1 JUAN 1:6 - Chatino Tataltepec

⁶ Cha' cuiñi laca nu nda na si ñacui̱ na cha' stu'ba ntsu'u tyiquee na lo'o ycui' Ndyosi, lo'o li' ña'a̱ ti tya ndiya ti' na cha' cuxi; ndi'i̱ na chalyuu ñi'ya̱ laca si talya tsa ña'a̱ su ndi'i̱ na li', cha' ná tso'o ndu'ni na.

1 JUAN 1:6 Referans Kwoze

1 JUAN 4:20

Ngu' nu ñacui̱ ndi'ya̱: “Ntsu'u tsa tyiquee na' ña'a̱ na' ji'i̱ ycui' Ndyosi”, lo'o li' ña'a̱ ti tya liye' ti' ngu' bi' ña'a̱ ngu' ji'i̱ tya'a ngu', cha' cuiñi ti laca nu nchcui' ngu' bi'. Ndi'ya̱ ndyu'u cha' bi': taca ña'a̱ na ji'i̱ tya'a ñati̱ na, pana ycui' Ndyosi ni, bilya ña'a̱ na ji'i̱ Ni tsiya' ti; bi' cha' lacua, si ná ntsu'u tyiquee na ña'a̱ na ji'i̱ tya'a ngusñi na cha' ji'i̱ Jesucristo, li' ná taca ñacui̱ na cha' ntsu'u tyiquee na ña'a̱ na ji'i̱ ycui' Ndyosi Sti na.

1 JUAN 2:4

Cuiñi tsa ñati̱ nu nacui̱ cha' ntsu'u cha' ji'i̱ ngu' lo'o Jesucristo, si ná ndaquiya' ngu' ji'i̱ cña nu nclyo Ni ji'i̱ ngu'; ná liñi cha' nu ntsu'u tyiquee ngu' bi'.

1 JUAN 1:10

Ñi'ya̱ si cua nacui̱ na cha' na cuiñi ycui' Ndyosi, jua'a̱ ndyu'u cha' si ñacui̱ na cha' ná ntsu'u qui'ya ji'na tsiya' ti; ná ngusñi su̱u̱ cha' ji'i̱ ycui' Ndyosi ne' cresiya ji'na, si tya ñacui̱ na jua'a̱.

SAN JUAN 8:12

Chaca quiya' nda Jesús cha' lo'o ngu' ne' laa bi'. ―Na' laca̱ nu nda̱ xee cha' tyu'ú ne' cresiya ji'i̱ ñati̱ ―nacui̱ yu―. Tyanu xee lubii jna' ne' cresiya ji'i̱ ñati̱ nu xñi cha' jna', lo'o jua'a̱ ná nga'a̱ cha' tye chalyuu ji'i̱ ngu' bi' li'; nga'aa ntsu'u cha' tya'a̱ yu'u ngu' bi', ñi'ya̱ nu ndu'ni ngu' nu ná ntsu'u xee jna' ne' cresiya ji'i̱ tsiya' ti.

SAN JUAN 12:35

Li' nguxtyacui Jesús cha' lo'o ngu': ―Tya xi ca tsa̱ tya tyi'i̱ na' slo cu'ma̱, na' nu ta̱ xee nu tyu'ú ne' cresiya ji'i̱ ñati̱ ―nacui̱ Jesús―. Bi' cha' juani yaa ma̱ su nga'a̱ cha' tsaa ma̱ lo'o tya xee ti, cha' ná cua'ni nu cuxi ngana ji'i̱ ma̱, nu cuxi nu nda talya chalyuu. Nu lo'o talya ña'a̱ su ndya'a̱ na, ná jlo ti' na ma nde ndya'a̱ na li'.

SANTIAGO 2:14

Cu'ma̱ tya'a ngusñi na cha' ji'i̱ Jesús, ná taca ñacui̱ na cha' ntsu'u cha' ji'na lo'o Jesús, si ná lo'o ndu'ni na cha' tso'o nu xtyucua ji'i̱ tya'a ñati̱ na. Sca ti ngusñi tso'o na cha' ji'i̱ Jesús, si cua'ni na cha' tso'o jua'a̱; li' tyaja'a̱ Ni cua'ni lyaá Ni ji'na.

SAN JUAN 12:46

Cua lijya̱ na' chalyuu cha' caca na' ñi'ya̱ laca sca xee nu tyu'ú ne' cresiya ji'i̱ ñati̱. Lo'o xñi ñati̱ cha' jna', li' nga'aa tyi'i̱ ngu' chalyuu ñi'ya̱ laca si ná ntsu'u xee ne' cresiya ji'i̱ ngu' xqui'ya cha' cuxi nu ndu'ni ngu'.

1 JUAN 1:3

Juani culu'u ya ji'i̱ ma̱ cua ña'a̱ ca cha' nu cua na'a̱ ya, culu'u ya cua ña'a̱ ca cha' nu cua ndyuna ya. Chañi laca cha' stu'ba ntsu'u tyiquee na lo'o ycui' Ndyosi Sti na, jua'a̱ lo'o Jesucristo nu sca ti Sñi' ycui' Ni. Lo'o juani cua nti' ya cha' stu'ba ti caca tyiquee ma̱ lo'o ya;

SAN JUAN 11:10

Lo'o tyu'u ta'a̱ na talya, li' tyacua sca na nga'a̱ tyucui̱i̱ quiya' na, cha' ná tyaca̱' xee ña'a̱ na ji'i̱ li'.

SANTIAGO 2:18

Ná tyiquee' ñacui̱ sca ñati̱ ji'na: “Tso'o tsa ngusñi ma̱ cha' ji'i̱ ycui' Ndyosi tu'ni. Pana nu na' ni, nti' na' cha' cuayá' tsa cuentya ji'i̱ ycui' Ndyosi masi cua'ni na' xi cha' tso'o lo'o ñati̱”, ñacui̱ ngu'. Tso'o lacua. Ndi'ya̱ chcui' na' lo'o ngu' bi' li': “Cacha' ma̱ 'na lacua cha' cua ngusñi ma̱ cha' ji'i̱ ycui' Ni, masi ndyu'ni ma̱ cha' tso'o lo'o ñati̱; pana laja lo'o ndyu'ni tso'o na' lo'o ñati̱, li' ca cuayá' ti' ma̱ cha' chañi cha' ngusñi na' cha' ji'i̱ ycui' Ni”, ñacui̱ na' ji'i̱ ngu' bi'.

1 JUAN 1:8

Si ñacui̱ na cha' ná ntsu'u qui'ya ji'na tsiya' ti, na ñilo'o na ji'i̱ ycui' ca ti na li', cha' ná nchca chcui' na cha' liñi.

SANTIAGO 2:16

Si chcui' ma̱ lo'o ngu' bi' ndi'ya̱: “Xtyucua Ni ji'i̱ ma̱”, ñacui̱ ma̱ ji'i̱ ngu', “cacu' ma̱ ste' ma̱ cha' caca chcatsu̱ ma̱, cacu tso'o ma̱ tyaja”, ñacui̱ ma̱ ji'i̱ ngu', pana ná nda ma̱ na nu lyiji ji'i̱ ngu' bi' li', ¿ha tso'o nti' ma̱ cha' nchcui' ma̱ lo'o ngu' jua'a̱? Ná tso'o chcui' ma̱ jua'a̱, cha' cua ngujlyaa ti' ma̱ cha' ji'i̱ ycui' Ndyosi si chcui' ma̱ jua'a̱;

SAN MATEO 7:22

Nu lo'o tyalaa hora cha' cua'ni cuayá' ycui' Ni ji'i̱ lcaa ñati̱ chalyuu, tyu'u tucua quiña'a̱ ñati̱ nu ñacui̱ 'na: “Xu'na, Xu'na”, ñacui̱ ngu' 'na, “lo'o cuare, cua nchcui' ya lo'o ñati̱ cuentya jinu'u̱. Chacuayá' jinu'u̱ ngulo ya ji'i̱ cui'i̱ cuxi nu ngusñi ji'i̱ ñati̱, lo'o jua'a̱ cua ngua'ni ya xa' lo cha' tlyu chacuayá' jinu'u̱”, ñacui̱ ngu' bi' 'na.

1 TIMOTEO 4:2

Ntsu'u ngu' nu nchcui' tucua lo cha', nu nga'aa ntyuju'u ti' cha' ngusñi ngu' cha' cuiñi nu nchcui' nu xña'a̱; ji'i̱ ngu' cuiñi bi' cuna xi ngu' tya'a na, tyu'utsu' ngu' ji'i̱ tyucui̱i̱ tso'o li'.

SAN JUAN 8:55

masi ná ndyuloo ma̱ ji'i̱ Ni, pana jua'a̱ ndu'ni ma̱. Nslo na' ji'i̱ Ni tu'ni. Ná taca ñacui̱ na' cha' ná nslo na' ji'i̱ Ni; cuiñi na' si jua'a̱ ñacui̱ na', ñi'ya̱ laca cu'ma̱, cha' cuiñi tsa ma̱. Chañi cha' nslo na' ji'i̱ Ni, jua'a̱ ndaquiya' na' ji'i̱ lcaa cha' nu nchcui' Ni lo'o na' ―nacui̱ Jesús ji'i̱ ngu' judío bi'―.