Ro 2:9 - Chuj San Sebastian Bible

⁹ Jantcn̈ej eb' tzb'on maysch'olnil, caw 'oj yab' eb' syal si'mb'il. Caw cusc'ojlal yic eb'. Yel xo wal 'oj 'ajxc 'och 'a yib'n̈ eb' wit israelal. 'Oj 'ajxc pax 'och 'a yib'n̈ eb' man̈ israeloc.

Chuj San Mateo Bible

⁹ Jantacn̈ej eb' sc'ulan chucal, ol yab' val syail eb' sic'lab'il. Ol te cus eb'. B'ab'el ol yab' syail eb' vetisraelal, ichato chi' eb' man̈ israeloc.

Ro 2:9 Referans Kwoze

A Sb'ab'el Carta San Pedro 4:17

Tox 'oj jawc stiempoal sb'eyc'ojlax smasnil 'anma'. An̈ec yunnaln̈ec xo Dios, 'oj qui b'ab'l b'eyc'ojlaxi. Toto tzon̈ b'ab'l b'eyc'ojlax an̈ec tic, ¿ocxom wal eb' matz yiclni xon jun wach' 'ab'x yic Dios?

Ro 1:16

An tic, matz in q'uixw yuj jun wach' 'ab'x tic, yujto 'aych spoder Dios yet'oc, yic wach' tzcolchj 'el jantcn̈ej eb' tzya'ch sc'ojl 'a 'a. A wal eb' wit israelal, yel xo wal 'ay yaln eb' yic 'a jun colnb'il tic, yet' pax eb' man̈ israeloc, 'ay pax yaln eb' yic 'a 'a.

Ez 18:4

A eb' 'anma', wic eb' smasnil, wic win mamb'il yet' win 'unnab'il, a mach tz'och smul, tojln̈ej schami.

2 Ts 1:6

A eb' tzex 'ixtn ticnec, a Dios 'oj 'a'noc syailal eb'. Caw tojl tzyutj Dios 'ixta'.

Ro 9:24

Wach'xam israel on̈ec, wach'xam ma'ay, palta yawtjnacn̈ec 'och yico'oc.

Ro 2:10

Ax jantcn̈ej eb' wach' tzyutj sb'a, 'oj yac' Dios swach'l 'a eb'. Niwn 'oj 'aj 'el'ch eb' 'a sat. Junc'ojlal xoj 'oj can eb' yet'oc. A eb' wit israelal wach' tzyutj sb'a, yel xo wal 'oj yac' jun tzo'n̈ tic 'a eb', 'oj yac' pax 'a eb' man̈ israeloc.

A Tas Sc'ulejnac Eb' Schecab' Jesús Hechos 3:26

A yic xya'n Dios pitzwc pax Yunnal, a 'ayn̈ec 'ix sb'ab'l checj coti, sec tzon̈ colchjec, tzcactnec can qui maysch'olnil junjn on̈ec, xchi Pedro 'a eb' yit israelal cha.

Lc 24:47

An̈jtona', yowlal 'oj alxc 'el wab'xil 'a scal eb' 'anma 'a junjn nacion̈, to yowlal tzna sb'a eb', sec 'oj 'ajxc can lajwc smul eb'. A 'a Jerusalén tic 'oj b'ab'l alxc 'el wab'xil, ax spuc 'a junjn chon̈ab'.

A Scarta San Pablo D'a Eb' Aj Colosas 3:11

Yuj cha, may yel'chi, toto israel on̈, mto man̈ on̈ israeloc. Wach' cab' 'ay mach 'ac'b'il circuncidar, wach' cab' 'ay mach ma'ay. Wach'xam chuc chon̈b'al, wach'xam cab'nal 'anma', mto moso to man̈ yico'oc sb'a, toxn̈ej yicn̈ej sb'a, may yel'ch jun tzo'n̈ tic. Cojxn Cristo 'ay yel'chi, yujto a 'aych 'a qui pixn junjn on̈ec.

Gl 3:28

Man̈x 'a yel'chi, toto israel on̈, mto griego on̈. Wach'xam 'ayn̈ 'och mosoal to man̈ quico'oc qui b'a, wach'xam mun quic qui b'a, toxn̈ej winac, toxn̈ej 'ix, may yel'chi, yujto junxn̈ej cajc qui masnil yet' Cristo. 'Icha to junxn̈ej 'anmal cajc qui masnil.

Ro 10:12

Wach'xam israel on̈ec, wach'xam man̈ on̈ israeloc, lajn on̈c qui masnil 'a sat Dios. Yujto a Cajlilec, Yajl yaj 'a quib'n̈ec qui masnil. Tzann̈j on̈ tzcalc qui b'a 'a 'a, til wal swach'c'ojlal tzyac' 'ayn̈ec.

A Tas Sc'ulejnac Eb' Schecab' Jesús Hechos 28:28

Yuj cha, nachj cab' 'el eyu'uj, to a Dios wan ya'n jun colnb'il tic 'a eb' man̈ israeloc. Yujto a eb' cha, tzya'ch eb' schicn 'a 'a, xchi Pablo 'a eb'.

A Tas Sc'ulejnac Eb' Schecab' Jesús Hechos 28:17

Schab'jil xo qui c'och ta 'on̈, ax Pablo x'awtn cot ewin checl yaj 'a scal eb' yit israelal 'a Roma cha. Ax yic xc'och ewin 'a 'a, 'ix yaln 'a ewin 'ixtic: —Ex wit chon̈ab', caw may in mul 'a eb' quit israelal. Ma'ix in ju pax sb'eyb'al eb' qui mam quichm 'aycn 'ayn̈ec. Palta a 'a Jerusalén, in ya'ch eb' 'a yol sc'ab' eb' 'aj Roma.

A Tas Sc'ulejnac Eb' Schecab' Jesús Hechos 26:20

Yuj cha, a 'a Damasco chi in b'ab'l aljnac 'el spaxti Dios. Xlajw cha, x'ec' walnc 'el 'a Jerusalén yet' 'a junjn chon̈b' 'a yol yic Judea cha. Xwaln pax 'a eb' man̈ israeloc, chajtlto tzna sb'a eb', tzya'n 'och eb' snab'en 'a Dios. Waln pax 'a eb' to yowlal wach' tzyutj eb' sb'eyb'al, sec chequel to yel tzna sb'a eb'.

A Tas Sc'ulejnac Eb' Schecab' Jesús Hechos 20:21

'Ix waln 'el 'a eb' israel, 'ix waln pax 'a eb' man̈ israeloc, chajtlto yowlal tzna sb'a eb' 'a sat Dios, tzya'n 'och eb' sc'ojl 'a Cajlil Jesucristo.

A Tas Sc'ulejnac Eb' Schecab' Jesús Hechos 13:26

Ex wit 'anma'il, ex yin̈tl can Abraham wet'oc, yet' ex 'ay e xiwc'ojlal 'a Dios, a jun 'ab'x yic colnb'il tic, eyic wet'oc.

A Tas Sc'ulejnac Eb' Schecab' Jesús Hechos 11:18

Ax eb' creyente 'a Jerusalén cha, yic xyab'n eb' jun tzo'n̈ tic, man̈x 'a tas xyal eb'. Cojxn wach' paxti xyal eb' 'a Dios, 'ix yaln eb' 'ixtic: —An̈jtona eb' man̈ israeloc, 'ay pax eb' 'ix yac' Dios sna sb'a, sec wach' 'oj scha pax eb' sq'uinl quet' 'a jun 'ejmn̈ej, xchi eb'.

Mt 16:26

Q'uinloc tzquique'ej smasnil tas 'ay 'a yolyib'n̈q'uinl tic, palta toto tzsatcn 'el qui pixn 'a jun 'ejmn̈ej, ¿tast wal qui ganar 'ixta'? ¿Tast wal 'oj cac' smannb'ilc colchjoc qui pixan?

Am 3:2

Ex israel, to cojn ex sic'b'ilx 'elt wuj 'a scal smasnil eb' chon̈b' 'ay 'a yolyib'n̈q'uinal. Yuj cha, 'oj wa'ch yailal 'a eyib'n̈ yuj smasnil maysch'olnil tze b'o'o, xchi.

2 Cr 6:23

a 'a satcha'an̈ tza chaj ab' tas yaj jun cha, tza b'onyaj 'a stojlal; tza'n 'och yailal 'a yib'n̈ mach tz'och smul cha, tza b'on pax yaj mach may smul, a tzyal wal tas yilxi.

Salmos 32:10

Mamin Jehová, a eb' maysch'olnil sb'eyb'al, til wal syailal eb' 'oj jawoc, palta ax eb' tzach 'a'n 'och yipc sc'ojol, a 'a chamc'ojlal tztan̈wni eb'.

Pr 11:23

A wal tas wach', a chi tznib'j eb' wach' snab'en, ax tas 'oj jawc 'a yib'n̈ eb' maysch'olnil, atn yowl sc'ojl Dios.

Ez 22:31

Yuj wal cha, 'oj wa' cot yowl in c'ojl 'a yib'an̈. 'Oj wac' lajwc 'el eb' 'anma yuj in c'a'lc'ojlal. 'Ixta 'oj 'aj sjaw yailal 'a yib'n̈ eb' yuj sb'eyb'al cha, xchi Dios, xa chi 'a eb', xchi 'ayin.

Ro 8:35

May junc tas tzch'oxni, to tzyij 'el Cristo schamc'ojlal 'ayn̈ec. Wach'xam yailal, wach'xam junc niwn cusc'ojlal, mto junc mach tz'a'n 'och junc tas 'a quib'n̈ec, toxn̈ej tz'och qui wejlec, toxn̈ej may qui pichul, toxn̈ej tzjaw junc tas 'ay smay, wach'xam tzon̈ milxec chamoc, toxn matz yij 'el Cristo schamc'ojlal 'ayn̈ec.