1 CORINTIOS 8:13 - Chatino Tataltepec

¹³ Lo'o jua'a̱ na', tso'o la masi ná cacu na' cuaña' nu cua nscua slo jo'ó, cha' jua'a̱ ná cua'ni ngu' tya'a na' cha' cuxi xqui'ya na' li'. Ná nti' na' cha' tyu'utsu' ngu' tya'a na' ji'i̱ tyucui̱i̱ liñi.

1 CORINTIOS 8:13 Referans Kwoze

ROMANOS 14:21

Tso'o la masi ná cacu ma̱ cuaña' tsiya' ti, masi ná co'o ma̱ lcui tsiya' ti, si nti' ma̱ cha' cuxi laca na bi' cuentya ji'i̱ tya'a ñati̱ ma̱. Ni sca na ná cua'ni ma̱ nu cua'ni cha' tya'a̱chu̱' ngu' tya'a ma̱ ji'i̱ Jesús, cha' cua'ni ngu' cha' cuxi, cha' quiñu'u̱ cresiya ji'i̱ ngu'.

2 CORINTIOS 11:29

Lo'o ná ndyiji juersa ji'i̱ scaa ngu' bi', li' caca ñu'u̱ ti' na' cuentya ji'i̱ ngu' bi'; lo'o ndyacua qui'ya ji'i̱ scaa ngu' bi', la cui' jua'a̱ na', xñi'i̱ tsa ti' na' li'.

2 CORINTIOS 6:3

Ná nti' ya cha' xtyí lo'o ngu' ji'i̱ ya xqui'ya cña nu ndyu'ni ya, cha' lo'o ji'i̱ ycui' Ndyosi xtyí lo'o ngu' bi' li'; bi' cha' ná ta ya chacuayá' cha' tyu'u tucua sca cha' cuxi, nu xqui'ya bi' taca chcui' ngu' ji'i̱ ya.

1 CORINTIOS 13:5

Si chañi cha' bi', ná cua'ni suba' na lo'o ngu', si'i xcui' cha' ji'na ti tya'a̱ tyiquee na, ni ná ca ñasi̱' na ji'i̱ ngu' lu'ba ti. Ntsu'u cha' clyu ti' ji'na lo'o ngu', si chañi cha' ntsu'u tyiquee na ña'a̱ na ji'i̱ ngu'.

1 CORINTIOS 6:12

Ntsu'u quiya' nchcui' ñati̱: “Ntsu'u chacuayá' 'na cha' cua'ni na' cua ña'a̱ ca cha', ñi'ya̱ nu nti' na' cha' cua'ni na'”, nacui̱ ngu'. Chañi cha' ji'i̱ ngu', pana ntsu'u cha' nu cua'ni na nu ná ntsu'u su xtyucua ji'na. Lo'o na, taca ñacui̱ na cha' ntsu'u chacuayá' ji'na cha' cua'ni na ñi'ya̱ nu nti' ti na cua'ni na; pana ná tso'o si qui'i̱ tsa na ji'i̱ sca cha' nu ndu'ni na ña'a̱ cuayá' nu nga'aa caca xtyanu na ji'i̱.

1 CORINTIOS 10:33

Lcaa su ndyu'ni na' cña ndube ti' na' ji'i̱ xa' ñati̱, si caca tso'o cresiya ji'i̱ ngu' lo'o cua'ni na' cña bi'. Si'i na tyacua cha' tso'o ji'i̱ ycui' ca na', nti' na' cha' caca tso'o cresiya ji'i̱ cua ña'a̱ ca ñati̱, cha' caja ñi'ya̱ clyaá ngu' ji'i̱ nu cuxi li'.

1 CORINTIOS 9:12

Xa' la tya'a ndyu'ni ya cña ndyiji na laca nu lyiji ji'i̱ ngu' nu lo'o nda ma̱ xi xcaya' ngu' bi'. ¿Ha ná tso'o si la cui' ti cha' caja ji'i̱ ya, ñi'ya̱ nu ndyiji ji'i̱ ngu' bi'? Tsa bi' ti cha', ná ndijña ya cha' tso'o bi' ji'i̱ ma̱ tsiya' ti. Ndalo tsa ya ji'i̱ cua ña'a̱ ca cha' ti'í nu ndyacua ji'i̱ ya, cha' ná nti' ya tsiya' ti tacu̱' ya ji'i̱ cha' tso'o ji'i̱ Cristo nu nchcui' ya lo'o ma̱, cha' ná cuna ñati̱ ji'i̱ cha' bi'.

SAN MATEO 17:27

Pana ná nti' na cha' ca ñasi̱' ngu' ji'na, ngu' nu laca loo ne' laa tonu, bi' cha' yaa clya nu'u̱ to' tayu' cha' cu̱ nu'u̱ chcua̱ xñi cualya lo hitya, cha' xñi nu'u̱ ji'i̱ sca cualya. Li' taya' nu'u̱ ji'i̱ cualya nu caja jinu'u̱ clyo, scana tu'ba cualya bi', cha' culo nu'u̱ cñi nu ntsu'u tu'ba ni'; tyu'u scua cñi bi' cha' ta nu'u̱ cñi ji'i̱ ngu' cuentya jinu'u̱, lo'o jua'a̱ cuentya jna'.

LOS HECHOS 15:20

Tsa bi' ti cha' cua'ni na, nti' na'; scua na xi cha' tso'o cha' tsaa slo ngu' bi' nu nacui̱ ndi'ya̱: Ná tso'o si cacu ngu' msta̱ ji'i̱ jo'ó, xqui'ya cha' cua'ni ñu'u̱ msta̱ bi' ji'i̱ cresiya ji'na si cacu na ji'i̱; lo'o jua'a̱ ná tso'o tsiya' ti tyu'u cha' ji'i̱ ngu' lo'o clyo'o xa' ñati̱; ná tso'o cacu ngu' na'ni nu ná ndye ndyalú tañi ji'i̱ ni', nu lo'o cua ndyujuii ngu' ji'i̱; ni ná tso'o cacu ngu' tañi.

ROMANOS 14:13

Nga'aa chcui' cuxi ma̱ ji'i̱ cña nu ndyu'ni scaa ngu' tya'a ngusñi ma̱ cha' ji'i̱ Jesús lacua. Ndi'ya̱ cua'ni ma̱ juani: nga'aa ta ma̱ tyempo ji'i̱ ngu' tya'a ma̱ cha' cua'ni ngu' cha' cuxi xqui'ya cu'ma̱.

1 CORINTIOS 10:32

Ná ta ma̱ chacuayá' tyu'utsu' ni tsaca ngu' ji'i̱ tyucui̱i̱ liñi ji'i̱ Cristo; ni ngu' judío, ni ngu' xa' tsu' nu si'i ngu' judío laca, ni tsaca ñati̱ tya'a ngusñi ma̱ cha' ji'i̱ ycui' Ndyosi, ná tso'o tsiya' ti si tyú ngu' ya' nu xña'a̱.