Os 4:2 - Chuj San Sebastian Bible

² Caw tzniwtj eb' laj sjelnc tas tzyala, tzlaj ya'nc eb' 'es. Tzmilw cham 'anma eb', tz'elc'w eb', cojxn̈ej 'ajmulal tzlaj sb'o eb', tzlaj yixtn eb' yit 'anma'il, jab'jb' scal tzlaj milw 'anma eb'.

Chuj San Mateo Bible

² Sq'uechaan̈ eb' sq'uexan sti' d'a tas syala', syesan eb'. Smilvaj eb', tz'elc'an eb', an̈ej ajmulal sc'ulej eb'. Slaj yixtej yetanimail eb', cotac scal smilancham anima eb'.

Os 4:2 Referans Kwoze

Os 6:9

A eb' ya'mal 'och sti eb' 'anma 'ayin, lajn eb' 'icha junc b'ulc eb' 'elc'um. Tzlaj macwjoc eb' 'a eb' 'anma', yic tzmilx cham eb' yuj eb'. Tzmilw cham 'anma eb' 'a b'e tzc'och 'a Siquem, til wal maysch'olnil sb'o eb'.

1 Ts 2:15

Atn eb' israel miljnac cham eb' yit chon̈b' 'aych schecb'oc Dios pecti'. Milb'il cham pax Cajlil Jesús yuj eb'. Ya'n pax eb' stul 'ayn̈ on̈. Caw may swach'l eb' 'a sat Dios. Caw 'ajc'ojl yajch eb' 'a smasnil eb' 'anma'.

Miqueas 7:2

'Icha te sat 'awb'ente cha, 'ixta waji, yujto man̈xtzac 'ilchj junc 'anma wach' sb'eyb'al, tojl snab'en 'a sat Dios 'a yol qui chon̈b'ec. A eb' wit chon̈b' cha, cojxn milj cham 'anma tznib'j eb' sb'o'. Tzlaj yac' 'ejm junjn eb' sch'an̈ yal 'a yol sb'e.

Os 7:1

ata tznachj 'el smul eb' wu'uj, yet' smaysch'olnilal eb'. Yujto jun lajn xoj tzb'eylb'ej eb' 'a'm 'esal. 'Elc'm eb' smasnil. Tojln̈ej yoch eb' 'a yoltc n̈a. Tzlaj 'elc'w pax eb' 'a yoltc caye 'a eb' 'anma'.

Jeremías 6:7

A wal 'a Jerusalén chi tzpitzw chan̈ maysch'olnilal, 'icha wal spac' junc a a'. Cojxn 'ixtj 'anma', miljb'a'il. Axn̈ej yab'il yet' lajwel tzwiln̈j 'a scal eb' chon̈ab'.

Apoc 17:6

Ax xwilni, caw 'u'm 'an̈ 'ix yuj schic'l eb' yic xo Dios, atn eb' milb'il chamoc, yujto xyac' eb' testigoal sb'a yuj Jesús. Xcaw sat in c'ojl wiln jun cha.

A Tas Sc'ulejnac Eb' Schecab' Jesús Hechos 7:52

A eb' schecb' Dios pecti', c'uxn xlaj yab' eb' syal yuj eb' qui mam quichmec cha. 'Ay jun tzo'n̈ eb' aljnac cani, chajtlto 'oj jawc jun tojl snab'en, 'ix milx cham eb' yuj eb'. Ax yic 'ix jaw jun cha, ax xo xeya'ch 'a yol sc'ab' chamel, xeya'n milxc chamoc.

Mt 23:35

Yuj cha, a 'a eyib'n̈ 'oj jawc schaml smasnil eb' tojl snab'en 'ix milx cham 'a yolyib'n̈q'uinl tic, yictax xcham win Abel, jun tojl snab'en, masnto xc'och stiempoal xcham win Zacarías, win yunnal Berequías. Atn Zacarías chi chamnc yuj eb' e mam eyichm 'a snan̈l yatut Dios yet' jun yet'l xajmb'al.

Zacarías 7:9

Atn jun tzo'n̈ tic waljnac 'a eb' in chon̈b' 'a yic pecti': Tojl cab' tzeyutj e b'eyc'ojlwi, wach' tzeyutj e nab'en, 'o'ch cab' e c'ojl 'ayx junjn ex.

Zacarías 5:3

Xlajw cha, xyaln 'ayn 'ixtic: —A 'a ch'an̈, ata tz'ib'b'il jun yailal 'oj jawc 'a yib'n̈ smasnil eb' maysch'olnil sb'eyb'al 'a jun nacion̈ tic. Atn tic tz'ib'b'il 'a schapaq'uil: Jun pac' 'aj tzyal yuj smasnil eb' 'elc'um, ax 'a junx pac', ata tzyal yuj eb' 'a'm 'es, c'uxn 'oj satxoc 'el eb' 'a sat lum lu'um.

Sofonías 3:1

'Oltac wal eb' 'aj Jerusalén, yujto caw wal tenmtac eb', man̈ wach'c eb', 'ixtm 'anma pax eb'.

Miqueas 6:10

A 'a yatut eb' maysch'olnil sb'eyb'al, til wal ricoal 'ayq'ui, ata tzyij eb' 'a spatc maysch'olnil, ¿tom 'oj 'at satc'ojlal jun tzo'n̈ tic wu'uj? 'Ixta pax jun tzo'n̈ 'echtab' man̈ tz'acnoc, caw yajb'il 'el wu'uj.

Miqueas 3:9

'Ab'c jun tzo'n̈ tic ex syajlil chon̈b' Israel, ex to man̈ tojloc tzeyutj e b'onyaj eb' 'anma'.

Miqueas 3:2

Palta tu tzeyutej, to tzeyajcn 'el tas wach', ax tas tu a tze chamc'ojlej. 'Icha to tze jitl eb' quit chon̈ab', man̈x 'a tas tzeyactj can 'a eb'.

Os 12:14

Palta a eb' 'aj Efraín, 'ix stzuntzj cot eb' yowl sc'ojl Jehová. Caw wal schab'c'ojlej sb'a yuj eb'. Yuj cha, 'oj yac' Jehová stuplajwc eb' jantc smaysch'olnilal xlaj 'el sb'oni. Yuj smul eb' cha, ax sjaw yailal 'a yib'n̈ eb'.

Os 10:4

Cojn spaxtin eb', tzlaj ya'nc eb' strato 'a 'a'j 'esal. Ax smasnil b'eyc'ojlal man̈ tojloc tzyutj eb', lajn eb' 'icha te c'ultc caw c'a tzpac' 'a scal 'awal.

Os 7:3

Caw wal tzalj eb' rey yet' eb' yajal yuj smaysch'olnilal eb', yet' yuj yixtm 'anmal eb'.

Os 5:2

Til wal 'anma xlaj e mil cham yuj e tenmtaquil, yuj cha, 'oj wa'ch yailal 'a eyib'an̈.

Lm 4:13

'Ixta 'ix uji, yuj wal smul eb' schecb' Dios yet' yuj smul eb' ya'mal 'och sti eb' 'anma 'a Dios, yujto til wal 'anma may smul 'ix smil eb' 'a yol chon̈ab'.

Is 48:1

A Dios a tzaln 'ixtic: 'Ab'c wal jun tic ex yin̈tl Jacob, ex tze cuch israel, yin̈tl ex pax can Judá. Tze loc in b'i an Jehová in tic, tzeyalni to tzex 'och 'emmquilal 'ayin. Ex israel, e Diosal in eyalni, palta man̈ yelc tzeyala, tzex paxtin 'a chab'satil.

Is 24:5

Caw wal xjuw 'el lum lum tic yuj eb' cajn 'a 'a, yujto matz yiclj eb' 'icha tzyal ley, matz yiclj eb' jun tzo'n̈ checnb'il, caw xyixtj 'el eb' jun trato b'ob'il 'a jun 'ejmn̈ej.

Gn 4:8

'Ay jun c'ual, 'ix yawtj 'at Caín win Abel cha, yic tz'at eb' b'eyc'oc. Ax yic 'ayc' eb' 'a 'aj 'ix 'at b'eyc'oc cha, 'ix meltzj 'och win Caín 'a win yu'tac cha, 'ix sma'n chamoc.

Dt 5:11

Man̈ comnoc tze loc in b'i 'a nab'an̈ej an Jehová e Diosal in tic, yujto 'oj wac' syailal eb' tzlocn in b'i 'a nab'an̈ej.

Dt 5:18

Man̈ e b'o 'ajmulal 'a yol sc'ab' eyitb'eym junjn ex.

Dt 5:19

Man̈ ex 'elc'woc.

Jeremías 51:5

Wach'xam a eb' 'aj Israel yet' eb' 'aj Judá, caw 'ix 'och smul eb' 'ayin, palta an̈ja mantzac wij 'el in c'ojl 'a eb' an Jehová in, tztac' wuj smasnil, sDiosal in eb', to Cojxn̈ in.

Ez 7:23

'Ac' b'o jaye'oc q'uen cadena, yujto a 'a jun nacion̈ tic, til wal eb' ma'm cham 'anma 'oj jalxoc yet' q'ue'en. Caw wal b'ut'jnac 'el jun chon̈b' tic yuj maysch'olnil.

Os 6:8

A eb' 'aj Galaad, cojn maysch'olnil xlaj sb'o eb' 'a yol schon̈ab', tzanxn̈ej 'aj 'aycn chic' yuj eb'.

Os 7:4

Cojxn 'ajmulal tzb'o eb' smasnil. A snib'b'en eb' cha, lajn 'icha junc jorna jab' wal tzecx 'och sc'a'l yuj junc b'om pan, ya' sb'a wanto sjaw sti 'ixm harina cha; ax yic tox xjaw sti 'ixim, 'ixta to b'i'an tzwach' ecx 'och wal sc'a'l si'mb'il.

Os 10:13

Palta ax eb' cojn maysch'olnilal xlaj sb'o'. Tox 'ix schaj eb' spac yujto man̈ tojloc xyutj sb'a eb'. Wan schan eb' spac yuj ya'm 'esal. Yujto xcob' ya'ch eb' yipc sc'ojl jun tzo'n̈ scaruaje yic owal yet' pax eb' soldado eb' caw niwn sb'isul,

Os 11:12

A eb' 'aj Efraín, atn eb' israel tic, cojxn̈ej wal 'es tzlaj yac' eb' 'ayin, caw tzin yixtj paxti eb'. A eb' 'aj Judá, caw tenmtac eb' 'ayin, ticni Cojxn in Dios in, to tz'el'chn̈ej tas tzwala.