Ro 10:18 - Chuj San Sebastian Bible

¹⁸ Palta ¿tas tze na'a? A eb' israel, ¿tom ma'ix yab' eb' jun wach' 'ab'x tic? Ma'ay, c'uxn xyab' eb'. Yujto 'ixtc tzyal 'a Ch'an̈ U'un̈: C'uxn tzpucb't yab'xil 'a smasnil chon̈ab', masnto tzc'och 'a 'aj tzlajw c'och yolyib'n̈q'uinl tic, xchi.

Chuj San Mateo Bible

¹⁸ Palta, ¿tas tze na jun? A eb' israel, ¿tom maj yab' jun vach' ab'ix tic eb'? Maay, ix yab' eb' smasanil. Yujto icha tic syalcan d'a Slolonel Dios: Ix b'eyb'at yab'ixal d'a masanil sat luum tic, masanto ix pucaxb'at d'a masanil yolyib'an̈q'uinal tic, xchicani.

Ro 10:18 Referans Kwoze

Salmos 19:4

palta c'uxn tzpucb't yab'xil 'a smasnil chon̈ab', masnto tzc'och 'a 'aj tzlajw c'och yolyib'n̈q'uinl tic. A 'a satcha'an̈, ata b'ob'il can 'och c'u yu'uj.

Ro 1:8

A jun tic tzin b'ab'l alj 'at 'ayex. Yuj Jesucristo, tzwa'n yuj diosal 'a qui Diosal eyu'uj, yujto 'ix pucb't eyab'xil 'a junjn chon̈ab', chajtlto caw tzeya'ch e c'ojl 'a 'a.

Mt 24:14

Ax jun wach' 'ab'ix, a tzalni chajtl tz'aj eb' 'anma yoch 'a yol sc'ab' Dios, yowlal 'oj alxc 'el 'a smasnil yolyib'n̈q'uinl tic, sec 'oj laj yab' eb' 'a junjn chon̈b'al. 'Ixta to b'i'an ax sjaw jun slajb' cha.

1 Ts 1:8

Eyu'uj, 'ix pucb't yab'xil Cajlil 'a junjn lugar. C'uxn xlaj yab' eb' 'a Macedonia yet' pax eb' 'aj Acaya, chajtlto caw tzeya'ch Dios 'a e c'ojol. Man̈ cojnoc eb' x'ab'ni. 'Ix laj yab' pax eb' 'a junjn lugar. Yuj cha, man̈x yowlalc an̈ tzcal-l eyab'xil 'a scal eb' 'anma 'on̈.

A Scarta San Pablo D'a Eb' Aj Colosas 1:23

Palta yowlal tzeya'ch 'a e c'ojl 'a smasnil tiempo. Caw te'n tzeyutj e nab'en, 'icha junc te caw 'ay sch'an̈l yib'. A jun wach' 'ab'x yic colnb'il eyab'jnac xo, man̈ eyactc can eya'n 'och yipc e c'ojol. A jun wach' 'ab'x tic, wan yalx 'el 'a smasnil yolyib'n̈q'uinl tic. An xo Pablo in tic, wan waln 'el pax jun xo.

A Scarta San Pablo D'a Eb' Aj Colosas 1:6

A jun 'ab'x yic colnb'il alb'ilx 'ayex, wan yalx 'a junjn lugar 'a yolyib'n̈q'uinl tic. 'Icha junc te tzq'uib'i, tzya'n sat, 'ixta tz'aj jun 'ab'x tic 'a eb' tz'ab'ni. An̈jtona', 'ixta x'aj 'ayex, yictax e b'ab'l 'ab'ni, chajtlto niwn swach'c'ojlal Dios. Yujto nachjnac 'el eyu'uj, to caw yel 'ay swach'c'ojlal cha.

Mr 16:15

Xlajw cha, xyaln 'a eb' 'ixtic: 'Ixquec 'a smasnil yolyib'n̈q'uinl tic, alc 'el wach' 'ab'x yic colnb'il 'a scal smasnil 'anma'.

Mt 28:19

Yuj cha, 'ixquec cuywjoc 'a junjn chon̈ab', sec 'oj laj 'och eb' in cuywumoc. Tzlaj eyac' bautisar eb' 'a sb'i Dios Mamb'il, 'a sb'i Dios 'Unnab'il, an ton tic, yet' 'a sb'i Yespíritu Dios.

Mt 26:13

Wal yel tzwal 'ayex, tzann̈j lugar 'a yolyib'n̈q'uinl tic 'aj 'oj alxc 'el wach' ab'x yic colnb'il, 'oj alxc pax 'el yab'xil tas 'ix sb'o jun 'ix tic, yic 'oj naxc cot 'ix, xchi 'a eb'.

Jeremías 16:19

Xwaln 'ixtc 'a Dios: Mamin Jehová, caw ach 'aych 'och wipoc, in tan̈mal 'aji. Ach tzin a colo, yic 'ayn 'och 'a in yailal. 'Oj jawc jun tzo'n̈ nacion̈ cajn 'a 'aj tzlajw c'och sti lum lum tic, ax wul yaln eb' 'aych 'ixtic: Cojn jun tzo'n̈ comn dios may jac yopiso, may jac tztac' yu'uj, a chi schajnac eb' qui mam quichm smacloc.

Mt 4:8

Ax win diablo cha, 'ix yi'n 'at win jun 'ejm xo. 'Ix c'och eb' 'a jun niwquil tzalan, 'ix sch'oxn win smasnil jun tzo'n̈ niwc chon̈b' 'ay 'a yolyib'n̈q'uinl tic 'a 'a, chajtlto caw niwn yel'ch eb'.

Is 52:10

A Jehová, tox 'ix sch'ox spoder yil smasnil nacion̈. 'Oj yojcoc 'el smasnil 'anma 'a yolyib'n̈q'uinl tic, chajtlto a Dios on̈ colnec 'eli.

Is 49:6

'Ix yaln 'ixtc 'ayin: In checb' ach, palta man̈ yujocn̈ej a tojlb'tzan pax eb' yin̈tl Jacob 'a 'icha xon yaji, yic tze'n pax meltzjoc jaywn̈ xo eb' cann̈cto can 'a Israel, palta yuj pax ach wa'n 'och sacq'uinlal 'a jun tzo'n̈ xo nacion̈, masnto 'a 'aj tzlajw c'och yolyib'n̈q'uinal, tze'n pax 'at colnb'il ta', xchi 'ayin, xchi jun schecb' Dios cha.

Salmos 98:3

Caw wal 'ayn̈j 'ec' schamc'ojlal yet' stojlal 'a qui calc an̈ israel on̈c tic. Smasnil 'anma 'a yolyib'n̈q'uinal tic 'ix yil eb' scolwj qui Diosalec quet'oc.

Salmos 22:27

Mamin Jehová, smasnil jun tzo'n̈ niwc nacion̈, yet' yin̈tl junjn macn̈ 'anma 'a 'aj tzlajw c'och lum lum tic, 'oj a nax cot yuj eb'. 'Oj jawc eb' 'a ojltac, ax yem cumn eb' 'ayach,

Is 24:16

Caw 'oj 'ab'xoc sb'itn eb' 'a 'aj tzlajw c'och sti lum lu'um, yuj yijx chan̈ sb'i Dios, jun caw tojl snab'en. Palta xwaln 'ixtic: 'Oltacn wali, caw wan in lajw 'el tzwab'i. A eb' tu snab'en cha, caw tu tas tzb'o eb'.

A Ch'an̈ B'ab'el Libro Yic Yab'ixal Eb' Rey 18:10

'A sat Jehová qui Diosalec tzwaln 'ayach, to may junc lum nacion̈, 'aj ma ach sayx 'ec' yuj win wajlil cha. 'Ix laj yalnc eb', to man̈ ach 'ayc 'ec' ta', yuj cha, xyaln win wajlil chi 'a jun tzo'n̈ nacion̈ cha, to tzyac' eb' sti 'a winac, sec to yel to man̈ ach 'ayc' 'ec' ta'.

Ro 15:19

'Ay pax jun tzo'n̈ milagro ch'oxb'il wuj 'a eb', yet' jun tzo'n̈ xo tas tzch'oxn 'el spoder Dios. Ax Yespíritu Dios 'ix yac' spoder 'ayin. 'Ixta xwutj 'ec' walnc 'el wach' 'ab'x yic Cristo 'a junjn chon̈ab'. A 'a Jerusalén, ata in b'ab'l yamj 'och waln 'eli. C'uxn x'ec' wal-l 'a junjn chon̈ab', masnto in c'och 'a chon̈b' Ilírico.

A Tas Sc'ulejnac Eb' Schecab' Jesús Hechos 28:23

Xlajw cha, smol aln eb', 'aja c'u tzyam sb'a eb' jun 'ejm xo. Ax 'a yic jun c'u cha, til wal eb' syam sb'a 'a 'aj 'ayc' Pablo cha. Ax 'a sq'uin̈b'ial, 'ix syamn 'och Pablo yaln 'a eb', masnto x'em c'u. 'Ix yaln 'a eb' tas wal tz'aj eb' 'anma yoch 'a yol sc'ab' Dios. 'Ix yaln pax 'a eb', tastc tz'ib'b'il can 'a ley yic Moisés, yet' tastc tz'ib'b'il can yuj eb' schecb' Dios pecti'. Caw xyac' wal snab'enoc eb', sec toq'ue tzya'ch eb' sc'ojl 'a Jesús.

Mr 16:20

Xlajw chi b'i'an, 'ix 'at eb' yal-l spaxti Dios 'a junjn lugar. 'Ix 'och Cajlil yet' eb'. 'Ix sch'ox jun tzo'n̈ milagro yet' eb', sec chequel to yel jun spaxti chi tz'ec' yal eb' cha. Ya' cab'i'.]

A Tas Sc'ulejnac Eb' Schecab' Jesús Hechos 26:20

Yuj cha, a 'a Damasco chi in b'ab'l aljnac 'el spaxti Dios. Xlajw cha, x'ec' walnc 'el 'a Jerusalén yet' 'a junjn chon̈b' 'a yol yic Judea cha. Xwaln pax 'a eb' man̈ israeloc, chajtlto tzna sb'a eb', tzya'n 'och eb' snab'en 'a Dios. Waln pax 'a eb' to yowlal wach' tzyutj eb' sb'eyb'al, sec chequel to yel tzna sb'a eb'.

A Tas Sc'ulejnac Eb' Schecab' Jesús Hechos 1:8

Palta 'oj yac' Dios spoder 'ayex, yic 'oj 'ochcn Yespíritu 'ayx junjn ex. 'Oj lajwc cha, ax eyaln 'el wab'xil 'a Jerusalén tic, 'a smasnil yol yic Judea yet' 'a Samaria, masnto 'a jun tzo'n̈ xo lugar 'a 'aj tzlajw c'och yolyib'n̈q'uinl tic, xchi 'a eb'.