1 JUAN 2:18 - Chatino Tataltepec

¹⁸ Cu'ma̱ sñi' na', cua ndyalaa hora cha' tye lcaa cha' nu ntsu'u chalyuu. Cua jlo ti' ma̱ cha' cua lijya̱ sca ñati̱ tlyu nu cñilo'o ji'i̱ tya'a ñati̱ na cha' Cristo laca ycui' yu; xu̱u̱ tya'a yu bi' lo'o lcaa na nu ntsu'u cha' ji'na lo'o Cristo. Masi tyempo juani, quiña'a̱ tsa ngu' cuiñi ntsu'u chalyuu, nu nti' xu̱u̱ tya'a lo'o ñati̱ ji'i̱ Cristo; bi' cha' cua ngua cuayá' ti' na cha' cua ngulala ti tye lcaa cha'.

1 JUAN 2:18 Referans Kwoze

1 JUAN 4:3

pana ñati̱ nu nacui̱ cha' si'i Sñi' ycui' Ndyosi laca Jesucristo lo'o ngula yu chalyuu ñi'ya̱ nu nclya ñati̱, ná ntsu'u Xtyi'i ycui' Ni ne' cresiya ji'i̱ ngu' bi'. Cha' ji'i̱ nu cuiñi nu nti' tyiji̱loo ji'i̱ Jesucristo laca cha' nu ntsu'u ne' cresiya ji'i̱ ngu' bi'; jua'a̱ cua ngua cuayá' ti' ma̱ cha' cua lijya̱ ti nu cuiñi bi', cha' masi juani cua laca ndi'i̱ bi' chalyuu.

2 JUAN 1:7

Ntsu'u tsa ñati̱ cuiñi nu nchcui' cha' ná chañi cha' ngua Jesús ñati̱ lo'o ya̱a̱ yu chalyuu. Tyucui ña'a̱ lo yuu chalyuu ndya'a̱ ñati̱ nu nchcui' cha' cuiñi bi'; na nñilo'o ngu' bi' ji'i̱ tya'a ñati̱ na, jua'a̱ tya'a cusu̱u̱ ji'i̱ Cristo laca ngu' bi'.

1 JUAN 2:22

¿Tilaca laca nu cuiñi lacua? Ñati̱ cuiñi bi' laca nu ñacui̱ cha' si'i Cristo laca Jesús, la cui' Cristo nu cua nda ycui' Ndyosi ji'i̱ cha' ya̱a̱ yu chalyuu. Nxu̱u̱ tya'a ngu' bi' lo'o ñati̱ nu ntsu'u cha' ji'i̱ lo'o Cristo, cha' ñacui̱ ngu' bi' cha' si'i nu sca ti Sñi' ycui' Ndyosi laca Jesucristo, cha' si'i ycui' Ndyosi laca Sti Jesucristo.

SAN MATEO 24:24

cha' Cristo cuiñi caca nu bi'. Lo'o jua'a̱ tyu'u tucua xi ngu' cuiñi nu chcui' cha' tu'ba ji'i̱ ycui' Ndyosi laca ycui' ca ngu', nu cuiñi ti cua'ni cha' tlyu cha' cube tsa ti' xa' ñati̱; cua'ni ngu' cuiñi bi' jua'a̱, cha' nti' ngu' cua'ni ngu' ngana ji'i̱ ma̱, lo'o jua'a̱ ji'i̱ lcaa ñati̱ nu cua ngusubi ycui' Ndyosi ji'i̱.

SAN MATEO 24:5

Nde loo la ca̱a̱ tyu̱u̱ tya'a ngu' cuiñi nu ñacui̱ cha' cuentya jna' lijya̱ ngu'. “Cristo laca na'”, ñacui̱ ngu' bi' ji'i̱ ma̱, lo'o jua'a̱ cñilo'o ngu' ji'i̱ quiña'a̱ ñati̱ nu jlya ti' cha' bi'.

1 JUAN 4:1

Cu'ma̱ tya'a ngusñi na cha' ji'i̱ Cristo nu tyaca'a tsa ma̱ 'na, ná xñi ma̱ cha' ji'i̱ cua ña'a̱ ca ñati̱ nu ñacui̱ cha' cua nda ycui' Ndyosi Xtyi'i ycui' Ni ji'i̱ ngu' bi'. Cua'ni cuayá' ma̱ ji'i̱ ngu' bi' clyo, cha' quijeloo cha' ji'i̱ ma̱ lo'o ngu' si chañi cha' cua ndyanu Xtyi'i ycui' Ndyosi ne' cresiya ji'i̱ ngu' bi', si cha' cuiñi ti laca nu nchcui' ngu' bi'. Cua ndu'u tucua tyu̱u̱ tsa tya'a ngu' cuiñi chalyuu juani, nu nñilo'o ji'i̱ ñati̱ cha' cuentya ji'i̱ ycui' Ndyosi nchcui' ngu'.

SAN MARCOS 13:6

Nde loo la ca̱a̱ quiña'a̱ ñati̱ nu chcui' cha' cuiñi ti ji'i̱ ycui' na'. Chcui' ngu' cha' ycui' Cristo laca ngu', lo'o jua'a̱ cñilo'o ngu' bi' ji'i̱ quiña'a̱ ñati̱ nu jlya ti' cha' bi'.

2 PEDRO 2:1

Cua ntsu'u xi ngu' cuiñi nu nguti'i̱ laja ngu' Israel sa'ni la; tu'ba ji'i̱ ycui' Ndyosi ngua ngu', nacui̱ ycui' ngu' cuiñi bi'. La cui' jua'a̱ tyu'u tucua ñati̱ cuiñi laja cu'ma̱ nde loo la; li' culu'u ngu' cuiñi bi' ji'i̱ ma̱, culu'u ngu' cua ña'a̱ ca cha' nu ca'ya hique ycui' ca ngu'. Lo'o li' ñacui̱ ngu' bi' cha' cuentya ji'i̱ ycui' Ndyosi nchcui' ngu'. Si cuna ma̱ cha' nu chcui' ngu' bi', li' xana cha' cusu̱u̱ ji'i̱ ma̱ lo'o tya'a ma̱ ña'a̱ cuayá' nu tya'be tya'a ma̱. Li' caca ma̱ tucua latya ma̱ xqui'ya cha' cuiñi bi'. Tlyu tsa cña nu ngua'ni ycui' nu Xu'na na cha' cua'ni lyaá Ni ji'i̱ lcaa na lo'o ji'i̱ ngu' bi', pana ná nti' nu ngu' cuiñi bi' cha' caca ycui' Ndyosi Xu'na ngu' bi' tsiya' ti; ná ntsu'u cha' tsiya' ti ji'i̱ ngu' bi' lo'o ycui' Ndyosi, bi' cha' yala ti tye cha' ji'i̱ nu ngu' cuiñi bi'.

SAN MATEO 24:11

La cui' jua'a̱ tyu'u tucua quiña'a̱ ngu' cuiñi, nu laca tu'ba ji'i̱ ycui' Ndyosi, ñacui̱ ngu'. Cñilo'o ngu' bi' ji'i̱ tyu̱u̱ tya'a ma̱, cu'ma̱ nu laca ma̱ ñati̱ 'na.

JUDAS 1:18

“Tyu'u tucua xi ñati̱ cuiñi lo'o cua tye ti chalyuu”, nacui̱ ngu' bi' ji'na. “Xtyí lo'o ngu' cuiñi bi' ji'i̱ lcaa cha' tso'o nu ntsu'u ji'i̱ ycui' Ndyosi, jua'a̱ cua'ni ngu' cua ña'a̱ ca cha' cuxi nu ndiya ti' ngu' ji'i̱”, nacui̱ ngu' bi' ji'na.

2 PEDRO 3:3

Tya clyo ntsu'u cha' ca cuayá' ti' ma̱ cha' lo'o cua tyalaa ti tsa̱ nu tye chalyuu, li' tyu'u tucua ngu' nu xtyílo'o tsa ji'i̱ cha' ji'i̱ ycui' Ndyosi. Cua'ni ngu' bi' cua ña'a̱ ca cha' cuxi nu ndiya ti' ycui' ca ngu' cha' cua'ni ngu'.

HEBREOS 1:2

Pana nu juani lo'o cua tye ti chalyuu, cua nchcui' Ni lo'o na, xqui'ya cha' cua ñaa Jesús nde chalyuu ca su ndi'i̱ na, la cui' Jesús nu laca sca ti Sñi' ycui' Ni. Cua nguti'i̱ nu Jesús bi' lo'o ycui' Ndyosi Sti yu nu lo'o ngüiñá Ni chalyuu tya clyo; tya lo'o ngüiñá Ni lcaa lo na nu ntsu'u nde cua̱ lo'o lcaa lo na nu ntsu'u lo yuu chalyuu, cua laca ndu̱ Jesús lo'o ycui' Ndyosi Sti Jesús li'. Lo'o jua'a̱ cua nda Ni chacuayá' ji'i̱ cha' caca ycui' Jesús loo ji'i̱ lcaa na bi'.

1 PEDRO 1:20

Tya clyo lo'o bilya cuiñá Ni chalyuu, cua jlo ti' ycui' Ndyosi cha' ntsu'u cha' cua'ni Cristo cña tonu bi'; pana ngujuatya ycui' Ni ni jacua' nu tyalaa tyempo bi'. Li' ñaa Cristo, ngua'ni yu cña bi' cuentya ji'na, cha' tyacua cha' tso'o bi' ji'na.

1 PEDRO 1:5

Cua ngusñi ma̱ cha' ji'i̱ ycui' Ndyosi, bi' cha' ndu̱ Ni cua̱ ji'i̱ ma̱ juani cha' ña'a̱si̱i̱ Ni ji'i̱ ma̱. Ná ntsu'u ni sca na nu nguula la juersa ji'i̱, nu taca ji'i̱ tyiji̱loo ji'i̱ ycui' Ndyosi; cua'a Ni ji'i̱ ma̱ ji'i̱ nu cuxi, cha' cua'ni lyaá Ni ji'i̱ ma̱ lo'o tye chalyuu re, cha' cua ndyaa Ni ngua'ni cho'o Ni su tyi'i̱ ma̱ ca slo ycui' Ndyosi.

SAN JUAN 21:5

Li' ngusi'ya lo'o Jesús ji'i̱ ngu': ―¿Ha ngujui xi na cacu ma̱, La? ―Ná sca na ngujui ji'i̱ ya tsiya' ti ―nacui̱ ngu' ji'i̱ yu li'.

ROMANOS 13:11

Cua'ni ma̱ cha' tyi'u ti' ma̱ lcaa cha' bi'. Cua jlo ti' ma̱ cha' cua ndyalaa hora cha' clyana na ji'i̱ ycui' Ndyosi; bi' cha' juani que ti' ma̱ lacua, cha' tii ti ti' ma̱ tyi'i̱ ma̱ chalyuu. Cua tya̱a̱ ti ycui' Jesús cha' cua'ni lyaá Ni ji'na, cha' ca̱qui'ya Ni ji'na. Nu lo'o ngusñi na cha' ji'i̱ Jesús tya clyo, li' ngua ti' na cha' tya lyiji tsa tyalaa tsa̱ bi' cha' tya̱a̱ ycui' Jesús; pana juani cua ngulala ti tyalaa tsa̱ bi'.

ROMANOS 13:12

Ñi'ya̱ laca chalyuu talya, jua'a̱ laca lo'o ndi'i̱ na chalyuu, xqui'ya cha' cuxi nu ntsu'u ji'na. Pana juani cua tye ti talya bi', cua tya̱a̱ ti Cristo cha' culotsu' Ni cha' cuxi bi'. Li' caca chalyuu ji'na ñi'ya̱ si cua nguxee tso'o, cha' lubii tsa xee caca li'. Bi' cha' nga'a̱ cha' xtyanu na ji'i̱ cha' cuxi nu ndu'ni ngu', cha' cuxi tsa tyiquee ngu' nu ndya'a̱ chalyuu talya bi'. Cua'ni cho'o na tyucui ña'a̱ na, cha' nguula tsa cua'ni na cña cuentya ji'i̱ Cristo nde chalyuu, ñi'ya̱ si laca na sendaru ji'i̱ Cristo.

1 PEDRO 4:7

Cua tye ti cha' ji'i̱ lcaa na nu ntsu'u chalyuu; bi' cha' tso'o la si cua'a ma̱ ji'i̱ ycui' ca ma̱, tii ti ti' ma̱ tyi'i̱ ma̱ chalyuu cha' taca cua'ni ma̱ cña tso'o, cha' lu'ba ti taca chcui' ma̱ lo'o ycui' Ndyosi.