Sofonías 3:5 - Chuj San Sebastian Bible

⁵ Palta a Jehová, 'ayc'n̈ej 'a jun chon̈b' cha. Tojln̈ej tas tzb'o'o. May tas tu tzb'o'o. 'A junjn sq'uin̈b'ial tzch'oxn 'el stojlal, ax pax eb' maysch'olnil sb'eyb'al, caw matz q'uixw eb' jab'oc.

Chuj San Mateo Bible

⁵ Palta, ayec' Jehová d'a co chon̈ab' tic, an̈ej tas tojol sc'ulej, malaj juneloc sc'ulej junoc tas man̈ vach'oc. Junjun q'uin̈ib'alil sch'oxanel stojolal. Axo pax eb' chuc, max q'uixvi jab'oc eb'.

Sofonías 3:5 Referans Kwoze

Dt 32:4

'Icha junc q'uen niwquil q'uen 'aych quen̈loc, 'ixta yaj Jehová 'ayn̈ec; tz'el'chn̈ej tas tzyala, caw tojln̈ej tas tzb'o'o. A Dios wach'n̈j tzyutj paxtinc sb'a, matz yac' 'es; tojln̈ej 'a smasnil.

Lm 3:23

'A junjn sq'uin̈b'ial, tzquilnec to tz'o'ch sc'ojl 'ayn̈ec.

Salmos 145:17

Mamin Jehová, caw wal tojl a b'eyb'al, 'ay a chamc'ojlal 'a smasnil tas b'ob'il o'oj.

Sofonías 3:15

A Jehová, tox 'ix yij 'el yowl sc'ojl 'aych 'a eyib'an̈, tox 'ix spatquilj can 'el eb' 'ajc'ojl yajch 'ayex. A Jehová qui Reyal, a 'ayc' eyet'oc. Man̈x 'a 'aj 'oj e xiwi.

Is 28:19

A yic 'oj jawc 'a junjn 'ejem, 'oj e jucx b'ey yu'uj, 'oj jawc 'ayx 'a junjn sq'uin̈b'ial. Sc'ual yac'wlil 'oj eyib'x can chan̈ yu'uj, yic 'oj eyab'nc yab'xil.

Sofonías 3:17

A Jehová e Diosal, a 'ayc' eyet'oc. A spoder tzex colni. Caw 'oj tzaljoc eyet'oc. Yuj schamc'ojlal 'ayex, yuj cha man̈x 'a tas 'oj e na'. A yuj stzaljc'ojlal cha, ax e b'itn cha'an̈, 'oj schioc.

Is 12:6

Ex 'aj Sión, 'el cab' eyaw yuj tzaljc'ojlal yujto a qui Diosal an̈ israel on̈c tic, atn jun Dios To Cojxni, caw 'ay smay, 'ayc' 'a qui calec, 'oj e chioc.

Dt 23:14

Yujto a Jehová qui Diosalec ajun eyet'oc, 'ayc' eyet' 'a e camplamento. A tzex tan̈wni, tzcolwj pax eyet'oc yic tzeya'n ganar eb' 'ajc'ojl yajch 'ayex. Yuj cha, a jun e camplamento cha, yowlal cab' sac yaji, sec may cab' tas tu yilx tzyil Dios 'a 'a, to ma'ay, 'ay smay tzyij 'el sb'a 'a e cal.

A Sb'ab'el Carta San Pedro 1:17

A Dios, 'oj sb'eyc'ojloc junjn 'anma', a tzyala tas sb'eyb'al jun jun. Yuj cha, toto tzcalc qui Mamoc, caw xiw coyc 'a 'a, ya' sb'a 'ayn̈ect 'ec' 'a yolyib'n̈q'uinl tic.

Ro 3:26

'Ixta yutjnac sch'oxn paxi, to an̈ja tojl snab'en ticnec. Yujto caw tojl tzyutj sb'a, yic tzyalni, to wach'n̈ec 'a sat an̈ tzca'c 'och qui c'ojl 'a Jesús.

Zacarías 2:5

Palta an Jehová in, an 'oj in tan̈wj chon̈b Jerusalén, 'icha to 'oj woch oyn 'a spatquil 'icha junc c'ac' yic tzin satn 'el eb' 'ajc'ojol, ax 'a snan̈l chon̈b' chi 'oj in ch'ox in tzictznial, xchi Dios, xchi jun ángel cha.

Salmos 37:6

'Oj ya' checljoc qui tojl b'eyb'alec yet' qui wach' nab'enalec, 'icha wal stzictznil yoc c'u 'a chimc'ual, 'ixta wal yilxi.

Job 34:10

Palta ax 'ay e nab'en tic, chajec eyab' tas 'oj wala'. A Dios tztac' yuj smasnil, tecn may 'aj tzb'o tas man̈ tojloc.

1 Co 4:5

Yuj cha, man̈x e b'eyc'ojloc junc xo mach ticnec. To tze tan̈wj sjaw Cajlilec, yujto a 'oj ch'oxnc 'el smasnil tas. 'Icha junc tas c'ub'b'il 'el 'a q'uic'q'uinal, ax tzc'och sacq'uinl 'a 'a, c'uxn tzcheclj 'eli, 'ixta 'oj 'aj scheclj smasnil tas ta'. A Cajlilec chi 'oj 'a'nc checljoc 'el tas 'ay 'a qui nab'enec qui masnil. At wal ta 'oj yal Dios qui wach'lec, a tzyala tas qui munljel junjn on̈ec.

Ro 2:5

Palta 'ayx pit ex, matz e na e b'a. Yuj cha, wan eya'n niwtjoc yowl sc'ojl Dios 'a eyib'an̈. Ax 'a yic 'oj jawc jun c'u yic yailal, ax yajx can 'och 'a eyib'n̈ ta'. At wal 'a jun c'ul cha, 'oj checljoc 'el sb'eyc'ojlal Dios caw yel.

Lc 12:2

Yujto jantcn̈ej tas c'ub'b'il 'el ticnec, c'uxn 'oj checljoc 'eli. Yet' jantcn̈ej tas c'ultac yaji, c'uxn 'oj 'ajxoc 'ojcaxc 'eli.

Sofonías 2:1

Ex 'anma to may jac e q'uixwel, yam'tzejc e b'a, nac e b'a,

Habacuc 1:3

¿Tas wal yuj tzac' wil tas tz'aj yixtx eb' 'anma', yet' pax maysch'olnilal? Tzanxn̈ej 'aj tzwil jun tzo'n̈ cha. 'Ayxn̈ej owl 'a smasnil lugar yet' tejb'ail.

Miqueas 7:9

'Ix 'och qui mulc 'a Jehová, yuj cha, 'oj ca'c techjoc yowl sc'ojol, masnto 'oj on̈ sb'eyc'ojloc, ax on̈ sb'onec yaji. 'Oj yac' Jehová quilc sacq'uinlal, 'oj quilc tas 'oj yutc on̈ scolnec 'eli.

Miqueas 3:11

A eb' juez yaj 'a yol chon̈ab', man̈ wach'c tzyutj eb' sb'onyaj junc 'anma', tzchaj eb' q'uen c'ultac tumin. An̈jtona eb' tz'a'n 'och qui ti 'a Dios, yujn̈ej schan eb' tumin, yuj cha, tzcuywj eb'. 'Ixta pax eb' tzyalch sb'a schecb'oc Dios, yujn̈ej schan eb' tumin, yuj cha, tzyaln eb' tas tz'aj 'el'ch junc mach. Tzyaln pax eb' to 'aych Dios yet' eb', yuj cha, tzyaln eb' 'ixtic: A Jehová 'aych quet'ec, yuj cha, may yailal 'oj 'ec' 'a quib'n̈ec, xchi cob' eb'.

Ez 48:35

A yechl jun muro chi 'a smasnil, jun oyn 'och 'a spatc 'el jun chon̈b' cha, b'aln̈e mil metro. Ax sb'i jun chon̈b' cha: Scajnub' Jehová, 'ixta 'oj sb'ioc, xchi Dios 'ayin, xchi Ezequiel.

Jeremías 8:12

¿Tom tzq'uixw jac eb' yuj jun tzo'n̈ tas matz tzchaj in c'ojl tzb'o cha? Wal yel tzwala, caw matz q'uixw xon eb', caw matz chacb' 'el sat eb' sq'uixw xon jab'oc. Yuj cha, an Jehová in, an tzwala, to a yic 'oj wa'n jawc yailal 'a yib'n̈ eb', 'oj telwc 'ejm eb', 'icha jun tzo'n̈ eb' 'emnc xo, xa chi 'a eb', xchi Dios 'ayin.

Jeremías 6:15

¿Tom 'ix q'uixw eb' sb'on jun tzo'n̈ maysch'olnil cha? Wal yel, caw ma'ix q'uixw xon wal eb' jab'oc, ¡toxn man̈ yojcoc eb' sq'uixwi! Yuj cha, an Jehová in, an tzwala to a wal yic 'oj wa'nc 'och yailal 'a yib'n̈ eb', 'oj satcn 'el eb', xchi Dios.

Jeremías 3:3

Yuj wal e mul cha, x'och wan ya'n n̈ab' 'a stiempoal. Caw lajn yilx 'och e sat 'icha junc 'ix 'ajmul 'ix. ¡Caw matz eyec q'uixwc e b'a!

Is 50:4

A jun schecb' Dios tzaln 'ixtic: A Jehová Wajlil a x'a'n jelnb'oc in paxtini, yic wach' tztac' wa'n sniwnal sc'ojl eb' c'unb'nac. 'A junjn sq'uin̈b'ial tzin nib'n wab'i' tas tzyac' in cuyu'.

Is 45:21

Paxtinan̈ec, alec tas chi eyojc cha, c'anb'jlajec 'ayex, jun lajn tzeyutj eyalni. ¿Mach aljnac 'el jun tzo'n̈ tic 'a yictax yel yich sb'o smasnil tas? ¿Mach aljnac 'el 'a yictax pecti'? ¿Tom man̈ oquin an Jehová in 'ix wal-l jun tzo'n̈ tic? May junc xo Dios, To Cojxn In Toni. Cojn in tzwac' 'el'choc tas tzwala yic tzex in coln 'eli.

Is 33:2

Mamin Jehová, 'o'ch cab' wal a c'ojl 'ayn̈ on̈, caw tan̈b'ilch cuj on̈, 'ochn̈ quet' 'a junjn c'u yic 'ay qui yailal on̈, coln̈ 'el on̈.

Job 8:3

A Dios tztac' yuj smasnil, may 'aj tzjelmtej tas tojol, may 'aj tzyij 'ec' smacl junc mach.

Gn 18:25

Ma'oj stac' a b'on 'ixta', yic tza satn 'el eb' may smul yet' eb' 'ay smul, 'icha to lajn xoj eb' tzyal cha. Man̈ a b'o 'ixta'. Caw Yajl ach 'a yolyib'n̈q'uinl tic. Toc wal 'oj a b'o tas man̈ tojloc, xchi Abraham 'a Dios.

Zacarías 9:9

A Jehová tzaln 'ixtic: ¡Tzaljan̈c wal si'mb'il ex 'aj chon̈b' Sión! ¡B'itnan̈c 'a tzaljc'ojlal ex 'aj Jerusalén! 'Iltec wal sjaw e reyl 'ayex, caw tojl snab'en. A 'oj 'a'nc colnb'il. Caw 'emmquil sjawi, 'ay q'ue 'a yib'n̈ jun no quelm b'uru yune jun no 'axna.

Job 7:18

¿Tas yuj cob' an̈ja on̈ a tan̈wni 'a junjn c'u, junjn 'ip tzon̈ a'lni pax prowal?

Salmos 92:15

'Ixta tzyutj eb' sch'oxn 'eli to tzach ya'ch eb' yipc sc'ojol. Caw tojln̈ej a nab'en, may tu nab'enal 'ayach.

Ez 18:25

Tecn 'ayx tzeyal 'ixtic: A Dios man̈ tojloc tas tzb'o'o, xe chi. Ex israel, tzcham wal eyab'n tas tzwala, an tic tojln̈ej tas tzin b'o'o, palta to ax man̈ tojloc e b'eyb'al.

Os 14:9

A eb' jelan, yet' eb' wach' snab'en, 'oj nachjoc 'el jun tzo'n̈ paxti tic yuj eb'. A jun b'e yic Jehová, caw wal tojol. A eb' wach' sb'eyb'al, 'oj 'at eb' 'a jun b'e cha, palta ax eb' maysch'olnil sb'eyb'al, 'oj telwc eb' 'a 'a.

Sofonías 3:13

A eb' israel 'oj can to, man̈x 'oj sb'o eb' tas maysch'olnil, man̈x 'oj yac' eb' 'es. Man̈x 'a mach 'oj yixtc paxti eb', 'oj wa eb', ax yilj eb', man̈x 'a mach 'oj xib'tnoc eb', xchi Dios.

Os 6:5

Yuj cha ex in satn 'eli, 'icha wutjnac wa'n yal eb' in checb' 'ayex. Yuj in paxti', ex in satn 'eli. Caw checl eyailal xwa'chi, lajn wal 'icha yoc c'u.