1 CORINTIOS 4:10 - Chatino Tataltepec

¹⁰ ¡Xqui'ya ycui' Cristo tonto tsa ya tu'ni! Lo'o cu'ma̱ ni, nti' ma̱ cha' tso'o tsa jlo ti' ma̱ cha' ji'i̱ Cristo. ¡Xti la cña nchca ji'i̱ cuare, nguula la cña nchca ji'i̱ cu'ma̱ nti' ma̱! ¡Chiya'a̱ la ndu'ni ngu' lo'o cuare tu'ni; chi̱ la ndu'ni ngu' loo cu'ma̱!

1 CORINTIOS 4:10 Referans Kwoze

1 CORINTIOS 2:3

Lo'o ndyalaa na' su ndi'i̱ ma̱, nguna'a̱ tya ti' na' ndu̱ na' li'; nchcua̱ tya na' cha' ngulacua tsa ti' na' ni cha' xacui̱ ma̱ 'na li'.

LOS HECHOS 26:24

Nu lo'o nchcui' Pablo jua'a̱ lo'o ngu', li' lye nchcui' Festo lo'o: ―Na loco nu'u̱, Pablo ―nacui̱ Festo ji'i̱―. Cha' lye tsa nchcui' nu'u̱ lo quityi, bi' cha' cua ngüichi̱ yaa hique nu'u̱ ―nacui̱.

LOS HECHOS 17:18

Cua ntsu'u sca taju ngu' nde quichi̱ bi', ngu' nu ndyaca tsa'a̱ ji'i̱ cha' nu nclu'u ngu' epicúreo, lo'o jua'a̱ ntsu'u chaca taju ngu' nu ndyaca tsa'a̱ ji'i̱ cha' nu nclu'u ngu' estoico. Ndyacua tya'a nu ngu' nu ndyaca tsa'a̱ tyucuaa lo cha' bi' lo'o Pablo li'. Nchcui' tsa ngu' cha' ji'i̱ yu lo'o tya'a ngu': ―¿Ni cha' nda nu qui'yu re nu nchcui' tsa lo'o na? ―nacui̱ ngu' ji'i̱ tya'a ngu'. ―¿Ha si'i cha' ji'i̱ xa' jo'ó nchcui' yu? ―nacui̱ tya'a ngu' li'. Pana cua ndyuna ngu' lo'o ngulu'u Pablo cha' ji'i̱ Jesús, cha' ngulu'u yu ji'i̱ ngu' ñi'ya̱ ngua cha' ndyu'ú Jesús chaca quiya'.

1 PEDRO 4:14

Nu lo'o nchcui' ngu' cha' ti'í ji'i̱ ma̱ xqui'ya Cristo, ca tso'o tyiquee ma̱ cha' ndi'i̱ Xtyi'i ycui' Ndyosi lo'o ma̱, lo'o jua'a̱ tlyu tsa cha' tso'o ntsu'u ji'i̱ ycui' Ni. Nchcui' ngu' bi' cha' cuxi ji'i̱ ycui' Ndyosi; pana cu'ma̱ ni, tso'o tsa si tya cua'ni tlyu ma̱ ji'i̱ Ni.

2 CORINTIOS 13:9

Si tso'o tsa ndyanu tachaa cha' ji'i̱ ycui' Ndyosi ne' cresiya ji'i̱ ma̱, tso'o tsa nti' ya li', masi xti ti cha' nchca ji'i̱ ycui' ya; bi' cha' ndijña ya cha' ji'i̱ ycui' Ndyosi cuentya ji'i̱ cu'ma̱ lacua, cha' jua'a̱ caca tyucui la ti' tyiquee ma̱ ña'a̱ ma̱ ji'i̱ ycui' Ndyosi.

1 CORINTIOS 3:18

Cua ngusñi na cha' ji'i̱ Cristo, bi' cha' tso'o la si ná cñilo'o na ji'i̱ ycui' ca na cha' ngua tsa ji'na, ñi'ya̱ ndu'ni ñati̱ chalyuu nu ngua tsa ji'i̱ ngu'. Ná tso'o si jua'a̱ nclyacua ti' na; nga'a̱ cha' culacua ti' na cha' ná ngua ji'na tsiya' ti, lo'o li' taca cua'ni ycui' Ndyosi cha' ca'ya sca cha' liñi hique na.

1 TESALONICENSES 4:8

Si'i sca cha' nu nchcui' ñati̱ chalyuu ti laca cha' nu nchcui' na' lo'o ma̱ juani, cha' liñi nu cua nda ycui' Ndyosi lo'o na laca cha' bi'; bi' cha' si ná taquiya' ma̱ ji'i̱ cha' bi', na cua nguxtyanu ma̱ ji'i̱ ycui' Ndyosi nu nda Xtyi'i ycui' Ni cha' tyanu Ni ne' cresiya ji'na.

2 CORINTIOS 11:29

Lo'o ná ndyiji juersa ji'i̱ scaa ngu' bi', li' caca ñu'u̱ ti' na' cuentya ji'i̱ ngu' bi'; lo'o ndyacua qui'ya ji'i̱ scaa ngu' bi', la cui' jua'a̱ na', xñi'i̱ tsa ti' na' li'.

2 CORINTIOS 11:19

¡Nu cu'ma̱ nchca tsa ji'i̱ ma̱! Bi' cha' tso'o tsa ndalo tyiquee ma̱ ji'i̱ ngu' nu tonto ti ndu'ni.

2 CORINTIOS 10:10

Nacui̱ ngu': Tonu tsa cha' nu nda nu Pablo bi', tyaala tsa ndu'ni yu lo'o na, nu lo'o ndi'i̱ yu tyijyu'. Nda yu cha' nu lijya̱ ca slo na, nacui̱ ngu' ji'i̱ ma̱, pana ná nchca culo tso'o yu cña ji'na nu lo'o ndi'i̱ yu slo na; ná nduna na tsiya' ti cha' nu nda yu li', nacui̱ ngu' bi' li'.

1 CORINTIOS 10:12

bi' cha' tso'o si cube ti' ma̱ cha' ná tyu'utsu' ma̱ ji'i̱ tyucui̱i̱ nu liñi ca, si nti' ma̱ cha' tso'o ti tyi'i̱ cresiya ji'i̱ ma̱, cha' ná tyacua sca cha' cuxi ji'i̱ ma̱ tsiya' ti.

1 CORINTIOS 4:8

Ndu'ni ma̱ cha' ndulo tsa cha' ji'i̱ ycui' ma̱, nga'aa ntsu'u na nu lyiji ji'i̱ ma̱ tsiya' ti, nti' ma̱; ndyu'ni ma̱ ñi'ya̱ nu ndu'ni ngu' culiya', ndi'i̱ ma̱ ñi'ya̱ ndi'i̱ nu laca loo chalyuu. Lo'o cuare ni, si'i ñati̱ tlyu laca ya, nti' ma̱. Pana si chañi cha' laca ma̱ loo ji'i̱ ya, ¿ha ná ta ma̱ chacuayá' masi caca stu'ba xi cha' ji'i̱ ya lo'o ma̱ li', cha' lo'o ya caca ya ñati̱ tlyu li'?

1 CORINTIOS 3:2

bi' cha' tiya' ti ngulu'u na' scaa cha' ji'i̱ ma̱. Ñi'ya̱ laca lo'o sca cubi' cuañi', styi' xtya'a̱ ti ntyi' cubi' bi', cha' ná nchca cacu tso'o; jua'a̱ ngua cu'ma̱, cha' ná ngua cuna tso'o ma̱ scaa cha'. Masi juani tya lyiji cua'ni yala ma̱ cha' ca tsa'a̱ tso'o ma̱,

1 CORINTIOS 2:14

Pana ñati̱ nu ná stu'ba cha' ji'i̱ lo'o ycui' Ndyosi ni, ná taca ca cuayá' ti' ngu' bi' ni sca cña nu ndu'ni ycui' Ndyosi cuentya ji'i̱ Xtyi'i ycui' Ni; ná nchca ca cuayá' ti' ngu' bi' ji'i̱ cha' bi' tsiya' ti. Sca ti si ntsu'u Xtyi'i ycui' Ndyosi ne' cresiya ji'na, li' caca cuayá' ti' na ni cha' laca bi', bi' cha' ná sca cha' laca nti' ngu' bi'.

LOS HECHOS 17:32

Nu lo'o ndyuna ngu' quichi̱ cha' bi', cha' cua ndyu'ú sca ñati̱ chaca quiya' ca su ntsiya ngujuii, li' nxtyí lo'o tsa ngu' ji'i̱ Pablo. Lo'o jua'a̱ ntsu'u xi xa' la ngu' nu nchcui' lo'o yu: ―Culu'u nu'u̱ cha' bi' ji'i̱ ya chaca quiya' chaca tsa̱ ―nacui̱ ngu' bi' ji'i̱ yu.

LOS HECHOS 9:16

Culu'u na' ji'i̱ yu ñi'ya̱ cha' ti'í nu tyacua ji'i̱ yu lo'o ta yu cha' jna' lo'o ñati̱.

SAN LUCAS 18:9

Nde chaca cui̱i̱ nu nda Jesús lo'o ngu'; sca cui̱i̱ cuentya ji'i̱ ngu' nu tyixi tsa ndu'ni ji'i̱ ycui' ca ti ngu', cha' xcui' cha' liñi ndu'ni ngu' bi' nti' ngu', cha' xcui' nxtyí lo'o ti ngu' bi' ji'i̱ xa' ñati̱. Ndi'ya̱ nchcui' Jesús li':

SAN LUCAS 10:16

―Ñati̱ nu cua'a̱ jyaca̱ ji'i̱ cha' nu ta cu'ma̱ lo'o, ñi'ya̱ si ndaca'a̱ jyaca̱ ngu' bi' ji'i̱ cha' nu ta na' lo'o ngu' laca; lo'o ñati̱ nu xlyú cha' hichu̱' cu'ma̱, ñi'ya̱ si nxlyú ngu' bi' cha' hichu̱' na' laca. Lo'o jua'a̱ ñati̱ nu xlyú cha' hichu̱' na' ni, na nxlyú ngu' cha' bi' hichu̱' ycui' Ndyosi nu nda jna' lijya̱a̱; jua'a̱ laca cha' ―nacui̱ Jesús ji'i̱ ngu'. Ndu'u ngu' ndyaa ngu' li'.

SAN LUCAS 6:22

’Lo'o jua'a̱ tso'o ti caca tyiquee cu'ma̱ masi ti'í ti' ngu' ña'a̱ ngu' ji'i̱ ma̱, masi culo'o ngu' ji'i̱ ma̱ ca su ndi'i̱ ma̱, masi suba' tsa chcui' ngu' lo'o ma̱, masi hasta nga'aa nti' ngu' chcui' ngu' lo'o ma̱, xqui'ya cha' jlya ti' ma̱ jna', na' nu cua nda Ni lijya̱a̱ cha' caca na' ñati̱;

SAN MATEO 24:9

’Nu lo'o xana cha' cuxi bi', tejeya' ngu' ji'i̱ ma̱ cha' xcube' ngu' ji'i̱ ma̱, hasta ña'a̱ cuayá' nu cujuii ngu' ji'i̱ ma̱, cha' ntsu'u ngu' tyucui ña'a̱ chalyuu nu caca ti'í ti' ngu' ña'a̱ ngu' ji'i̱ ma̱ xqui'ya na';

SAN MATEO 5:11

’Lo'o jua'a̱ tso'o ntsu'u tyiquee ma̱ masi xtyí lo'o ngu' ji'i̱ ma̱ xqui'ya na', masi lya' tsa ti' ngu' ji'i̱ ma̱, masi cuiñi tsa ngu', masi chcui' tsa ngu' cuentyu ji'i̱ ma̱ xqui'ya na'.

1 CORINTIOS 1:21

Ngua'ni Ni cha' ná caja ñi'ya̱ tyuloo ñati̱ chalyuu ji'i̱ Ni cha' hique ti ngu'; jua'a̱ tso'o la, ngua ti' ycui' Ndyosi. Pana ndu'ni lyaá Ni ji'i̱ ñati̱ nu xñi cha' ji'i̱ Ni; la cui' cha' nu ndacha' na ji'i̱ ngu', masi cha' tonto nchcui' na, nacui̱ ngu' li'.

1 CORINTIOS 1:23

Pana nu na ni, ndacha' na ji'i̱ ngu' cha' ji'i̱ Cristo nu cua ngujuii lo crusi cha' cua'ni lyaá ji'na. Li' chiya'a̱ nti' ngu' judío lo'o ndyuna ngu' cha' nu nchcui' na re; lo'o jua'a̱ ngu' xa' tsu', cha' tonto nchcui' na nti' ngu' bi', si'i cha' bi' tsiya' ti nti' ngu' bi'.

1 CORINTIOS 1:25

Tso'o tsa ndyu'u cua ña'a̱ ca cha' nu nchcui' ycui' Ndyosi, masi ñacui̱ ñati̱ chalyuu cha' tonto tsa laca cha' bi'; pana cuxi la ndyu'u lcaa cha' tlyu nu nda ñati̱ chalyuu nu nchca tsa ji'i̱, nti' ngu'. La cui' jua'a̱ nguula la cña ndyaca, cua ña'a̱ ca cña nu ndu'ni ycui' Ndyosi, masi ñacui̱ ngu' cha' ná nchca ji'i̱ Ni; pana cuxi la cña ndyaca nu ndu'ni ycui' ca ñati̱.

2 CORINTIOS 6:8

Ntsu'u quiya' nu ndu'ni chi̱ ngu' loo ya; xa' la tyempo, li' nchcui' ngu' cha' ti'í ji'i̱ ya. Nchcui' ngu' cha' tso'o ji'i̱ ya, lo'o jua'a̱ nchcui' ngu' cha' cuxi ji'i̱ ya. Nchcui' ngu' cha' nu cuiñi tsa ya; xa' la tyempo, li' nchcui' ngu' cha' liñi tsa cha' nu nchcui' ya.

2 CORINTIOS 4:12

Jua'a̱ laca cha' ji'i̱ cuare, na ncliji tyucui ña'a̱ ya xqui'ya cha' ti'í nu ndyacua ji'i̱ ya nde chalyuu; pana cu'ma̱ ni, cua ngujui chalyuu nu ná nga'a̱ cha' tye ji'i̱ ma̱ xqui'ya cña nu ngua'ni ya.