1 CORINTIOS 5:8 - Chatino Tataltepec

⁸ Bi' cha' tso'o la si tyi'u ti' na ji'i̱ Cristo lcaa tsa̱, cha' xa' ña'a̱ cua'ni na li'; tso'o ti cua'ni na lo'o ñati̱, xcui' cha' liñi chcui' na lo'o ñati̱. Laca na ñi'ya̱ laca xlyá cui nu ndya' chaca quiya' li'; nga'aa ntsu'u cha' cua'ni na ñi'ya̱ nu ngua'ni na sa'ni lo'o ntsu'u cha' cuxi ji'na, lo'o ntsu'u cha' suba' ji'na, cha' ngua na ñi'ya̱ ngua tsa ycu' xlyá nu ná tso'o tyempo bi'.

1 CORINTIOS 5:8 Referans Kwoze

SAN LUCAS 12:1

Cua ndyu'u ti'i̱ tyu̱u̱ tsa mil tya'a ñati̱ slo Jesús li'. Tachaa tsa ndi'i̱ ngu' bi', ña'a̱ cuayá' nu nsatá quiya' ngu' ji'i̱ tya'a ngu'. Laja li' nchcui' Jesús lo'o nu ngu' nu ndyaca tsa'a̱ ji'i̱: ―Tii ti' ma̱ ji'i̱ cña nu ndyu'ni ngu' fariseo, nu ngu' nu tacati tsa ndu'ni ycui' ca ngu', nti' ngu'.

SAN MARCOS 8:15

Lo'o li' nda Jesús chaca cui̱i̱ lo'o ngu': ―Tii ti ti' ma̱ tyi'i̱ ma̱ ―nacui̱ yu―, cui'ya ma̱ cuentya ñi'ya̱ ndu'ni scua̱ tiye' nu nda ngu' bi', nu ngu' fariseo lo'o ngu' nu cuentya ji'i̱ rey Herodes ni.

SAN MATEO 16:6

Lo'o li' ndi'ya̱ nchcui' Jesús lo'o ngu': ―Tii ti ti' ma̱ tyi'i̱ ma̱ ―nacui̱ Jesús ji'i̱ ngu' bi'―. Cui'ya ma̱ cuentya ñi'ya̱ ndu'ni scua̱ tiye' nu nda ngu', la cui' ngu' fariseo lo'o ngu' saduceo ―nacui̱.

1 PEDRO 4:2

Lo'o li' nu cha' cuxi nu ndiya ti' ñati̱ chalyuu ni, nga'aa si'i cha' bi' nu caca loo ji'i̱ ma̱ lcaa tsa̱ lo'o ndi'i̱ ma̱ chalyuu; xcui' cña nu ndiya ti' ycui' Ndyosi cha' cua'ni ma̱, bi' laca cña nu cua'ni ma̱, cha' sca ti ycui' Ndyosi caca loo ji'i̱ ma̱ li'.

EFESIOS 6:24

Lo'o jua'a̱ nti' na' cha' ña'a̱ ti cua'ni Ni cha' tso'o lo'o lcaa cu'ma̱ nu ntsu'u tyiquee ma̱ ji'i̱ Jesucristo nu Xu'na na, cu'ma̱ nu nga'aa nti' tya'a̱chu̱' ma̱ ji'i̱ Cristo. Chañi cha' jua'a̱ caca cha' bi'.

1 CORINTIOS 5:6

Si'i cha' tso'o ndu'ni ma̱ cha' ndu'ni tyucuaa ti' ma̱ ji'i̱ tya'a ma̱. ¿Ha ná jlo ti' ma̱ ñi'ya̱ ndu'ni scua̱ tiye'? Masi xti ti scua̱ tiye' tyu'u ji'i̱ catyá xlyá, cua'ni bi' cha' tyacui̱ quiña'a̱ scua̱ li'.

SAN JUAN 1:47

Lo'o na'a̱ Jesús cha' lijya̱ Natanael slo, li' nacui̱: ―Nde cua lijya̱ sca ngu' Israel nu chañi cha' ndyu'ni tlyu ji'i̱ ycui' Ndyosi. Ná ntsu'u cha' cuiñi ji'i̱ yu jua tsiya' ti.

SAN MATEO 16:12

Ngua cuayá' ti' ngu' li' cha' nchcui' Jesús ji'i̱ lcaa cha' cuxi nu nclu'u ngu' fariseo lo'o ngu' saduceo ji'i̱ ngu', cha' nga'aa tso'o xñi ngu' cha' bi'; si'i cha' ji'i̱ scua̱ tiye' nu ndya' xlyá lo'o nu nti' Jesús chcui' tsa̱ bi'.

2 CORINTIOS 8:8

Si'i na nclyo na' cña ji'i̱ ma̱ re; nu lo'o ña'a̱ ma̱ ji'i̱ xa' la ngu' tya'a na, cha' nti' tsa ngu' xtyucua ngu' ji'i̱ tya'a ñati̱ ji'i̱ Cristo, li' taca cua'ni cuayá' ma̱ ji'i̱ ycui' ca ma̱ si chañi ca cha' ntsu'u tyiquee ma̱ ña'a̱ ma̱ ji'i̱ la cui' ngu' tya'a ma̱.

2 CORINTIOS 1:12

Tso'o tsa nti' ya cha' xcui' ngua'ni tyucui tyiquee ya lo'o ma̱, xcui' nda ya cha' liñi lo'o ma̱, ñi'ya̱ nu ngua'ni ya lo'o xa' ñati̱; jua'a̱ nti' ya. Ngua ji'i̱ ya cua'ni ya jua'a̱ lo'o ma̱ xqui'ya cha' lye tsa ngua'ni tya'na ti' ycui' Ndyosi ji'na laja ti; si'i cha' nda'ya cha' hique ti ya, bi' cha' ndu'ni ya jua'a̱.

1 CORINTIOS 5:1

Cua ngujui cha' 'na, cua ndyuna na' cha' suba' tsa ngua'ni sca ñati̱ tya'a ngusñi ma̱ cha' ji'i̱ Jesucristo; ngua'ni yu sca cña nu cuxi tsa. Pana ni ngu' xa' tsu', ná ndu'ni ngu' tsa lo cua cha' cuxi, masi ná ndaquiya' ngu' ji'i̱ ycui' Ndyosi tsiya' ti. Ndi'ya̱ cña ngua'ni yu: ngua'a̱ yu lo'o xtya'a̱ miña'a̱ yu.

1 CORINTIOS 3:3

cha' ña'a̱ ti tya ndiya la ti' ma̱ ña'a̱ cha' cuxi nu ndyu'ni ñati̱ chalyuu. Nu lo'o liye' ti' ma̱ ji'i̱ tya'a ñati̱ ma̱, nu lo'o lye nxu̱u̱ tya'a ma̱, tyaca̱' tyijyu' cha' ndiya la ti' ma̱ cha' cuxi nu ntsu'u nde chalyuu. Tya ndu'ni ma̱ ñi'ya̱ nu ndu'ni ñati̱ cuxi.

2 CORINTIOS 2:17

Si'i ngana ndyu'ni ya lo'o cha' ji'i̱ ycui' Ndyosi bi', si'i na nchcutsa'a̱ ya ji'i̱ lo'o xa' la cha'; tyucui ti' tyiquee ya nchcui' ya lo'o ñati̱ ñi'ya̱ laca si na ndi'i̱ ycui' Ndyosi slo ya, xqui'ya cha' ycui' Ndyosi laca nu ngua'a̱ loo ji'i̱ ya cha' cua'ni ya cña bi' cuentya ji'i̱ Cristo.