A Scarta San Pablo D'a Eb' Aj Filipos 2:2 - Chuj San Sebastian Bible

² Yuj wal jun tzo'n̈ tic, caw junxn̈ej tzeyutj e nab'en ta'. Junxn̈ej tzlaj eyutc e chamc'ojlan e b'a. Junxn̈ej tzlaj eyutc e nan pax smasnil tas. Junc'ojlaln̈ej tzeyutj e b'a. Toto 'ixta tzeyutj e b'a ta', 'oj wach' jawc in tzaljc'ojlal eyuj 'a tic.

Chuj San Mateo Bible

² Yuj val juntzan̈ tic, junxon̈ej pensaril tzeyutej e b'a ta'. Junxon̈ej tzeyutej e xajanan e b'a. Junxon̈ej tzeyutej e naan masanil tasi. Junc'olal tzeyutej e b'a, yic ol vach' ja in tzalajc'olal eyuuj.

A Scarta San Pablo D'a Eb' Aj Filipos 2:2 Referans Kwoze

Ro 12:16

Junc'ojlal tzlaj cutquec qui b'a qui masnil. Matz tac' qui b'an̈nec qui b'a. Jun tzon̈ 'e'c cab' yet' eb' may yel'ch 'a sat eb' 'anma'. Matz tac' qui nanec, to caw jeln on̈ec.

1 Co 1:10

Ex wu'tac, ex wanab', tzin tew 'ayx 'a sb'i Cajlil Jesucristo, to junxn̈ej tz'aj e nab'en e masnil ta'. Man̈ comnoc tze pojl e b'a. Caw jun lajn xoj tzeyutj e nab'en, jun lajnn̈ej tzeyutj e nan smasnil tas.

2 Co 13:11

Al ticnec ex wu'tac, ex wanab', 'ay cab' e tzaljc'ojlal ta'. Caw tze wach' b'oj e nab'en, 'ayx cab' e niwnc'ojlal. Junxn̈ej tzlaj eyutc e nab'en, junc'ojlal xoj tzlaj eyutc e b'a ta'. A Dios, 'a'm junc'ojlal, 'a'm pax chamc'ojlal, a 'oj 'och eyet'oc.

3 Jn 1:4

A yic tzwab'ni, chajtlto a eb' chajnac Cristo wu'uj, an̈ja sb'eylb'an eb' jun cuynb'il caw yel, yuj cha, caw tzin tzalji. May junc xo 'aj tzjaw in tzaljc'ojlal 'ixta', yujto 'icha to wunnal eb'.

A Scarta San Pablo D'a Eb' Aj Filipos 2:16

Yujto tzeyal-l spaxti Dios 'a scal eb', atn tzaln yuj qui q'uinlec 'ay 'a jun 'ejmn̈ej. Yuj cha, a yic 'oj jawc Cristo, caw 'oj jawc in tzaljc'ojlal eyu'uj, yujto wojtac, man̈ nab'an̈ejoc xwac' 'ip in munlj 'a e cal.

A Tas Sc'ulejnac Eb' Schecab' Jesús Hechos 2:46

Junjn c'u, tzyamn sb'a eb' 'a yamq'uil yatut Dios. Tzlaj syamn sb'a junjn eb' 'a yatut, tzpojn 'ec' eb' 'ixm pan yic Cena 'a scal. Junxn̈ej tzlaj wa eb' 'a tzaljc'ojlal. Caw junc'ojlal xlaj yutc sb'a eb'.

2 Jn 1:4

Caw wal xjaw in tzaljc'ojlal, yic xwab'ni, to 'ay eb' one wan sb'eylb'an jun cuynb'il caw yel, 'icha yaj yaln can qui Mam Dios 'ayn̈ec.

2 Ts 2:13

Ex wu'tac, ex wanab', chamc'ojlb'ilx yuj Cajlilec. Yowlal caw tzca'n̈j yuj diosal 'a Dios eyuj on̈, yujto yictax pecti', sic'b'ilx can 'el yuj Dios quet' on̈, sec tzex colchj yuj Yespíritu. A tzex 'i'n 'och yico'oc Dios. Yuj cha, tzex colchj quet' on̈, yujto tzeya'ch pax e c'ojl 'a jun cuynb'il caw yel.

A Scarta San Pablo D'a Eb' Aj Colosas 2:5

Wach'xam man̈ in 'ayc 'ec' eyet' ta', palta 'icha to caw 'ayn 'ec' eyet'oc. Yuj cha, caw tzin tzalji, yic tzwab'ni to junn̈j tzeyutj e b'a ta', te'n tzeyutj eya'n 'och e c'ojl 'a Cristo.

A Scarta San Pablo D'a Eb' Aj Filipos 4:2

A ticnec, tzin tew 'at 'aych wanb' Evodia yet' 'aych Síntique, sec junxn̈ej tzeyutj e nab'en, yujto e nulj e b'a 'a yol sc'ab' Cajlilec.

A Scarta San Pablo D'a Eb' Aj Filipos 2:20

Yujto may wal eb' lajn snan wet' 'a tic. May wal eb' tzex nan coti.

2 Co 7:7

Man̈ yujocn̈ej xjaw Tito, x'ajx qui niwnc'ojlal on̈, palta caw tzon̈ tzalj pax on̈, yujto xeyac' sniwnal sc'ojl Tito tic, yic yec' 'ayex. A xaln 'ayn̈ on̈, chajtlto caw tze nib'j tzin eyila. 'Ix yaln paxi, to caw tzex cus yuj jun e b'ojnac cha, 'ix yalni, to caw tzin e na'a. Yuj cha, 'ix wach' jaw in tzaljc'ojlal eyu'uj.

2 Co 2:3

'Ixta wutjnac waln 'at 'ayx 'a junx in carta, yujto in nib'jnac, ma'in 'at wa'ch e cusc'ojlal. Smoj to ax tzeyac' in tzaljc'ojlal. Xwa'ch yipc in c'ojol, toto tzjaw in tzaljc'ojlal, ax sjaw pax e tzaljc'ojlal jun xo.

A Tas Sc'ulejnac Eb' Schecab' Jesús Hechos 5:12

Ax eb' schecb' Jesús, til wal milagro 'ix ch'ox eb'. Caw 'ix ch'oxl eb' spoder Dios 'a scal eb' 'anma'. A 'a jun scorredoral yatut Dios tzcuch Yic Salomón, ata tzyam sb'a eb' creyente smasnil.

A Tas Sc'ulejnac Eb' Schecab' Jesús Hechos 1:14

Junjn c'u, tzyamn sb'a eb' smasnil, tzleslwi eb' 'a Dios. 'Ay pax eb' 'ix 'ix tzleslwi yet' eb'. 'Ayc' María, atn snun Jesús. 'Ayc' pax eb' yu'tac.

A Scarta San Pablo D'a Eb' Aj Filipos 1:4

A yic tzin leslwi 'a junjn 'ejem, tzin leslwi pax eyuj e masnil. Caw tzin tzalj eyu'uj,

Jn 3:29

Q'uinloc 'ay junc nupnel tz'och ticnec. A win tznupni, tzyi'n junc 'ix. Toto 'ay junc swach'c'ojl win 'ayc' yet' ta', caw tzalj yab'n tas tzyal win tznupn chi yet' 'ix 'ix cha. An̈jtona', 'ixta 'in tzalj ticnec, yujto wan yoch eb' 'anma scuywumoc Jesús.

2 Ti 1:4

Tzin na coti, chajtlto caw 'o'nc ach, yic a can wu'uj. Caw tzin nib'j tzach wil jun 'ejm xo, sec 'oj wach' jawc in tzaljc'ojlal.

A Tas Sc'ulejnac Eb' Schecab' Jesús Hechos 2:1

Yic 'ix japx sc'ul q'uin̈ Pentecostés, junn̈j 'aj 'ix syam sb'a eb' creyente smasnil.

Filemón 1:20

Yuj chi wu'tac, colwjan̈ 'ayin, yujto creyente on̈ 'a Cajlil, sec tzac' in tzaljc'ojlal yuj Cristo.

Salmos 122:8

Yuj eb' wit chon̈ab' yet' eb' in wach'c'ojol, yuj cha, ax waln 'ixtic: 'Ay cab' junc'ojlal 'a jun chon̈b' tic, xin chi.