1 CORINTIOS 1:5 - Chatino Tataltepec5 Ntsu'u tsa cha' nu cua nda ycui' Ndyosi lo'o ma̱, cha' cua ngua stu'ba cha' ji'i̱ ma̱ lo'o Cristo; bi' laca cha' nu ntsu'u ne' cresiya ji'i̱ ma̱ juani. Bi' cha' cua jlo tso'o ti' ma̱ lcaa cha' nu ji'i̱ Jesús, lo'o jua'a̱ nchca ji'i̱ ma̱ nchcui' ma̱ cha' bi' lo'o ñati̱. Gade chapit la |
1 CORINTIOS 1:5
27 Referans Kwoze
Nu cu'ma̱ ni, tso'o tsa jlya ti' ma̱ ji'i̱ ycui' Ndyosi, tso'o tsa nchca ji'i̱ ma̱ culu'u ma̱ cha' ji'i̱ ycui' Ndyosi ji'i̱ xa' ñati̱, tso'o tsa nchca cuayá' ti' ma̱ ñi'ya̱ ndyu'u sca cha'; na cua nti' tsa ma̱ xtyucua ma̱ ji'i̱ ngu', la cui' jua'a̱ ntsu'u tsa tyiquee ma̱ ña'a̱ ma̱ ji'i̱ ya. Nchca tsa ji'i̱ ma̱ cuentya ji'i̱ lcaa cña, nti' ya; bi' cha' nclyacua ti' ya cha' ná tyiquee' yala tsa cua'ni ma̱ cha' xti'i̱ ma̱ cñi bi'.
Nu lo'o nti' ma̱ cha' tso'o tsa nchca ji'i̱ ma̱ nchcui' ma̱, cha' tso'o tsa nduna ma̱ scaa cha' nu nda ñati̱ lo'o ma̱, li' xcui' cha' tso'o ti cua'ni ma̱ laja lo'o ndi'i̱ ma̱ chalyuu, cha' taca cui'ya xa' la ñati̱ cuentya ji'i̱ ma̱ cha' ñati̱ tso'o laca ma̱. Ná quiña'a̱ cha' tyu'u tyiquee ma̱ ña'a̱ ma̱ ji'i̱ ngu', pana tso'o ti chcui' ma̱ lo'o ngu'.
La cui' jua'a̱ tso'o si chcui' ma̱ lo'o ycui' Ndyosi Sti na cuentya jna', cha' tya ta la Ni cha' nu chcui' na' lo'o ñati̱, cha' caca tlyu la tyiquee na' chcui' na' lo'o ñati̱ ña'a̱ cuayá' nu ca cuayá' ti' ngu' cha' taca cua'ni lyaá Cristo ji'i̱ ngu' ya' nu cuxi; sca cha' nu bilya cuna ngu' laca bi'.
Tlyu tsa cha' tso'o ntsu'u ji'i̱ ycui' Ndyosi Sti na, la cui' ycui' Ndyosi nu laca Sti Jesucristo nu Xu'na na. Nchcui' na' lo'o Ni cha' ta Ni Xtyi'i ycui' Ni ji'i̱ ma̱, cha' jua'a̱ ca cuayá' ti' ma̱ lcaa cha' li'; culu'u Xtyi'i ycui' Ni ji'i̱ ma̱ ñi'ya̱ laca ycui' Ni, lo'o li' taca tyuloo tso'o la ma̱ ji'i̱ ycui' Ndyosi.
Pana tso'o la ca tsa'a̱ la ma̱ cha' tso'o ji'i̱ Jesucristo nu Xu'na na, nu cua ngua'ni lyaá ji'na; li' taca tyi'i̱ tso'o la tyiquee ma̱ cuentya ji'i̱ ycui' nu Xu'na na. Cua'ni tlyu na ji'i̱ ycui' Ni nde chalyuu, lo'o jua'a̱ ná nga'a̱ cha' tye tsa̱ nu cua'ni tlyu na ji'i̱ Ni ca slo ycui' Ni. Jua'a̱ caca cha' lacua.
Ná tso'o la na' tsiya' ti que cua ña'a̱ ca ñati̱ nu ngusñi cha' ji'i̱ ycui' Ndyosi, tso'o la ngu' bi' que na'; pana nda Ni chacuayá' cha' tsa'a̱ slo ñati̱ nu ndi'i̱ xa' tsu'. Tso'o tsa cña nda Ni 'na, cha' cacha' na' cha' tso'o bi' ji'i̱ ngu', masi tya lyiji tsa cha' tye ca cuayá' ti' ycui' na' lcaa cha' tso'o nu ndu'ni Cristo lo'o ñati̱.
Sca ti quiya' ngua'ni Ni lcaa cha' bi', cha' ca cuayá' ti' lcaa ñati̱ nu ca̱a̱ chalyuu nde loo la cha' ntsu'u tsa tyiquee Ni ña'a̱ Ni ji'i̱ ñati̱ chalyuu. Xqui'ya cha' ntsu'u tsa tyiquee Jesucristo ña'a̱ Ni ji'na, bi' cha' ca cuayá' ti' na cha' ná ntsu'u su tye cha' ndu'ni tso'o ycui' Ndyosi lo'o na;
Ná ndu'ni cha' masi cacha' na lcaa cha' nu nda ycui' Ndyosi lo'o ñati̱, si ná ntsu'u tyiquee na ña'a̱ na ji'i̱ ngu'. Ná ndu'ni cha' masi jlo ti' na lcaa cha' ji'i̱ ycui' Ndyosi, masi tso'o tsa nchca cuayá' ti' na sca cha' nu ná ngujui ñi'ya̱ nu caca cuayá' ti' ñati̱ nu ngua sa'ni la; ná sca na laca na cuentya ji'i̱ ycui' Ndyosi si ná ntsu'u tyiquee na ña'a̱ na ji'i̱ ñati̱. La cui' ti masi jlya tsa ti' na ji'i̱ ycui' Ndyosi ñi'ya̱ nti' si caca cuityi̱ na ji'i̱ sca ca'ya cua̱, pana si ná ntsu'u tyiquee na ña'a̱ na ji'i̱ ñati̱, ná sca na laca na li'.
La cui' ycui' Ndyosi laca nu nda xee lubii ji'i̱ Ni cha' tyanu ne' cresiya ji'na; bi' cha' caca cuayá' ti' na lcaa cha' tlyu nu tso'o tsa nu ntsu'u ji'i̱ ycui' Ndyosi, la cui' ti cha' nu nchca tii na cha' ndyu'ni Ni cña ne' cresiya ji'na nu lo'o xñi na cha' ji'i̱ Cristo. Ycui' Ni ngulo Ni cña cha' tyucua xee ca su ngua chalyuu talya nu ngua tya sa'ni la.
Cu'ma̱ tya'a ngusñi na cha' ji'i̱ Jesús, ndi'ya̱ cua'ni ma̱ nu lo'o tyu'u ti'i̱ ma̱ lo'o tya'a ma̱: Tyatu̱ tsaca ma̱ cha' cacha' ni ji̱i̱ caca nu cula tu'ba ma̱ cuentya ji'i̱ ycui' Ndyosi; cuati tyatu̱ chaca nu culu'u cha' ji'i̱ ycui' Ni ji'i̱ tya'a ma̱; lo'o li' chcui' tsaca ngu' sca cha' nu nti' Ni ta Ni lo'o ma̱; lo'o jua'a̱ taca ta ma̱ xi cha' lo'o cha'cña ji'i̱ xa' ñati̱, si lo'o nchca ji'i̱ ma̱ xtyacui ma̱ cha' bi', cha' caca cuayá' ti' lcaa ñati̱ nu nga'a̱ ca ndacua. Lcaa ña'a̱ nu cua'ni ma̱ ntsu'u cha' tyatí̱ la ti' tyiquee lcaa ñati̱ tya'a ndyu'u ti'i̱ ma̱.
Nde loo la ná ntsu'u cha' tye cha' ntsu'u tyiquee na ña'a̱ na ji'i̱ ñati̱. Nde loo la tyalaa tyempo nu lo'o nga'aa ndu'ni cha' tya chcui' la ycui' Ndyosi lo'o na nde chalyuu, nga'aa ndu'ni cha' chcui' la na cha'cña ji'i̱ xa' ñati̱, ni nga'aa ndu'ni cha' caca cuayá' ti' na lcaa cha' ji'i̱ ycui' Ndyosi ca lo'o caca tyempo bi'; pana ná tye chca cha' ntsu'u tyiquee na ña'a̱ na ji'i̱ ñati̱.
lo'o jua'a̱ ntsu'u ngu' nu nchca ji'i̱ ndu'ni xa' la cha' tlyu chacuayá' ji'i̱ ycui' Ndyosi, cña nu ná nchca cua'ni ñati̱ nquicha'; cuati ntsu'u xa' la ngu' nu nchca ji'i̱ ndacha' ji'i̱ ñati̱ sca cha' nu nda ycui' Ndyosi lo'o ngu' bi'; cuati jua'a̱ ntsu'u ngu' nu nchca tii ni cña ndu'ni sa scaa ngu', si cuentya ji'i̱ Xtyi'i ycui' Ndyosi ndu'ni ngu' cña, si si'i cuentya ji'i̱ ycui' Ndyosi ndu'ni ngu' cña; lo'o jua'a̱ ntsu'u ngu' nu nchca ji'i̱ nchcui' cha'cña ji'i̱ xa' la ñati̱; jua'a̱ tya ntsu'u xa' la ngu' nu nchca ji'i̱ xtyacui cha' bi', cha' caca cuayá' ti' lcaa ñati̱ ni cha' nda ngu' bi' li'.
Jua'a̱ ngua cha' tso'o la ndyuna ngu' tyucui ña'a̱ chalyuu cha' ji'i̱ ycui' Ndyosi, masi cha' cuxi ngua'ni ngu' judío bi'. La cui' jua'a̱ ngua tso'o la cha' ji'i̱ ngu' xa' tsu' cuentya ji'i̱ ycui' Ndyosi, masi ngua cuxi la chalyuu ji'i̱ ycui' ngu' judío. Bi' cha' tlyu tsa cha' tso'o caca, nu lo'o xcutsa'a̱ Ni tyiquee cua ña'a̱ ca ngu' judío lo'o xñi ngu' cha' tso'o nu ji'i̱ Jesús.
Masi xñi'i̱ tsa ti' ya xqui'ya cha' ti'í nu ndyacua ji'i̱ ya tu'ni, pana ña'a̱ ti chaa ti' ya; ti'i tsa ya tu'ni, pana ndyiji juersa ji'i̱ ya cha' xtyucua ya ji'i̱ tyu̱u̱ tya'a ñati̱. Masi ná sca na ntsu'u ji'i̱ ya tsiya' ti lo'o ndi'i̱ ya nde chalyuu; pana ycui' Ndyosi nxtyucua ji'i̱ ya, lcaa na ntsu'u ji'i̱ ya li'.
Piblisite