nu cuaña bi' ji'i̱ nu cuna'a̱ bi' li', ndyaa ndyaana ni' cha' cusu̱u̱ lo'o lcaa ñati̱ nu tyu'u ji'i̱ nu cuna'a̱ ca tiya' la; nxu̱u̱ tya'a ni' lo'o lcaa ñati̱ nu taquiya' ji'i̱ cña nu ngulo ycui' Ndyosi ji'na, nu ña'a̱ ti ná ntsi̱i̱ ngu' cha' cacha' liñi ngu' cha' ji'i̱ Jesús ji'i̱ xa' ñati̱.

1 JUAN 5:20

Cua jlo ti' na cha' cua ya̱a̱ nu sca ti Sñi' ycui' Ndyosi nde lo yuu chalyuu, lo'o jua'a̱ cua nda bi' chacuayá' cha' caca tyu'u cha' ji'na lo'o ycui' Ndyosi. Chañi cha' stu'ba ntsu'u tyiquee na lo'o ycui' Ndyosi juani, xqui'ya cha' stu'ba ntsu'u tyiquee na lo'o Jesucristo nu laca Sñi' ycui' ca Ni. Chañi cha' ycui' Ndyosi tsiya' ti laca nu Jesús bi', lo'o jua'a̱ chañi cha' ná nga'a̱ cha' tye chalyuu cucui nu ta Ni ji'na.

1 CORINTIOS 1:30

Ndi'ya̱ laca cha': cua nacui̱ ycui' Ndyosi cha' caca stu'ba cha' ji'na lo'o Jesucristo, lo'o jua'a̱ cua nda Ni ji'i̱ Jesucristo ji'na. Masi ná nchca ji'na, pana nu Jesucristo ni, lcaa cha' nchca ji'i̱ ycui'. Xqui'ya nu Jesús bi' nchca tso'o cresiya ji'na ñati̱ cuxi na cuentya ji'i̱ ycui' Ndyosi; xqui'ya Jesús taca caca na ñati̱ ji'i̱ ycui' Ndyosi, cha' Jesús laca nu ngua'ni lyaá ji'na ji'i̱ nu cuxi.

ROMANOS 8:1

Pana juani ni, ndi'ya̱ ngua'ni ycui' Ndyosi: Nga'aa ndyanu yabe' hichu̱' na, si stu'ba ntsu'u cha' ji'na lo'o Jesucristo; nga'aa taca ji'i̱ nu cuxi nu ntsu'u chalyuu cojolaqui ji'na juani, cha' Xtyi'i ycui' Ndyosi laca loo ji'na lo'o ndi'i̱ na nde chalyuu.

SANTIAGO 2:22

Ntsu'u sca cña nu ngua'ni Abraham lacua. Xqui'ya bi' ngua cuayá' ti' ycui' Ndyosi cha' cua ngusñi Abraham cha' nu nchcui' Ni lo'o; jlya tsa ti' nu cusu' cha' bi', bi' cha' ntaja'a̱ yu ngua'ni yu cña bi'.

2 CORINTIOS 5:21

Masi ná ntsu'u qui'ya ji'i̱ Cristo tsiya' ti, pana ycui' Ndyosi ngua'ni cha' ndyanu qui'ya nu ntsu'u ji'na hichu̱' Cristo. Si cua ngua stu'ba cha' ji'na lo'o Cristo, li' caca lubii cresiya ji'na ñi'ya̱ nu nti' ycui' Ndyosi cha' caca na.

SAN JUAN 6:56

Lo'o cua ña'a̱ ca ñati̱ nu jua'a̱ cacu ngu', nu jua'a̱ co'o ngu' cha' nu ta na' ji'i̱ ngu' ―nacui̱―, lcaa tsa̱ tyi'i̱ ngu' bi' lo'o na', tyi'i̱ na' lo'o ngu' bi' li'.

1 JUAN 4:17

Tso'o ti ntsu'u tyiquee na ña'a̱ na ji'i̱ ycui' Ndyosi, cha' nu lo'o tyalaa tsa̱ lo'o tya̱a̱ Jesucristo chaca quiya' cha' cua'ni cuayá' Ni ji'i̱ lcaa ñati̱, li' tyucui tyiquee na taca tyacua tya'a na lo'o ycui' Ni. Ndya'a̱ Ni lo'o na laja lo'o ndi'i̱ na chalyuu, ñi'ya̱ nguta'a̱ Ni lo'o Jesucristo lo'o nguti'i̱ yu nde chalyuu, bi' cha' nga'aa ntsu'u cha' cutsi̱i̱ na.

2 JUAN 1:6

Lo'o nu ni na' ji'i̱ ma̱ cha' tso'o ti tyu'u tyiquee na ña'a̱ na ji'i̱ tya'a ñati̱ na, la cui' jua'a̱ ntsu'u cha' taquiya' na lcaa cña nu nclyo ycui' Ndyosi ji'na. Nu lo'o ngusñi ma̱ cha' bi' tya clyo, cua ndyuna ma̱ lcaa cña nu ntsu'u cha' cua'ni ma̱ cha' tso'o ti tyu'u tyiquee lcaa ma̱ ña'a̱ ma̱ ji'i̱ tya'a ñati̱ ma̱.